Ka tau hotatou kaumeʼa mo he mahaki ʼulu, ʼe lagi mole tou iloʼi he meʼa ke tou fai. Kae ʼe feala ke tou fakaha ki ai ʼe tou ʼoʼofa ai, ʼo tou tokoni ki ai ke ina lava katakiʼi tona mahaki. ʼO feafeaʼi?

Tou fagono ʼaki he lotolelei.​—SAKOPO 1:19.

Kapau ʼe tou fia tokoni ki totatou kaumeʼa, ʼe lelei ke tou fagono ki ai moka ʼe fia palalau. ʼAua naʼa tou manatu ʼe maʼua ke tou tali ki te ʼu palalau fuli ʼae ʼe ina fai mai. Kotou tokagaʼi ʼana palalau pea mo faiga ke kotou lotomahino. Kotou fakalogo lelei ki ʼana palalau pea ʼaua naʼa kotou manatu ʼe faihala pea mo tokoniʼi atu aipe ia ia. Ke mahino kia koutou ʼe feala pe ke ina fai he ʼu palalau neʼe mole ina fakakaukauʼi pea mo fakahemala leva ki ʼamuli.​—Sopo 6:2, 3.

“Kotou fai he ʼu palalau fakalotofimalie.”​—1 TESALONIKA 5:14.

Lagi ʼe hoha ʼaupito tokotou kaumeʼa peʼe manatu ia ʼe mole hona ʼaoga. Tatau aipe pe ʼe kotou iloʼi pe kotea he ʼu palalau ʼe feala ke kotou fai age ki ai, kae kapau ʼe kotou ui age ki ai ʼe kotou ʼoʼofa ia ia, ʼe feala ke ina maʼu ia he fakalotofimalie pea mo he fakalotomalohi.

“ ʼE fakaha e he kaumeʼa moʼoni tona ʼofa ʼi te temi fuli pe.”​—TAʼAGA LEA 17:17.

Kotou tokoni ki tokotou kaumeʼa. ʼAua naʼa kotou manatu ʼe kotou iloʼi pe kotea te tokoni  ʼe ʼaoga ki ai, kotou fakalavelave fakahagatonu ki ai. Kapau ʼe mole ina iloʼi pe kotea ʼae ʼe ʼaoga moʼoni ki ai, kotou fai he fakatuʼutuʼu mo ia, ohage ke kotou olo ʼo haʼele. ʼE feala ke kotou ui age ki ai ke kotou olo faifakatau, peʼe ke kotou tokoni ki te fai ʼo tana menasi, mo te tahi atu ʼu gaue.​—Kalate 6:2.

Kotou faʼa kataki.​—1 TESALONIKA 5:14.

ʼE lagi mole fia palalau atu tokotou kaumeʼa. Kapau koia pea kotou ui age ki ai, ko te temi ʼae ʼe fia palalau ai, ʼe kotou fiafia anai ʼi te fagono ki ai. ʼE feala pe ke ina fai atu he ʼu palalau ʼe fakatupu lotomamahi, ʼuhi pe ko tona mahaki. Peʼe feala ke ina holoʼi he fakatuʼutuʼu neʼe kotou fai mo ia, peʼe ita. Ka kotou tokoni kia ia, kotou faʼa kataki pea mo lotomahino.​—Taʼaga lea 18:24.

“ ʼE au faiga ke au liliu ko hona kaumeʼa ʼe feala ke falala ki ai. Logo la ʼe mole au maʼu he puleʼaki ki ʼona fihifihia, kae ʼe au faiga tuʼumaʼu ke au fagono lelei ki ʼana palalau. Ko te meʼa pe ʼae ʼe feala ke fimalie ai tona loto, ko he tahi ʼe fagono lelei ki ai moka fia palalau.”​—Farrah,  ako tona kaumeʼa ʼe tau mo te mahaki ko te lotomamahi mo te lotohoha.

“ ʼE ʼi ai toku kaumeʼa ʼe agalelei pea mo fiafia tuʼumaʼu pe ia. Neʼe ina fakaafe au ke matou kai meʼa kai. Neʼe au fiafia pea neʼe mole au logoʼi toku hoha, koia neʼe faigafua ai taku palalau ki te ʼu meʼa ʼae ʼe au logoʼi. Neʼe fimalie ʼosi toku loto pea mo au fiafia.”—Ha-eun, ʼe tau mo te mahaki ko te lotomamahi.

“ ʼE maʼuhiga ʼosi te faʼa kataki. Ka fai e toku ʼohoana he meʼa ʼe au ita ai, ʼe au manatuʼi ʼe ko tona mahaki ʼae ʼe feia ai kae mole ko ia. Koia ʼe mole au ita ai ki ai kae ʼe au toe ʼofa mamahi age kia ia.”​—Sakopo, ko tona ʼohoana ʼe tau mo te mahaki ko te lotomamahi.

“ ʼE tokoni lelei ʼosi mai toku ʼohoana pea mo fakafimalieʼi toku loto. Ka lahi fau toku lotohoha, ʼe mole ina fakamalohiʼi au ke au fai he meʼa ʼe mole au loto ki ai. ʼI ʼihi temi, ʼe holoʼi ai he fakatuʼutuʼu neʼe holi moʼoni ki ai. ʼE ko he tahi ʼe lotofoaki mo manavaʼofa ʼaupito.”—Enrico, ʼe tau mo te mahaki ko te lotohoha.