YU DUWOM 29
Ombun Kerma Min Wonda ne er Kun er Men Mo?
“Embe pile enem pra er kun er moram.”—MAT. 24:44.
GOLANG 150 Got Ki Si Nim Siyem Kera
DUWOM ENAMEN YU KERMA a
1. Nalende ombun kerma min wonda ne, er kun er moramen wal kerma paim?
OMBUN min wonda ne er nombro monjin dal, kenem kolmem kantawol enamen. E embe mal, nolmal bo mo ombun kerma ende min wonom bar er kun er meim alamb, enjip kolmem kantawol ere, ala alamb ende pakerom eri. Ombun min wonom bar alamb pakerorojip okanaiseisen ende, Irop seim embe nim: “Yero er kun ka er meim alamb, ombun tuiro kolmem kantawol esim.”
2. Ombun kerma min wonda ne er kun er moramen, nalende wal kerma paim? (Matyu 24:44)
2 “Ombun kerma wei” wamnam pulnombol min wonda. (Mat. 24:21) Ombun kerma min wonda ne kenem pilkane esmen nalenem, ombun pende min wonom bol ding mal ma. Kongar 2,000 wopunom, Jises olom disaipol aiem walem nengo, kunum e, min wonda ne er kun ere kanpolto moya nim. (Matyu 24:44. gere.) Kenem er nombro monjin dal, ombun wonda akilgi ne kaunamen onom panda, ala alamb pende pra pakeronamen eri.—Luk 21:36.
3. Akilgi nim mem, alamb pakerom mem, na alamb kanka kanim mem, nalmal kenem pakerondo ombun kerma min wonda bar er kun er moramen?
3 Akilgi nim mem, alamb pakerom mem, na alamb kanka kanim mem, talende kenem pakerondo, ombun kerma min wonda bar er nombro moramen. Johova alamb kot er ngonda mal yu-omblombol, pilgi nane kenem bol opyem esim ga meim bar, nengoya nim dal kenem nal enamen? (Rev. 16:21) Akilgi nim mem kenem bol sem dal, Johova ninda yu karkar ere olom kenem pakero kantawol enda ne pilgi ninamen. Kenem pilgi ding angjen man kannom wal pende mo porpor wakrojip dal, kenem nal enamen? (Hab. 3:17, 18) Ende pakerom mambnem kenem bol sem dal, enjep wandil si ambsik panda wal ngo pakeronamen. Kantri puli wose ding pu kenem tonam bar ombun embe min wom dal, pilgi ding angjen ambajen man moram bar mand moramen. (Ese. 38:10-12) Kenem ende ende kanka kanmen mem dongal pam dal, kunum kes embe mal senda kunum ende ende pakeronamen.
4. Akilgi nimen mem, alamb wandil simen mem, na alamb kanka kanmen mem karkar enamen, Baibel nalmal tadom?
4 Got Yuwom Baibel a meim kenem dongal ngo, akilgi nimen mem, alamb wandil gosmon mem, na kanka kanmen mem, anjngo karkar eiya dom. Luk 21:19 embe dom: “Akilgi nim mem er kelde enem kolmem wak naronam.” Kolosi 3:12 embe dom: “Wandil mem kerma . . . enem konkongol mal keram.” 1 Tesalonaika 4:9, 10 embe dom: “Got enem duwom erngo ende ende kanka kandya nim. . . . Ba angjen man, kin yu ne enem dongal ngomon, mambnem e, kunum kunum enam.” Baibel wes yu embe mal meim, akilgi mem sem, alamb wandil sijip mem sem, na alamb kanka kanjip mem sem, ga disaipol walem nengom. Ba enjep mambnem ka embe mal kunum kunum enam pam, kenem pra ding mal enamen. Kenem embe enamen ne pinjin dal, komna Kristen monjip mambnem ka dingding ne, nalmal tanijip mal omukro kanamen. Embe enamen kenem pakerondo, enjep enjip mambnem karkar ere ombun kerma wonda bar er kun er moramen.
AKILGI DON MEM ER DONGAL ENDEL
5. Komna Kristen monjip ombun enjep bol min wom, nalmal akilgi nijip?
5 Komna aposol Pol kunum, Kristen monjip akilgi nim mem sinam ambsik pam. (Hib. 10:36) Nalerim, alamb ombun kaujip mal enjep kaujup. Ba, Kristen monjip bar ombun pende pra kaujup eri. Enjep puli to er kes enjip e, Juda lotu pengem enjip ga na Rom gapman kongan enjip ga mongse ma, enjep pemili aijep walem pra. (Mat. 10:21) Ala kunum pende ne kongrikeisen tuwal, apostet ga yu gend duwom er alamb ngojip bar kanpolto tuironam nalerim, kongrikeisen kumbol ding nasenda. (Apo. 20:29, 30) Wal embe min wom ba, Kristen ga akilgi nijip. (Rev. 2:3) Nalmal akilgi nijip? Baibel a yu bol pende akilgi nijip mal mom kanjup enjep pakerom, ende Jop. (Jems 5:10, 11) Enjep yane ne Johova dongal nganijip eri. (Apo. 4:29-31) Ala ende akilgi ninam bar Johova wal ka enjep ngonda, buro pinjip eri.—Apo. 5:41.
6. Alamb Merita bol opyem enjip kunum, olom mambnem erim bar nim nawal duwom enen?
6 Baibel a yu bol meim na kenem buk na nus a, alamb ombun min wongo kaujip mal yu bol meim kenem kunum kunum duwom er kanamen pakerondo, kenem bol ombun min wonda kauwo akilgi ninamen eri. Pilgi ding ambajen ende kulu Albeniya meim kangem Merita, pemili aiem olom bol opyem kes wei enjip. Ombun kauwo akilgi nim ambajen embe nim: “Jop yu bolom Baibel a pam na duwom er kanj dongal kerma ngom. Olom ombun kerma kes wei kauwum—ba, namal er kelnge min wom kanpolnarom—ba embe nim: ‘Na Got kin kamei mambnem waknaro golno porninda!’ (Jop 27:5) Na omukro kanj, Jop ombun kerma kes wei kauwo na ngom, ala namal er kelnge ombun min wom Jop pilkane narim, ba na pilkane erind.”
7. Yipe kenem ombun kerma ende nakaumon, ba nawal ende duwom ere kanpolto moramen?
7 Kenem akilgi ne moramen mem er dongal enamen ne pinjin dal, kunum kunum kumbola na bunumana seim wal, yane ne Johova ngonamen. (Fili. 4:6; 1 Tes. 5:17) Yipe kunum nim ombun duwom kes mal ende nakaunon, ba nim bunumana kes pisen, endel wal kanpolnaronon, mo kumbol ombun sinen kunum, Johova na pakera ne ki sinen mo? Yipe kunum dingding ne-ombun pende min wonom bar embe erin dal, bulto ombun kerma min wonda kunum, embe endel onom panda. Nim embe erin dal, olom nal kunum na nalmal nim pakeronda, pilkane enem ne pilgi wei nindel.—Sng. 27:1, 3.
AKILGI NIMEN MEM
Ombun yero wonom kauwo akilgi ne dongal meimen er kelde, mibulto wonda kauwo akilgi ninamen eri (Paragrap 8 kane)
8. (a) Yipe ombun kauwo akilgi nijin dal, mibulto ombun wonda nalmal kauwo akilgi ninamen? (b) Pilgi ding ambajen Mira ombun kauwo akilgi nim bar, kenem nawal duwom esmen? (Jems 1:2-4) (Piksa pra kane.)
8 Yipe ombun pende min wonom kauwo akilgi ne Johova bol ka monjin dal, bulto ombun kerma min wonda kauwo akilgi ninamen eri. (Rom 5:3) Nalende kenem embe nimen? Pilgi ding angjen ambajen man, ombun ende yero wom kauwo akilgi nijin pakerongo, bulto wom kaujin eri panijip. Ombun enjep bol min wom Johova pakerongo, akilgi ne kaujup er kelnge bulto ombun ende min wonda, pakeronda eri ne pilgi nijip. (Jems 1:2-4 gere.) Pilgi ding ambajen Mira, painia ende kulu Albeniya meim, olom bol ombun pende yero wom kauwo akilgi nim pakero kelnge bulto ombun pende wom anjngo kauwo akilgi nim. Olom embe nim: Kunum pende ne ombun puli e, na bol mongse min wonom ne pilpil erind. Ba, kongar 20 tuwalto ombun min wom kunum, Johova olom pakerongo kauwum mal pilyem kel pile, olom olom bol embe nim: ‘Johova bol ka moral. Embe pile, Johova nim pakerongo kongar puli tuwalto ombun min wom kauwon pam dal, olom bol ka molo konganem wak narondol.’ Ala, ombun min wonom kauwo akilgi don Johova pilkane enem, embe pile topum ka ngonda. (Mat. 5:10-12) Ombun kerma min wonda kunum, nim ombun kauwo akilgi nindel mal duwom er kanen pile, anjngo akilgi ne mol pundol.
WANDIL MEM TANINAMEN
9. Kongrikeisen Antiok Siria tuwalto monjip, wandil mem nalmal tanijip?
9 Kristen ga Judia monjip, komb kono kerma sem kunum, nawal min wom mal omukro kanamen. Kristen ga kongrikeisen Antiok Siria monjip, angjep man Judia monjip komb kono kerma sem panijip kunum, kenem pilkane esmen enjep, wandil wei sijip. Ba, wandil mongse nasijip, wal ende ere pakeronam ne enjip. “Disaipol walem yu ne ding kele, angjep man Judia monjip wal ngo pakeronamen panijip, enjep porpor ngonam kaple erim wal ngonjip.” (Apo. 11:27-30) Pilgi ding angjep ambajep man kono gonjip, kulu kolbar wei monjip, ba enjep pakeronam ka pinjip.—1 Jon 3:17, 18.
WANDIL MEM
Nolmal bo na ombun pende min wonom er kelde, wandil mem taninamen kol apis kerem (Paragrap 10 kane)
10. Nolmal bo mo ombun pende min wo, pilgi ding angjen ambajen man to er kes enda kunum, nal wusngam wandil mem taninamen? (Piksa pra kane.)
10 Yipe kenem kunum pra, lotu ding ga nolmal bo mo ombun kerma ende tom dal, wandil mem taninamen eri. Wusngam pende pakeronamen e—elda walem ki si kongan enem bar pakeronamen paninamen, ku ngo pakeronamen mo, ombun kauwum ga yane wusngama pilngonamen eri. b (Prov. 17:17) Ende embe mal, kongar 2020 COVID-19 tom kunum, 950 Disasta Rilip Komiti makromngo mal tambem yemyem ombun kaujup pake sinam pam bar pakeronjip. Embe pile, rilip komiti kongan esim ga, kenem, ka pane ngonamen wal kerma paim. Enjep pilgi ding angjep ambajep man kanka kane wandil gonjip mem, er kelnge nganj wal na pilgi wal tambem erim ngo, gulgar kes mom er ka ere, ala lotu enam gar pende kol tau ngonjip eri.—2 Korin 8:1-4 omukro kane.
11. Kenem wandil mem tane ende pakeromon kunum, Johova nalmal kangem kerma sinem?
11 Nolmal bo mo ombun kerma ende min wonom kunum, bulto kenem pu pakeromon mand meim alamb pilkane esim. Ende embe mal kongar 2019 kunum, nolkomb kerma ende er tom kangem, Ariken Doriyen, kulu Baamas Kingdom Gar ende to kes mokum. Angjen man gar e, ala taujup kunum, kampani ende dam Witnis-namom ki si ku nalnal ngopo wal pende ngondola nijip. Nijip kunum olom enjep nengo: “Na enem kongan wal na kongan wo pakeronam ga . . .ei ngonal panim. . . . Na mambnem embe enem okanaiseisen bol er pakeronal kapis panim. [Enem] pilgi ding ga wei pilngom bar na kawei pis panim.” Alamb puli yipe mala mol pum Johova ye nalmal kanpolnarom, ba, Johova Witnis ga ende ende pakerom kanpolrom, kenem pilkane ere kawei pismen, wandil mem tane ende ende pakeromon er kelde alamb se Johova wandil “mem kerma” pam ye kanpol tonamen ne mand wom!—Efe. 2:4.
12. Kenem wandil mem yipe tanijin dal, nalmal pakerondo er kun er molo ombun kerma min wonda kunum pra taninamen? (Revelesen 13:16, 17)
12 Nalende ombun kerma min wonda kunum, wandil mem taninamen wal kerma paim? Baibel taninde kenem pilkane esmen, ya mala gapman polotik pakenarom ga ombun sinam—e, yipe na mibulto ombun kerma min wonda kunum pra. (Revelesen 13:16, 17 gere.) Kunum ele pilgi ding angjen ambajen man nomolpa enam bar, nganj wal pende pake sinam panda. Kenem King aijen Krais Jises alamb kot er ngonda kunum, olom kanja, kenem wandil mem tanijin panda, embe pile “enem wo Kingdom siya ninda.”—Mat. 25:34-40.
PILGI DING ANGNEM AMBANEM MAN KANKA KANEN MEM ER DONGAL ENDEL
13. Rom 15:7 dom, komna Kristen monjip, ende ende kanka kanjip mem nalmal er dongal enjip?
13 Komna Kristen ende ende kanka kanjip, Kristen wei monjip tanijip. Ba kanka mem taninam onom pam mo? Kongrikeisen Rom wal ende min wom mal, omukro kand pe. Mosis Lo karkar enjip Juda alamb mongse ele namonjip, kulu jel nomolpa enjip bar mambnem jel mal karkar enjip alamb monjip eri. Kristen ga pende kongan nip ga monjip, pende priari monjip—ala Kristen pende kongan nip ga si garjep kol mokjip eri. Ba, enjip porpor nalmal, kanka mem er dongal ere tanijip? Aposol Pol enjep nengo, ende ende bol “yu ka ne siya nim.” (Rom 15:7 gere.) Pol nim yu mem nalmal paim? Ende ende bol “yu ka ne siya nim” akrojip yu mem embe, ende bol mambnem ka ere ne si garjep kol keram e, pilnim. Ende embe mal, Pol Pilimon nengo kongan nip ye Onisimus kewom ye: “Ne si mambnem ka era nim.” (File. 17) Ala Prisila na Akuila, Apolos bol “yu ka ne,” ne sijil. Olom Kristen mambnem enjel kanpol weironjil mal narom. (Apo. 18:26) Komna Kristen monjip pende wal kanpolronjip, pende kanpol narojip ba, ombun min wonda bar kanapile, mambnem ka ere ende ende ne sijip.
KANKA MEM
Kenem ombun ende kaumon kunum, pilgi ding angjen ambajen man kanka mem taninam kapismen (Paragrap 15 kane)
14. Pilgi ding ambajen Ana adam bol, kanka mem nalmal tanijil?
14 Kenem pra, pilgi ding angjen ambajen man kanka kanmen taninamen, enjep bol seno anj dunglom kele tapronamen. Embe enamen er kelde enjep, kenem kanka kanim mem taninam eri. (2 Kor. 6:11-13) Pilgi ding ambajen Ana na olom adam bol wal min wom mal omukro kand pe. Enjel misinari kongan kolnga si, pu Wes Aprika enambel ne punjil kunum, kes COVID-19 pulnombol tom. Embe pile, enjel kongrikeisen ga bol tapairo make ronam kaple narim. Enjel kanka mem nalmal taninabel? Enjel vidiyo konprens wusngama pilgi ding angjel ambajel man bol tapro, enjep kane yu ninabel ne kawei pinjip mal ne ngonjil. Mambnem ka embe enjil bar, enjel bol kapile ring enjip tex mesis kenjip eri. Nalernge misinari ral kongrikeisen kol pilgi ding angjen ambajen man kanpolronabel ka pinjil? Ambajen Ana embe nim: “Pilgi ding angna ambana man, kunum kes na ka sem na pemili aina bol kanka mem tanijip pilauro ninal kaple nanem. Ala embe enjip na kumbola wei pile, nanam kanka mem tanind eri.”
15. Pilgi ding angjen ambajen man porpor kanka kanamen mal, Wanesa mambnem erim bar nawal duwom esmen? (Piksa pra kane.)
15 Kenem puli kongrikeisen ende meimen bar, pilgi ding angjen ambajen man nomolpa esim bar ding mal nasem, ala mambnem aijep jeljel paim. Kenem enjep kanka kanmen mem er dongal enamen ne pinjil dal, mambnem ka esim bar mongse kanamen. Pilgi ding ambajen ende kangem Wanesa, Nu Julend kongan er meim, olom kongrikeisen aiema angam ambam man pende bol tapronal ne erim pesil pam. Ba, kongrikeisena ga pende mambnem enjip kanapim ga bol, sikele se kolbar napum, anj dunglom puli kele enjep bol taprom. Embe erim, olom pakerongo Johova enjep kanka kanem mal, kanim. Olom embe nim: “Na adana seket tawol kongan erim pile, kunum puli pilgi ding angjen ambjen man mambnem jeljel kannojip ga bol taproro enjin, ala na ga porpor bol tapka ronal onom pam. Johova alamb porpor kanka kanem nalenem, mambnem jeljel pam alamb si tuwal kel mokso olom lotu er ngom.” Johova alamb kanem mal kenem embe kanjin dal, kanka mem taninamen.—2 Kor. 8:24.
Ombun kerma min wonda kunum kenem pilgi ding ga bol tapromon mem dongal pam dal, Johova yu dongal ne kenem pakeronal pandom weieri tonda (Paragrap 16 kane)
16. Nalende ombun kerma wei min wonda kunum, pilgi ding angjen ambajen man kanka kanamen wal kerma paim? (Piksa pra kane.)
16 Ombun kerma wei min wonda kunum, pilgi ding angjen ambajen man bol kanka mem taninamen wal kerma wei panda. Ombun kerma min wonda kunum, Johova kenem nalmal pakeronda? Komna tawun Babilon ombun min wom, Johova alambem man wal enam mal yu nengom kenem omukro kanamen. Olom embe nim: “Alambna man, enem se gar kulo tuwalto wei seim bar punam, ala enem gar duwa koltungo, anj dunglom apal ende okul er morambe Got kumbol mul sinem porninda.” (Ais. 26:20) Yipe ombun kerma min wonda kunum, yu e, kenem karkar enamen mal paim. “Gar kulo tuwalto” wei seim panimen e, kenem kongrikeisen pilninda dom. Ombun kerma wei min wonda kunum, kenem pilgi ding angjen ambajen man bol Johova lotu er ngomon mem anjngo er monjin dal, olom kenem kantawol enal pane yu dongal dom. Embe pile, kenem ombol weieri pilgi ding angjen ambajen man kanka kanmen mem tokes namoksamen, er dongal enamen. Kenem kanka mem ambilgi ninamen bar, ombun tuiro kol moramen!
YIPE ER KUN ER MORAMEN
17. Kenem yipe er kun er monjin dal, ombun kerma min wonda kunum nawal enamen kaple enda?
17 “Johova kunum aiem kerma” mand wei wonom, alamb porpor bol ombun min wonda. (Sef. 1:14, 15) Johova alambem man pra ombun kaunam eri. Ba yipe er kun ere kanpolto monjil dal, ombun wonda kau kine molo ende pakeronamen eri. Ombun nal ombun ende kenem bol min wonda akilgi ne kaunamen. Ala kenem pilgi ding angjen ambajen man ombun kaunam, kenem wandil mem tane ambsik panda wal ngo pakeronamen. Kenem pilgi ding angjen ambajen man yipe kanka kanjin dal, mibulto kanka mem taninamen eri. Kenem embe enamen bar Johova topum ka ende ngonda e, kol aimanj mem ngonda. Mal kol senda kunum ombun duwom kanem kanem pi pande kanmen ala buro yem kel napisamen, weiwei auro ne sikera.—Ais. 65:17.
GOLANG 144 Topum Ka sindel bar Anjngo Kanjel!
a Ombun kerma pulnombol min wonda mand enem. Akilgi nimen mem, alamb pakeronamen ne pismen mem, na alamb kanka kanmen mem er kelde, ombun kerma wei alamb bol ende min nawoipum mal wonda bar, er kun er moramen. Kristen komna monjip mambnem embe mal karkar enjip kane, yipe kenem kunum enjep enjip mambnem nalmal karkar enamen. Mambnem embe mal kenem nalmal pakerondo, ombun kerma min wonda bar er nombro moramen.
b Ombun min wonom bar disasta rilip kongan er pakeronam ne pisam ga, yero Local Design/Construction Volunteer Application (DC-50) mo Application for Volunteer Program (A-19) bol tuwal kele, wironambe pu kongan enamen ne kui enam.