ʼE ui fenei e te tamai ʼi Malesia ʼo ʼuhiga mo te ʼu ʼata viteo Ke Ke Kaumeʼa Mo Sehova: “ʼE hage pe neʼe fagono Sehova ki te ʼu meʼa ʼae ʼi te loto ʼo te ʼu matuʼā.”

Talu mai te ʼu ʼuluaki kiʼi ʼata, neʼe fai e te kau Fakamoʼoni ʼa Sehova te ʼu kiʼi ʼata viteo ʼe ha ai ia Kalepo mo tona famili. Ko te ʼu ʼata viteo ʼaia, ʼae kua maʼu ʼi tatatou tuʼasila ʼi te neti jw.org, ʼe ina akoʼi ki te fanau te ʼu faʼahi ʼo ʼuhiga mo te aga pea mo te ʼu manatu fakalaumalie, ohage la he koʼe ʼe mole tonu ke natou kaihaʼa, pea ʼe feafeaʼi hanatou faikole ki te ʼAtua.

Ko te ʼuluaki ʼata kua fakaliliu ia lea ʼe 131, ʼo tokoni ai ki te fanau ʼi te malamanei katoa.

Neʼe tohi fenei e te faʼe ʼe ko ʼana toe ʼe toko nima: “Kua hili ki ai te vahaʼa katoa ʼo tamatou kua maʼu ia te foʼi ʼata viteo, Fagono, mo Talagafua pea ʼe Tapuakina Anai Koe. Kua tuʼa 50 tamatou sioʼi te foʼi ʼata viteo ʼaia.”

Ko Milie, ko te kiʼi taʼahine mai Pilitania ʼe taʼu 12, ʼe ʼi ai tana tehina lahi ko Thomas, ʼe taʼu 15 pea ʼe mahaki. ʼE tohi fenei e Millie: “Kua maʼu e Thomas te ʼu ʼata viteo ʼo Kalepo ʼi tona kiʼi masini Ipad, koia ʼe feala ke ina fakaha te ʼu ʼata ʼaia ki ʼana kaumeʼa ʼi te fale ako. ʼE ina leleiʼia te ʼu hiva pea ʼi te tahi ʼaho, neʼe tagi te tuagaʼane he neʼe malie ʼosi tana hiva te ʼu hiva ʼaia,. ʼE ko he meʼa fakaofoofo.”

Ko Ava, ʼae ʼe ina fakaha fakalelei ʼe ko tona taʼu 8 ʼaeni, mo mahina ʼe 9 pea mo ʼaho ʼe 25, ʼe ina tohi fenei: “Ko Kalepo pea mo tona tuagaʼane ʼe ko he ʼu faiako lelei ʼaupito maʼa te fanau.”

Ko Mikaylah, ʼe ina tohi fenei: “Ko taku taʼu 6 ʼaeni. ʼE au fakamalo atu ʼo ʼuhiga mo te ʼata viteo Fagono, mo Talagafua pea ʼe Tapuakina Anai Koe. ʼI te foʼi ʼata ʼaia, ʼe akoʼi mai ke au fakalogo ki ʼaku matuʼā koteʼuhi ʼe fiafia ai ia Sehova.”

Ko te tagata tupulaga ʼe gaue ʼi te televisio pea ʼe mole ko he Fakamoʼoni ʼa Sehova, neʼe ina sioʼi te ʼata viteo ʼE Mole Lelei Te Kaihaʼa. Neʼe punamaʼuli ʼaupito, tafitō ʼi tana iloʼi ʼae neʼe fai te ʼata ʼaia e te kiʼi kutuga. Neʼe ina ui fenei: “ʼE au iloʼi ni hahaʼi ʼe natou gaue maʼa te ʼu foʼi fale fai ʼata lalahi pea mo te ʼu fale fai ʼata liliki, pea neʼe au feʼekeʼaki pe feafeaʼi tanatou gaue. ʼI te ʼaho katoa, ʼe natou gaue mo faiga pe ke natou fai he ʼata ke kokolo ai te hahaʼi ʼi he kiʼi temi pe pea ʼosi ai leva ia. Kaʼe ko ʼakotou ʼata, ʼe natou fetogi te maʼuli ʼo te fanau, mo akoʼi age kia natou pe kotea te meʼa ʼae lelei mo te meʼa ʼae ʼe kovi, pea mo tokoni kia natou ke natou fai he ʼu tonu ʼe lelei. ʼE kotou fai he meʼa ʼe ʼi ai tona ʼuhiga, pea ʼe tokoni ki te hahaʼi.”

ʼE toe manatu tahi te ʼu matuʼā ʼi te malamanei katoa mo te ʼu palalau ʼaia. ʼE tohi fenei e te faʼe: “Ko Quinn, taku kiʼi tama ʼe taʼu tolu, neʼe ina sioʼi te ʼata viteo Ke Ke Kaumeʼa Mo Sehova. ʼI te lolotoga ʼo te hiva, neʼe sioʼi mai kia au, mo ina ʼai tona nima ki tona fatafata pea mo ina ui fenei mai: ‘Mama, ʼe au lotofiafia ʼaupito ʼi taku sioʼi te ʼata ʼaeni.’”