Kailoa. ’E mo’oni, ’e matou faifakamafola tu’uma’u ’i te ’u ’api, ka’e ’e mole fakalogo tomatou haofaki ki te gaue ’aia. (Efeso 2:8) Kotea tona tupu’aga?

Tou to’o he fa’ifa’itaki: Kotou fakakaukau’i age he tagata loto manava’ofa, ’e ina fakapapau ’e ina foaki anai he me’a ’ofa ma’uhiga kia natou ’ae ka olo age ki te koga me’a mo te ’aho ’ae ne’e kua fakatu’utu’u ki ai. Kapau ’e kotou tui ki te fakapapau ’a te tagata ’aia, ’e kotou fai anai koa ia te me’a ’ae ’e ina kole atu? ’E mahino papau ia ’e kotou fai anai. ’E mahino ia, ’e kotou toe fakaha anai ki ’okotou kaume’a pea mo ’okotou famili, ke natou toe ma’u mo natou ia te me’a ’ofa ’aia. Koia, ’i takotou mulimuli ki te ’u me’a ’ae ’e kole atu e te tagata ’aia, ’e mole kotou malo anai ki te me’a ’ofa. Ka’e ’e ina foaki atu anai he’e ko te me’a ’ofa.

’O toe feia aipe, ’e fakapapau’i e te ’Atua ’e ina foaki anai ia te ma’uli he’e gata kia natou fuli ’ae ’e fakalogo age, pea ’e matou tui ki tana fakapapau ’aia. (Loma 6:23) ’E matou faiga ke matou palalau tu’uma’u ki te haha’i fuli ’o ’uhiga mo tamatou tui, ’aki ia te faka’amu ’ae ke natou ma’u mo natou ia te ’u fakapapau ’a te ’Atua. Ka’e ’e mole fakalogo tomatou haofaki ki tamatou faifakamafola. (Loma 1:17; 3:28) Koia ’e mole feala ki he tagata ke ina fai he gaue ’e tuha mo te me’a ’ofa ma’uhiga ’aia mai te ’Atua. “Nee ina haofaki tatou, o mole uhi ko te u gaue o te faitotonu nee tou fai, kae o mulimuli ki tona manavaofa.”—Tito 3:5.