LESEN 01

Baibel Gerdel Bar Nim Nalmal Pakeronda?

PLAY

Kenem porpor ki pende kol meimen mem, ombun wonom bar, gosmon bar na mi bulto nawal min wonda nepismen. Kunum ding dingne wal min wonom bar, kenem bunuman kesmen eri. Ende embe mal, na nalmal ere nomolpa erind bar ku na nganj wal kansi nanam pakero, pemili erkelne kapil moram nepismen. Alamb pulikes Baibel yu omukro kanjip, kol meim bar ki kerma kerma mongse pundom nangonom, ba nomolpa esim bar nalmal enambe woka punda mal dom eri. Embe pile, nim kanen alamb ende Baibel pakeronda kaple enem mo?

1. Nal ki pende Baibel pundom ngonom?

Baibel ki kerma embe mal pende pundom ngonom: Kol meimen mem nalmal min wom? Kenem nalende embe meimen? Nalende alla napaim alamb ombun kawum? Alamb ende gorom kunum nalwal min wonom? Alamb porpor kumbol amin moram nepinjip dal, nalende opo nganmal puli paim? Akling ya mala nawal min wonda? Ki embe mal pundom Baibel a meim, alamb millien pulikes pundom kur kansinjip kunum kawei pinjip.

2. Nomolpa enen bar Baibel nim nalmal pakerondo kapil morol?

Baibel kenem kangip ka ngonom. Pende embe mal, pemili nal ere kawei pilmoram mal dom. Bunuman puli sinamen nalmal tomene kele, ala kongan enamen bar nalmal ere kapisamen mal kangip ka ngonom eri. Yu duwom endel kunum, Baibel yu pengem embe meim bar nal padom omukro kane, yu pende meim omukro kanpol tondol eri. Ala nim pilgi wei nindel . . . “[Baibel yu ka porpor meim] pakeronda nepisel.”—2 Timoti 3:16.

Buk e Baibel dumam nasinem. Ba pakero kelnde, nenem Baibel gere omuk manero kane pake sindel. Embe pile, Baibel wes porpor meim gere duwom enen wal bol mane omukro kanjel.

KANSE MUR PUNDOL

Baibel alamb nalmal pakerom mal kane, nem kapil gerdel mal kane, ala ende nim pakeronambe yu mem kanpol tondol mal kanjel eri.

3. Baibel kenem kolta ninda

Baibel, dop tus omblom bol ende do audom mal embe paim. Baibel konganem ka enjin dal kenem pakero kolta ninde, wal enamen bar bunuman ka karkar enamen, ala pakerondo mi bulto min wonda wal kanpol tonamen eri.

Buk Song 119:105 gere, ki meim omukro kanambel:

Buk Song bom ye, olom Baibel bol bunuman nalmal ambim?
Nim Baibel yu meim bol nalne pisen?

4. Kenem ki meim Baibel pundom ngonda kaple enem

Amb ende kongar puli ki pende mom pundom sinda kaple naerim, Baibel pundom ngom. Vidio kel kane, ki meim omukro kanambel.

VIDIO: Kanal Ne Kui Enen Wal Wak Narondol! (1:48)

Vidio kanjin bar, amb e nal ki pende mom?
Baibel yu duwom erkanim bar olom nalmal pakerom?

Baibel dom kenem ki puli ngoya dom. Matyu 7:7 gere, ki meim omukro kanambel:

Nim nal ki pende meim, Baibel pundom ngonda kaple enem nepisen?

5. Nim Baibel gerdel bar kapisel

Alamb puli Baibel kapil gerim bar enjep pakeronom. Vidio kel kane, ki meim omukro kanambel.

VIDIO: Baibel Gerdel (2:05)

Vidio kanjin, ngang ambel gal Baibel gernam bar nalne pinjip?
Bulto enjep Baibel gerjip kunum nalne pinjip?

Baibel kenem nawal enamen mal ne, kumbol amin ngo, ala mi bulto wal kawei min wonda mal dom eri. Rom 15:4 gere, ki e omukro kanambel:

Baibel yu dongal ne bulto wal kawei min wondo kumbol amin moramen padom, nim kapisen mo?

6. Alamb ende kenem pakeronambe Baibel yu mem kanpol tonamen

Nenem Baibel gerdel ba alamb puli omukro kanjip, gerdel wal ende bol omuk ai tonambel kunum, pake kerma sindel pam. Aposel 8:26-31 gere, ki e omukro kanambel:

Kenem Baibel yu nalmal kanpol wei tonamen?—Wes 30 na 31 kane.

Itopia ye, ende olom pakeronambe Baibel yu mem kanpol tonda ambsik wei pam. Alamb puli yipe meim, ende bol Baibel yubol tom kunum enjep pake kerma sim

ALAMB PENDE EMBE NIM: “Baibel yu duwom esim anj dunglom aei mal kesim.”

Ba nim nal panindel? Nalende embe don?

BOL TOJIN YU KERMA

Baibel alamb kunum ding dingne nomolpa enam mal kangip ka ngo, ki kerma pende meim pundom ngo, ala alamb erkelnde kumbol amin molo, bulto wal kawei min wonda kui esim.