Ko ia ʼae ʼe lotololomi ʼe

• fakatalitali muʼa pea hoki foaki age leva te meʼa ʼae ʼe loto ki ai

• ina lava tataʼofi te ʼu meʼa ʼae ʼe holi ki ai

• ina fakaʼosi he gaue maʼia pe la ʼe mole ina leleiʼia

• ina fakamaʼuhigaʼi age ʼihi ia ia totonu

Ko te kau tamaliki ʼae ʼe lotololomi ʼe natou lava fakafisi ki he meʼa ʼe kovi, logo pe la ko he aluʼaga ʼe feala ke ina fakafiafiaʼi ʼonatou loto. Kae, ko te kau tamaliki ʼae ʼe mole lotololomi ʼe

• natou agakovi

• natou lotomamahi ʼaupito

• natou suluka peʼe inu kava fakavale peʼe toloke

• mole lelei tanatou kakai

Neʼe ui ʼi te sivi ka lalahi ake te ʼu fanau ʼae ʼe lotololomi ʼe mole natou mahamahaki, mo tau mo he ʼu fihifihia fakapaʼaga pea ʼe mole ʼi ai hanatou tuʼā mai te telepinale. Koia ʼae neʼe ui fenei ai e te fafine faiako ko Angela Duckworth ʼo te Univelesite ʼo Pennsylvanie: “Ka kita maʼu te lotololomi ʼe fua lelei pe ia kia kita.”

Moka ʼe kotou fakafisi age ki he meʼa pea kotou fakafisi moʼoni.

PELESEPETO FAKATOHI-TAPU: “Ko takotou ‘ ʼIo’ ke ʼio pea ko takotou ‘Kailoa’ ke kailoa.”—Mateo 5:37.

ʼE feala ke ʼahiʼahiʼi e he tamasiʼi ʼana ʼu matuʼā ʼaki tana nani, maʼia moka hahaʼi. Kapau ʼe mulimuli pe te ʼu matuʼā ki te ʼu meʼa ʼae ʼe loto ki ai, ʼe fai tuʼumaʼu pe anai e te tamasiʼi te meʼa ʼaia moka ʼe loto ia ki he meʼa.

Kae, kapau ʼe fakafisi moʼoni te ʼu matuʼā ki te meʼa ʼae ʼe holi ki ai ia te tamasiʼi, ʼe feala ki te tamasiʼi ke ina taʼofi ai he ako maʼuhiga—ʼe mole feala ke ina maʼu tuʼumaʼu pe te ʼu meʼa ʼae ʼe loto ki ai. ʼE tohi fenei e te toketa ʼo te fakakaukau ko David Walsh: “ ʼE mole fakapotopoto anai te akoʼi e te ʼu matuʼā ki te ʼu fanau, ʼe natou maʼu tuʼumaʼu pe te meʼa ʼae ʼe natou loto ki ai. Kae ko natou ʼae neʼe akoʼi ʼaki te lotololomi, ʼe natou maʼuli fiafia age natou.” *

Kapau ʼe kotou akoʼi takotou fanau ke mole ina maʼu te ʼu meʼa fuli ʼae ʼe loto nei ki ai, ʼe faigafua anai kia ia moka kua lahi, tana fakafisi ki te toloke, peʼe ko te holi ki te ʼu felaveʼi fakasino peʼe ko ʼihi atu meʼa ʼe fakatupu tuʼutamaki kia ia peʼe ki ni ʼihi atu.

 Fakamahino age kia ia te ikuʼaga ʼo tana aga moka ʼe lelei peʼe kovi.

PELESEPETO FAKATOHI-TAPU: “ ʼE utu pe anai e te tagata te meʼa ʼae neʼe ina to.”—Kalate 6:7.

ʼE tonu ke iloʼi e he tamasiʼi ko meʼa fuli ʼe ina fai ʼe ʼi ai ʼona fua. Pea kapau ʼe mole lotololomi ʼe hoko anai he ʼu tuʼutamaki neʼe mole ʼamanaki ki ai. Ohage la, kapau ko te agamahani ʼa te tamasiʼi te hoko ita, ʼe mole fia kaumeʼa anai he tahi mo ia. Kae, kapau ʼe fakatupu ke age he tahi, ʼe faiga anai ke lolomi tana hoko ita pea ʼe toe leleiʼia anai ia ia e te hahaʼi. Fakamahino lelei age ʼe maʼuli fiafia anai moka ʼe ina maʼu tuʼumaʼu te lotololomi.

Akoʼi ki takotou fanau te ʼu meʼa ʼae ʼe maʼuhiga

PELESEPETO FAKATOHI-TAPU: “Ke kotou iloʼi papau te ʼu meʼa ʼae ʼe maʼuhiga ʼaupito.”—Filipe 1:10.

Ko te lotololomi ʼe mole gata pe ki tatatou tekeʼi te aga ʼae ʼe kovi, kae ʼe tonu foki ke tou fakahoko ʼotatou maʼua, logo la ʼe mole tou faʼa leleiʼia. ʼE maʼuhiga ʼaupito ki takotou fanau ke ina filifili te ʼu meʼa ʼae maʼuhiga, pea ke ina fakahoko. Ohage la, ʼe tonu ke ina fai tana ʼu meʼa ako, ʼi muʼa ʼo tana alu ʼo faigaoʼi.

Tuku age he faʼifaʼitaki ʼe lelei.

PELESEPETO FAKATOHI-TAPU: “Neʼe au tuku atu te faʼifaʼitaki, ohage pe ko taku fai kia koutou, ke kotou toe fai feia mo koutou.”—Soane 13:15.

ʼE fakatokagaʼi pe anai e takotou tamasiʼi takotou ʼu aga moka hoko he aluʼaga ʼe fakatupu itaita. Pea ʼe ina fakatokagaʼi pe anai he ʼu fua lelei moka ʼe kotou lotololomi. Ohage la, ʼe ina fai he aga ʼe kovi, ʼe kotou iita anai koa peʼe kailoa?