Kapau ʼe ke faigataʼaʼia, ʼe ke loto anai ke tokoni atu hou kaumeʼa. Kae ʼe manatu e ʼihi ʼe mole kaumeʼa natou mo te ʼAtua he ʼe mole tokoni age ia kia natou. Kae ʼi tona fakahagatonu, neʼe kua ʼosi fai e Sehova te ʼu fakatuʼutuʼu ʼe ʼaoga mai kia tatou pea ʼe ina puleʼakiʼi anai te ʼu faigataʼaʼia mo te ʼu mamahi fuli ʼe tou felaveʼi mo ia, ia ʼaho nei. Kotea anai ʼae ka ina fai?

ʼE haga anai te ʼAtua ʼo pulihi te matapuna ʼo te agakovi. ʼE tohi fenei ʼi te Tohi-Tapu: “ ʼE nofo te malamanei katoa ʼi te malohi ʼo Satana.” (1 Soane 5:19) Neʼe toe fakahigoaʼi e Sesu ia Satana te Tevolo ko “te pule ʼo te malama ʼaeni.” (Soane 12:31) Koia, ko te pule ʼaia ʼa Satana ʼae ʼe tupu ai te ʼu mamahi ʼi te kele. Kotea anai te puleʼaki ʼa te ʼAtua?

ʼE fakaʼaogaʼi anai e Sehova ʼAtua ia tona ʼAlo ko Sesu Kilisito “ke ina pulihi ia ia ʼae ʼe feala ke ina fakatupu te mate, ia te Tevolo.” (Hepeleo 2:14; 1 Soane 3:8) Koia, ʼe iloʼi lelei e te Tevolo “kua nounou tona temi” pea ʼe kua vave fakaʼauha pe. (Fakaha 12:12) Pea ʼe toe pulihi pe anai e te ʼAtua ia te agakovi mo natou ʼae ʼe natou fakahoko te ʼu aga ʼaia.​—Pesalemo 37:9; Taaga Lea 2:22.

Ka ʼosi pulihi anai e te ʼAtua ia te agakovi ʼi te fuga kele, ʼe hoko anai tana fakapapau ʼae ke maʼuli heʼe gata te tagata haohaoa ʼi te kele. Kotea ʼae ʼe tou ʼamanaki ki ai?

He maʼuli tokalelei mo fimalie. “ ’E ma’u anai e te kau agavaivai te kele, pea ’e natou fiafia moʼoni anai ’i te mahu ’o te tokalelei.”​—Pesalemo 37:11, MN.

Te mahu mo te kano lelei ʼo te meʼa kai. “ ʼE mahu anai te pulapula ʼi te kele; ʼe tapuke anai ʼi te tumutumu ʼo te ʼu moʼuga.”​—Pesalemo 72:16, MN.

He nofoʼaga mo he gaue ʼe lelei. “E natou fakatuu anai ni fale, pea e natou nonofo anai i ai; e natou to anai ni gaueaga vite, pea e natou kai anai onatou fua. . . . E fiafia anai aku kau filifiliia i te gaueaga o onatou nima.”​—Esaia 65:21, 22.

ʼE ke fakaʼamu koa ki he maʼuli feia? ʼEi, kua tou vave maʼu pe hotatou maʼuli feia ʼi te ʼaho fuli.

Ia ʼaho nei, ʼe mole feala ke hao he tahi mai te mahaki mo te mate. Kae kua vave pulihi pe te ʼu mamahi fuli ʼaia. ʼE tou maʼu anai te ʼu fua lelei ʼo te sakilifisio faitotogi ʼa Sesu Kilisito, koia “ko ʼae ʼe tui kia te ia ʼe mole mate anai kaʼe ʼe ina maʼu anai te maʼuli heʼe gata.” (Soane 3:16) Kotea anai te ʼu lelei ʼe tou maʼu?

ʼE mole toe ʼi ai anai he mahaki. “ ʼE mole he tahi ʼe ina ui anai: ‘ ʼE au mahaki.’ Ko te hahaʼi ʼae ʼe nonofo ʼi te kele, ko natou ʼaia ʼae ka fakamolemole anai ʼanatou agahala.”​—Esaia 33:24, MN.

ʼE mole toe mate anai te tagata. “ ʼE ina fakaʼauha moʼoni anai te mate ʼo talu ai, pea ʼe holoholoʼi anai e te Tuʼi ʼAliki ko Sehova te ʼu loʼimata ʼi te ʼu fofoga fuli pe.”​—Esaia 25:8, MN.

ʼE maʼuli anai te tagata ʼo heʼe gata. “Ko te meʼa ʼofa ʼae ʼe foaki e te ʼAtua ʼe ko te maʼuli heʼe gata ʼaki ia Kilisito Sesu totatou ʼAliki.”​—Loma 6:23.

ʼE toe fakatuʼuake anai te kau mate. “ ʼE ʼi ai anai he fakatuʼuake ʼo te kau faitotonu pea mo te kau heʼe faitotonu.” (Gaue 24:15) ʼE toe maʼu vaega anai mo te kau mate ki te ʼu lelei ʼo te meʼa ʼofa ʼa te ʼAtua ʼae ko te totogi.

ʼE fakahoko feafeaʼi anai e te ʼAtua te ʼu aluʼaga fuli ʼaia?

ʼE fakatuʼu anai e te ʼAtua te puleʼaga ʼi selo mo ina fakanofo ia Sesu Kilisito ke Pule ai. (Pesalemo 110:1, 2) Neʼe ko te puleʼaga ʼaia ʼae neʼe talanoa ki ai ia Sesu ʼi tana ui fenei: “Ko tamatou Tamai ʼae ʼe ʼi selo, ke . . . hoko mai tou Puleʼaga.”​—Mateo 6:9, 10.

ʼE pule anai te Puleʼaga ʼa te ʼAtua ʼi te kele katoa mo ina pulihi te ʼu mamahi fuli. Ko te Puleʼaga ʼaia ʼe ʼaoga kia tatou fuli. Koia ʼae neʼe fakaʼaogaʼi ai e Sesu tona temi ʼi tona minisitelio ke ina “fakamafola te logo lelei ʼo te Puleʼaga.” Pea neʼe ina ʼekenaki ʼana tisipulo ke natou faʼifaʼitakiʼi ia ia.​—Mateo 4:23; 24:14.

Neʼe fai e Sehova ʼAtua te ʼu fakapapau taulekaleka ʼaia koteʼuhi ʼe lahi tona ʼofa ki te tagata. ʼE mole tupu ai koa la hau fia iloʼi mo hau fia fakaovi kia te ia? Kotea anai ʼona fua lelei kia koe? ʼE tali ʼi te alatike ʼae ka hoa mai ki te ʼu fehuʼi ʼaia.