5. Mal Tokes Moksim

“[Got alamb mal] tokes moksim alamb topor ninda.”—REVELESEN 11:18, NWT.

● Ye Piri kulu Por Naijeria kongan ere ond pam nolom kol sise erim. Ba nol Nige pambar oil puli wei toine olom bisnis tokes mokum. Olom embe nim, “oil toine kin nanj tokes moklo, pis togolo, nol tokes mokum eri. Embe pile na pemili kantawol enal wusngam nasem.”

WAL NAWAL PENDE YIPE MINE WONOM? Sape pam ga pende embe ninjip, kongar ding dingne wal pipiya 6.5 millien apnol kerma paim bar tuwal punom panijip. Ala wal ende, apnol pipiya 50 pesen poro meim e plastik, kongar andret puli wopundo wal e burda. E mongse ma, ya mala ond ku na wal pende meim tokes moklo kamkam topor dom. Alamb kongar ding tuwalto mal konganem ertokes mokjip mal olom erka eryem kera, kongar ding na oll 5-poro wopundo embe enda. Austrelia nius pepa Sydney Morning Herald embe nim, “alamb namba semine pundo ala mala wal konganem yipe esim mal anjngo ermonjip dal, kongar 2035 kunum mal tal sende moram kaple enda panjip.”

ALAMB PULI NAL BUNUMAN PAIM? Alamb, wal erka enam sape paim. Kenem ombun paim erka ere mal kantawol ka enamen kaple enem.

NIM PISEN E KUN PAIM MO? Alamb ye dulom puli nolmal na wal nalmal kantawol ka enamen mal neori kenjip. Embe esim ba, alamb mal yemyem papum nolmal anjngo tokes moksum.

NIM NALNE PISEN? Nim pisen Got wal ende ere, olom yu dongal ne pakim mal—alamb nolmal tokes moksum erka enda kaple enem mo?

Kenem yu propet 5-poro Baibel nepakim mal omukro kanjin, ba kunum porninda bar wal ka pende mine wonda panim eri. Nim yu e, yu propet namba 6 a paim omukro kanamen.

[Blurb]

“Na komna kulu paradais kawei ende sem mei nepinj, ba yipe kulu e oil toine tokes mokum.”—ERIN TAMBA, A RESIDENT OF THE GULF COAST, UNITED STATES, CONCERNING THE EFFECTS OF THE 2010 OIL SPILL IN THE GULF OF MEXICO.

[Box]

Got Erkelde Ombun Duwom Mine Wonom Mo?

Baibel yu propet nepakim mal ombun duwom yipe mine wonom, embe pile nim pisen Got mem pande wal embe mine wonom mo? Got erkelde kenem ombun duwom kaumon mo? Buk Tok Baibel I Skulim Yumi Long En ? sapta 11 a pu ki mei e pundom sindel, e Johova Witnis ga enjip buk.

[Picture Credit Line]

U.S. Coast Guard photo