Natawo ako ngan nagdaku ha usa nga pobre nga komunidad ha Roma. Miserable an amon kinabuhi. Waray ko makilala an akon nanay, ngan pirme kami diri nagkakasinabot ni Tatay. Salit nagdaku ako nga bugoy ha kakalsadahan.

Dyes anyos pa la ako, nangangawat na ako. Han 12 anyos ako, linayas ako. Damu ka beses nga ginkukuha ako ni Tatay ha presinto. Pirme ako nakikigdiskusyon—madarahog ngan nasisina ha bisan kan kanay. Pag-edad ko hin 14, binaya na gud ako ha balay. Nagtikang ako magdroga ngan umukoy ha kakalsadahan. Tungod kay waray nakakaturogan, nandidistrungkar ako hin awto ngan didto nakaturog tubtob ha kaagahon. Katapos namimiling ako hin fountain basi maghiram-os.

Nagin eksperto ako ha pangawat—tikang ha pag-snatch hin bag ngadto ha pangawat ha mga apartment ngan dagku nga balay kon gab-i. Nagin kilala ako, ngan waray pag-iha ginpaapi hin kilala nga gang, salit “na-promote” ako, kay mga bangko na an amon ginpapangawatan. Tungod kay agresibo, ginkakahadlokan ako. Diri ako nalakat nga waray pusil; ngani, bisan ha pagkaturog, may pusil ako ha ilarom han akon ulonan. An kamadarahog, droga, pangawat, pamuyayaw, ngan imoralidad an akon nagin kinabuhi. Pirme ako ginbibiling han mga pulis ngan makadamu ako maaresto. Gawas-sulod liwat ako ha prisohan.

Usa ka beses han makagawas ako ha prisohan, ginbisita ko an usa han akon dadâ. Diri ako maaram nga hiya ngan an akon duha nga patod mga Saksi ni Jehova na. Gin-imbitar nira ako nga tumambong ha ira katirok. Tungod kay karuyag ko mag-usyuso, inupod ako. Pag-abot ha Kingdom Hall, nag-insister ako paglingkod hirani ha  purtahan basi makita ko kon hin-o an nasulod ngan nagawas. Syempre, may pusil ako.

Ginbag-o hito nga katirok an akon kinabuhi. Ha akon pag-abat, aadto ako ha iba nga kalibotan. Gin-abiabi ako han malipayon ngan makisangkayon nga mga tawo. Nahinunumdoman ko pa an pagkabuotan ngan pagkasinsero han mga Saksi. Hirayo gud ini ha kalibotan nga akon gindak-an!

Nagtikang ako mag-aram han Biblia ha ira. Samtang nagtitikadamu an akon hinbabaroan, nagin mas klaro nga kinahanglan ko bag-uhon an akon pagkinabuhi. Ginsunod ko an sagdon han Proberbios 13:20: “Lakat kaupod han mga tawo nga makinaadmanon, ngan ikaw makikinaadmanon; kondi an kaupod-upod han mga lurong mag-aantos tungod hini.” Nahunahuna ko nga kinahanglan ko na bumaya ha gang. Diri adto masayon, pero ha bulig ni Jehova, nahimo ko.

Ginbag-o ko liwat an akon panagway. Nangalimbasog gud ako ha pag-undang ha pagsigarilyo ngan pagdroga. Nagpaarot ako, waray na mag-ariyos, ngan inundang ha pamuyayaw. Ha siyahan nga higayon ha akon kinabuhi, nakontrol ko an akon panggawi.

Waray ako hilig pagbasa ngan pag-aram, salit nakurian ako pagpokus ha pag-aram han Biblia. Kondi samtang nangangalimbasog, hinay-hinay nga hinbaroan ko nga higugmaon hi Jehova, ngan inabat ko nga may nagbag-o ha akon—nakukonsensya na ako. Agsob ko mahunahuna an akon nahimo nga mga sala, salit nagruruhaduha ako kon mapapasaylo pa ako ni Jehova. Ha sugad nga mga higayon, naliliaw ako ha pagbasa kon paonan-o ginpasaylo ni Jehova hi Hadi David ha iya mabug-at nga mga sala.—2 Samuel 11:1–12:13.

Nagin problema ko gihapon an pagsangyaw mahitungod han akon gintotoohan ha balay-balay. (Mateo 28:19, 20) Nahadlok ako nga may masangyawan ako nga naagrabyado ko hadto! Kondi hinay-hinay nga nalamposan ko ito. Nalilipay ako pagbulig ha iba ha paghibaro mahitungod han aton mahigugmaon nga Amay ha langit nga hura nga nagpapasaylo.

An kahibaro kan Jehova nagtalwas han akon kinabuhi! Kadam-an han akon kaupod hadto patay na o priso. Kondi ako, malipayon ngan nagpapamulat hin maopay nga tidaraon. Nahibaro ako magpaubos, magsugot, ngan magkontrol han pagbuto han akon kasina, salit maopay an akon relasyon ha mga tawo nga akon nakakaupod. Dugang pa, malipayon ako kaupod han akon mahusay nga asawa nga hi Carmen. Nalilipay kami pagbulig ha iba nga mahibaro mahitungod ha Biblia.

Aw anay, karuyag ko isumat ha iyo nga may-ada ako dungganon nga trabaho​—usahay ha bangko. Kondi imbes nga pangawatan, ginlilimpyohan ko lugod ito!