Ko te fehu’i ʼae kotea te ʼuhiga moʼoni ʼo te maʼuli, ʼe lahi ʼona fa’ahiga fulihi. Ohage la ʼe feala ke tou fai te ʼu fehu’i ʼaeni: “He koʼe ʼe tou ʼi te kele?” pe’e “ ʼE ʼi ’ai koa he ʼaoga ʼo toku ma’uli?” ʼE fakaha mai ʼi te Tohi-Tapu ne’e fakatupu tatou ke tou kaume’a mo te ʼAtua. Tou fakasiosio fakatahi he ʼu mo’oni ʼe ʼaoga ʼe talanoa ki ai te Tohi-Tapu.

•   Ko te ʼAtua ʼe ko totatou Tupuʼaga. ʼE ui fenei ʼi te Tohi-Tapu: “Ko [te ʼAtua] ʼae neʼe ina fakatupu tatou pea ko tatou ʼaʼana.”—Pesalemo 100:3, NWT; Apokalipesi 4:11.

•   Ko me’a fuli ne’e fakatupu e te ʼAtua, ʼo feia mo tatou, ne’e ina fai ʼaki he fakatu’utu’u ke ʼaoga.—Esaia 45:18.

•   Ne’e fakatupu tatou e Sehova mo te loto ʼae ke tou tauhi age kia te ia. ʼE ʼaoga kia tatou te ʼu me’a fakalaumalie, ohage ko te fia iloʼi te ʼuhiga moʼoni ʼo te ma’uli. (Mateo 5:3) Pea ʼe ina toe loto foki ke tou ma’u ia te ʼu me’a fakalaumalie ʼaia mo’o fakafimalieʼi totatou loto.—Pesalemo 145:16.

•   ʼE feala ke tou maʼu te ʼu me’a fakalaumalie ʼaia ʼi tatatou fakakaume’a mo te ʼAtua. Tokolahi ʼe natou manatu ʼe mole feala ke kita liliu ko he kaumeʼa ʼo te ʼAtua, kae ʼe ui fenei ʼi te Tohi-Tapu: “Kotou fakaovi ki te ʼAtua, pea ʼe fakaovi atu anai kia koutou.”—Sakopo 4:8; 2:23.

•   Kapau ’e tou fia kaume’a mo te ʼAtua, ʼe tonu ke tou ma’uli ʼo mulimuli ki ’ana fakatotonu. ʼE fakaha lelei mai ʼi te Tohi-Tapu, ia Ekelesiasi 12:13, NWT, pe kotea te fakatotonu ʼaia: “Manavasi’i ki te ’Atua mo’oni pea mo taupau ʼana fakatotonu. Ko’ena te ma’ua katoa ’o te tagata.”

•   ʼI te ka haʼu, ʼe pulihi anai e te ʼAtua ia te mamahi. Pea ko ʼona kaumeʼa, ia natou ʼae ne’e atolasio kia ia, ʼe natou maʼu anai te maʼuli he’e gata. ʼE tou fiafia lahi anai ʼi tatatou ma’u ia te ʼu me’a lelei fuli pe ne’e teuteu’i e te ʼAtua ma’a te tagata talu mai te kamata.​—Pesalemo 37:10, 11.