1. He koʼe ʼe fua lelei kia tatou moka tou fakamanatu te ʼAho Mate ʼo Sesu ʼi te taʼu fuli?

 ʼE MAHINO ia, ko te totogi ʼe ko he meʼa ʼofa maʼuhiga ʼaupito neʼe foaki mai e Sehova. (2 Ko. 9:15) Neʼe sakilifisioʼi e Sesu ia tona maʼuli ke ke maʼu he ʼu felogoi lelei mo Sehova ʼAtua, pea mo maʼu ia te maʼuli heʼe gata. Koia, ʼe lahi te ʼu tupuʼaga ke tou fakaha ai tatatou lotofakafetaʼi lahi ki totatou ʼAtua ki te meʼa ʼofa ʼaia neʼe ina foaki mai. Neʼe ina fakaha mai ai ia tona ʼofa ʼae kia tatou. (Loma 5:8) Koia, neʼe kole mai e Sesu ke tou Fakamanatu ia tona mate ʼi te taʼu fuli ke tou lotofakafetaʼi tuʼumaʼu ki te totogi ʼaia, pea ke mole tou meʼa noaʼi.​—Luka 22:19, 20.

2. Kotea ka tou vakaʼi ʼi te alatike ʼaeni?

² ʼI te taʼu ʼaeni, ʼe to ia te ʼAho Fakamanatu ʼi te Moeaki ʼaho 12 ʼo Apelili 2025. ʼE mahino ia, ʼe tou tahi fakatuʼutuʼu anai ke tou kau ki ai. ʼE lelei ke tou toʼo he temi ke tou metitasio a ki te ʼu meʼa ʼae neʼe fai e Sehova pea mo tona ʼAlo maʼa tatou ʼi te ʼu vahaʼa ʼi muʼa pea mo te ʼosi ʼo te ʼAho Fakamanatu. Kotea tona tupuʼaga? Koteʼuhi ʼe lahi anai te ʼu fua lelei ʼe tou maʼu mai ai. ʼI te alatike ʼaeni, ʼe tou vakaʼi anai pe kotea ʼe tou ako ʼo ʼuhiga mo Sehova pea mo Sesu ʼaki te totogi. Pea ʼi te alatike ʼae ka hoa mai, ʼe tou vakaʼi ai anai pe kotea te ʼu lelei ʼe tou maʼu ʼaki te totogi, pea ʼe feafeaʼi hatatou lotofakafetaʼi ki te meʼa ʼofa taulekaleka ʼaia.

 KOTEA ʼE TOU AKO ʼO ʼUHIGA MO SEHOVA ʼAKI TE TOTOGI?

3. He koʼe ʼe feala ke fakaʼateainaʼi te tagata mai te agahala mo te mate ʼuhi pe ko te mate ʼa he tagata ʼe tahi? (Vakaʼi mo te pāki.)

³ ʼAki te totogi, ʼe lahi ai te ʼu ako ʼe tou maʼu ʼo ʼuhiga mo te faitotonu ʼa Sehova. (Tet. 32:4) Ke ke fakakaukauʼi age muʼa te aluʼaga ʼaeni: ʼE tou agahala mo mamate, ʼuhi ko Atama ʼae neʼe talagataʼa ki te ʼAtua. (Loma 5:12) Koia, neʼe fakatuʼutuʼu e Sehova ke foaki e Sesu te totogi moʼo fakaʼateainaʼi tatou mai te agahala pea mo te mate. Kae, ʼe lava totogi feafeaʼi e he tagata haohaoa pe ʼe tahi ia he toko lauʼi miliona hahaʼi? Neʼe tali fenei e te apositolo ko Paulo: “Koteʼuhi ʼaki te talagataʼa ʼa te tagata pe ʼe tahi [ia Atama] kua agahala ai te hahaʼi tokolahi, ʼo toe feia aipe, ʼaki te fakalogo ʼa te tagata pe ʼe tahi [ia Sesu] ʼe faitotonu anai te hahaʼi tokolahi.” (Loma 5:19; 1 Tim. 2:6) Ohage ko tona fakamahino e Paulo, ʼe tou popula ki te agahala mo te mate, ʼuhi ko te tagata haohaoa pe ʼe tahi kae neʼe talagataʼa ki te ʼAtua. Koia, ʼe feala ke fakaʼateaina tatou mai ai, ʼaki he tagata haohaoa pe ʼe tahi kae neʼe fakalogo ki te ʼAtua.

4. He koʼe neʼe mole fakatuʼutuʼu pe e Sehova ke ina foaki te maʼuli heʼe gata ki te hologa ʼo Atama, ʼae ka fakalogo anai kia te ia?

⁴ Neʼe tonu koa ke mate ia Sesu moʼo haofaki ʼo tatou? Neʼe mole feala pe koa ke fakatuʼutuʼu e Sehova ke ina foaki te maʼuli heʼe gata ki te hologa ʼo Atama, ʼae ka fakalogo anai kia te ia? ʼE feala pe ke manatu e te tagata agahala ʼe ko he puleʼaki ʼaia ʼe fonu ʼi te ʼofa pea mo fakapotopoto. Kae kapau ʼe fai te puleʼaki ʼaia, ʼe meʼa noaʼi ai te faitotonu haohaoa ʼa Sehova. ʼE faitotonu ia Sehova. Koia neʼe mole feala ke ina moeʼi ʼona mata ʼi te aluʼaga ʼaia neʼe hoko, he neʼe sio ifo pe ki te talagataʼa ʼa Atama.

5. He koʼe ʼe tou tui papau ko meʼa fuli ka fai e Sehova, ʼe ina fai tuʼumaʼu pe anai ʼi te faitotonu?

⁵ Kae feafeaʼi la mo kapau neʼe foaki e Sehova te totogi pea neʼe ina tuku keheʼi tana faitotonu, kae ʼe ina tuku te hologa ʼo Atama ke maʼuli ʼo heʼe gata? ʼE lagi ʼe feala pe ke tou feuiʼaki pe ʼe ina toe tuku keheʼi anai tana faitotonu ʼi ʼihi atu aluʼaga. Ohage la, ʼe feala pe ke tou feuiʼaki ʼe mole ina fakahoko fuli anai ʼana fakapapau. ʼAua naʼa kotou tuʼania ki te faʼahi ʼaia, he mole ko te aluʼaga ʼaia ka hoko. Kotea tona tupuʼaga? Koteʼuhi neʼe fai e Sehova te meʼa ʼae ʼe totonu, logo la neʼe tonu ke ina sakilifisioʼi siʼona ʼAlo ʼofaina. Koia, ʼe tou tui papau ko meʼa fuli ka ina fai, ʼe ina fai tuʼumaʼu pe anai ʼi te faitotonu.

6. He koʼe ʼe feala ke tou ui ʼaki te totogi, ʼe ha ai te ʼofa ʼo Sehova ia tatou? (1 Soane 4:9, 10)

⁶ Kapau ʼaki te totogi ʼe feala ai ke tou mahino ki te faitotonu ʼa Sehova, pea ʼe toe tokoni mai anai ke tou mahino ki te lahi ʼo tona  ʼofa. (Soa. 3:16; lau ia 1 Soane 4:9, 10.) Neʼe momoli mai e Sehova siʼona ʼAlo ke haʼu ʼo mate maʼa tatou. Koteʼuhi ʼe ina loto ke tou maʼuʼuli ʼo heʼe gata, pea ke tou toe kau ki tona famili. Ke ke manatuʼi ʼi te agahala ʼa Atama, neʼe fakamavae e Sehova ia ia ʼi tona famili. Pea talu mai ai, neʼe mole tou toe kau mo tatou ʼi te famili ʼo te ʼAtua, ʼi tatatou tutupu ake. Kae ʼe fakamolemole e Sehova ʼatatou agahala ʼo fakatafito ki te totogi. Pea ʼe feala anai ʼi he ʼaho ke kau ki tona famili ia natou fuli ʼae ʼe tui pea mo fakalogo kia te ia. Pea tahi, ʼi te temi nei ʼe feala ke tou maʼu he ʼu felogoi lelei mo ia ʼo feia pe mo ʼotatou tehina mo tuagaʼane. ʼEi, ʼe ʼofa mamahi ʼosi ia Sehova ia tatou!​—Loma 5:10, 11.

7. He koʼe ʼe tou ui ʼe feala ke tou mahino lelei age ki te ʼofa mamahi ʼo Sehova ia tatou ʼuhi ko te ʼu mamahi ʼo Sesu?

⁷ ʼE tou mahino lelei ki te ʼofa mamahi ʼa Sehova ia tatou, mo kapau ʼe tou fakakaukauʼi ki te toe mamahi neʼe ina logoʼi ʼi tana sio ifo ki te mamahi ʼo siʼona ʼAlo. ʼE ui e Satana ʼe mole nofo agatonu anai he kaugana ʼa te ʼAtua kia te ia moka ʼahiʼahiʼi. Koia, neʼe tuku e Sehova ke mamahi siʼona ʼAlo ʼofaina ʼi muʼa ʼo tana mate moʼo fakamoʼoni ko Satana ʼe gutu loi. (Sopo 2:1-5; 1 Pet. 2:21) Neʼe sio Sehova ki te vaʼi ʼo Sesu e te kau takitaki lotu ʼae neʼe fakafeagai ki ai, mo tona ta e te kau solia, pea mo tona tutuki leva ʼae ki te pou. Pea neʼe toe sio ki te toe mamahi lahi neʼe ina logoʼi ʼi te temi ʼae neʼe tugaki mate ai. (Mat. 27:28-31, 39) Neʼe feala pe ke fakagata e Sehova ʼona mamahi fuli ʼaia neʼe hoko ki ai. Ohage la, ʼi te ui fenei e ʼihi “ke haofaki nei ia ia e te ʼAtua mo kapau ʼe ʼofa ai,” neʼe feala noa pe ia ke fai e Sehova te faʼahi ʼaia. (Mat. 27:42, 43) Kae, kapau neʼe ina fai he meʼa ʼi te temi ʼaia, neʼe mole feala ke foaki ia te totogi, pea ʼe mole feala anai ke tou maʼu he ʼamanaki ʼi te temi nei. Koia, neʼe ina tuku ke mamahi siʼona ʼAlo ʼo kaku ki siʼona mate.

8. Neʼe mamahi koa ia Sehova ʼi tana sio ifo ki te mamahi ʼo siʼona ʼAlo? Fakamahino. (Vakaʼi mo te pāki.)

⁸ ʼAua naʼa tou manatu ʼe mafimafi ia te ʼAtua, pea mole he ʼu meʼa ia ʼe ina logoʼi. Neʼe fakatupu tatou ki tona pāki. Koia, kapau ʼe tou logoʼi he ʼu meʼa ʼi ʼotatou loto, pea ʼe toe feia pe mo ia. ʼE ui ʼi te Tohi-Tapu ʼi ʼihi temi ʼe “mamahi” ai ia Sehova. (Pes. 78:40, 41) Tou talanoa ki te hisitolia ʼo Apalahamo mo Isaake. ʼE tou iloʼi neʼe kole e Sehova kia Apalahamo ke ina momoli siʼona foha ʼulu tokotahi ko he sakilifisio. (Sen. 22:9-12; Hep. 11:17-19) Fakakaukauʼi age muʼa koe, te ʼu meʼa ʼae neʼe logoʼi e Apalahamo ʼi te temi ʼae neʼe meʼa ai ke ina matehi ia Isaake ʼaki he hele. Kae neʼe toe lahi age la ia te toe mamahi ʼae neʼe logoʼi e Sehova ʼi tana sio ifo ki te gaohi koviʼi, mo te ta pea mo te matehi ʼo siʼona ʼAlo e he ʼu tagata ʼe mole tui!​—Vakaʼi ʼi te jw.org te viteo Imitez leur foi : Abraham [partie 2].

9. Ka ke lau ia Loma 8:32, 38, 39, ʼe tokoni feafeaʼi atu ke ke mahino ki te ʼofa mamahi ʼo Sehova kia koe pea mo ʼou tehina mo tuagaʼane?

 ⁹ ʼAki te totogi, ʼe tou ako ai ʼe mole he tahi ʼe lahi age tona ʼofa kia tatou ohage ko Sehova, maʼia mo he tahi ʼo ʼotatou famili peʼe ko hotatou kaumeʼa lelei. (Lau ia Loma 8:32, 38, 39.) Pea ʼe tou tui papau, ʼe lahi age te ʼofa ʼo Sehova kia tatou ʼi tatatou ʼofa ʼae kia tatou totonu. ʼE ke fia maʼuli koa ʼo heʼe gata? Pea ʼe toe lahi age la ia mo tana fakaʼamu ʼae ke ke maʼu te maʼuli heʼe gata. ʼE ke loto koa ke fakamolemole atu ʼau agahala? ʼE toe kehe age la mo te loto ʼo Sehova. Ko te meʼa pe ʼe ina kole mai, ke tou tali tona meʼa ʼofa maʼuhiga ʼo tou tui pea mo fakalogo kia te ia. ʼE ha te ʼofa mamahi ʼo Sehova ia tatou ʼi tana foaki mai te totogi. Pea ʼi te malama foʼou, ʼe toe lahi age anai te ʼu meʼa ka tou ako ʼo ʼuhiga mo te ʼu meʼa neʼe ina fai maʼa tatou ʼuhi pe ko tona ʼofa.​—Ekl. 3:11.

KOTEA ʼE TOU AKO ʼO ʼUHIGA MO SESU ʼAKI TE TOTOGI?

10. (1) He koʼe neʼe lotomamahi ʼosi ia Sesu? (2) Neʼe fakatapuha feafeaʼi e Sesu ia te huafa ʼo Sehova? (Vakaʼi mo te ʼa takai “ Neʼe Fakatapuha e Sesu Te Huafa ʼo Sehova ʼi Tana Nofo Agatonu.”)

¹⁰ ʼE tuʼania moʼoni ia Sesu naʼa ʼulihi te huafa ʼo tana Tamai. (Soa. 14:31) Neʼe lotomamahi ʼosi ia Sesu ʼi tana iloʼi ʼae ʼe feala ke ʼulihi te huafa ʼo tana Tamai, ʼuhi ko te ʼu tukugakovi hala ʼae neʼe fai kia ia e te hahaʼi. Neʼe natou ui ʼe matehi anai ia ia he neʼe mole fakaʼapaʼapa ki te ʼAtua, pea ko he tagata faifakapo. Koia neʼe ina ui fenei ai ʼi tana faikole: “Siʼaku Tamai, kapau ʼe feala, ke mamaʼo atu te ipu ʼaeni ia te au.” (Mat. 26:39) Neʼe nofo agatonu ia Sesu ki tona mate. Koia, neʼe ina fakatapuha ai ia te huafa ʼo Sehova.

11. Neʼe fakaha feafeaʼi e Sesu ia tona ʼofa mamahi ʼae ki te tagata? (Soane 13:1)

¹¹ ʼAki te totogi, ʼe tou toe ako ai ʼe tokaga moʼoni  Sesu ki te tagata, kae tafito ʼana tisipulo. (Taag. 8:31; lau ia Soane 13:1.) Neʼe iloʼi e Sesu ʼe ʼi ai anai ʼihi aluʼaga ʼo tana minisitelio ʼi te kele ʼe faigataʼa ʼaupito anai, he ʼe mamahi anai moka mate. Kae, neʼe mole ina fakahoko tana gaue ʼaia ʼuhi pe neʼe fakamaʼua age ke ina fai. Kailoa ia. Neʼe ina fai mo tona loto katoa. Neʼe faifakamafola tuʼumaʼu mo faiakonaki pea mo tokoni ki ʼihi ʼuhi pe ko tona ʼofa ki te hahaʼi. ʼI te po ʼi muʼa ʼo tana mate, neʼe ina toʼo he temi ke ina fufulu ai te ʼu vaʼe ʼo ʼana apositolo. Neʼe ina fakalotomalohiʼi ai natou pea mo akoako natou. (Soa. 13:12-15) Pea ʼi te pou fakamamahi, neʼe ina toʼo he temi ke tokaga ai ki te ʼu meʼa ʼae ʼe ʼaoga ki siʼana faʼe, pea mo foaki he ʼamanaki ki he tagata kaihaʼa ka mate ʼi ʼona tafa. (Luka 23:42, 43; Soa. 19:26, 27) Koia, neʼe mole fakaha pe e Sesu tona ʼofa mamahi ki te hahaʼi ʼi tana mate maʼa natou, kae neʼe ina toe fakaha ʼaki tana agalelei pea mo ʼofa kia natou.

12. He koʼe ʼe tou ui ʼe kei hoko atu pe Sesu tana fai he ʼu sakilifisio maʼa tatou?

¹² Logo la neʼe mate ‘tuʼa tahi ia Sesu ʼo talu ai,’ kae ʼe hoko atu pe tana fai he ʼu sakilifisio maʼa tatou (Loma 6:10) ʼE haga gaue pe ke tou maʼu te ʼu tapuakina ʼae kua feala ke tou maʼu ʼi te temi nei ʼaki te totogi. Fakakaukauʼi age muʼa te ʼu meʼa fuli ʼe ina fai. ʼE gaue ʼi tona ʼuhiga Hau mo Pelepitelo Lahi, pea mo pule ʼo te kokelekasio. (1 Ko. 15:25; Efe. 5:23; Hep. 2:17) ʼE ina fakatahiʼi te kau fakanofo pea mo te toe hahaʼi kaugamalie. Neʼe tuku age te gaue ʼaia ki ai pea ʼe tonu ke ina fakaʼosi ʼi muʼa ʼo te fakaʼosi ʼo te mamahi lahi. b (Mat. 25:32; Mko. 13:27) ʼE tokaga ia ke fafaga lelei ʼana tisipulo agatonu ʼi te faʼahi fakalaumalie lolotoga te ʼu temi fakaʼosi. (Mat. 24:45) Pea ʼi tana ʼafio ʼaia ia taʼu ʼe afe, ʼe hoko atu pe anai tana gaue maʼa tatou. ʼEi, neʼe foaki moʼoni mai e Sehova tona ʼAlo maʼa tatou!

KE HOKO ATU PE TAU AKO HE ʼU MANATU FOʼOU

13. ʼE feafeaʼi hau faiga ke lahi age te ʼu faʼahi ʼae ʼe ke ako ʼo ʼuhiga mo te ʼofa ʼo Sehova pea mo Sesu kia koe?

¹³ ʼE lahi tuʼumaʼu pe anai te ʼu faʼahi ʼe ke ako ʼo ʼuhiga mo te ʼofa ʼo Sehova mo Sesu kia koe. ʼO feafeaʼi? ʼAki hau metitasio tuʼumaʼu ki te ʼu meʼa ʼae neʼe nā fai maʼa koe. He koʼe ʼe mole ke lau fakalelei he Evaselio ʼe tahi, peʼe laka atu ʼi te ʼu vahaʼa ʼi muʼa pea mo te ʼosi ʼo te ʼAho Fakamanatu? ʼAua naʼa ke faiga ke ke lau he tuʼuga vaega ʼi he moʼi temi pe ʼe tahi. ʼE lelei age hau lau mamalie, pea mo toʼo he temi ʼo fai he ʼu fekumi ke ke maʼu ai he tahi ʼu tupuʼaga ke ke ʼofa ai kia Sehova pea mo Sesu. Hili ia, pea ke fai ia  meʼa fuli ke ke vaevae pea mo ʼihi ia te ʼu meʼa ʼae ʼe ke ako.

14. Ka tou lau ia Pesalemo 119:97 mo te nota, ʼe feafeaʼi hau maʼu he ʼu manatu foʼou ʼo ʼuhiga mo te totogi pea mo ʼihi atu akonaki? (Vakaʼi mo te pāki.)

¹⁴ Kapau kua fualoa tau ʼi te moʼoni, ʼe lagi ʼe ke feuiʼaki pe kei ʼi ai koa he tahi ʼu manatu foʼou ke tou ako ʼo ʼuhiga mo te faitotonu ʼa te ʼAtua, mo tona ʼofa pea mo te totogi. ʼE kei lahi tuʼumaʼu pe te ʼu faʼahi ke tou ako ʼo ʼuhiga mo te ʼu manatu ʼaia pea mo ʼihi atu manatu. Koia, kotea ʼe feala ke ke fai? Ke ke lau pea mo ako te ʼu manatu taulekaleka ʼo te Tohi-Tapu ʼi ʼatatou tohi. Pea ka ke to ki he vaega ʼe mole ke mahino lelei ki ai, ke ke fai he ʼu fekumi. Pea ʼi te ʼaho katoa, ke ke metitasio ki te ʼu manatu ʼae neʼe ke maʼu, pea mo te ʼu faʼahi ʼae neʼe ke ako ʼo ʼuhiga mo Sehova mo tona ʼAlo, pea mo tonā ʼofa ʼae kia koe.​—Lau ia Pesalemo 119:97 mo te nota.

15. He koʼe ʼe tonu ke tou haga kumi ke tou maʼu he ʼu manatu foʼou ʼi te Tohi-Tapu?

¹⁵ Kapau mole ke maʼu he tahi age manatu foʼou peʼe ko he manatu ʼe ke fia mahino ki ai moka ke ako pea mo fai he ʼu fekumi, ʼaua naʼa ke lotovaivai. ʼE ke lagi hage pe ko he tahi ʼe ina tami te ʼone ke ina maʼu he aulo. ʼE tonu kia natou ʼae ʼe natou kumi te aulo, ke natou faʼa kataki. ʼE feala ke natou gaue ʼi ni hola, peʼe ko ni ʼaho, ke hoki natou maʼu he aulo. Kae ʼe natou faʼa kataki koteʼuhi ʼe maʼuhiga kia natou te aulo ʼaia. Pea ʼe toe feia pe, ʼe toe maʼuhiga lahi age kia tatou ia te ʼu manatu foʼou fuli ʼi te Tohi-Tapu. (Pes. 119:127; Taag. 8:10) Koia, ke ke faʼa kataki mo hoko atu pe tau lau ʼo te Tohi-Tapu.​—Pes. 1:2.

16. ʼE feafeaʼi hatatou faʼifaʼitaki ia Sehova mo Sesu?

¹⁶ Ka ke ako te Tohi-Tapu, ke ke feuiʼaki pe ʼe feafeaʼi hau maʼuliʼi te meʼa ʼae ʼe ke ako. Ohage la, ʼe feala ke ke faʼifaʼitakiʼi te faitotonu ʼa Sehova ʼaki hau mole fakapalatahi ki ʼihi. Pea ʼe feala ke ke faʼifaʼitakiʼi te ʼofa ʼo Sesu ki tana Tamai pea mo tona tatau. ʼO feafeaʼi? ʼAki hau fai ia te meʼa ʼae ʼe loto ki ai ia Sehova, pea mo tokoni ki ʼou tehina mo tuagaʼane, maʼia pe ʼe faigataʼa ʼi ʼihi temi. Pea ʼe feala ke ke toe faʼifaʼitakiʼi ia Sesu ʼaki hau faifakamafola ki tou tatau ke ina maʼu mo ia te fealagia ʼae ke ina tali te meʼa ʼofa maʼuhiga ʼae neʼe foaki age e Sehova ki ai.

17. Kotea ka tou palalau ki ai ʼi te alatike ka hoa mai?

¹⁷ Kapau ʼe tou haga ako pe kotea te totogi, pea ʼe toe lahi age anai tatatou lotofakafetaʼi pea mo ʼoʼofa kia Sehova pea mo Sesu. Pea ʼe nā toe ʼoʼofa mamahi anai ia tatou. (Soa. 14:21; Sakp. 4:8) Koia, tou fakaʼaogaʼi lelei ia meʼa fuli e tuku mai e Sehova ke lahi tuʼumaʼu age te ʼu faʼahi ʼae ʼe tou ako ʼo ʼuhiga mo te totogi. ʼI te alatike ʼae ka hoa mai, ʼe tou vakaʼi anai te ʼu tapuakina ʼe tou maʼu ʼuhi ko te totogi. Pea ʼe tou toe vakaʼi ai anai pe ʼe feafeaʼi hatatou lotofakafetaʼi ʼo ʼuhiga mo te ʼofa ʼo Sehova.