An mga Saksi ni Jehova ha Bulgaria busy ha pagtutdo ha iba han kamatuoran mahitungod ha Dios ngan ha iya Pulong, an Biblia. Basi mabuligan hira, ginatos nga Saksi tikang ha iba nga katunaan an binalhin ha Bulgaria tikang han tuig 2000. Ano an pipira nga kakurian han pagbalhin basi makagsangyaw ha iba nga nasud? Kay ano nga sulit an pagbuhat hito? Ini an ginsiring han pipira nga binalhin ha Bulgaria.

 “Maiha na namon nga tumong nga mag-alagad ha iba nga nasud diin mas daku an panginahanglan,” siring ni Darren nga naukoy hadto ha England. “Katapos namon magpakasal ni Dawn, binalhin kami ha London basi bumulig ha pagtutdo han Biblia ha Russian nga linggwahe. Pipira ka beses nga naghimo kami hin espisipiko nga mga plano nga bumalhin ha iba nga nasud, pero tungod han iba-iba nga rason waray kami madayon. Kahuna namon imposible na ito mahitabo, pero ginbuligan kami han usa nga sangkay nga makita nga nagbag-o na an amon kahimtang, ngan kaya na namon makab-ot an amon tumong.” Namiling hira Darren ngan Dawn hin nasud nga nanginginahanglan hin dugang nga mga magturutdo han Biblia ngan posible nira mabalhinan. Han 2011, binalhin hira ha Bulgaria.

 An kalipay hadton binalhin ha iba nga bahin han kalibotan nakadasig ha pipira nga ha siyahan waray tumong nga mag-alagad ha iba nga nasud. “May nakilala ako nga madasigon nga mga Saksi nga malipayon nga nag-aalagad ha South America ngan ha Africa,” siring ni Giada nga naukoy hadto ha Italy upod an iya bana nga hi Luca. “Naparig-on gud ako han ira kalipay ngan han mga eksperyensya nga ira iginsumat. Nakabulig ito ha akon nga i-adjust an akon espirituwal nga mga tumong.”

 Hira Tomasz ngan Veronika binalhin tikang ha Czech Republic ngadto ha Bulgaria han 2015, upod an ira duha nga anak nga hira Klara ngan Mathias. Ano an nagpagios ha ira nga bumalhin? Hi Tomasz nagsiring: “Ginhunahuna namon hin maopay an ehemplo han iba, upod na an ehemplo han amon mga paryente nga binalhin ha iba nga nasud, ngan ginpamalandong namon an pipira nira nga eksperyensya. Nabantad kami han ira kalipay, ngan gin-iristoryahan namon ini ha balay.” Inin malipayon nga pamilya nagsasangyaw na yana ha ira bag-o nga teritoryo ha Montana, usa nga syudad ha Bulgaria.

 Hi Linda usa pa nga Saksi nga binalhin ha Bulgaria. Siring niya: “Damu ka tuig na an naglabay, binisita ako ha Ecuador ngan may nakilala ako nga mga bugto nga binalhin didto basi magsangyaw. Tungod hito nahunahuna ko nga bangin umabot an adlaw nga ako liwat makakag-alagad ha lugar nga mas daku an panginahanglan.” Hira Petteri ngan Nadja, usa nga mag-asawa tikang ha Finland, namalandong liwat ha ehemplo han iba. Siring nira: “Ha amon kongregasyon, may pipira nga eksperyensyado nga magwarali nga binalhin hadto ha iba nga mga lugar basi maghatag hin espirituwal nga bulig ha mga tawo. Pirme hira eksayted mag-istorya mahitungod han mga tuig nga ira gin-gamit hito nga klase han pag-alagad. Siring nira nga ito an pinakamaopay nga mga tuig han ira kinabuhi.”

 Importante gud nga magplano hin maopay adton naruruyag mag-alagad ha iba nga nasud. (Lucas 14:28-30) Hi Nele nga tikang ha Belgium, nagsiring: “Han mas seryoso ko na nga ginhuhunahuna nga mag-alagad ha iba nga nasud, nag-ampo ako ngan namiling hin mga artikulo parte hito ha aton mga publikasyon. Gin-adman ko ito ngan nangalimbasog nga mahibaroan kon ano an kinahanglan ko buhaton basi magin andam na nga bumalhin.”

 Hira Kristian ngan Irmina nga tikang ha Poland, sobra siyam ka tuig na nga naukoy ha Bulgaria. Nasantop nira nga daku nga bulig an ira pag-atender ha usa nga grupo ha Poland nga nagyayakan hin Bulgarian antes hira bumalhin. Gindasig hira han kabugtoan ngan ginbuligan nga mahibaro hito nga linggwahe. Siring nira Kristian ngan Irmina: “Naeksperyensyahan namon nga makalilipay gud an pagboluntaryo ngan makita kon paonan-o igintatagana ni Jehova nga Dios an imo mga panginahanglan. Kon kinaburut-on ka nga nasiring kan Jehova, ‘Aadi ako! Sugoa ako!’ mahihimo mo an mga butang nga waray mo ngani mahunahuna nga posible.”—Isaias 6:8.

 Basi magin andam ngan makatirok hin kwarta, hira Reto ngan Cornelia, usa nga mag-asawa tikang ha Switzerland, nagdesisyon nga magpasimple han ira kinabuhi. “Usa ka tuig antes kami bumalhin,” siring nira, “kinadto kami ha Bulgaria hin usa ka semana basi magin mas pamilyar ha paagi han pagkinabuhi didto. May nakaistorya kami didto nga mga misyonero nga naghatag ha amon hin praktikal nga sagdon.” Ginsunod nira Reto ngan Cornelia ito nga mga suhestyon ngan yana sobra 20 ka tuig na hira ha Bulgaria.

 Adton nabalhin ha iba nga nasud kinahanglan magpahiuyon ha mga kahimtang nga bag-o ha ira ngan bangin makuri pa ngani. (Buhat 16:9, 10; 1 Corinto 9:19-23) Usa nga makuri para ha damu amo an pag-aram hin bag-o nga linggwahe. “Nalilipay kami pagkomento ha amon kalugaringon nga mga pulong ha mga katirok,” siring ni Luca nga gin-unabi na. “Pero maiha-iha nga nakurian kami nga mag-asawa ha pag-andam hin bisan usa la nga simple gud nga komento ha Bulgarian nga linggwahe! Baga hin nagin mga bata kami utro. Ngani, an komento han Bulgarian nga kabataan mas maopay pa gud kay ha amon.”

 Hi Ravil nga tikang ha Germany, nagsiring: “Makapoy an pag-aram han linggwahe. Pero ginhinunahuna ko, ‘Ayaw pagin sobra kaseryoso, tawa gad la kon magsayop ka.’ Para ha akon, an mga ayat diri problema kondi bahin han akon sagrado nga pag-alagad kan Jehova.”

 Hi Linda nga gin-unabi na, nagsiring: “Maiha ako mahibaro pagyakan hin bag-o nga mga linggwahe. Makuri adman an Bulgarian, ngan damu ka beses nga naghunahuna ako nga umundang na la. Namingaw ako kay diri ko makaistorya an mga tawo ngan diri ko nasasabtan an ira ginsisiring. Basi magpabilin nga marig-on an akon espirituwalidad, nag-aaram ako han mga publikasyon gamit an Swedish nga linggwahe. Ha urhi, ha bulig han hinigugma nga kabugtoan nahibaro gihap ako pagyakan han Bulgarian.”

 Usa pa nga ayat amo an kamingaw ha imo ginbayaan nga mga kapamilya ngan kasangkayan. “Ha siyahan, namingaw ako,” siring ni Eva nga binalhin ha Bulgaria upod an iya bana nga hi Yannis. “Basi makaya ito, regular nga ginkukontak namon an amon kasangkayan ngan pamilya ha amon gintikangan nga lugar, ngan nagkaada liwat kami bag-o nga kasangkayan dinhi.”

May iba pa nga mga kakurian. Hira Robert ngan Liana nga binalhin tikang ha Switzerland, nagsiring: “Makuri gud para ha amon an linggwahe ngan an kultura, ngan waray namon laumi nga sugad ngay-an kahagkot an mga winter dinhi.” Pero an pagpabilin nga positibo ngan malipayon nakabulig hini nga mag-asawa nga mag-alagad hin matinumanon ha sulod hin 14 ka tuig.

 Malipayon nga iginrirekomendar ni Lilly an pagsangyaw ha lugar nga daku an panginahanglan. “Nakilala ko hi Jehova ha paagi nga bangin diri ko mahihimo kon nakadto ako ha akon gintikangan nga nasud,” siring niya. “Puydi ako magin mas busy ha pagbulig ha iba, ngan nabulig ini ha akon nga mag-uswag ha espirituwal ngan magin malipayon ngan kontento.” Nauyon hito hi Ravil nga iya bana. Siring niya: “Ini an pinakamaopay nga kinabuhi, usa nga waray kapariho nga oportunidad nga makilala an madasigon nga mga Kristiano tikang ha iba-iba nga nasud nga eksperyensyado gud ha pagtutdo han mga kamatuoran ha Biblia. Damu an akon nahibaroan tikang ha ira.”

 Tungod han pagin andam ha pagsakripisyo han damu, nagresulta ito ha malampuson nga pagsangyaw han “maopay nga sumat han Ginhadian . . . ha bug-os nga inuukyan nga tuna.” (Mateo 24:14) Tungod han pagin andam ha pagboluntaryo, nakita han mga binalhin ha Bulgaria kon paonan-o iginhatag ni Jehova an mga hingyap han ira kasingkasing ngan ginpalampos an tanan nira nga plano.—Salmo 20:1-4.