“ ’O a’u anai ki ʼafeā oi Sehova, ’e tonu ai anai ke au tagi ke ke haofaki au, kae mole ke logo mai koe? ’O a’u anai koa ki ʼafeā taku kole tokoni atu ʼuhi ko te agamalohi, kae mole ke haofaki au?” (Hapakuke 1:2, 3, MN) Ko te ʼu palalau ʼaeni ʼa Hapakuke. Neʼe ʼofa te ʼAtua ki te tagata agalelei ʼaia. Kae, neʼe faikole feia koa ia Hapakuke he neʼe vaivai tana tui? Kailoa ia. Neʼe ui age e te ʼAtua neʼe kua Ina ʼosi fakatuʼutuʼu pe te temi ʼae ka ina pulihi ai anai te ʼu mamahi.—Hapakuke 2:2, 3.

Ka mamahi hou kaiga peʼe ko koe totonu, ʼe ke lagi manatu ai ʼe tuai fau ia te ʼAtua pea ʼe ke fakaʼamu ke ina foimo fai la he meʼa. Kae, ʼe maʼu ʼi te Tohi-Tapu te ʼu palalau fakalotofimalie ʼaeni: “ ʼE mole tuai ia Sehova ʼo ʼuhiga mo tana fakapapau, ohage ko te manatu ʼa ʼihi, kaʼe ʼe kataki fualoa kia koutou he ʼe mole loto ia ke fakaʼauha he tahi, kaʼe ʼe loto ia ke kaku te hahaʼi fuli ki te fakahemala.”—2 Petelo 3:9.

Kua vave hoko mai pe te temi ʼae ka fakagata ai anai e te ʼAtua te ʼu mamahi. Neʼe fakakikite e Sesu ʼe ʼi ai anai he taʼiake ʼe sio ki te ʼu fakailoga ʼo te ʼu ʼaho fakamuli “ ʼo te tuʼu ʼo te ʼu faʼahiga meʼa ʼaeni.” (Mateo 24:3-42) ʼE hoko moʼoni te lea fakapolofeta ʼaia ʼa Sesu ʼi te temi nei. ʼE ko he fakamoʼoni ʼaia ʼe kua vave fakahoko pe e te ʼAtua ʼana fakapapau ʼo ʼuhiga mo te tagata. *

Kae ʼe pulihi feafeaʼi anai e te ʼAtua ia te ʼu mamahi? ʼI te kei nofo ʼa Sesu ʼi te kele, neʼe ina fakaha ai ʼe feala ki te ʼAtua ke ina fakafimalieʼi te tagata. Koʼeni ʼihi faʼifaʼitaki:

Te ʼu Tuʼutamaki Fakanatula: Neʼe lolotoga faifolau ia Sesu mo ʼana apositolo ʼi te Tai ʼo Kalilea, mo te to ifo ʼo te toe afā lahi, ʼo meihiʼi mou ai te vaka. ʼI te lakaga ʼaia, neʼe fakaha e Sesu ʼe feala pe hana puleʼi mo tana Tamai ia te natula. (Kolose 1:15, 16) Neʼe ui atu pe e Sesu: “Tuku! Fakalogologo!” Pea neʼe kotea la ʼae neʼe hoko? “Neʼe puli te matagi, ʼo hoko ai te malū lahi.”—Maleko 4:35-39.

Te Mahaki: Neʼe iloa ia Sesu ʼi tana fakamalolo ia faʼahiga mahaki kehekehe, ʼo kau ai te kivi, te ketu, te mahaki moa, te kilia mo ʼihi atu. “Neʼe ina fakamalolo ia natou fuli ʼae neʼe mahahaki.”—Mateo 4:23, 24; 8:16; 11:2-5.

Te Hoge Meʼa Kai: Neʼe maʼu e Sesu mai tana Tamai te malohi ʼae ke ina fakafonu ia te meʼa kai. Lolotoga tona minisitelio, neʼe tuʼa lua tana fafaga ia te toko lauʼi afe hahaʼi.—Mateo 14:14-21; 15:32-38.

Te Mate: ʼE feala ke pulihi e Sehova ia te mate. Pea ʼe fakamoʼoni ki ai te ʼu fakatuʼuake ʼe tolu ʼae neʼe fakahoko e Sesu. ʼE kau ki ai te fakatuʼuake ʼo he tahi neʼe kua ʼaho fa tana mate.—Maleko 5:35-42; Luka 7:11-16; Soane 11:3-44.