ʼEi. ʼE tokaga ia te ʼAtua ki ʼana kaugana ʼae ʼe mahahaki. ʼO ʼuhiga mo te tahi ia natou, ʼe tou lau fenei ʼi te Tohi-Tapu: “Neʼe tokoni ia Sehova ki ai ʼi tona palepale mahaki.” (Pesalemo 41:3, NWT) Kapau ʼe ke tau mo he mahaki tausino, ʼe ʼaoga atu anai te ʼu puani ʼaeni ʼe tolu ka hoa mai:

1.   Kole ki te ʼAtua ke ina foaki atu te malohi ke ke utakiʼi te mahaki. ʼE feala ke ke maʼu ai “te tokalelei ʼo te ʼAtua ʼae ʼe maʼoluga age ʼi te ʼu ʼatamai fuli.” ʼAki te faʼahi ʼaia, ʼe siʼisiʼi anai tau tuʼania pea ʼe faigafua anai tau tali te mahaki.​—Filipe 4:6, 7.

2.   Ke ke maʼu he manatu ʼe lelei. ʼE ui fenei ʼi te Tohi-Tapu: “Ko te loto ʼae ʼe fiafia ʼe tokoni ki te faitoʼo, kaʼe ko te lotomamahi ʼe fakatupu gaʼegaʼe.” (Ta’aga Lea 17:22, NWT) ʼE tonu ke ke fakanoaʼi te mahaki. Ka ke aga fakakata ʼe feala ke tokoni atu ʼi te ʼu temi mamahi pea ʼe toe lelei foki ki tou malolo fakasino.

3.   Fakamalohiʼi tau ʼamanaki ki te ka haʼu. Ka malohi tau ʼamanaki, ʼe feala ke tokoni atu ke ke fiafia logo la te mahaki tausino ʼe ke tau mo ia. (Loma 12:12) ʼE ui ʼi Tohi-Tapu, kua tou vave maʼuʼuli pe nei ʼi he temi ʼe mole toe ui anai e he tahi: E au mahaki. (Esaia 33:24) ʼE fakamalolo anai e te ʼAtua ia te ʼu mahaki tausino fuli ʼe mole feala ke faitoʼo e te ʼu poto fakatoketa ʼo te temi. ʼE mole tou toe matutuʼa anai. ʼE ui fenei ʼi te Tohi-Tapu ʼo ʼuhiga mo te tagata matuʼa: “ʼE toe mata maʼuli anai ohage ko tana kei veliveli, ʼe toe liliu anai ki tona temi tupulaga.”​—Sopo 33:25, NWT.

 Nota: Logo aipe la ʼe natou tui papau ʼe foaki age e te ʼAtua ia he tokoni moʼoni, kae ʼe fakaʼaogaʼi e te kau Fakamoʼoni ʼa Sehova ia te ʼu faitoʼo fakatoketa moʼo tauʼi ʼaki te ʼu mahaki tausino. (Maleko 2:17) Kae, ʼe mole natou fakalotomalohiʼi anai he tahi ke ina fakaʼaogaʼi he faʼahiga faitoʼo he ʼe fakalogo pe ki te tagata takitokotahi.