1, 2. (1) Kotea te tokalelei ʼae ʼe feala ke tou maʼu ʼi te temi nei? (2) He koʼe ʼe mole heʼeki feala ke tou maʼu he tokalelei ʼe katoa ʼi te temi nei? (Vakaʼi te ʼuluaki pāki.)

ʼE TOU fia maʼuʼuli fuli ʼi te tokalelei, kaʼe ʼe mole tou fia maʼuli ʼi te lotohoha. Koia ʼae ʼe tou lotofakafetaʼi ai kia Sehova, he ʼe ina foaki mai ‘tona tokalelei.’ ʼE feala ke puipui tatou e te tokalelei ʼaia mai te ʼu manatu mo te ʼu meʼa ʼi totatou loto ʼae ʼe fakatupu hoha. (Filipe 4:6, 7) Pea ʼe tou toe ‘tokalelei foki mo te ʼAtua’ he neʼe tou foaki totatou maʼuli kia te ia. Ko tona fakaʼuhiga, ʼe tou maʼu he ʼu felogoʼi lelei mo Sehova.—Loma 5:1.

² Kaʼe, ʼe heʼeki hoko te temi ʼae ʼe ʼaumai ai e te ʼAtua ia he tokalelei katoa ki te kele. ʼE kei tou maʼuʼuli nei ʼi te ʼu ʼaho fakamuli, pea ʼe lahi te ʼu fihifihia ʼae ʼe tupu ai totatou lotohoha. Pea ʼe tou maʼuʼuli ʼi te lotolotoiga ʼo he hahaʼi agamalohi. (2 Timoteo 3:1-4) ʼE tonu foki ke tou tauʼi ia Satana mo ʼana akonaki loi ʼae ʼe ina fakamafola haʼele. (2 Kolonito 10:4, 5) Kaʼe ko te aluʼaga ʼae ʼe feala ke lahi age ai tatatou lotohoha, ko te  fakafeagai mai ʼo ʼotatou famili ʼae ʼe mole tauhi kia Sehova. Ko ʼihi ʼe lagi natou vaʼi te ʼu akonaki ʼae ʼe tou tui ki ai, peʼe natou lau ʼe tou fakamavetevete te famili. ʼE lagi natou ui kapau ʼe mole tou tuku tatatou tauhi ʼae kia Sehova, pea ʼe mole kei tou kau ki te famili. Kaʼe ʼe tonu ke feafeaʼi tatatou faʼahiga manatu ʼo ʼuhiga mo te fakafeagai ʼo ʼotatou famili? Pea ʼe feafeaʼi anai hatatou taupau ia te tokalelei ʼo totatou loto moka hoko te aluʼaga ʼaia?

3, 4. (1) ʼE malave feafeaʼi ia te ʼu akonaki ʼa Sesu kia tatou? (2) He koʼe ʼe feala ke faigataʼa ia te mulimuli ia Sesu?

³ Neʼe iloʼi e Sesu ʼe mole tali anai ʼana akonaki e te hahaʼi fuli. Neʼe ina iloʼi foki ʼe ʼaoga anai ke maʼu e ʼana tisipulo te lototoʼa, koteʼuhi ʼe fakafeagai anai ʼihi kia natou. Pea neʼe feala ke malave te fakafeagai ʼaia ki te tokalelei ʼo ʼonatou famili. Neʼe ui fenei e Sesu: “ ʼAua naʼa kotou manatu neʼe au haʼu ʼo ʼaumai te tokalelei ki te kele, neʼe mole au haʼu ʼo ʼaumai te tokalelei kaʼe ko te heleta. Koteʼuhi neʼe au haʼu ʼo fakamavetevete te ʼu loto fale: ʼE fakafeagai anai te foha ki tana tamai, mo te taʼahine ki tana faʼe pea mo te fafine ʼohoana ki te faʼe ʼo tona ʼohoana. Ko te ʼu fili ʼo te tagata ʼe ko natou totonu anai ʼo tona loto fale.”—Mateo 10:34-36.

⁴ Kotea te fakaʼuhiga ʼo te ʼu palalau ʼae ʼa Sesu “ ʼAua naʼa kotou manatu neʼe au haʼu ʼo ʼaumai te tokalelei”? Neʼe loto ia ke iloʼi e te hahaʼi ʼe ʼi ai anai he ʼu nunuʼa ʼo tanatou fia liliu ʼae ko ʼana tisipulo. Pea ko tana fakatuʼutuʼu, ke ina akoʼi ki te hahaʼi ia te moʼoni ʼo ʼuhiga mo te ʼAtua, kaʼe ke mole ina fakamavetevete ia te ʼu famili. (Soane 18:37) Kaʼe neʼe tonu ke iloʼi e ʼana tisipulo ʼe mole faigafua anai hanatou mulimuli ia te ia, tafito age la moka mole tali e ʼonatou kaumeʼa lelei mo ʼonatou famili ia te moʼoni.

5. Kotea ʼae neʼe katakiʼi e te ʼu tisipulo ʼa Sesu?

⁵ Neʼe ui e Sesu ʼe tonu ke lotolelei ʼana tisipulo ʼo natou faʼa kataki ʼi te ʼu fakafeagai mai ʼo ʼonatou famili. (Mateo 10:38) ʼI te temi ʼae neʼe vaʼi mo liʼakina ai natou e ʼonatou famili, neʼe natou faʼa kataki, he neʼe natou fia fakafiafiaʼi te loto ʼo Sesu. Pea neʼe lahi te ʼu meʼa ʼae neʼe natou maʼu i te ʼu meʼa ʼae neʼe kua puli.—Lau ia Maleko 10:29, 30.

6. Kotea ʼae ʼe tonu ke tou manatuʼi moka fakafeagai mai ʼotatou famili?

⁶ Tatau aipe pe ʼe fakafeagai mai ʼotatou famili ʼuhi ko tatatou tauhi ʼae kia Sehova, kaʼe ʼe tou ʼoʼofa aipe ia natou. Kaʼe ke tou manatuʼi, ʼe tonu ke malohi age totatou ʼofa ʼae ki te ʼAtua mo Kilisito. (Mateo 10:37) Pea ʼe tou iloʼi ʼe feala ke fakaʼaogaʼi e Satana totatou ʼofa ki ʼotatou famili ke mole tou nonofo agatonu kia Sehova. Tou vakaʼi pe ʼe feafeaʼi anai hatatou katakiʼi he ʼu aluʼaga faigataʼa.

7. ʼE tonu ke feafeaʼi tau faʼahiga manatu ki tou maʼuli mo kapau ʼe mole tauhi tou ʼohoana kia Sehova?

⁷ ʼE fakatokaga mai ʼi te Tohi-Tapu ʼe “felaveʼi anai” ia ia ʼae ka ʼohoana “mo he ʼu mamahi” peʼe ko he ʼu fihifihia. (1 Kolonito 7:28) Kapau ʼe ke ʼohoana mo he tahi ʼe mole tauhi kia Sehova, ʼe feala ke toe lahi age ʼou tuʼania mo tau lotohoha ʼi tou maʼuli fakataumatuʼa. Kaʼe, ʼe maʼuhiga ke ke maʼu te manatu ʼa Sehova ʼo ʼuhiga mo tou maʼuli. ʼE ina  ui, ʼe mole feala ke tou mavete peʼe ke tou tahi nofo mo ʼotatou ʼohoana ʼuhi pe ko tanatou mole tauhi kia Sehova. (1 Kolonito 7:12-16) Tatau aipe pe ʼe mole tauhi tou ʼohoana kia Sehova pea ʼe mole ina takitaki tokolua famili ʼi te tauhi moʼoni, kaʼe ʼe tonu ke ke fakaʼapaʼapa ki ai he ʼe ko te pule ʼo te famili. Pea ʼu tagata ʼohoana, kapau ʼe mole tauhi ʼokotou ʼohoana kia Sehova, ʼe tonu ke kotou ʼoʼofa mo tokakaga kia natou.—Efeso 5:22, 23, 28, 29.

8. Kotea te ʼu fehuʼi ʼae ʼe feala ke ke fai mo kapau ʼe fakatuʼakoi atu e tou ʼohoana ia tau tauhi?

⁸ Kaʼe kotea ʼae ʼe tonu ke ke fai mo kapau ʼe fakatuʼakoi atu e tou ʼohoana ia tau tauhi? Neʼe ui age e te ʼohoana ʼo he tuagaʼane, ʼe feala pe ke alu ʼo faifakamafola kaʼe mole ʼi te ʼaho fuli. Kapau ʼe ke felaveʼi mo he aluʼaga feia, fai te ʼu fehuʼi ʼaeni: ‘ ʼE ui mai koa e toku ʼohoana ke tuku ʼosi taku tauhi ʼae kia Sehova? Kapau ʼe mole koia, ʼe feala koa ke au fakalogo ki ai?’ ʼE mole lahi anai he ʼu fihifihia ʼi tou maʼuli fakataumatuʼa mo kapau ʼe ke aga fakapotopoto.—Filipe 4:5.

9. ʼE lava akoʼi feafeaʼi e te kau Kilisitiano ʼanatou fanau ke natou fakaʼapaʼapa ki tanatou tamai peʼe ko tanatou faʼe ʼae ʼe mole tauhi kia Sehova?

⁹ ʼE feala ke faigataʼa te akoʼi ʼo ʼau fanau mo kapau ʼe mole tauhi tou ʼohoana kia Sehova. Ohage la, ʼe tonu ke ke akoʼi age kia natou ke natou fakalogo ki te fakatotonu ʼaeni ʼi te Tohi-Tapu: “Fakaʼapaʼapa ki tau tamai pea mo tau faʼe.” (Efeso 6:1-3) Kaʼe kotea ʼae ʼe tonu ke ke fai mo kapau ʼe mole mulimuli tou ʼohoana ki te ʼu lekula Fakatohi-tapu? ʼE ʼaoga anai ke ke tuku he faʼifaʼitaki lelei ki ʼau fanau, ʼo ke fakaʼapaʼapa ki tou ʼohoana. Fakakaukau ki ʼona kalitate, pea mo ke fakaha ki ai ia tau lotofakafetaʼi ki ʼana gaue lelei fuli ʼe ina fai. Pea ʼaua naʼa ke fai he ʼu palalau ʼe mole lelei ʼo ʼuhiga mo tou ʼohoana ia muʼa ʼo ʼau fanau. Kaʼe, fakamahino kia natou ʼe tahi fakalogo pe ki te tagata takitokotahi pe ʼe tauhi kia Sehova peʼe kailoa. Kapau ʼe ke akoʼi ʼau fanau ke natou fakaʼapaʼapa ki tanatou tamai peʼe ko tanatou faʼe ʼae ʼe mole tauhi kia Sehova, ʼe mahino ia ʼe fia iloʼi anai e tou ʼohoana pe ʼe ko ai ia Sehova.

10. ʼE lava akoʼi feafeaʼi e te ʼu matuʼā Kilisitiano ʼanatou fanau ke natou ʼoʼofa kia Sehova?

 ¹⁰ Ko ʼihi tamai peʼe ko ʼihi faʼe ʼae ʼe mole tauhi kia Sehova, ʼe natou loto ke fai e ʼanatou fanau ia te ʼu ʼaho lalahi fakapagani peʼe ke natou ako ia te ʼu akonaki fakalotu hala. Pea ko ʼihi tagata ʼohoana ʼe lagi natou tapuʼi ki ʼonatou ʼohoana te akoʼi ʼo te Tohi-Tapu ki ʼanatou fanau. Kaʼe maʼia ʼi te ʼu aluʼaga ʼaia, ʼe tonu ki te fafine Kilisitiano ke ina faigaʼi ʼo akoʼi ia te moʼoni ki ʼana fanau. (Gaue 16:1; 2 Timoteo 3:14, 15) Ohage la, ko he tagata ʼohoana ʼe mole tauhi kia Sehova, ʼe lagi mole loto ia ke fai e tona ʼohoana ia he ako Tohi-Tapu ʼo ʼanā fanau peʼe ke ina ʼave natou ki te ʼu fono. ʼE fakaʼapaʼapa anai ki tona ʼohoana, kaʼe ʼe palalau pe anai ki ʼana fanau ʼo ʼuhiga mo te moʼoni ʼi te ʼu lakaga ʼae ʼe fealagia ai. Kapau ʼe ina fai te faʼahi ʼaia, ʼe feala anai ke natou iloʼi pe ko ai ia Sehova pea mo ʼana lekula ʼo ʼuhiga mo te meʼa ʼae ʼe lelei pea mo ʼae ʼe kovi. (Gaue 4:19, 20) Pea ʼe feala ai leva ke filifili e te fanau pe ʼe natou tauhi kia Sehova peʼe kailoa. * (Vakaʼi te kiʼi nota.)—Tetelonome 30:19, 20.

11. Kotea ʼae ʼe feala ke tupu ai he ’u fihifihia mo ʼotatou famili ʼae ʼe mole tauhi kia Sehova?

¹¹ ʼI tatatou kamata ako ia te Tohi-Tapu mo te kau Fakamoʼoni ʼa Sehova, neʼe lagi mole tou fakaha ki ʼotatou famili. Kaʼe ʼi te kua malohi ʼo tatatou tui, neʼe tou mahino ai ʼe ʼaoga ke tou fakaha kia natou ʼe tou fia tauhi kia Sehova. (Maleko 8:38) Ko tau nofo agatonu kia Sehova neʼe lagi tupu ai hou fihifihia mo tou famili. Koia, tou vakaʼi pe kotea ʼae ʼe feala ke ke fai moʼo taupau te tokalelei ʼi tou loto pea mo ke nofo agatonu kia Sehova.

12. He koʼe ʼe feala ke fakafeagai mai ʼotatou famili? Pea ʼe tou lava fakaha feafeaʼi ʼe tou tokagaʼi te ʼu meʼa ʼae ʼe natou logoʼi?

¹² Faigaʼi ke ke mahino ki te ʼu meʼa ʼae ʼe logoʼi e ʼou famili ʼae ʼe mole tauhi kia Sehova. ʼE tou fiafia ʼaupito ʼi tatatou kua iloʼi te moʼoni mai te Tohi-Tapu. Kaʼe ʼe feala ke ui e ʼotatou famili neʼe kakaʼi tatou peʼe tou kau ki he lotu ʼe faikehe. ʼE toe feala pe ke natou manatu ʼe mole kei tou ʼoʼofa ia natou heʼe mole kei tou fakatahi mo natou ʼi te ʼu ʼaho lalahi. Pea ʼe lagi natou tuʼania naʼa hoko he meʼa ʼe kovi kia tatou moka tou mamate. Tou faiga ke tou mahino ki te ʼu meʼa ʼae ʼe natou logoʼi mo fakalogo lelei ki te ʼu meʼa ʼae ʼe natou lau, ke feala hatatou iloʼi pe koʼe ʼe natou tuʼania ʼo ʼuhiga mo tatou. (Taaga Lea 20:5) Ko te apositolo ko Paulo neʼe ina faigaʼi ke mahino ki te “hahaʼi kehekehe” ke feala ai hana akoʼi age ia te logo lelei. Kapau ʼe tou faigaʼi ke tou mahino ki ʼotatou famili, ʼe tokoni mai anai ke tou iloʼi pe ʼe feafeaʼi hatatou akoʼi age te moʼoni.—1 Kolonito 9:19-23.

13. ʼE feafeaʼi anai hatatou palalau mo ʼotatou famili ʼae ʼe mole tauhi kia Sehova?

 ¹³ Palalau ʼaki he agamalū. ʼE ui ʼi te Tohi-Tapu “ke lelei tuʼumaʼu ʼakotou palalau.” (Kolose 4:6) Kaʼe ʼe mole faigafua. ʼE feala ke tou kole kia Sehova tona laumalie maʼoniʼoni ke tokoni mai ke tou maʼu te agamalū pea mo agalelei ki ʼotatou famili. ʼE mole tou ke anai mo natou ʼuhi ko tanatou tui ki te ʼu akonaki hala. Kapau ʼe tou mamahi ʼuhi ko te ʼu meʼa ʼae ʼe natou lau mo fai, ʼe feala ke tou faʼifaʼitakiʼi te kau apositolo. Neʼe ui fenei e Paulo: “Ka leakoviʼi matou e te hahaʼi ʼe matou tapuakiʼi natou, ka fakatagaʼi matou ʼe matou ʼutakiʼi, pea ka fai he ʼu fasituʼu ʼo ʼuhiga mo matou, ʼe matou tali ʼaki he agamalū.”—1 Kolonito 4:12, 13.

14. Kotea te ʼu fua lelei ʼo ʼatatou aga ʼae ʼe lelei?

¹⁴ Ke lelei tuʼumaʼu tau aga. He koʼe ʼe maʼuhiga? ʼE moʼoni, ʼe feala ke tokoni ʼatatou palalau ʼae ʼe fai ʼaki he agamalū ke tou taupau te tokalelei mo ʼotatou famili. Kaʼe ʼe feala ke toe maʼuhiga age ʼatatou aga moka ʼe lelei. (Lau ia 1 Petelo 3:1, 2, 16.) Koia, faigaʼi ke ke tuku he faʼifaʼitaki lelei ke mahino ʼou famili ki te maʼuli fiafia ʼe maʼu e he taumatuʼa ʼe tauhi kia Sehova, ki te tokaga lelei ki ʼanatou fanau. ʼE natou toe mulimuli ki te ʼu pelesepeto Fakatohi-tapu, pea ʼe ʼi ai te ʼuhiga moʼoni ʼo tonatou maʼuli. Logo la ʼe mole tali anai e ʼotatou famili fuli ia te moʼoni, kaʼe ʼe tou fiafia ʼi tatatou iloʼi ʼae ʼe tou fakafiafiaʼi ia Sehova ʼaki ʼatatou aga ʼae ʼe lelei.

15. ʼE feafeaʼi hatatou teuteu fakatomuʼa ke mole tou ke mo ʼotatou famili?

¹⁵ Teuteu fakatomuʼa. Fakakaukauʼi te ʼu aluʼaga ʼae ʼe feala ke fakatupu ai he ʼu ke mo tou famili. Pea ke fakakaukauʼi pe kotea ʼae ka ke fai anai. (Taaga Lea 12:16, 23) Ko te meʼa ʼaia neʼe fai e te tuagaʼane ʼi ʼOsitalalia. Neʼe fakafeagai malohi te tamai ʼo tona ʼohoana ki te moʼoni pea ʼi ʼihi temi neʼe itaita. Koia ʼi muʼa ʼo tanā telefoni ki ai, neʼe kole e te tuagaʼane mo tona ʼohoana ia te tokoni ʼa Sehova ke nā maʼu ia te lotololomi. Neʼe natou faipalalau ki he ʼu meʼa ʼe mole fakatupu ke. Pea neʼe nā faigaʼi ke mole loaloaga fau ʼanatou faipalalau naʼa natou faipalalau ki te lotu ʼo tupu ai hanatou fihi.

16. Moka ke fefihiʼaki mo tou famili, ʼe feafeaʼi anai hau mole tukugakoviʼi ia koe?

¹⁶ ʼE moʼoni, ʼe mole feala ke ke hao mai te ʼu fefihiʼaki ʼae ʼe feala ke hoko mo tou famili ʼae ʼe mole tauhi kia Sehova. Koia moka kotou fefihiʼaki, ʼe lagi ke tukugakoviʼi ia koe heʼe ke ʼofa ki tou famili pea ʼe ke fia fakafiafiaʼi ia natou. Kaʼe ke ke manatuʼi ʼe tonu ke maʼuhiga age tau nofo agatonu kia Sehova ʼi tau ʼofa ki tou famili. Kapau ʼe mahino tou famili ki te faʼahi ʼaia, ʼe natou iloʼi anai ʼe maʼuhiga age tau tauhi kia Sehova. ʼE mole feala ke ke fakakinauʼi he tahi ke ina tali ia te moʼoni. Kaʼe, ʼe feala pe hau fakaha ki ʼihi ia te ʼu fua lelei ʼo tau mulimuli ki te ʼu lekula ʼa Sehova. Pea ohage pe ko koe, ʼe tokoni anai ia Sehova kia natou ke natou filifili pe ʼe natou tauhi anai kia te ia peʼe kailoa.—Esaia 48:17, 18.

17, 18. Kotea ʼae ʼe feala ke tokoni atu moka mavae he tahi ʼo tou famili ia Sehova?

¹⁷ ʼE faigataʼa ʼaupito moka fakamavae he tahi ʼo tou famili peʼe ina toʼo te tonu ʼae ke mavae ʼi te kokelekasio. Pea ko te lotomamahi ʼae ʼe ke logoʼi, ʼe hage pe ia ʼe hukiʼi koe ʼaki he heleta. Kaʼe ʼe feafeaʼi hau lava katakiʼi te mamahi ʼaia?

¹⁸ Tokaga tafito ki tau tauhi kia Sehova. Kapau ʼe ke tau mo te mamahi ʼaia, ʼe ʼaoga ke ke fakamalohiʼi tau tui. Lau tuʼumaʼu te Tohi-Tapu, teuteuʼi ʼau fono mo ke kau ki ai, faifakamafola tuʼumaʼu pea mo kole kia Sehova ke ina foaki atu te malohi ke ke faʼa kataki. (Suta 20, 21) Pea kapau kua ke fai te ʼu faʼahi fuli ʼaia kaʼe ʼe kei ke lotomamahi pe, ʼaua naʼa ke tuku ʼau faiga. Tokaga tuʼumaʼu ki tau tauhi kia Sehova. Pea ʼaki te temi, ʼe tokoni atu anai te ʼu faʼahi fuli ʼaia ke ke lolomi ʼau manatu mo te ʼu meʼa ʼae ʼe ke logoʼi ʼi tou loto. Ko te aluʼaga ʼaia neʼe hoko ki te tagata ʼae neʼe ina tohi te Pesalemo 73. Neʼe ʼi ai te kiʼi temi ʼi tona maʼuli neʼe faigataʼa kia ia hana lolomi ʼana manatu mo te ʼu meʼa ʼae neʼe ina logoʼi ʼi tona loto. Kaʼe neʼe tokoni age tana tauhi kia Sehova ke ina toe maʼu he ʼu manatu ʼe lelei. (Pesalemo 73:16, 17) Pea ʼe toe feala pe foki ke hoko te aluʼaga ʼaia kia koe.

19. ʼE feafeaʼi hau fakaha tau fakaʼapaʼapa ki te ʼu fakatonutonu ʼa Sehova?

¹⁹ Fakaʼapaʼapa ki te fakatonutonu ʼa Sehova. ʼE iloʼi e te ʼAtua ʼe fua lelei anai ʼana fakatonutonu kia tatou fuli, maʼia mo ia ʼae neʼe fakamavae. Logo la ʼe fakatupu lotomamahi moka fakatonutonuʼi he tahi ʼe tou ʼoʼofa ai, kaʼe ʼe feala ke tokoni ki ai ke toe liliu mai kia Sehova. (Lau ia Hepeleo 12:11.) Kaʼe ʼi te temi nei, ʼe tonu ke tou fakaʼapaʼapa ki te fakatotonu ʼa Sehova ke mole tou “fakatahi” mo natou ʼae neʼe fakamavae. (1 Kolonito 5:11-13) ʼE moʼoni ʼe mole faigafua. Kaʼe ʼe mole tonu ke tou felogoʼi peʼe ke tou faitohi kia natou ʼi te telefoni, peʼe ʼi te Neti, peʼe ʼi te ʼu fakatahiʼaga ʼi te Neti.

20. He koʼe ʼe mole tonu ke tou tuku tatatou falala?

²⁰ ʼAua naʼa tou tuku tatatou falala. Ko te ʼofa “ ʼe falala kia meʼa fuli.” Koia, ʼe tou falala tuʼumaʼu ai ʼe toe liliu mai anai ia natou ʼae ʼe tou ʼoʼofa ai kia Sehova. (1 Kolonito 13:7) Kapau ʼe tou tokagaʼi ia te ʼu faiga ʼo he tahi ʼi totatou famili, ʼe feala ke tou hufakiʼi ia ia ke ina toe maʼu he malohi ʼaki te Tohi-Tapu pea ke ina tali ia te fakaafe ʼaeni ʼa Sehova: “Toe liliu mai kia au.”—Esaia 44:22.

21. Kotea ʼe tonu ke ke fai mo kapau ʼe fakafeagai atu tou famili ʼuhi ko tau mulimuli ia Sesu?

²¹ Neʼe ui e Sesu ʼe tonu ke lahi age totatou ʼofa kia te ia. Pea neʼe tui papau ia ʼe lototoʼa anai ʼana tisipulo mo natou nonofo agatonu anai kia te ia tatau aipe pe ʼe fakafeagai age ʼonatou famili. Koia, falala kia Sehova mo kapau ʼe fakafeagai atu tou famili ʼuhi ko tau mulimuli ia Sesu. Kole kia te ia ke tokoni atu ke feala hau ʼutakiʼi te faʼahi ʼaia. (Esaia 41:10, 13) Pea ke fiafia, he ʼe ke iloʼi ʼe fiafia ia Sehova mo Sesu kia koe pea ʼe nā fakapale anai ia tau nofo agatonu.