1. Ia ʼaho nei, kotea ʼae ʼe ui e he ʼaselo, pea ʼe malave feafeaʼi kia tatou ʼana palalau ʼaia?

 KAPAU ʼe palalau atu ia he ʼaselo, ʼe ke fakalogo lelei anai koa ki ai? Ia ʼaho nei, ʼe palalau he ʼaselo “ki te ʼu puleʼaga fuli, mo te ʼu telepi fuli, mo te ʼu lea fuli, pea mo te hahaʼi fuli.” Pea kotea ʼae ʼe ina ui? ʼE ina ui fenei: “Kotou manavasiʼi ki te ʼAtua pea mo fakakololiaʼi ia ia, . . . kotou atolasio kia Ia ʼae neʼe ina fakatupu te lagi, mo te kele.” (Fkha. 14:6, 7) ʼEi, ko Sehova tokotahi pe ʼae ʼe tonu ke atolasio ki ai te hahaʼi. Koia, ʼe tou fakamalo lahi ki te fakafealagia mai e te ʼAtua ke tou atolasio kia te ia ʼi tona fale lotu lahi fakalaumalie!

2. Kotea te fale lotu fakalaumalie ʼa Sehova? (Vakaʼi mo te fakamatala ʼae ʼe ʼa takai “  ʼE Mole Fakata e Te Fale Lotu Fakalaumalie.”)

² Kae kotea te fale lotu fakalaumalie ʼaia, pea ʼe tou maʼu ʼifea ni fakamahino? Ko te fale lotu fakalaumalie ʼe mole ko he fale moʼoni. ʼE fakaʼuhiga ia ki te fakatuʼutuʼu ʼae neʼe fai e Sehova ke tou atolasio ai kia te ia pea ʼe feala ʼaki te sakilifisio ʼa Sesu. ʼE fakamahino e te apositolo ko Paulo te fakatuʼutuʼu ʼaia ʼi te tohi ʼae neʼe ina fai ki te kau Kilisitiano Hepeleo ʼi Sutea. b

3-4. He koʼe neʼe faitohi ia Paulo ki te kau Kilisitiano Hepeleo ʼi Sutea, pea kotea te tokoni neʼe ina fai age?

³ He koʼe neʼe faitohi ia Paulo ki te kau Kilisitiano Hepeleo ʼi Sutea? Lagi neʼe ko ʼona tupuʼaga ʼe lua. ʼUluaki, neʼe ina fia fakalotomalohiʼi natou. Tokolahi ia natou neʼe lahilahi ake ʼi te lotu Sutea. Pea ʼi tanatou tafoki leva ʼae ki te lotu Fakakilisitiano, ko te kau takitaki ʼo tanatou lotu ʼafea ʼaia neʼe natou manukiʼi  natou. Kotea tona tupuʼaga? Koteʼuhi neʼe mole he fale lotu matalelei neʼe olo ki ai te kau Kilisitiano ʼo fai ai tanatou tauhi. Neʼe mole hanatou ʼaletale ke natou momoli ai ni sakilifisio ki te ʼAtua. Pea neʼe mole gaue he ʼu pelepitelo maʼa natou. Neʼe feala ke lotovaivai ai te ʼu tisipulo ʼa Kilisito pea ke toe vaivai ai mo tanatou tui. (Hep. 2:1; 3:2, 14) Neʼe lagi fia liliu pe la ʼihi ki te lotu Sutea.

⁴ Lua, neʼe fia palalau ia Paulo ki te kau Kilisitiano he neʼe mole natou faiga malohi ke natou mahino ki te ʼu akonaki foʼou pea mo loloto, ia “te meʼa kai fefeka” ʼae ʼe tuʼu ʼi te Folafola ʼa te ʼAtua. (Hep. 5:11-14) Neʼe kei mulimuli pe ʼihi ki te Lao ʼa Moisese. Kae neʼe fakamahino age e Paulo neʼe mole feala ke pulihi ʼo talu ai ia te ʼu agahala ʼaki te ʼu sakilifisio ʼae neʼe fakamaʼua e te Lao. Koia la ʼae neʼe “molehi” ai te Lao. Pea neʼe akoʼi age leva e Paulo he ʼu moʼoni loloto. Neʼe ina fakamanatuʼi age ki ʼona tehina mo tuagaʼane ʼe natou maʼu “te ʼamanaki ʼe lelei age” ʼuhi ko te sakilifisio ʼae neʼe momoli e Sesu. Pea ʼaki te sakilifisio ʼaia neʼe feala ai ke natou “fakaovi” ki te ʼAtua.​—Hep. 7:18, 19.

5. Kotea te akonaki ʼi te Tohi-Tapu ʼe tonu ke tou mahino ki ai ʼe tuʼu ʼi te tohi ki te kau Hepeleo, pea kotea tona tupuʼaga?

⁵ Neʼe fakamahino e Paulo ki ʼona tehina Hepeleo pe koʼe neʼe maʼoluga age te lotu Fakakilisitiano ʼi te lotu Sutea ʼae neʼe natou kau ki ai ʼi muʼa atu. Ko te tauhi ʼa te kau Sutea ʼo mulimuli ki te Lao neʼe “ko he ʼata [pe ia] ʼo te ʼu meʼa ʼae ka hoko mai, kaʼe ko te moʼoni ʼo te ʼu meʼa ʼaia ʼe ko Kilisito.” (Kol. 2:17) Ka ʼasi mai te ʼata ʼo he tahi, ʼe mole ko ia moʼoni, kae ʼe ko tona faʼahiga agaaga pe ia. ʼO toe feia pe, ko te tauhi ʼa te lotu Sutea ki te ʼAtua ʼi te temi muʼa, neʼe ko he ʼata pe ia. Kae ʼe ʼi ai te tauhi ʼe lelei age. ʼE tonu ke tou mahino ki te fakatuʼutuʼu ʼae neʼe fai e Sehova ke fakamolemole ai ʼatatou agahala pea ke feala ai hana tali tatatou tauhi. Tou fakatatau ia te faʼahiga tauhi ʼae neʼe fai ʼi te lotu Sutea pea mo te faʼahiga tauhi ʼi te lotu Fakakilisitiano, ohage ko tona fakamahino mai ʼi te tohi ki te kau Hepeleo. ʼI tatatou fai te faʼahi ʼaia, ʼe tou mahino lelei age anai pe kotea te fale lotu fakalaumalie pea kotea ʼae ʼe tonu ke tou fai.

6. Neʼe fakaʼaogaʼi kitea ia te tapenakulo?

⁶ Te tauhi ʼae kia Sehova ʼi te lotu Sutea. Neʼe palalau ia Paulo ki te tapenakulo ʼae neʼe fakatuʼu e Moisese, ʼi te taʼu 1512 I.M.T.S. (Vakaʼi te pāki “Te Tauhi Kia Sehova ʼi Te Lotu Sutea—Te Tauhi Kia Sehova ʼi Te Lotu  Fakakilisitiano.”) Ko te tapenakulo neʼe ko he fale la. ʼI te kamata mai, neʼe ʼave e te kau Iselaele te fale la ʼaia ʼi tanatou feoloʼaki ʼi te toafa. Neʼe natou fakaʼaogaʼi ia teitei taʼu ʼe 500, ʼo aʼu ki te faʼu leva ʼo te fale lotu ʼi Selusalemi. (Eke. 25:8, 9; Num. 9:22) Neʼe atolasio te kau Iselaele ki te ʼAtua pea mo momoli ʼanatou sakilifisio ʼi “te fale la ʼo te fono” ʼaia. (Eke. 29:43-46) Kae neʼe fakata e te tapenakulo he faʼahi ʼe lelei age maʼa te kau Kilisitiano.

7. Neʼe ko ʼanafea ʼae neʼe ha ai te fale lotu fakalaumalie?

⁷ Te tauhi ʼae kia Sehova ʼi te lotu Fakakilisitiano. Ko te tapenakulo ʼaia ʼi te temi muʼa neʼe ko “he fakata ʼo te ʼu meʼa ʼae ʼi selo” pea neʼe ina fakata te fale lotu lahi fakalaumalie ʼa Sehova. Neʼe ui e Paulo ko “te fale la [peʼe ko te tapenakulo] ʼaia ʼe ko te fakata ʼo te ʼu meʼa ʼae ʼe lolotoga hoko ʼi te temi nei.” (Hep. 8:5; 9:9) Koia, ʼi tana faitohi ki te kau Hepeleo, neʼe kua ʼosi tuʼu ia te fale lotu fakalaumalie. Neʼe kamata ʼi te taʼu 29 H.T.S. ʼI te taʼu ʼaia, neʼe papitema ai ia Sesu, neʼe fakanofo ʼaki te laumalie maʼoniʼoni pea gaue leva ʼi tona ʼuhiga “pelepitelo lahi mo maʼoluga” ʼa Sehova ʼi te fale lotu fakalaumalie. c​—Hep. 4:14; Gaue 10:37, 38.

8-9. ʼO mulimuli kia Hepeleo 7:23-27, kotea ʼae neʼe kehekehe ʼaupito ai te ʼu pelepitelo lahi ʼi Iselaele pea mo te Pelepitelo Lahi mo maʼoluga, ʼae ko Sesu Kilisito?

⁸ Te tauhi ʼae kia Sehova ʼi te lotu Sutea. Neʼe fakafofoga e te pelepitelo lahi ia te hahaʼi ia muʼa ʼo te ʼAtua. Neʼe fakanofo e Sehova te ʼuluaki pelepitelo lahi ʼi Iselaele, ia Alone, ʼi te temi ʼae neʼe fakatapuʼi ai te tapenakulo. Kae ohage ko tona fakamahino e Paulo “tokolahi te kau pelepitelo neʼe mole feala ke natou hoko atu tanatou gaue ʼuhi ko te mate, koia neʼe fetogi natou e ʼihi ke natou hoko atu te gaue.” d (Lau ia Hepeleo 7:23-27.) Pea ʼuhi ʼae neʼe ko ni tagata agahala, neʼe tonu ke momoli e te ʼu pelepitelo lahi ʼaia ni sakilifisio moʼo fakamolemole ʼanatou agahala. Neʼe kehekehe ʼaupito ai te ʼu pelepitelo lahi ʼi Iselaele pea mo te Pelepitelo Lahi mo maʼoluga, ʼae ko Sesu Kilisito.

⁹ Te tauhi ʼae kia Sehova ʼi te lotu Fakakilisitiano. Ko Sesu Kilisito, totatou Pelepitelo Lahi, “ ʼe ko he tagata faifekau ʼo . . . te fale la moʼoni, ʼae neʼe fakatuʼu e Sehova kaʼe mole ko te tagata.” (Hep. 8:1, 2) Neʼe fakamahino e Paulo “ ʼuhi ko te maʼuli ʼa Sesu ʼo talu ai, ʼe mole ʼaoga ke fetogi e he tahi tana gaue fakapelepitelo.” Pea neʼe toe ui e Paulo ko Sesu “ ʼe heʼe mele, ʼe mavae kehe mai te kau agahala” pea “ ʼe mole ʼaoga ia ke ina momoli he ʼu sakilifisio ʼi te ʼaho fuli” ʼuhi ko ʼana agahala, ohage ko tona fai e te ʼu pelepitelo lahi ʼo Iselaele. ʼI te lakaga nei, tou vakaʼi te kehekehe ʼo te ʼu ʼaletale pea mo te ʼu sakilifisio ʼi te tauhi ʼi te lotu Sutea mo te tauhi ʼi te lotu Fakakilisitiano.

10. Kotea ʼae neʼe fakata e te ʼu sakilifisio ʼae neʼe momoli ʼi te ʼaletale kapa?

¹⁰ Te tauhi ʼae kia Sehova ʼi te lotu Sutea. Neʼe fakatuʼu ʼi te huʼaga ʼo te tapenakulo te ʼaletale kapa pea neʼe momoli ai kia Sehova te ʼu sakilifisio manu. (Eke. 27:1, 2; 40:29) Kae ko te ʼu sakilifisio ʼaia neʼe mole ina fakamolemole ʼo talu ai te ʼu agahala ʼa te hahaʼi. (Hep. 10:1-4) Ko te ʼu sakilifisio manu ʼae neʼe fai tuʼumaʼu pe ʼi te tapenakulo neʼe ina fakata ia te sakilifisio pe ʼae ʼe tahi ka ina fakamolemole anai ʼo talu te ʼu agahala ʼa te hahaʼi.

11. Kotea ia te ʼaletale ʼae neʼe momoli ai e Sesu ia ia totonu ohage ko he sakilifisio? (Hepeleo 10:5-7, 10)

 ¹¹ Te tauhi ʼae kia Sehova ʼi te lotu Fakakilisitiano. Neʼe iloʼi e Sesu neʼe fekauʼi ifo ia ia e Sehova ki te kele ke ina sakilifisioʼi tona maʼuli ohage ko he totogi maʼa te malamanei. (Mat. 20:28) Koia, ʼi tana papitema neʼe fakaha ai e Sesu kia Sehova ʼe ina fai anai tona finegalo. (Soa. 6:38; Kal. 1:4) Neʼe momoli ai e Sesu ia ia totonu ʼi he ʼaletale fakata. ʼE fakata e te ʼaletale ʼaia ia te finegalo ʼo te ʼAtua. Neʼe loto e Sehova ke sakilifisioʼi e tona ʼAlo ia tona maʼuli haohaoa. Neʼe foaki e Sesu tona maʼuli “tuʼa tahi ʼo talu ai” moʼo fakamolemole, peʼe ʼuʼufi ʼo talu ai te ʼu agahala ʼa natou ʼae ka tui kia Kilisito. (Lau ia Hepeleo 10:5-7, 10.) Tou vakaʼi leva pe kotea ʼae neʼe fakata e te ʼu faʼahi ʼi te loto tapenakulo.

12. Ko ai ʼae neʼe feala ke ulu ki te ʼu koga fale ʼo te tapenakulo?

¹² Te tauhi ʼae kia Sehova ʼi te lotu Sutea. Ko te tapenakulo pea mo te ʼu fale lotu ʼae neʼe laga ki muli age ʼi Selusalemi neʼe tatau tanatou faʼahiga faʼu ʼi loto. Neʼe ʼi ai ʼona koga fale ʼe lua, te Potu Taputapu pea mo te Potu Taputapu ʼAupito. Neʼe vaheʼi te ʼu koga fale ʼaia ʼaki he lito neʼe tui fakailoga. (Hep. 9:2-5; Eke. 26:31-33) Neʼe tuku ʼi te Potu Taputapu te tuʼulaga malama, mo te ʼaletale ʼae neʼe tutu ai te iseso, pea mo te laupapa mo te ʼu pane ʼae neʼe molagaʼi. Neʼe gata pe ki “te ʼu pelepitelo ʼae . . . neʼe fakanofo” ke natou hu ki ai moʼo fakahoko ʼanatou gaue taputapu. (Num. 3:3, 7, 10) Neʼe tuku ʼi te Potu Taputapu ʼAupito ia te  aleka aulo ʼo te fuakava ʼae neʼe ina fakata ia te ʼafio ʼa Sehova ʼi ai. (Eke. 25:21, 22) Neʼe gata pe ki te pelepitelo lahi neʼe feala ke fakalaka ʼi te lito ʼo hu ki te Potu Taputapu ʼAupito tuʼa tahi ʼi te taʼu, ʼi te ʼAho ʼo Te ʼu Faifakalelei. (Lev. 16:2, 17) Neʼe ulu ki ai mo te toto ʼo te ʼu manu ke fakamolemole ai ʼana agahala pea mo te ʼu agahala ʼa te hahaʼi fuli. Ki muli age, neʼe fakaha lelei e Sehova ʼaki tona laumalie maʼoniʼoni pe kotea ʼae neʼe fakata e te ʼu faʼahi ʼaia ʼo te tapenakulo.​—Hep. 9:6-8.

13. Kotea ʼae ʼe fakata e te Potu Taputapu mo te Potu Taputapu ʼAupito ʼo te tapenakulo ʼi te lotu Fakakilisitiano?

¹³ Te tauhi ʼae kia Sehova ʼi te lotu Fakakilisitiano. ʼE tokosiʼi te ʼu tisipulo ʼa Kilisito neʼe fakanofo ʼaki te laumalie maʼoniʼoni pea mo natou maʼu he ʼu felogoi makehe mo Sehova. ʼE kauga gaue anai te toko 144 000 ʼaia mo Sesu ohage ko ni pelepitelo ʼi selo. (Fkha. 1:6; 14:1) Ko te Potu Taputapu ʼo te tapenakulo ʼe ina fakata tonatou vaheʼi e te ʼAtua ko hona ʼu foha fakalaumalie, ʼi tanatou kei maʼuʼuli ʼi te kele. (Loma 8:15-17) Ko te Potu Taputapu ʼAupito ʼo te tapenakulo ʼe ina fakata te ʼafioʼaga ʼo Sehova, ʼae ko selo. Ko “te lito” ʼae neʼe ina vaheʼi te Potu Taputapu mo te Potu Taputapu ʼAupito ʼe ina fakata te sinoʼi tagata ʼo Sesu. Neʼe mole feala ke ulu Sesu, te Pelepitelo Lahi maʼoluga ʼo te fale lotu fakalaumalie mo tona sino ʼaia ki selo. ʼI tana foaki tona sinoʼi tagata ko he sakilifisio maʼa te malamanei, neʼe avahi ai e Sesu te ala ki te maʼuli ʼi selo maʼa te kau Kilisitiano fakanofo fuli. ʼE tonu ke natou toe liʼaki mo natou ʼonatou sinoʼi tagata ke feala hanatou maʼu tonatou fakapale ʼi selo. (Hep. 10:19, 20; 1 Ko. 15:50) Hili te fakatuʼuake ʼo Sesu, neʼe ulu ki te Potu Taputapu ʼAupito ʼo te fale lotu fakalaumalie, pea ʼe fakatahi anai ʼi ai mo te kau fakanofo fuli.

14. ʼO mulimuli kia Hepeleo 9:12, 24-26, kotea ʼae ʼe maʼoluga age ai te fakatuʼutuʼu ʼae ʼa Sehova ʼo ʼuhiga mo te fale lotu fakalaumalie?

¹⁴ ʼE tou mahino lelei ai ki te maʼoluga ʼo te fakatuʼutuʼu ʼa Sehova ʼo ʼuhiga mo te tauhi maʼa. Pea neʼe feala te fakatuʼutuʼu ʼaia ʼaki te sakilifisio pea mo te gaue fakapelepitelo ʼa Sesu Kilisito. ʼI Iselaele, neʼe ulu te pelepitelo lahi ki te Potu Taputapu ʼAupito ʼae neʼe faʼu e te tagata pea mo te toto ʼo te ʼu manu ʼae neʼe sakilifisioʼi. Kae neʼe hu ia Sesu “ki selo” te potu ʼae ʼe taputapu ʼaupito age, ʼo ha ia muʼa ʼo Sehova. Neʼe ina momoli ai te maʼuhiga ʼo tona maʼuli haohaoa ke fua lelei kia tatou, heʼe feala ai ke “pulihi te agahala ʼaki tana sakilifisioʼi ia ia totonu.” (Lau ia Hepeleo 9:​12, 24-26.) ʼE feala ʼaki te sakilifisio ʼa Sesu ke fakamolemole ʼo talu ai ʼatatou agahala. ʼE tou vakaʼi anai ʼi te ʼu palakalafe ka hoa mai ʼe feala ke tou tauhi fuli kia Sehova ʼi tona fale lotu fakalaumalie, pe ʼe tou ʼamanaki olo ki selo peʼe tou maʼuʼuli ʼi te kele.

15. Ko ai ʼae neʼe tauhi ʼi te malaʼe ʼo te tapenakulo?

¹⁵ Te tauhi ʼae kia Sehova ʼi te lotu Sutea. ʼI te tapenakulo neʼe ʼi ai te malaʼe mo tona ʼa. Neʼe fakahoko ʼi ai e te kau pelepitelo ʼanatou gaue. Ko te ʼaletale kapa lahi ʼae neʼe tutu ai te ʼu holokoseta neʼe tuʼu ʼi te malaʼe, ʼo feia mo te foʼi topu vai kapa. Neʼe fakaʼaogaʼi e te ʼu pelepitelo te topu vai ʼaia moʼo ʼonatou fakamaʼa ʼi muʼa ʼo tanatou fakahoko tanatou tauhi taputapu. (Eke. 30:17-20; 40:6-8) Kae ʼi te ʼu fale lotu ʼae neʼe laga ki muli age, neʼe ʼi ai te tahi malaʼe ʼi tuʼa atu, neʼe feala ke ʼomai ia natou ʼae neʼe mole pelepitelo ʼo atolasio ai ki te ʼAtua.

16. Ko ai ʼae ʼe tauhi kia Sehova ʼi te ʼu malaʼe ʼo te fale lotu fakalaumalie?

¹⁶ Te tauhi ʼae kia Sehova ʼi te lotu Fakakilisitiano. ʼI muʼa ʼo te hake ʼa te ʼu tehina fakanofo ʼo Sesu ki selo ʼo kauga pelepitelo mo ia,  ʼe natou tauhi agatonu ki te ʼAtua ʼi te kele, ʼi te loto malaʼe ʼo te fale lotu fakalaumalie. Ko te foʼi topu vai ʼae neʼe tuʼu ʼi te malaʼe ʼo te tapenakulo pea mo te fale lotu, ʼe ina fakamanatuʼi ai kia natou, ʼo feia mo te kau Kilisitiano fuli, te maʼuhiga ʼae ke natou maʼa ʼi te aga ʼae ʼe tonu ke fai pea ʼi te faʼahi fakalaumalie. Pea ʼe atolasio leva ʼifea ia te “toe hahaʼi tokolahi” ʼae ʼe natou lagolago agatonu ki te ʼu tehina fakanofo ʼo Kilisito? Neʼe sio ia te apositolo ko Soane “ ʼe natou tutuʼu ia muʼa ʼo te hekaʼaga fakahau.” Ko tona fakaʼuhiga, ʼe natou ʼi te kele, ʼi te tuʼa malaʼe pea “ ʼe natou foaki [ki te ʼAtua] he tauhi taputapu ʼi te ʼaho mo te po ʼi tona fale lotu.” (Fkha. 7:9, 13-15) ʼE tou fakamalo lahi kia Sehova tana foaki mai te fealagia maʼuhiga ʼae ke tou atolasio kia te ia ʼi tona fale lotu lahi fakalaumalie.

17. Kotea te ʼu sakilifisio ʼae ʼe feala ke tou foaki kia Sehova?

¹⁷ Ia ʼaho nei, ʼe maʼu e te kau Kilisitiano fuli te fealagia maʼuhiga ʼae ke natou foaki he ʼu sakilifisio kia Sehova. Ko tona fakaʼuhiga, ʼe natou foaki tonatou temi, tonatou malohi pea mo ʼonatou koloa moʼo tauhi kia te ia. Ohage ko tona ui e te apositolo ko Paulo ki te kau Kilisitiano Hepeleo, ʼe feala ke “tou momoli tuʼumaʼu ki te ʼAtua he sakilifisio fakavikiviki, ko tona fakaʼuhiga, te fua ʼo ʼotatou laugutu ʼae ʼe tou tala ai ia muʼa ʼo te hahaʼi tona huafa.” (Hep. 13:15) Koia, ʼe feala ke tou fakaha tatatou lotofakafetaʼi ki te fealagia maʼuhiga ʼae ke tou atolasio kia Sehova ʼaki tatatou foaki kia te ia te ʼu sakilifisio ʼae ʼe lelei tukupau.

18. ʼO mulimuli kia Hepeleo 10:22-25, kotea ʼae ʼe tonu ke tou fai tuʼumaʼu, pea kotea ʼae ʼe mole tonu ke tou galoʼi?

¹⁸ Lau ia Hepeleo 10:​22-25. ʼI te ʼamanaki fakaʼosi e Paulo tana faitohi ki te kau Hepeleo, neʼe ina fakamaʼuhigaʼi he ʼu faʼahi ʼe tonu ke tou fai tuʼumaʼu ʼi tatatou tauhi. Neʼe palalau ki te faikole, te tala ki te hahaʼi tatatou ʼamanaki, tatatou fakatahi ki te ʼu fono, pea mo tatatou fefakalotomalohiʼaki ʼo “laka age tatatou fai te ʼu faʼahi ʼaia koteʼuhi kua ovi mai te ʼaho ʼo te ʼAtua.” ʼI te fakaʼosi ʼo te tohi ʼo Fakaha, neʼe ui fenei e te ʼaselo ʼa Sehova: “Atolasio ki te ʼAtua.” (Fkha. 19:10; 22:⁠9) Neʼe ina fai tuʼa lua te ʼu palalau ʼaia moʼo fakaha tona maʼuhiga. ʼOfa pe ke mole tou galoʼi te ʼu faʼahi kehekehe ʼaeni neʼe tou ako ʼo ʼuhiga mo te fale lotu lahi fakalaumalie ʼa Sehova pea mo te fealagia maʼuhiga ʼae ʼe tou maʼu ke tou atolasio ki totatou ʼAtua lahi!