Neʼe au tupu ʼi Mulhouse, ʼi te potu noleto esite ʼo Falani, ʼi he kolo masiva ʼe iloa ʼuhi ko te agamalohi. ʼE au manatuʼi ʼi taku kei veliveli neʼe lahi te ʼu ke ʼi te ʼu famili ʼae neʼe maʼuʼuli ai. ʼI toku famili, ko te hahaʼi tagata neʼe natou meʼa noaʼi te hahaʼi fafine pea ʼe tahitahiga tanatou kumi te manatu ʼo ʼonatou ʼohoana. Neʼe ko te tuʼulaga ʼa te fafine ko te fale kuka pea neʼe tonu ke tokaga ki tona ʼohoana mo te fanau.

Neʼe faigataʼa toku maʼuli ʼi taku kei veliveli. ʼI toku taʼu hogofulu, neʼe mate taku tamai ʼuhi ko te kava. Hili ki ai tau ʼe nima, neʼe fakamate te tahi ʼo ʼoku taʼokete. ʼI te taʼu pe ʼaia, neʼe au sio ki he fakapo lolotoga he fihi ʼo toku famili. Pea neʼe puli noa taku fakakaukau ʼi te lahi fau ʼo toku mamahi. Neʼe ʼi ʼai ʼihi ʼo toku famili neʼe natou ako mai pe ʼe feafeaʼi haku fakaʼaogaʼi he hele mo te ʼu mahafu pea mo te fuhu moka hoko he aluʼaga. Neʼe mole au iloʼi pe ʼe kotea ʼae ʼe tonu ke au fai. Neʼe au kamata inu kava pea mo fai ni ta ki toku sino.

ʼI toku taʼu 16, neʼe au inu foʼi piele ʼe 10 peʼe 15 ʼi te ʼaho. Pea neʼe au kamata fakaʼaoga te toloke. Ke feala haku totogi taku toloke mo ʼaku foʼi kava, neʼe au taka kaihaʼa pea mo fakatau te ʼu piesi ʼe mole kei fakaʼaogaʼi, ohage la ko he ʼu piesi motoka pea mo ʼihi atu meʼa. ʼI toku taʼu 17, neʼe kua tuʼa lahi toku pilisoniʼi. Pea fakatahiʼi age kua tuʼa 18 toku pilisoniʼi ʼuhi ko te ʼu kaihaʼa mo te ʼu agamalohi.

ʼI toku taʼu 20 tupu, neʼe ʼasili kovi age toku maʼuli. Neʼe au fakaʼaogaʼi te toloke ʼae ko te marijuana tuʼa 20 ʼi te ʼaho. Neʼe au toe fakaʼaogaʼi mo te toloke ʼae ko te héroïne pea mo ʼihi toloke ʼe tapuʼi. Neʼe tuʼa lahi taku meihiʼi mate. Neʼe au feʼaluʼaki tuʼumaʼu mo ʼaku mahafu he neʼe au kamata fakatau te toloke. ʼI te tahi ʼaho, neʼe au fanahi te tagata kaʼe meʼa lelei foki neʼe tau te foʼi pulu ʼi te foʼi mama ʼo tona kiliʼi pipi. ʼI toku taʼu 24, neʼe mate taku faʼe. Neʼe toe ʼaʼasili kovi age taku agamalohi. Ka sisio mai te hahaʼi kia au ʼe natou feholaki. ʼE au tau nofo ʼi te ʼu fakaʼosi vahaʼa ʼi te lopitali ke tui ʼoku lavea peʼe ko te fale polisi koteʼuhi ʼe au tau fuhu.

ʼI toku taʼu 28 neʼe au ʼohoana. Neʼe mole au gaohi leleiʼi toku ʼohoana. Neʼe au lea koviʼi pea au ta. Neʼe mole he meʼa neʼe ma fai fakatahi ʼi toma ʼuhiga taumatuʼa. ʼI taku manatu, neʼe feʼauga pe mo taku foaki age te ʼu meʼa gigila ʼae neʼe au kaihaʼa. Pea neʼe ʼi ai leva he meʼa neʼe hoko fakafokifa. Neʼe kamata ako leva e toku ʼohoana te Tohi-Tapu mo te kau Fakamoʼoni ʼa Sehova. Hili pe te ʼaho ʼae neʼe ina ako ai te Tohi-Tapu, neʼe ina tuku leva tana suluka, neʼe mole ina tali ke au foaki age he foʼi falā  neʼe au kaihaʼa pea neʼe ina toe liufaki mai ʼana meʼa gigila fuli. Neʼe kovi ʼosi toku ita. Neʼe mole au loto ke hoko atu tana ako te Tohi-Tapu. Neʼe au pupuhi ki ʼona fofoga te kohuʼi sikaleti pea neʼe au fakagalivaleʼi ia ia ʼi muʼa ʼo te hahaʼi.

ʼI te tahi po, neʼe au tutu tomatou ʼapi he neʼe au konahia. Ko toku ʼohoana ʼae neʼe ina haofaki au mo tamā kiʼi taʼahine ʼae neʼe taʼu nima. ʼI taku mole kei konahia, neʼe au tukugakoviʼi pe ia au. Neʼe au logoʼi ʼe mole feala anai ke fakamolemole mai te ʼAtua kia au. Neʼe au manatuʼi te ʼu palalau ʼae neʼe ui e te patele ko te hahaʼi agakovi ʼe olo anai ki ʼifeli. Maʼia mo te toketa ʼo te mahaki ʼulu ʼae neʼe tokaga kia au, neʼe ina ui fenei mai: “ ʼE mole kei ʼi ai he meʼa ʼe feala ke fai kia koe. ʼE mole fetogi anai tou maʼuli.”

Hili te vela ʼaia, neʼe matou olo leva ʼo maʼuʼuli ʼi te ʼapi ʼo te ʼu matuʼā ʼo toku ʼohoana. ʼI te ʼomai ʼa te kau Fakamoʼoni ʼa Sehova ʼo ʼaʼahi toku ʼohoana, neʼe au fai age te fehuʼi ʼaeni: “ ʼE feala koa ke fakamolemole mai e te ʼAtua ʼaku agahala fuli?” Neʼe nā lau mai ia ʼi te Tohi-Tapu ia 1 Kolinito 6:9-11. ʼI te vaega ʼaia, ʼe maʼu ai te ʼu aga ʼae ʼe tauteaʼi e te ʼAtua, kaʼe ʼe toe ui fenei ai: “Nee feia ni ihi ia koutou i mua.” Ko te ʼu palalau ʼaia neʼe ina fakafimalieʼi au he ʼe neʼe feala ke au fetogi. Pea neʼe fakaha mai e te ʼu Fakamoʼoni ʼa Sehova ko te ʼAtua neʼe ʼofa ia au, ʼaki tanā lau mai ia 1 Soane 4:8. Neʼe au lotomalohi, koia ʼae neʼe au kole age ai ke nā fai haku ako Tohi-Tapu tuʼa lua ʼi te vahaʼa pea neʼe au kamata kau ki te ʼu fono. Neʼe au faikole tuʼumaʼu kia Sehova.

Heʼeki katoa ki ai he mahina, neʼe au toʼo leva te tonu ʼae ke au fakagata te fakaʼaoga ʼo te toloke mo te inu kava. Neʼe au mahaki, mo fai he ʼu moemisi fakamataku, mo mamahi ʼulu pea migi te ʼu koga fuli ʼo toku sino pea mo ʼihi atu mahaki. Kaʼe, neʼe puke au e Sehova ʼaki tona nima pea neʼe ina fakalotomalohiʼi au. Neʼe au hage ko te apositolo ko Paulo,ʼae neʼe ina ui fenei: “E au fealagia te u mea fuli i ae e ina fakamalohii au.” (Filipe 4:13) Ki muli age, neʼe au lava taʼofi taku suluka.—2 Kolinito 7:1.

ʼO hilifaki ki tana tokoni mai ki toku maʼuli, neʼe toe tokoni mai te Tohi-Tapu ke au fetogi toku maʼuli fakafamili ke lelei age. Neʼe fetogi taku faʼahiga manatu ʼo ʼuhiga mo toku ʼohoana. Neʼe au kamata fakaha he fakaʼapaʼapa lahi ki ai pea mo fai age te ʼu palalau ʼaeni: “Fakalelei age siʼou loto” pea “malō.” Neʼe au toe liliu ko te tamai ʼae neʼe loto ki ai toku kiʼi ʼofafine. Hili taku ako te Tohi-Tapu lolotoga he taʼu katoa, neʼe au foaki toku maʼuli kia Sehova pea mo papitema, ʼuhi pe ko te faʼifaʼitaki lelei neʼe tuku mai e toku ʼohoana.

Ko te ʼu pelesepeto ʼo te Tohi-Tapu ʼae neʼe haofaki ai toku maʼuli. Maʼia mo toku famili ʼae ʼe mole ko he kau Fakamoʼoni ʼa Sehova, neʼe natou tokagaʼi kapau neʼe mole au fetogi, ʼe lagi kua au mate peʼe matehi au.

Ia ʼaho nei, kua fetogi toku maʼuli fakafamili. ʼE fakaha lelei mai ʼi te Tohi-Tapu ʼoku maʼua ʼi toku ʼuhiga tagata ʼohoana pea mo tamai. (Efeso 5:25; 6:4) ʼE matou fai he ʼu gaue fakatahi, ohage he famili moʼoni. Pea ʼi te temi nei, mole au fakamaʼua ke tuʼu toku ʼohoana ʼi te fale kuka kaʼe ʼe au fiafia ʼi te lagolago ki ai ʼi ʼana gaue ʼi te selevisi temi katoa. Pea ʼe toe fiafia mo toku ʼohoana ʼi te lagolago mai kia au ʼi toku ʼuhiga tagata ʼafeā ʼi te kokelekasio.

Neʼe malave ki toku maʼuli ia te ʼofa mo te manavaʼofa ʼo Sehova. ʼE au fia palalau ki ʼona kalitate kia natou ʼae ʼe mole ʼi ʼai honatou ʼamanaki. Tokolahi neʼe natou maʼu te faʼahiga manatu ʼaia ʼo ʼuhiga mo au. ʼE au iloʼi ko te Tohi-Tapu ʼe ina maʼu te malohi moʼo tokoni ki he tahi pe ke ina maʼu he maʼuli maʼa pea mo fiafia. Neʼe au ako ʼi te Tohi-Tapu te ʼofa mo te fakaʼapaʼapa ki te hahaʼi, tatau aipe pe ʼe ko te hahaʼi tagata peʼe ko te hahaʼi fafine. Pea neʼe toe tokoni mai foki ke au fakaʼapaʼapa kia au totonu.