ʼE KUMI TUʼUMAʼU PE E TE HAHAʼI IA TE ʼOFA. ʼE mole feala ke fiafia he maʼuli fakataumatuʼa, he famili peʼe ko he maʼuli fakakaumeʼa, mo kapau ʼe mole ʼi ai te ʼofa. ʼE ha mai ai ko te ʼofa ʼe maʼuhiga ki te lelei ʼo te fakakaukau pea mo te maʼuli fiafia. Kotea koa te fakaʼuhiga ʼo te “ ʼofa”?

Ko te ʼofa ʼae ʼe tou talanoa ki ai, ʼe mole ko te ʼofa femanakoʼaki ʼa he taumatuʼa ʼae ʼe ko he ʼofa foki ʼe toe maʼuhiga. Kae, ʼe tou talanoa ki he tahi faʼahiga ʼofa ʼe maʼoluga age ia, he ʼe ina ʼekenaki he tahi ke tokaga mo fakamuʼamuʼa ʼihi ia ia totonu. Pea ko te ʼofa ʼaia ʼe takitaki ʼaki he ʼu pelesepeto fakaʼatua mo te agalelei pea mo te loto ʼofa.

Koʼeni te fakaʼuhiga taulekaleka ʼo te ʼofa ʼaia, ʼe ui fenei: “Ko he tahi ʼe ʼofa, ʼe kataki fualoa ia pea mo agalelei. Pea ʼe mole maheka ia. ʼE mole laupisi, ʼe mole fiameʼalahi, ʼe mole ina fai he aga ʼe kovi, ʼe mole ina kumi te ʼu meʼa ʼae ʼe lelei kia ia, ʼe mole hoko ita. ʼE mole ina manatuʼi te kovi ʼae neʼe fai age kia ia. ʼE mole fakafiafia ia ʼi te heʼe faitotonu kaʼe ʼe fakafiafia ia ʼi te moʼoni. ʼE ina ʼutakiʼi ia meʼa fuli, . . . ʼe falala kia meʼa fuli pea ʼe ina katakiʼi ia meʼa fuli. Ko te ʼofa ʼe mole puli anai ʼi he temi.”—1 Kolonito 13:4-8.

Ko te taʼi ʼofa ʼaia ʼe “mole puli anai ʼi he temi,” ko tona fakaʼuhiga ʼe tuʼu maʼu ʼo talu ai. Pea ʼaki te temi ʼe feala ia ke liliu ʼo malohi. Pea ʼuhi ʼae ʼe kataki fualoa, mo agalelei pea mo lotofakamolemole, ko te ʼofa ʼaia “ ʼe ina fakatahiʼi te hahaʼi ʼi hona faʼahiga aluʼaga ʼe lelei tukupau.” (Kolose 3:14) Koia, ko te ʼu felogoi ʼae ʼe fakatafito ki ai, ʼe logoʼi ai te fiafia pea ʼe ko  he puipui logo la te ʼuhiga agahala. Tou vakaʼi te faʼahi ʼaia ʼi te nofo ʼohoana.

Neʼe akoʼi mai e Sesu Kilisito he ʼu pelesepeto maʼuhiga ʼo ʼuhiga mo te nofo ʼohoana. Ohage la, neʼe ina ui: “ ‘ ʼE mavae anai te tagata mai tana tamai pea mo tana faʼe pea ʼe pipiki anai ki tona ʼohoana, ʼo nā liliu ai ko he kakano ʼe tahi’ . . . Koia, ko te meʼa ʼae neʼe fakatahiʼi e te ʼAtua, ke ʼaua naʼa veteki e te tagata.” (Mateo 19:5, 6) ʼE tou maʼu ai pelesepeto maʼuhiga ʼe lua.

“ ʼO NĀ LILIU AI KO HE KAKANO ʼE TAHI.” Ko te ʼohoana ʼe ko he noʼo malohi pea ko te ʼofa ʼe ko he puipui mai te tono—ʼae ko he tagata peʼe ko he fafine ʼohoana ʼe liliu ko he “sino ʼe tahi” mo he tahi kehe ʼe mole ko tona ʼohoana. (1 Kolonito 6:16; Hepeleo 13:4) Ka mole nonofo agatonu he taumatuʼa ʼe maumauʼi ai te fefalalaʼaki pea ʼe toe maumauʼi ai mo te nofo ʼohoana. Pea, ʼe feala ke malave kovi ki te ʼu fanau he ʼe mole kei natou logoʼi ʼe puipui mo ʼofainaʼi natou peʼe ʼe feala ke natou lotokovi.

“KO TE MEʼA ʼAE NEʼE FAKATAHIʼI E TE ʼATUA.” Ko te ʼohoana ʼe taputapu. Ko te taumatuʼa ʼae ʼe fefakaʼapaʼapaʼaki ʼe nā faigaʼi ke tologa tona maʼuli fakataumatuʼa. Pea ka ʼe hoko he ʼu fihifihia ʼe nā tauʼi anai ke mole nā mavete. Koteʼuhi ʼe malohi pea mo tologa tana feʼofaʼaki. Ko te taʼi ʼofa la ʼaia ʼae ʼe ina “ ʼutakiʼi ia meʼa fuli,” ʼe tokoni mai ke tou fakatokatoka te ʼu faigataʼaʼia ke taupau maʼu ai te logo tahi pea mo te tokalelei.

Pea ka maʼuliʼi te ʼofa ʼaia e te ʼu matuʼā, ʼe fua lelei ʼaupito ki te ʼu fanau ʼi he famili. Neʼe ui fenei e te kiʼi taʼahine ko Jessica: “Ko ʼaku matuʼā ʼe nā feʼofaʼofani moʼoni pea mo fefakaʼapaʼapaʼaki. Moka au sio ki taku faʼe ʼe fakaʼapaʼapa ki taku tamai, tafito la ʼi tana tokaga kia matou ko ʼana fanau, ʼe au fia liliu ai ohage ko ia.”

Ko te ʼofa ʼe ko te kalitate takimuʼa ʼaia ʼo te ʼAtua. ʼE ui fenei mai ʼi te Tohi-Tapu: “Ko te ʼAtua ʼe ko te ʼofa.” (1 Soane 4:8) Koia, ʼe mole tou punamaʼuli ai ʼe ko Sehova “te ʼAtua fiafia.” (1 Timoteo 1:11) ʼE tou toe maʼuli fiafia moka ʼe tou faiga malohi ke tou faʼifaʼitakiʼi te ʼu kalitate ʼo totatou Tupuʼaga tafito tona ʼofa. ʼE ui fenei ia Efeso 5:1, 2: “Ohage ko ni fanau ʼofaina, kotou faʼifaʼitakiʼi ia te ʼAtua, pea ke hoko atu takotou maʼuʼuli ʼi te ʼofa.”