Abraham—Tawo nga Mapainubsanon

Hi Abraham nagliliningkod ha sulod han iya tolda ngan napapanalipdan tikang ha sirak han adlaw. Samtang nagkikinita hiya ha unhan, may nasiplatan hiya nga tulo nga lalaki. * Ha kadagmitan, dinalagan hiya pagtapo ha mga bisita ngan ginhangyo hira nga magpahuway anay ngan kumaon. Iya ginserbihan hira hin “gutiay nga tinapay,” kondi nagpadayon pag-andam hin damu nga pagkaon ngan naghikay hin kaluluto pa la nga tinapay, mantikilya, gatas, ngan hin primera klase nga karne. Ha paghikay hini ha iya mga bisita, iginpakita ni Abraham diri la an iya pagin maabiabihon, kondi sugad han aton mahihibaroan, an iya tinuod nga pagkamapainubsanon.—Genesis 18:1-8.

ANO AN PAGKAMAPAINUBSANON? An pagkamapainubsanon amo an pagin diri mapahitas-on o hambog. An mapainubsanon nga tawo nagtatagad ha iba nga mas labaw ha iya. (Filipos 2:3) Namamati hiya ha suhestyon ngan andam pagbuhat hin ubos nga trabaho para ha iba.

HA ANO NGA PAAGI NAGPAKITA HI ABRAHAM HIN PAGPAUBOS? Malipayon nga nagserbi hi Abraham ha iba. Sugad han gin-unabi na, han iya nakita an mga bisita, gin-asikaso dayon niya an ira panginahanglan. An iya asawa, hi Sara, nagdagmit pag-andam hin pagkaon. Kondi, tigamni kon hin-o an nagbuhat han kadak-an nga trabaho: Hi Abraham nagdalagan pagtapo ha mga bisita, hiya naghikay hin pagkaon, hiya nagdalagan ha pagpili hin hayop nga iihawon, ngan iya iginserbi an ngatanan ha ira. Imbes isugo an ngatanan ha iya mga surugoon, ginlugaringan hinin mapainubsanon nga lalaki inin ubos nga mga buruhaton. Waray niya hunahunaa nga an pagserbi makakaminos han iya dignidad.

Namati hi Abraham ha suhestyon han aada ha ilarom han iya awtoridad. Pipira la nga pag-istorya nira Abraham ngan Sara an nakarekord  ha Biblia, kondi duha ka beses mababasa nga namati hi Abraham kan Sara ngan ginsunod ito. (Genesis 16:2; 21:8-14) Ha usa hito nga sitwasyon, an suhestyon ni Sara “uraura ka mabug-at ha paniplatan ni Abraham.” Pero han makig-istorya hi Jehova kan Abraham, ngan ginsidngan hiya nga maopay an suhestyon ni Sara, mapainubsanon nga iya ginkarawat ngan ginsunod ito.

ANO NGA MGA LEKSYON AN ATON MAHIHIBAROAN? Kon kita tinuod nga mapainubsanon, malilipay kita pagserbi ha iba ngan pagbuhat han aton mahihimo para ha ira kaopayan.

Dugang pa, an aton reaksyon ha suhestyon han iba nagpapakita kon mapainubsanon kita. Imbes nga diri karawaton an ideya tungod la kay diri kita an nakahunahuna hito, maaramon nga magin makinarawaton hin suhestyon. (Proberbios 15:22) An sugad nga disposisyon labi nga mapulsanon ha usa nga may awtoridad. “Hinbaroan ko nga an mga personel han maopay nga superbisor diri nag-aalang ha pagpahayag han ira opinyon,” siring han eksperyensyado nga superbisor nga hi John. Nagdugang hiya: “Nagkikinahanglan hin pagpaubos an pagkarawat nga usa han imo personel mas maopay an ideya kay ha imo. Kondi, bisan pa hito, waray usa, bisan an nagdudumara, an makakasiring nga hiya la an may maopay nga opinyon.”

Kon ginsusubad naton hi Abraham pinaagi ha pagpamati ha mga suhestyon ngan pagbuhat hin ubos nga buruhaton para ha iba, makakarawat naton an pag-uyon ni Jehova. Oo, an “Dios nasuwahi ha palabilabihon, kondi nahatag hin grasya ha mapaubsanon.”—1 Pedro 5:5.

[Footnote]