Masayon la an pagsiring nga an Satanas nga nababasa ha Biblia simbolo la han karaotan. Pero ini gud ba an igintututdo han Biblia? Kon oo, kay ano nga nasiring ito nga nakiistorya hi Satanas kan Jesu-Kristo ngan ha Dios mismo nga Makagarahum-ha-ngatanan? Hisgotan naton iton duha nga pakiistorya.

Han tikangan ni Jesus an iya ministeryo, tulo ka beses nga ginsulay hiya han Yawa. Siyahan, nangalimbasog hi Satanas ha pagsulay kan Jesus nga gamiton an gahum nga iginhatag han Dios kan Jesus para la ha iya kalugaringon nga kaopayan. Ikaduha, ginsulsolan han Yawa hi Jesus nga ibutang ha peligro an iya kinabuhi basi la makakuha hin atensyon. Ikatulo, igintanyag ni Satanas kan Jesus an pagmando ha ngatanan nga ginhadian ha kalibotan kabalyo hin bisan gutiay la nga buhat hin pagsingba. Waray gud magpasulay hi Jesus, ngan ha tagsa hiton tuso nga pagsulay, ginkukotar niya pirme an Kasuratan.​—Mateo 4:1-11; Lucas 4:1-13.

Hin-o an kaistorya ni Jesus? Ha usa ba nga karaotan nga aada ha iya sulod? Sumala ha Biblia, hi Jesus “ginsarihan ha ngatanan nga paagi pariho ha aton, pero waray hiya sala.” (Hebreo 4:15) Nasiring liwat ito: “Waray hiya nabuhat nga sala, waray liwat limbong dida ha iya baba.” (1 Pedro 2:22) Hi Jesus nagpabilin nga hingpit ngan may integridad. Waray gud niya tuguti nga magkaada hiya bisan ano nga karaotan. Klaro, an iya kaistorya diri usa nga karaotan nga aada ha iya sulod; tinuod nga persona an iya kaistorya.

Hito gihapon nga pag-istorya, may makikita nga dugang nga ebidensya nga hi Satanas tinuod nga persona.

• Tigamni nga igintanyag han Yawa kan Jesus an pagmando ha kalibotan kabalyo hin buhat ha pagsingba ha iya. (Mateo 4:8, 9) Magigin kawang ini nga tanyag kon diri tinuod hi Satanas. Dugang pa, waray kwestyona ni Jesus an pag-angkon ni Satanas hin sugad kadaku nga awtoridad.

• Katapos isalikway ni Jesus an mga pagsulay, “ginbayaan hiya han Yawa tubtob nga magkaada iba nga higayon.” (Lucas 4:13) Hini nga kahimtang, masisiring ba nga karaotan la hi Satanas o usa hiya nga pursigido nga kaaway?

• Tigamni nga “nagkaabot an mga anghel basi magmangno” kan Jesus. (Mateo 4:11) Ito ba nga mga anghel tinuod nga espiritu nga persona nga nagtagana hin pagparig-on ngan bulig kan Jesus? Oo. Kon sugad, kay ano nga huhunahunaon naton nga diri tinuod nga persona hi Satanas?

An ikaduha nga pakiistorya ni Satanas amo an may kalabotan kan Job, usa nga lalaki nga may kahadlok ha Dios. Hito nga asoy, duha ka beses nga nakiistorya an Yawa ha Dios. Ngan ha tagsa hito, gindayaw han Dios an integridad ni Job. Igin-insister ni Satanas nga nag-aalagad la hi Job tungod ha hakugnon nga hinungdan nga sugad hin nasiring hiya nga ginpapalit han Dios an pagin maunungon ni Job. Baga hin ginpapagawas han Yawa nga mas kilala niya hi Job. Gintugotan ni Jehova hi Satanas nga kuhaon an kan Job panag-iya, mga anak, pati pa ngani an iya kahimsog. * Ha urhi, nagin matin-aw nga husto an pagkakilala ni Jehova kan Job, ngan napamatud-an nga buwaon hi Satanas. Ginbendisyonan han Dios hi Job tungod han iya integridad.​—Job 1:6-12; 2:1-7.

Hito nga pag-istorya, nakikiistorya la ba hi Jehova ha karaotan nga aada ha iya sulod? An Biblia nasiring: “Mahatungod han Dios, an iya dalan hingpit.” (2 Samuel 22:31) Ito liwat nasiring: “Baraan, baraan, baraan hi Jehova nga Dios, an Makagarahum-ha-ngatanan.” (Pahayag 4:8) An pulong nga baraan nangangahulogan hin putli, sagrado, ngan waray sala. Hi Jehova hingpit ngan waray kasaypanan. Imposible gud nga magkaada hiya maraot nga kalidad.

Kondi an pipira bangin mangatadongan nga hi Job diri tinuod nga persona, salit susmatanon la an pag-istorya ni Jehova ngan ni Satanas. Kondi makatadunganon ba ini nga ideya? May iba pa nga teksto ha Biblia nga nagpapakita nga hi Job tinuod nga persona. Pananglitan, ha Santiago 5:7-11, gin-gamit hi Job sugad nga ehemplo basi mapagios an mga Kristiano nga magpailob ha magkuri nga sitwasyon ngan basi maliaw ha paghibaro nga ginbabalosan ni Jehova an sugad nga pagpailob. Magigin epektibo ba ini nga ehemplo kon diri tinuod nga persona hi Job ngan susmatanon la an pagpakuri ha iya ni Satanas? Dugang pa, ha Esekiel 14:14, 20, gin-unabi hi Job kaupod nira Noe ngan Daniel ha iginlista nga tulo nga matadong nga kalalakin-an. Pariho kanda Noe ngan Daniel, hi Job tinuod nga persona nga may daku nga pagtoo. Kon tinuod hi Job, diri ba makatadunganon hunahunaon nga tinuod liwat an nagpakuri ha iya?

Matin-aw, iginpapakita han Biblia nga hi Satanas tinuod nga espiritu nga persona. Kondi bangin maghunahuna ka, ‘Namimeligro ba ako ha iya, pati an akon pamilya?’

Handurawa nga nagkaada mga kriminal ha iyo lugar. Sigurado nga mamimeligro an katalwasan han kada tagsa ngan maaapektohan an moral han mga residente. Yana, hunahunaa an pariho nga kahimtang: Iginlabog nganhi ha tuna hi Satanas ngan an iya mga demonyo​—tinuod nga mga espiritu nga nagrebelde ha Dios pariho kan Satanas. Ano an resulta? Hunahunaa an imo nababatian nga mga news ha iyo lugar ngan ha bug-os nga kalibotan.

• Nakikita mo ba an pag-uswag han kamadarahog bisan pa han bug-os-kalibotan nga pangalimbasog ha pagpaundang hito?

• Nakikita mo ba an pagtikadamu han kaliawan nga may kalabotan ha espiritismo bisan pa han paniguro han damu nga kag-anak nga makontrol ito?

• Nakikita mo ba an aton tuna nga padayon nga nadadaot bisan pa han mga pangalimbasog ha pagsalbar hito?

• Baga ba hin may seryoso nga sayop ha sosiedad, nga sugad hin may pwersa nga nag-iimpluwensya ha katawohan ha pagbuhat hin maraot?

Alayon tigamni an ginsisiring han Biblia kon hin-o an promotor han mga karaotan yana: “Iginlabog an daku nga dragon, an orihinal nga halas, an gintatawag nga Yawa ngan Satanas, nga nanlilimbong ha bug-os nga inuukyan nga tuna. Iginlabog hiya ha tuna, ngan an iya mga anghel iginlabog upod niya. . . . Kairo han tuna ngan han dagat, kay an Yawa linusad ha iyo nga may daku nga kasina, kay maaram hiya nga halipot na la an iya panahon.” (Pahayag 12:9, 12) Katapos hisgotan an mga ebidensya, damu nga tawo an tinoo nga hi Satanas peligroso nga espiritu nga persona nga aktibo nga nag-iimpluwensya ha bug-os nga kalibotan.

Bangin maghunahuna ka kon paonan-o ka makakabiling hin panalipod. Husto la nga hunahunaon mo ito. An sunod nga artikulo maghihisgot hin pipira nga praktikal nga bulig.