Neʼe ui e Sesu ʼe fakamafola anai te logo lelei ʼo te Puleʼaga ki te hahaʼi ʼi te kele katoa. (Mateo 24:14) Talu mai te taʼu 1909, neʼe fakaliliu ki te lea Fakasepania te ʼu tohi Fakatohi-tapu ʼae neʼe ta e te kau Fakamoʼoni ʼa Sehova, ʼo tokoni ai ki te hahaʼi ʼi te kele katoa ke natou logo ki te logo ʼo te Puleʼaga ʼi tonatou lea. ʼE hoa te lea Fakasepania ki te lea Fakasiana ʼae ʼe ko te ʼuluaki lea ʼi te ʼu lea ʼae ʼe lahi tona palalauʼi. Pea ʼi te malamanei, ko te teitei hahaʼi ʼe toko 500 miliona ʼe natou palalau Fakasepania.

ʼE ui fenei e William, ʼe kau ki te kutuga faifakaliliu ʼi te lea Fakasepania: “ʼE palalau te Fakasepania ʼi te malamanei katoa, ia fenua lalahi ʼe hogofulu tupu ʼe maʼu ai ni agaʼi fenua kehekehe. ʼE matou faiga ke matou fai he fakaliliu ʼe malave ki te loto ʼo te hahaʼi lautohi mai te ʼu faʼahiga maʼuli kehekehe pea mo te ʼu faʼahiga ako kehekehe.” Moʼo tokoni ke iku ia te fakatuʼutuʼu ʼaia, neʼe kau ki te kutuga faifakaliliu he ʼu tehina mo tuagaʼane mai Alesatina, mo Kolopia, mo El Salvador, mo Guatemala, mo Mekesiko, Mo Puerto Rico, mo Amelika, mo Uruguay, mo Venesuela, pea mo Sepania.

Lolotoga ni tau, neʼe fai e te kau Fakamoʼoni ʼa Sehova te fakaliliu Fakasepania ʼi Amelika, ʼaki te tokoni ʼo te kau Fakamoʼoni faifakaliliu ʼae neʼe nonofo ʼi Alesatina, mo Mekesike pea mo Sepania. Kaʼe ʼi te taʼu 1993, neʼe mavae te kutuga faifakaliliu Fakasepania ʼo natou olo ki Puerto Roco, ʼo feala ai ke gaue fakatahi te kau faifakaliliu fuli ʼi he koga meʼa ʼe tahi.

Pea ʼi Malesio 2012, neʼe fai leva te tonu ʼae ke toe mavae te Selevisi Faifakaliliu Fakasepania ʼo natou olo ki te Petele ʼa te kau Fakamoʼoni ʼa Sehova ʼi Sepania. ʼE manatuʼi fenei e Edward: “Neʼe tonu foki ke matou mavae fuli, pea ke ʼave mo ʼomatou uta, mo te ʼu meʼa gaue pea mo te tahi meʼa neʼe maʼuhiga ʼaupito kia matou: tamatou tanakiʼaga tohi.” Neʼe maʼu ʼi te tanakiʼaga tohi ʼaia ni tohi ʼe 2 500, ʼo kau ai te ʼu fakaliliu ʼo te Tohi-Tapu ʼi te Fakasepania ia lea e teau tupu.

ʼI te ʼaho 29 ʼo Maio 2013, neʼe tau te ʼu tehina mo tuagaʼane ʼo te Selevisi Faifakaliliu Fakasepania ki Sepania, pea neʼe fakatalitali lelei natou e te famili ʼo te Petele ʼo Sepania. Neʼe folau te kau fakaliliu, ʼo feia mo te ʼu tohi pea mo te ʼu meʼa gaue ʼo natou fakalaka ʼi te Tai ʼo Atlantique, kaʼe ʼi te fai fakalelei ʼo te ʼu fakatuʼutuʼu pea mo te gaue kinakina, neʼe hoko atu pe te ta ʼo te ʼu tohi ʼa te kau Fakamoʼoni maʼa te kau lautohi lea Fakasepania. ʼE ui fenei e Edward: “Ko te logo ʼa te Puleʼaga ʼae ʼe maʼuhiga ʼaupito pea ʼe matou loto ke kaugā malie te hahaʼi lea Fakasepania ʼae ʼe natou logo ki ai.”