KO TE TOHI-TAPU ʼE MOLE KO HE TOHI FAKASIENESIA. KAE ʼE TOTONU TE ʼU MANATU ʼAE ʼE TUʼU AI ʼO ʼUHIGA MO TE SIENESIA. TOU VAKAʼI HE ʼU FAʼIFAʼITAKI.

Neʼe ʼi ai koa he kamataʼaga ʼo te ʼatulaulau?

Neʼe tui malohi te kau poto fakasienesia neʼe mole ʼi ai he kamataʼaga ʼo te ʼatulaulau. Kae, ʼi te temi leva ʼaeni, kua fetogi tanatou manatu. ʼI te Tohi-Tapu, ʼe tuʼu ai pe te manatu ʼae neʼe ʼi ai te kamataʼaga ʼo te ʼatulaulau.—Senesi 1:1.

ʼE feafeaʼi te agaaga ʼo te kele?

Tokolahi, ʼi te temi muʼa, neʼe natou manatu ʼe lafalafa te kele. ʼI te nima sekulo I.M.T.S., * neʼe tala e te kau poto Keleka ʼe takafuafua te kele. Kae ʼi te Tohi-Tapu, neʼe kua fualoa atu te tohi ai e Esaia “te takafuafua o te kele.” Neʼe ina tohi ʼi te valu sekulo I.M.T.S.—Esaia 40:22, MN, nota.

ʼE feala koa, ʼaki te temi, ke maumau te lagi?

Kia Aristote, neʼe mole feala ia ke maumauʼi peʼe fetogi te lagi kae ʼe feala ia ke maumauʼi te kele. Lolotoga ni sekulo, tokolahi neʼe natou tali te manatu ʼaia. Kae, ʼi te 19 sekulo, neʼe talanoa leva te kau poto ki te entropie ʼae ko meʼa fuli ʼi te kele mo te lagi ʼe feala anai ke maumau. Ko Lord Kelvin, ko he tagata poto, neʼe tokoni ki te fakamafola ʼo te manatu ʼaia. Neʼe ina tokagaʼi te manatu ʼae ʼi te Tohi-Tapu ʼo ʼuhiga mo te lagi mo te kele: “E natou popo fuli anai o hage ko he kofu.” (Pesalemo 102:26, 27) Ohage ko tona akoʼi ʼi te Tohi-Tapu, neʼe tui ia Kelvin ʼe feala ki te ʼAtua ke ina taʼofi te maumauʼi ʼo Tana fakatupu.—Ekelesiasi 1:4.

ʼE tuʼu feafeaʼi te ʼu palanete, ohage la ko te kele?

Ko Aristote, neʼe ko te tagata poto fakasienesia Keleka ʼi te fa sekulo I.M.T.S. Kia ia, neʼe ʼi ai te ʼu foʼi takafuafua k ilisitale ʼe natou ʼaofi te tahi ʼu foʼi takafuafua ʼo natou fehohokoʼaki ai. Pea ʼuhi ko te ʼu foʼi takafuafua kilisitale, neʼe ha ai ki tuʼa te tuʼu ʼa te kele ʼi lotomalie. Kae, ʼi te 18 sekulo H.T.S., * neʼe hoki tali ai leva e te kau poto fakasienesia te manatu ʼae ʼe tuʼu te ʼu fetuʼu mo te ʼu palanete ʼi te noa. ʼE tou lau fenei ʼi te tohi ʼo Sopo, ʼae neʼe tohi ʼi te 15 sekulo I.M.T.S. ko te Tupuʼaga neʼe “ina tautau te kele i oluga o te aele noa.”—Sopo 26:7.

KO TE TOHI-TAPU ʼE MOLE KO HE TOHI FAKATOKETA. KAE ʼE MAʼU AI HE ʼU PELESEPETO ʼO UHIGA MO TE MAʼULI MALOLO.

 Te fakamamaʼo kehe mai te hahaʼi mahahaki.

Neʼe fakatuʼutuʼu ʼi te Lao ʼa Moisese ke fakamamaʼo te hahaʼi mai ia natou ʼae ʼe kilia. ʼI te hoko ʼo te ʼu taʼi mahaki lalahi ʼi te Moyen-Âge, neʼe hoki mahino ai leva te ʼu toketa ki te maʼuhiga ʼae ʼo te muliʼi ʼo te lekula ʼaia. Pea ʼe kei ʼaoga pe te pelesepeto ʼaia ʼi totatou temi.—Levitiko, kapite 13 mo te 14.

Te fakamaʼa hili he fāfā ki he sino mate.

ʼO kaku mai ki te fakaʼosi ʼo te 19 sekulo, ko te kau toketa, ʼi tanatou gaue ʼe tau fāfā ki te ʼu sino mate. ʼOsi ʼaia, neʼe natou fai te ʼu vakaʼi mahaki ʼo te hahaʼi kae neʼe mole natou fufulu ʼonatou nima. ʼO lahi ai te ʼu mateā. Kae neʼe ui ʼi te Lao ʼa Moisese ko he tahi neʼe fāfā ki he sino mate neʼe ko he tahi ʼe heʼe maʼa. Pea neʼe tonu ke fakamaʼa ʼaki te vai. Ko te ʼu fakatuʼutuʼu ʼaia neʼe ʼi ai ʼona fua lelei ki te maʼuli malolo.—Numelo 19:11, 19.

Te fakamaʼa.

ʼI te taʼu fuli, neʼe tokolahi te ʼu tamaliki neʼe mamate ʼi te liligi ʼuhi ko te ʼu faifekau ʼa te tagata ʼae neʼe mole tanu fakalelei. ʼO mulimuli ki te Lao ʼa Moisese, neʼe tonu ke tanu te ʼu faifekau ʼa te tagata ke mamaʼo mai te ʼu nofoʼaga.—Tetelonome 23:13.

Te temi ʼae ʼe tonu ke silikosisioʼi ai.

Ko te fakatuʼutuʼu ʼo te Lao ʼa te ʼAtua ke silikosisioʼi he toe tagata ʼi te ʼaho valu ʼo tana tupu. (Levitiko 12:3) Ka hili he vahaʼa katoa ki tana tupu, kua feala ke totoka te toto ʼo te ʼu kiʼi toe ʼae kei meamea. ʼI te ʼu temi ki muʼa, ʼae neʼe heʼeki maʼu ai he ʼu faitoʼo, neʼe ko he puipui te atali ke ʼosi he vahaʼa katoa pea hoki silikosisioʼi he kiʼi toe.

Te pikipikiga ʼo te ʼu meʼa ʼae ʼe tou logoʼi mo te fakakaukau.

Neʼe ui e te kau poto mo te kau sivi fakatoketa ʼe malave te ʼu meʼa ʼae ʼe tou logoʼi ohage la ko te fiafia, te lotofakafetaʼi mo te lotofakamolemole ki te sino mo te loto. ʼE ui fenei ʼi te Tohi-Tapu: “Ko te loto ae e fiafia ko he faitoo lelei, kae ko te loto mamahi e ina fakatupu te magemage o te u hui.”—Taaga Lea 17:22.