ʼE MOLE KOA LA KO HE KA HAʼU TAULEKALEKA? Neʼe fakapapauʼi mai e totatou Tupuʼaga ia te maʼuli heʼe gata, ʼi te kele. Kae, ki te tokolahi ʼe faigataʼa hanatou tui ki ai. ʼE natou ui fenei: ‘ ʼE tou mamate fuli pe anai, he ko te ʼuhiga ia ʼaia ʼo tatou.’ ʼE mole tui ʼihi ki he maʼuli heʼe gata ʼi te kele, kae ʼi selo, ʼi te hili ʼo te mate. Kotea la tau manatu?

ʼI muʼa ʼo te fai ʼo hau tali, vakaʼi muʼa ʼi te Tohi-Tapu he ʼu tali ki te ʼu fehuʼi ʼaeni ʼe tolu: ʼE ha feafeaʼi ʼi te faʼahiga fakatupu ʼo te tagata, neʼe tonu ke maʼuli fualoa? ʼI te kamata, neʼe kotea te fakatuʼutuʼu ʼa te ʼAtua ki te kele mo te tagata? He koʼe koa ʼe mate te tagata?

Ia meʼa fuli ʼae neʼe fakatupu e te ʼAtua ʼi te kele, ʼe makehe age te natula ʼo te tagata. ʼO feafeaʼi? ʼE fakaha ʼi te Tohi-Tapu neʼe fakatupu te tagata “o fakatatau ki te paaki o te Atua.” (Senesi 1:26, 27) Kotea tona fakaʼuhiga? ʼE maʼu e te tagata te ʼu kalitate ʼo te ʼAtua, ohage la ko te ʼofa mo te faitotonu.

Pea tahi, ʼe toe maʼu e te tagata te ʼatamai mo te fealagia fakakaukau ke ina iloʼi te meʼa ʼae ʼe kovi mo ʼae ʼe lelei. Pea ke ina iloʼi mo fakaovi ki te ʼAtua. Koia ʼae ʼe tou leleiʼia ai te taulekaleka ʼo te ʼatulaulau mo te natula, ʼo toe feia pe mo te musika mo ʼihi atu faiva. Kae ko te fealagia ʼae ʼe makehe age, ʼe ko te tauhi ki te Tupuʼaga. Ko te ʼu fealagia la ʼaia ʼae ʼe kehe ai te tagata mo te manu.

Koia, tou fakakaukauʼi te faʼahi ʼaeni: Neʼe foaki koa e te ʼAtua ki te tagata te ʼu kalitate fakaofoofo ʼaia mo he ʼu fealagia ke ina fakatuputupu ʼi he kiʼi temi nounou pe pea mate leva? Kailoa ia. Neʼe loto te ʼAtua ke maʼuli fiafia te tagata ʼi te kele ʼo heʼe gata mo ʼona kalitate pea mo ʼona fealagia makehe ʼaia.

ʼE ui e ʼihi, neʼe mole fakatuʼutuʼu e te ʼAtua ke maʼuli te tagata ʼo heʼe gata ʼi te kele. Pea takua ko te kele ʼe ko he nofoʼaga fakatemi pe. ʼE ʼahiʼahiʼi ai te hahaʼi ʼae ʼe tuha anai ke maʼuʼuli ʼi selo mo te ʼAtua, ʼo talu ai. Kae, kapau la koia ʼaia, ko tona fakaʼuhiga koa ʼe ko te ʼAtua te tupuʼaga ʼo te agakovi mo te mamahi ʼae ʼi te kele? Kailoa. Koteʼuhi ʼe fakafeagai ia ki te ʼuhiga moʼoni ʼo te ʼAtua. ʼE ui fenei ʼi te Tohi-Tapu: “E agatonu ona ala fuli, ko he Atua agatonu mo faitotonu, e fonu ia ia i te agatonu mo te maonioni.”—Tetelonome 32:4.

 ʼE fakaha lelei ʼi te Tohi-Tapu te fakatuʼutuʼu ʼa te ʼAtua ʼo ʼuhiga mo te kele ʼi te kamataʼaga, ia Pesalemo 115:16: “Ko te atu lagi ko te atu lagi a [Sehova, MN], kae nee ina foaki te kele ki te u foha o te tagata.” Koia, neʼe fakatupu e te ʼAtua te kele ke liliu ko he nofoʼaga matalelei ʼo te tagata. Pea neʼe ina fakafonu ʼaki te ʼu meʼa fuli ʼe ʼaoga ki te tagata, ke maʼuli fiafia ai ʼo heʼe gata.—Senesi 2:8, 9.

“Ko te atu lagi ko te atu lagi a [Sehova, MN], kae nee ina foaki te kele ki te u foha o te tagata.”​—Pesalemo 115:16

Pea ʼe fakamatala ʼi te Tohi-Tapu, neʼe fakatotonu e te ʼAtua ki te ʼuluaki taumatuʼa ke nā fakahahaʼi te kele pea mo nā puleʼi te ʼu manu fuli. (Senesi 1:28) Neʼe ko he toe pilivilesio lahi tanā tokakaga ki te Palatiso mo folahi ki te kele katoa! Koia, ko te ʼamanaki ʼae neʼe maʼu e Atama mo Eva mo tona hologa ko te maʼuli heʼe gata ʼi te kele. Kae neʼe mole ko he fakapale ki te maʼuli ʼi selo.

Kae he koʼe koa ʼe tou mamate? ʼE ui ʼi te Tohi-Tapu, neʼe faigaʼi e te ʼaselo agatuʼu, neʼe fakahigoaʼi ki muli age ko Satana te Tevolo, ke ina maumauʼi te ʼu fakatuʼutuʼu ʼa te ʼAtua ʼae ʼi Eteni. ʼO feafeaʼi?

Neʼe ina fakahalaʼi ʼatatou ʼuluaki matuʼā, ia Atama mo Eva, ke nā agatuʼu ki te ʼAtua. Neʼe ina ui age kia naua, neʼe mole fia tuku age e te ʼAtua te fealagia ʼae ke nā filifili te meʼa ʼae ʼe lelei mo ʼae ʼe kovi. Koia, neʼe nā lagolago ai kia Satana, ʼo nā agatuʼu ki te ʼAtua. Neʼe kotea tona ikuʼaga? Ki muli age, neʼe nā mamate, ohage pe ko tona fakatokaga age e te ʼAtua. Neʼe puli ai tanā ʼamanaki ki te maʼuli heʼe gata ʼi te Palatiso fakakelekele.—Senesi 2:17; 3:1-6; 5:5.

ʼUhi ko te agatuʼu ʼa Atama mo Eva, neʼe mafola ai te mate ki te malamanei katoa ʼo kaku mai ki totatou temi. ʼE ui fenei ʼi te Folafola ʼa te ʼAtua: “ ʼAki te tagata pe ʼe tahi [ia Atama] neʼe hu ai te agahala ki te malamanei, pea ʼaki te agahala ia te mate, ʼo mafola ai te mate ki te tagata fuli pe.” (Loma 5:12) Koia ʼe tou mamate fuli ʼuhi ko te agahala ʼa ʼatatou ʼuluaki matuʼā, kae neʼe mole ko he ‘fakatuʼutuʼu’ neʼe fai fakatomuʼa e te ʼAtua.

Logo la te agatuʼu ʼae neʼe hoko ʼi Eteni kae ʼe kei tuʼu maʼu pe te fakatuʼutuʼu ʼa te ʼAtua ʼo ʼuhiga mo te tagata pea mo te kele. Neʼe fakaʼateainaʼi tatou e te ʼAtua mai te agahala pea mo te mate ʼuhi ko te lahi ʼo tona ʼofa mo tana faitotonu. Koia, ʼe ui fenei e te apositolo ko Paulo: “Ko te totogi ʼo te agahala ʼe ko te mate, kaʼe ko te meʼa ʼofa ʼae ʼe foaki e te ʼAtua ʼe ko te maʼuli heʼe gata ʼaki ia Kilisito Sesu totatou ʼAliki.” (Loma 6:23) Neʼe ʼofa lahi te ʼAtua “ ʼo ina foaki ai tona ʼAlo ʼulu tokotahi [Sesu Kilisito], pea ko ʼae ʼe tui kia te ia ʼe mole mate anai kaʼe ʼe ina maʼu anai te maʼuli heʼe gata.” (Soane 3:16) Koia, neʼe lotolelei ia Sesu ke ina foaki tona maʼuli ko he sakilifisio faitotogi. Pea kua feala ai ke tou toe maʼu ia meʼa fuli ʼae neʼe pulihi e Atama. a

Kua vave hoko moʼoni pe te fakapapau ʼa te ʼAtua, ʼe liliu anai te kele ko he palatiso. ʼE feala ke ke maʼuli ai mo kapau ʼe ke fakalogo ki te fakatotonu ʼaeni ʼa Sesu: “Kotou hu ʼi te matapa faveliveli, koteʼuhi ʼe falahi ia te matapa pea mo laulahi ia te ala ʼae ʼe ina taki ki te fakaʼauha, pea ʼe kaugā malie ia natou ʼae ʼe hu ai. Kaʼe ʼe faveliveli ia te matapa pea mo lauveliveli ia te ala ʼae ʼe ina taki ki te maʼuli, pea ʼe tokosiʼi ia natou ʼae ʼe natou maʼu.” (Mateo 7:13, 14) Koia, ʼe fakalogo tou ka haʼu ki te ʼu tonu ʼae ka ke fai. Kotea anai te tonu ʼae ka ke toʼo?