ʼE LAGI faigataʼa ʼaupito kia koe tau iloʼi ʼae ʼe kovi tou mahaki peʼe ko te mahaki ʼo hou kaumeʼa peʼe ko he tahi ʼo tou famili. ʼE tonu ke ke tokaga ki tou mahaki logo la ia tau kua lototuʼania mo lotovaivai gafua. Pea ʼe feala ke ʼaʼasili tau mataku ʼuhi ko te ʼu vakai mahaki mo te maʼu gataʼa peʼe ko te totogi kovi ʼo hou faitoʼo. ʼE mole lagi kei ke iloʼi pe ʼe tonu ke ke haga kifea ʼuhi ko ʼau tuʼania mo te kovi ʼo tou mahaki.

ʼE feala ke ke kumi tokoni kifea? Neʼe ʼaoga ki te tokolahi ia te faikole mo te lau ʼo ni vaega fakalotomalohi ʼi te Tohi-Tapu. Neʼe natou toe maʼu he  malohi ʼi te tokoni mo te ʼofa age ʼo ʼonatou famili mo kaumeʼa.

ʼE taʼu 58 ia Robert, koʼeni tana faitokoni: “Kapau ʼe ke tui ki te ʼAtua, ʼe tokoni atu anai ke ke katakiʼi tou mahaki. Faikole kia Sehova. Fakaha fuli ʼau manatu. Kole tona laumalie maʼoniʼoni mo tana tokoni ke ke lava ʼutaki tou mahaki pea ke tokagaʼi e tou famili ʼe ke lotomalohi.”

Neʼe ʼaoga ʼaupito te tokoni ʼo te famili kia Robert. ʼI te ʼaho fuli ʼe pauʼi age hona kaiga peʼe ko he foʼi tokolua mo fakalavelave age pe ʼe lelei pe. Neʼe ina toe maʼu ni fakalotomalohi mai mamaʼo mai ʼona kaumeʼa. Neʼe ina maʼu ai te malohi feʼauga ke faʼa kataki.

Kapau ʼe ke fia alu ʼo fakasiosio he tahi ʼe mahaki, ʼe ʼaoga atu anai te tala manatu ʼaeni ʼa Linda: “ ʼE mole fia palalau tuʼumaʼu pe anai he tahi ki tona mahaki. Koia ʼae ʼe lelei ke kolua faipalalau ohage pe ko te mahani.”

Koia, ʼe ke lotomalohi anai ʼuhi ko te tokoni ʼa te ʼAtua mo te Tohi-Tapu, ʼo toe feia mo te famili mo ʼou kaumeʼa. ʼE kei ʼi ai pe he ʼuhiga ʼo tou maʼuli tatau aipe pe ʼe kovi hou mahaki.