An Baraan nga Espiritu—Kay Ano nga Iba-iba an Pagsabot Hito?

ANO an baraan nga espiritu? Ito nga pakiana baga hin simple la, kondi diri simple an pamiling hin baton hito. Hi Papa Benedict XVI nagsiring ha usa nga grupo ha Australia: “Imposible an pagkaada matin-aw nga pagsabot mahitungod han Espiritu.”

Oo, damu an opinyon ngan waray kasigurohan nga mga baton ha pakiana nga, Ano an baraan nga espiritu? Ini an pipira han komon nga baton:

• Usa nga tinuod nga persona nga naukoy ha sulod han mga sumurunod ni Kristo.

• An presensya han Dios ha kalibotan.

• An ika-tulo nga persona han Trinidad.

Kay ano nga iba-iba an baton hito nga pakiana? An kagupong nagtikang pa han ika-upat ka siglo K.P., han an pipira nga teologo nagsiring nga an baraan nga espiritu usa nga persona nga katupong han Dios. Kondi, ini nga ideya diri igintututdo han Biblia o han siyahan nga mga sumurunod ni Kristo. An New Catholic Encyclopedia nasiring: “An Daan nga Tugon matin-aw nga waray maghulagway han espiritu han Dios sugad nga persona . . . simple la an iginpapasabot hito, ito an gahum han Dios.” Ito nagdugang: ‘Iginpapakita han kadak-an nga bahin han Bag-o nga Tugon nga an espiritu han Dios diri usa nga persona; mas nagin matin-aw ini ha pagkapariho han espiritu ngan gahum han Dios.’

Natural la nga makurian an mga tawo ha paghunahuna nga persona an gahum. Salit ha bag-o nga surbey ha Estados Unidos, nakita nga kadam-an han tawo diri natoo nga an baraan nga espiritu usa nga persona. Husto ba hira? O sadang ba naton toohan an mga teologo nga nainsister nga “an Baraan nga Espiritu usa nga Persona nga bulag ha Amay ngan ha Anak”?

Basi hibaroan an masasarigan nga baton, kinahanglan usisahon naton an Pulong han Dios, an Biblia, nga detalyado nga naghuhulagway han baraan nga espiritu. Hi apostol Pablo nagsurat: ‘An ngatanan nga Baraan nga Surat nga ginpakaaghat han Dios may kapulsanan ha pagtutdo, ha pagbadlong.’—2 Timoteo 3:16.

Kay ano nga sadang mo pangalimbasogan nga hibaroan an kamatuoran mahitungod han baraan nga espiritu? Tungod kay an paghibaro han kamatuoran mabulig ha imo ha pagkarawat han bulig han Dios. May mga panahon ba nga inaabat mo nga waray ka na mahihimo? Hi Jesus nagsaad ha iya mga disipulo: ‘Pangamuyo, ngan ihahatag ha iyo. Kon nahababaro kamo paghatag hin mag-opay nga hatag ha iyo kabataan labi pa gud an iyo Amay nga langitnon, nga mahatag han Espiritu Santo ha mga nangangaro ha iya.’—Lukas 11:9, 13.

Ha masunod nga mga artikulo, uusisahon naton ha Biblia kon ano an baraan nga espiritu. Ngan aton paghihisgotan kon paonan-o ito makakabulig ha aton.

[Blurb ha pahina 3]

Iginsusumat han Biblia kon ano an baraan nga espiritu