Kay Ano nga an Kinabuhi Baga hin Waray Katuyoan?

KAY ano nga sadang ka tumoo nga an kinabuhi diri la “halipot ngan waray pulos” nga nalabay sugad hin “lambong,” pariho han paghulagway ni Hadi Salomon? (Eklesiastes 6:12, Maopay nga Sumat) An giniyahan nga Pulong han Dios, an Biblia—an burabod han masasarigan nga impormasyon—nagsasaad nga an kinabuhi ha tidaraon magigin may katuyoan gud.—2 Timoteo 3:16, 17.

An Biblia nagsusumat ha aton kon ano an orihinal nga katuyoan han Dios para ha tuna. Nagsusumat liwat ito kon kay ano nga an kalibotan puno hin kawaray-hustisya, panalumpigos, ngan pag-antos. Kay ano nga importante nga hisabtan ito? Tungod kay an siyahan nga hinungdan kon kay ano nga ginhuhunahuna han tawo nga waray katuyoan an kinabuhi amo an ira kawaray kaaram o pagbalewaray han katuyoan han Dios para ha tuna ngan ha katawohan nga aada hito.

Ano an Katuyoan han Dios Para ha Tuna?

Ginhimo ni Jehova nga Dios * an tuna basi magin hingpit nga paraiso nga urukyan han tawo. Usa nga lugar diin  an tawo magpapahimulos hin hura ngan makapatagbaw nga kinabuhi ha kahingpitan ha kadayonan. Inin importante nga kamatuoran basado ha Kasuratan pero diri kinakarawat han kadam-an nga natoo nga an tuna ginhimo la han Dios basi magin lugar diin puydi sarihan an tawo kon angayan ba hiya magkaada mas may katuyoan nga kinabuhi ha kalibotan han espiritu.—Kitaa an kahon ha pahina 6 nga  “Kinahanglan ba Bumaya ha Tuna Basi Magkaada hin May Katuyoan nga Kinabuhi?”

Ginhimo han Dios an lalaki ngan babaye ha Iya dagway ngan gintagan hin kapasidad ha pagsubad han Iya mga kalidad. (Genesis 1:26, 27) Ginhimo niya hira nga hingpit. Aada ha ira an tanan basi magkaada mapulsanon ngan may katuyoan nga kinabuhi ha kadayonan. Nag-uupod ito ha pagpuno han tuna, “pagtag-iya” hito, ngan paghimo hito nga paraiso sugad han hardin han Eden.—Genesis 1:28-31; 2:8, 9.

Ano an Nahitabo?

Matin-aw, may-ada diri maopay nga nahitabo. Diri nakikita ha mga tawo ha kabug-osan an kalidad han Dios. Waray ruhaduha an tuna yana diri paraiso. Ano an nahitabo? Gin-abuso han aton siyahan nga kag-anak, hira Adan ngan Eva, an ira kagawasan ha pagdesisyon. Karuyag nira ‘mahinugad ha Dios,’ makagdesisyon kon ano an ‘maopay ngan maraot.’ Ha pagbuhat hito, nagrebelde liwat hira pariho kan Satanas nga Yawa.—Genesis 3:1-6.

Kon sugad, diri katuyoan han Dios nga magkaada karaotan. Nagkaada la hito han nagrebelde hi Satanas—ngan ha urhi hira Adan ngan Eva—ha pagmando han Dios. Sugad nga resulta, nawara nira Adan ngan Eva an Paraiso ngan an kahingpitan nga nagresulta ha sala ngan kamatayon diri la ha ira kondi pati ha ira mga anak—an bug-os nga tawhanon nga pamilya. (Genesis 3:17-19; Roma 5:12) Ini an hinungdan kon kay ano nga an kinabuhi baga hin waray katuyoan.

Kay Ano nga Waray Dayon Wad-a an Karaotan?

An iba nagpapakiana: ‘Kay ano nga waray dayon wad-a han Dios an karaotan pinaagi ha pagbungkag kan Satanas ngan ha mga rebelde, ngan magtikang hin bag-o?’ Maaramon gud ba an pagbuhat hito? Ano an imo aabaton kon iginpapapatay dayon hin usa nga gobyerno an nakontra ha awtoridad hito? Diri ba ito magpapahirayo ha makatadunganon nga mga tawo ngan magpapaubos han reputasyon hito nga gobyerno?

Nagdesisyon an Dios nga diri dayon bungkagon an mga rebelde. Maaramon nga ginpalabay anay niya an panahon basi mabaton an mga isyu nga iginbangon ha Eden may kalabotan han iya pagmando.

Pagwara han Ngatanan nga Karaotan

Ini an angay hinumdoman: Gintugotan han Dios an karaotan nga umiksister ha sulod hin limitado la nga panahon. Ginbuhat niya ito kay maaram hiya nga maibabalik niya ha kahingpitan an resulta han karaotan kon masulbad na an importante nga isyu han iya pagmando.

Waray hingalimti ni Jehova an iya katuyoan para ha tuna ngan ha katawohan. Pinaagi kan propeta Isaias, Iya kita ginpasarig nga Hiya an Maglalarang han tuna, an usa nga ‘nagbuhat hito [basi] diri bayaan, ngan naghitsura hito [basi] pag-ukyan.’ (Isaias 45:18) Ha diri na maiha, iya ibabalik an tuna ha kahingpitan sugad han iya orihinal nga katuyoan. Katapos  mapamatud-an nga husto an paagi han iya pagmando, makatadunganon gud nga gamiton niya an iya gahum ha pagtuman han iya kaburut-on ngan bug-os nga pagbungkag han karaotan. (Isaias 55:10, 11) Ha modelo nga pag-ampo, naghangyo hi Jesu-Kristo nga gumios an Dios uyon hito. Gintutdoan kita ni Jesus nga mag-ampo: “Matuman an imo pagburut-an, sugad ha langit, amo man ha tuna.” (Mateo 6:9, 10) Nag-uupod ito hin ano?

An Kaburut-on han Dios Para ha Tuna

Kaburut-on han Dios nga ‘an maaghop makapanunod han tuna.’ (Salmo 37:9-11, 29; Proberbios 2:21, 22) Hi Jesu-Kristo ‘magluluwas han mga kablas nga nangangaraba ngan han nagkukuri.’ Luluwason niya hira tikang ha “pagtalumpigos ngan paglugos.” (Salmo 72:12-14) Mawawaray na girra, kamatayon, pagtangis, kasakit, o pag-antos. (Salmo 46:9; Pahayag 21:1-4) Damu hinduro nga tawo nga namatay durante han  panahon nga gintugotan han Dios an karaotan an babanhawon dinhi ha tuna ngan tatagan hin higayon nga makapahimulos hito ngan han iba pa nga bendisyon.—Juan 5:28, 29.

Oo, ibabalik ni Jehova ha bug-os nga kahingpitan an karaotan nga resulta han pagrebelde ni Satanas, salit ‘an kasamokan [an tanan nga hinungdan han kasubo ngan kasakit yana] mahingangalimtan na.’ (Isaias 65:16-19) Sigurado nga mahitatabo ito. Diri nagbubuwa an Dios. Ngatanan han iya saad natutuman. An kinabuhi diri na magigin ‘waray kapulsanan ngan pagdinakop la han hangin.’ (Eklesiastes 2:17, Maopay nga Sumat) Lugod, magigin puno ito hin katuyoan.

Kumusta man yana? Makakahatag ba hin katuyoan ha imo kinabuhi an paghibaro han igintututdo han Biblia ngan an pagsabot han katuyoan han Dios para ha tuna? Ito nga pakiana babatunon han sunod nga artikulo.

[Footnote]

[Kahon ha pahina 6]

 Kinahanglan ba Bumaya ha Tuna Basi Magkaada hin May Katuyoan nga Kinabuhi?

Ha mga siglo na, an mga tawo nga diri maaram han katuyoan han Dios para ha tuna nagtututdo nga kinahanglan naton bumaya ha tuna basi makapahimulos hin may katuyoan nga kinabuhi.

An iba nasiring nga an mga kalag “mas maopay an kahimtang antes han ira pagsulod ha lawas han tawo.” (New Dictionary of Theology) An iba liwat nasiring nga an kalag “priso ha lawas han tawo sugad nga sirot han ira mga sala han nakadto pa hira ha langit.”—Cyclopedia of Biblical, Theological, and Ecclesiastical Literature.

An Griego nga mga eskolar, sugad kan Socrates ngan Plato, nagtutdo hini: Ha takna nga makagawas an kalag ha mga limitasyon han pisikal nga lawas han tawo, dida la ito “makakagawas ha pagin waray direksyon ngan ha mga kaluyahan ngan ha mga kahadlok, ngan ha magraot nga ungara hito, ngan ha ngatanan nga kasakitan nga naieksperyensyahan hito,” ngan maukoy “kaupod han mga dios tubtob ha waray kataposan.”—Plato’s Phaedo, 81, A.

Ha urhi, iginlakip han tinatawag nga mga lider han mga Kristiano ha ira katutdoan an pilosopiya han Griego nga mga eskolar nga an tawo ‘may-ada diri-mamaratyon nga kalag.’—Christianity—A Global History.

Itanding ito nga mga ideya ha tulo nga importante nga ginsisiring han Biblia:

1. Katuyoan han Dios nga an tuna magin permanente nga urukyan han mga tawo, diri lugar diin puydi sarihan hira kon angayan ba hira umukoy ha langit kaupod niya. Kon ginsunod nira Adan ngan Eva an mga balaud han Dios, buhi pa unta hira ha paraiso nga tuna.—Genesis 1:27, 28; Salmo 115:16.

2. Samtang kadam-an han relihiyon nagtututdo nga an tawo may-ada diri-mamaratyon nga kalag ha sulod hito, simple la an igintututdo han Biblia. An tawo amo an “buhi nga kalag” nga “tikang ha tapotapo han tuna.” (Genesis 2:7) An Biblia waray magsiring nga diri namamatay an kalag. Lugod, ito nasiring nga an kalag mahimo mamatay o mabungkag, o diri na gud maeksister. (Salmo 146:4; Eklesiastes 9:5, 10; Esekiel 18:4, 20) An siyahan nga tawo, hi Adan, namatay ngan binalik ha tapotapo diin hiya tikang. Binalik hiya ha diri pag-eksister.—Genesis 2:17; 3:19.

3. An paglaom han tawo diri nadepende ha pagkaada diri-mamaratyon nga kalag nga nakadto ha kalibotan han espiritu, kondi ha saad han Dios nga pagkabanhaw ha paraiso nga tuna.—Daniel 12:13; Juan 11:24-26; Buhat 24:15.