NANGUNGUNA NGA ARTIKULO | MGA BUWA NGA NAGPAPAHIRAYO HA MGA TAWO HA DIOS
Buwa: An Dios Usa nga Misteryo
AN GINTOTOOHAN HAN DAMU
An Kristiano nga relihiyon “ha tulo nga nangunguna nga bahin hito nga amo an Romano Katoliko, Este nga Ortodokso, ngan Protestante natoo ha uusa nga Dios ha tulo nga Persona: Dios Amay, Dios Anak, Dios Espiritu Santo. Sumala ha Kristiano nga teolohiya, ini nga pagtoo diri pagkilala ha tulo nga dios, kondi nga ini nga tulo nga persona uusa la.”—The New Encyclopædia Britannica.
AN KAMATUORAN TIKANG HA BIBLIA
Hi Jesus, an Anak han Dios, waray gud mag-angkon nga katupong hiya han Dios o nga hiya ngan an Dios uusa la. Lugod, hiya nagsiring: “Makadto ako ha Amay, kay an Amay mas gamhanan kay ha akon.” (Juan 14:28) Iya liwat ginsidngan an iya mga sumurunod: “Masaka ako ngadto ha akon Amay ngan ha iyo Amay, ha akon Dios ngan ha iyo Dios.”—Juan 20:17.
An baraan nga espiritu diri persona. Pananglitan, an mga Kristiano ha siyahan nga siglo “napuno han baraan nga espiritu,” ngan hi Jehova nagsiring: “Ibubuhos ko an akon espiritu ha ngatanan nga tawo.” (Buhat 2:1-4, 17) Salit, an baraan nga espiritu diri bahin han Trinidad. Ito an aktibo nga pwersa han Dios.
KON KAY ANO NGA KINAHANGLAN MO ITO HIBAROAN
An Trinidad, sumala ha Katoliko nga mga eskolar nga hira Karl Rahner ngan Herbert Vorgrimler “diri hibabaroan kon waray kapahayagan, ngan bisan kon may-ada kapahayagan, diri ito bug-os nga masasabtan.” Mahimo mo gud ba higugmaon an usa nga imposible makilala o masabtan? Oo, an doktrina han Trinidad nakakapugong ha mga tawo ha pagkilala ngan paghigugma ha Dios.
Nakita ni Marco, nga gin-unabi ha siyahan nga artikulo, nga usa nga ulang an Trinidad. “Kahuna ko igintatago han Dios an iya pangirilal-an,” siring niya, “tungod hito, hiya nagin mas hirayo, misteryoso, ngan diri masayon daupon.” Kondi, “an Dios diri Dios han kasamokan.” (1 Corinto 14:33) Diri niya igintatago an iya pangirilal-an. Karuyag niya nga makilala naton hiya. Hi Jesus nagsiring: “An amon ginsisingba kilala namon.”—Juan 4:22.
“Han hinbaroan ko nga an Dios diri bahin han Trinidad,” siring ni Marco, “nagkaada na ako personal nga relasyon ha iya.” Salit, kon gintatagad naton hi Jehova sugad nga persona, diri usa nga misteryoso nga estranghero, nagigin mas masayon para ha aton nga higugmaon hiya. An Biblia nasiring: “An diri nahigugma diri nakilala ha Dios, kay an Dios gugma.”—1 Juan 4:8.
