Ko te faʼahiga maʼuli ʼae ʼe ke leleiʼia. Ohage la, ʼe ke faigaʼi koa ke mole ke aga fakakaka ʼi te ʼu aluʼaga fuli ʼo te maʼuli? Koia la ʼae, ʼe ke fia akoʼi ai ʼau fanau ki te faʼahiga maʼuli ʼae ʼe lelei.

Pea ʼe ke toe fia akoʼi age foki te maʼuhiga ʼo te faʼa gaue, te mole fakapalatahi pea mo te aga fakaʼapaʼapa ki te hahaʼi. ʼE mahani ʼe faigafua age tanatou kamata gaueʼi te ʼu kalitate ʼaia ʼi tanatou kei liliki.

PELESEPETO FAKATOHI-TAPU: “Ako te fanau o mulimuli ki te ala ae e tonu ke mulimuli ai; pea ka liliu anai ia o matua, e mole anai toe liliu ia mai ai.” —Taaga Lea 22:6.

ʼI te kua laka ki muʼa ʼo te tekenolosia, ʼe kua toe maʼuhiga ʼaupito ai te ʼu aga ʼae ʼe lelei. ʼE ui fenei e te faʼe ko Karyn: “Ko te ʼu fakaneke kovi ʼe feala pe ke toe maʼu ʼi te ʼu kiʼi masini toʼotoʼo pea ʼi he temi pe ia. ʼE feala pe la ia ke tou heheka fakatahi mo he fanau kae ʼe ina lolotoga sioʼi ia he ʼu ʼata peʼe ko he ʼu pāki ʼe kovi.”

PELESEPETO FAKATOHI-TAPU: Te “[hahaʼi] ʼae kua fotufotuʼa ʼe natou akoako ʼonatou fealagia fakakaukau moʼo fakakehekeheʼi te meʼa ʼae ʼe lelei mo te meʼa ʼae ʼe kovi.”—Hepeleo 5:14.

Te ʼu aga fakaʼapaʼapa. Ohage la ko te fakaʼalofa, ko te fakamalō pea mo te tokagaʼi ʼo ʼihi. ʼE kua tahitahiga te fai ʼo te ʼu aga ʼaia, he kua tokaga tafito pe ʼihi ki te ʼu kiʼi masini foʼou, kae mole ki te hahaʼi.

PELESEPETO FAKATOHI-TAPU: “Ko te meʼa ʼae ʼe kotou loto ke fai atu e te hahaʼi, kotou fai feia maʼa natou.”—Luka 6:31.

Fakaha te ʼu aga ʼae ʼe lelei. Ohage la, ʼe ui ʼi te sivi neʼe fai, ko te kau tupulaga ʼae neʼe lelei tonatou akoʼi ʼo ʼuhiga mo te ʼu aga heʼe ʼaoga, ʼe mole natou fai anai te ʼu aga ʼaia.

TOKONI: Fakaʼaogaʼi he aluʼaga neʼe hoko ke tupu ai he faipalalau ki te ʼu pelesepeto maʼuhiga. Ohage la, neʼe fakaha ʼi te tala logo he fakapo. ʼE feala ke ke ui age feia: “Sio ki te fakapo ʼae neʼe hoko. ʼI tau manatu la, neʼe tupu kotea?”

ʼE ui fenei e Brandon: “ ʼE faigataʼa he filifili e te ʼu fanau te fai ʼo te meʼa ʼae lelei pea mo te meʼa ʼae ʼe kovi, mo kapau ʼe mole natou iloʼi kehekehe te meʼa ʼae ʼe lelei mo ʼae ʼe kovi.”

Akoʼi te ʼu aga ʼae ʼe lelei: Maʼia pe la mo te ʼu kiʼi tamaliki kua feala pe ke natou ako te ʼu kupu ʼaeni: “malo” peʼe “fakalelei siʼou loto” pea mo te aga fakaʼapaʼapa ki te hahaʼi. ʼE talanoa fenei ʼi te tohi ʼo ʼuhiga mo te ʼu matuʼā: “Ka mahino te ʼu fanau ʼe mole ko natou ʼateaina pe, kae ʼe natou toe kau foki ki he famili, ki he fale ako peʼe ki he kutuga, ʼe uga ai anai natou ke natou fakaha te aga ʼofa, he ʼe fua lelei anai kia natou pea mo te hahaʼi fuli.”

TOKONI: Foaki age ni gaue ʼo te loto fale ke natou fai, ke natou mahino ai ki te maʼuhiga ʼo te tokaga ki ʼihi.

ʼE ui fenei e Tara: “Ka mahani te ʼu fanau ki te fai ʼo te ʼu gaue ʼi tanatou kei liliki, ʼe natou fakahoko anai moka kua natou lalahi ʼi te taki ʼo tonatou maʼuli.”