Sumala ha bag-o pa la nga report ha bug-os nga kalibotan, a mga usa ha upat nga tawo an naabat nga nag-uusahan hira.

•   “An kakulang hin pakig-upod ngan pakig-istorya ha iba, puydi makaapekto bisan kan kanay, anoman an ira edad, ngan diin man hira tikang.”—Chido Mpemba, cochair han World Health Organization’s Commission on Social Connection.

 Kabaliktaran ha bangin ginhuhunahuna han damu, diri la mga edaran o nag-uusahan nga tawo an naabat hin pag-inusahan, kondi pati liwat adton mga bata, mahimsog, malampuson ha kinabuhi, ngan inasaw-an. An diri pakig-istorya ngan pakig-upod ha iba ngan an pag-abat hin pag-inusahan makakadaot gud ha pisikal ngan emosyonal nga kahimsog han usa nga tawo.

•   “An pag-abat hin pag-inusahan diri la kay basta malain nga pag-abat,” siring ni Dr. Vivek Murthy, usa nga U.S. surgeon general. Hiya nagdugang: “An posibilidad nga mamatay tungod han diri pakig-upod o pakig-istorya ha iba maipapariho ha epekto han pagsigarilyo hin 15 ka beses ha usa ka adlaw.”

 Diri karuyag han aton Maglalarang nga mag-inusahan kita. Tikang pa ha tinikangan, katuyoan han Dios nga ma-enjoy han mga tawo an maopay ngan malipayon nga pakig-upod.

•   Prinsipyo ha Biblia: “An Dios nagsiring: ‘Diri maopay nga an lalaki padayon nga nag-uusahan.’”—Genesis 2:18.

 Karuyag han Dios nga magkaada kita maopay nga relasyon ha iya. Nagsasaad hiya nga magigin duok hiya ha aton kon mangangalimbasog kita nga magin duok ha iya.—Santiago 4:8.

•   Prinsipyo ha Biblia: “Malipayon an mga mahunahunaon han ira espirituwal nga panginahanglan, kay ira an Ginhadian han langit.”—Mateo 5:3.

 Karuyag han Dios nga singbahon naton hiya kaupod an iba. Kon bubuhaton naton ito, mabubuligan kita nga magin mas malipayon.

•   Prinsipyo ha Biblia: “Tagdon naton an usa kag usa basi mag-aghat ha pagpakita hin gugma ngan mag-opay nga mga buhat, nga diri ginpapabay-an an aton pagkatirok, . . . lugod nagdidinasigay ha usa kag usa.”—Hebreo 10:24, 25.

 Para ha dugang nga impormasyon kon kay ano importante nga atohan an pag-abat hin pag-inusahan, basaha an artikulo nga “Nagtitikadamu an Nasusubo Tungod han Pag-abat nga Nag-uusahan La—Paonan-o Mo Ito Malilikyan?.”