Nahadlok Ka ba ha mga Patay?

“DIRI. Kay ano nga mahadlok ako?”, an baton han damu nga tawo. Natoo hira nga an patay, patay na. Kondi, minilyon an kombinsido nga an patay padayon nga nabubuhi sugad nga espiritu.

Ha Benin, ha Weste nga Aprika, natoo an damu nga an patay mahimo bumalik ha pagpatay han iya iba nga kapamilya. Salit, nagbabaligya an mga tawo hin mga propriedad o nangungutang pa ngani basi ibayad ha mga halad nga hayop ngan mga seremonya ha pagpalukmay han ira namatay nga kapamilya. An iba nagbubuhat hin espiritismo nga nag-uupod han ideya nga may espiritu nga bahin an tawo nga diri namamatay, ngan mahimo ito makigkomunikar ha mga buhi. An iba nga may-ada magpakaharadlok nga eksperyensya natoo nga nahitatabo ito tungod han espiritu han mga patay.

Usa han may sugad nga eksperyensya amo hi Agboola nga nag-uukoy hirani ha giutan han Benin ngan Nigeria. Hiya nagsiring: “An espiritismo bahin han adlaw-adlaw nga pagkinabuhi ha amon lugar. Kustomre an pagkaada seremonya ha pagkarigo han patay basi iandam ito para ha lugar han mga espiritu. Agsob nga gintitirok ko an sobra nga sabon nga ginagamit ngan ginsasalaktan ito hin espisipiko nga klase hin mga dahon. Katapos, samtang ginpapahid ko ito ha akon riple, ginyayakan ko ha daku nga tingog an hayop nga karuyag ko madakop. An mga buhat nga sugad hini komon ngan baga hin epektibo. Kondi, makaharadlok an iba nga bahin han espiritismo.

“Han misteryoso nga mamatay an akon duha nga anak, nagtahap ako nga may nagbubuhat hin espiritismo kontra ha akon. Basi hibaroan kon husto an akon tahap, kinadto ako ha lagas nga kilala nga espiritista. Nagsiring hiya nga husto ako. Ngan mas maraot pa, nagsiring hiya nga an akon mga anak naghuhulat na ha lugar han mga espiritu basi mag-alagad ha nagpatay ha ira kon mamatay na ito. Katapos hiya nagdugang nga ito liwat an kapalaran han akon ikatulo nga anak. Paglabay hin pipira ka adlaw, namatay liwat ito nga akon anak.”

Katapos, nakaistorya ni Agboola hi John, usa nga Saksi ni Jehova nga taga-Nigeria. An ginsiring ni John mahitungod ha kahimtang han mga patay basado ha Biblia, ngan nabag-o hito an kinabuhi ni Agboola. Mahimo liwat hito mabag-o an imo kinabuhi.

Buhi ba an mga Patay?

Hin-o an makakahatag hin husto nga baton hito nga pakiana? Diri an bisan hin-o la nga tawo, bisan kon kilala hiya nga espiritista. Lugod, hi Jehova, an Maglalarang han ngatanan nga buhi ‘ha langit ngan ha tuna, han mga bagay nga nakikita ngan diri nakikita’ an makakabaton hito. (Kolosas 1:16) Ginlarang niya an mga anghel ha pag-ukoy ha lugar han mga espiritu ngan an mga tawo ngan hayop ha pag-ukoy ha tuna. (Salmo 104:4, 23, 24) An ngatanan nga may kinabuhi nadepende ha Iya. (Pahayag 4:11) Kon sugad, tagda kon ano an ginsisiring han Pulong han Dios, an Biblia, mahitungod ha kamatayon.

Hi Jehova an siyahan nga naghisgot mahitungod han kamatayon. Ginpahamangnoan niya hira Adan ngan Eva nga mamamatay hira kon magtalapas hira ha iya. (Genesis 2:17) Ano an karuyag sidngon hito? Hi Jehova nagsiring: “Tapotapo ka man, ngan ha tapotapo ikaw hiuuli.” (Genesis 3:19) Kon namamatay an tawo, nadudunot an lawas hito; nabalik ito ha pagin tapotapo, ngan natatapos an kinabuhi hito.

Tinuyo nga nagtalapas hira Adan ngan Eva salit ginsirotan hira hin kamatayon. Pero, diri hira an siyahan nga namatay, kondi an ira anak nga hi Abel. Ginpatay hiya han iya magurang nga hi  Kain. (Genesis 4:8) Pero waray mahadlok hi Kain nga makakabulos pa an iya patay nga bugto. Lugod, nahadlok hiya ha mahimo buhaton ha iya han mga buhi.—Genesis 4:10-16.

Paglabay hin mga siglo, nasina hi Hadi Herodes han ginsumatan hiya han mga astrologo nga may “hadi han mga Judio” nga natawo ha iya nasasakopan. Tungod kay determinado nga patayon inin posible nga karibal, iya iginpapatay an ngatanan nga bata nga lalaki ha Betlehem nga tubtob dos anyos an pangidaron. Kondi, usa nga anghel an nagpahamangno kan Jose nga dad-on hira Jesus ngan Maria ngan ‘pumalagiw ngadto ha Ehipto.’—Mateo 2:1-16.

Han mamatay hi Herodes, an anghel nagsiring kan Jose nga bumalik ha Israel, ‘kay patay na an nagpipinamiling han kanan bata kinabuhi.’ (Mateo 2:19, 20) An anghel, usa nga espiritu mismo, maaram nga diri na madadaot ni Herodes hi Jesus. Waray mahadlok hi Jose ha patay nga hi Hadi Herodes. Kondi, nahadlok hiya ha mahimo buhaton han madarahog nga anak hito, hi Arkilao. Salit, nag-ukoy hiya ngan an iya pamilya ha Galilea nga diri sakop han pagmando ni Arkilao.—Mateo 2:22.

Ini nga mga asoy nabulig ha aton nga hibaroan nga an patay waray na mahihimo. Kon sugad, paonan-o maisasaysay an nahitabo kan Agboola ngan ha iba pa?

Mga Demonyo, o Mahugaw nga mga Espiritu

Han adulto na hi Jesus, iginkita hiya hin magraot nga espiritu. Ira nakilal-an hiya ngan gintawag nga “Anak han Dios.” Nakilal-an liwat hira ni Jesus. Diri hira espiritu han patay nga mga tawo. Lugod, gintawag hira ni Jesus nga mga demonyo o maghugaw nga espiritu.—Mateo 8:29-31; 10:8; Markos 5:8.

An Biblia naghihisgot mahitungod hin mga espiritu nga maunungon ha Dios ngan hin mga nagrebelde ha iya. An libro han Genesis nasiring nga han ginpaiwas ni Jehova an matinalapasnon nga hira Adan ngan Eva ha hardin han Eden, nagbutang Hiya hin mga kerubin, o mga anghel, ha este nga bahin han hardin basi waray makasulod hito. (Genesis 3:24) Matin-aw nga ini an siyahan nga higayon nga an mga espiritu nakita han mga tawo.

Paglabay hin mga panahon, may mga anghel nga kinanhi ha tuna ngan nagpakatawo bisan kon waray hira sugoa ni Jehova ha pagtuman hin toka dinhi. Lugod, ‘ginbayaan nira an ira urukyan’ ha lugar han mga espiritu. (Judas 6) Hakugnon an ira motibo. Nangasawa hira ngan nag-anak hin mga higante nga gintawag nga Nepilim. Ginpuno han mga Nepilim ngan han ira rebelyoso nga mga amay an tuna hin kamadarahog ngan duro nga karaotan. (Genesis 6:1-5) Kondi, gintadong ni Jehova an sitwasyon pinaagi ha pagpahinabo hin Delubyo ha bug-os nga kalibotan ha panahon ni Noe. Tungod hito, namatay an magraot nga katawohan pati an mga higante. Pero, kumusta man an mga anghel?

Tungod han Baha, napiritan hira pagbalik ha lugar han mga espiritu. Kondi, waray na hira tuguti ni Jehova nga makabalik ha ira orihinal nga kahimtang. (Judas 6) An Biblia nasiring: “An Dios waray pag-awil ha mga anghel han ira pagpakasala, kondi nga pinanhulog hira ngadto ha impyerno [“Tartaro,” NW], ngan igintubyan hira ngadto ha mga magsirom nga mga bito, nga iginhuhulat ngada ha paghukom.”—2 Pedro 2:4.

An Tartaro diri lugar; usa ito nga kahimtang diin an mga iginlabog didto sugad hin mga priso ngan ubos an kahimtang salit napupugngan ha ira mga buruhaton. Diri na mahimo han mga demonyo magpakatawo, kondi may-ada pa gihapon  hira daku nga gahum ngan impluwensya ha hunahuna ngan kinabuhi. Mahimo nira makontrol an mga tawo ngan hayop. (Mateo 12:43-45; Lukas 8:27-33) Nalilimbongan liwat nira an mga tawo pinaagi ha pagpakuno-kuno nga espiritu hira han mga patay. Kay ano? Basi mapugngan an mga tawo ha pagsingba kan Jehova ha paagi nga iya nalilipayan ngan basi diri nira mahibaroan an tinuod nga kahimtang han patay.

Kon Paonan-o Malalamposan an Kahadlok

Nakita ni Agboola nga makatadunganon an siring han Biblia may kalabotan han kamatayon ngan han pangirilal-an han mga espiritu. Nasantop niya nga kinahanglan mahibaro hiya hin dugang pa. Ha bulig ni John, nagtikang hiya pagbasa han Biblia ngan mga publikasyon nga basado ha Biblia. Naliaw hiya ha paghibaro nga an iya mga anak nakaturog la ha lubnganan, diri naghuhulat ha lugar han mga espiritu basi mag-alagad ha nagpatay ha ira.—Juan 11:11-13.

Nasantop liwat ni Agboola nga kinahanglan niya umundang gud ha pagbuhat hin espiritismo. Iya ginsunog an iya mga gamit ha espiritismo. (Buhat 19:19) Waray hiya mahadlok bisan kon may mga nagpahamangno ha iya nga masisina an mga espiritu. Iya ginsunod an sagdon ha Efeso 6:11, 12: “Magsul-ot kamo han bug-os nga hinganiban han Dios . . . kay an aton pakig-away . . . kontra ha mga espirituhanon nga kasundalohan han kamaraotan.” Inin espirituwal nga hinganiban nag-uupod han kamatuoran, katadongan, maopay nga sumat han kamurayawan, pagtoo, ngan kampilan han espiritu, an Pulong han Dios. An sugad nga hinganiban tikang ha Dios ngan gamhanan!

Ginbayaan ni Agboola an mga kustomre may kalabotan ha espiritismo, tungod hito ginsalikway hiya han iba niya nga sangkay ngan kapamilya. Kondi, nakabiling hiya hin bag-o nga kasangkayan nga natoo ha igintututdo han Biblia ha Kingdom Hall han Mga Saksi ni Jehova.

Yana, maaram na hi Agboola nga ha diri maiha, lilimpyuhon ni Jehova an tuna tikang ha karaotan ngan diri na gud tutugotan an mga demonyo nga makabuhat pa hin maraot. Ha urhi, Iya bubungkagon hira. (Pahayag 20:1, 2, 10) Babanhawon han Dios dinhi ha tuna an ‘ngatanan nga aadto ha lubnganan.’ (Juan 5:28, 29) Upod hito hi Abel, an inosente nga kabataan nga iginpapatay ni Hadi Herodes, ngan an minilyon nga iba pa. Natoo hi Agboola nga upod liwat hito an iya tulo nga anak. Posible nga upod man hito an mga patay nga imo hinigugma. Hito nga panahon, pamamatud-an han ngatanan nga binanhaw nga tikang ha ira kamatay tubtob ha ira kabanhaw, waray gud hira sarabotan—diri maaram han bisan ano nga seremonya nga ginhimo para ha ira.

Waray hinungdan nga mahadlok ka ha mga patay. Lugod, mahimo mo pamulaton an panahon nga makakaupod mo utro an mga patay nga imo hinigugma. Kondi yana, kay ano nga diri pag-adman an Biblia basi maparig-on an imo pagtoo? Pakig-upod ha mga natoo ha igintututdo han Biblia. Kon nagbubuhat ka hin espiritismo, iundang dayon ito. Panalipdi an imo kalugaringon tikang ha mga demonyo pinaagi ha pagsul-ot han “bug-os nga hinganiban han Dios.” (Efeso 6:11) Malilipay an Mga Saksi ni Jehova ha pagbulig ha imo. Nagtatanyag hira hin libre nga pag-aram ha Biblia gamit an libro nga Ano Gud ba an Igintututdo han Biblia? a

Diri na nahadlok hi Agboola ha mga patay, ngan maaram na hiya kon paonan-o aatohan an mga demonyo. Hiya nasiring: “Diri ako maaram kon hin-o an hinungdan han kamatayon han akon tulo nga anak. Kondi tikang han nag-alagad ako kan Jehova, nagkaada ako pito pa nga anak. Waray usa tikang ha lugar han mga espiritu an nanhilabot ha ira.”

[Footnote]

[Blurb ha pahina 13]

Diri na nahadlok hi Agboola ha mga patay, ngan maaram na hiya kon paonan-o aatohan an mga demonyo

[Retrato ha pahina 12]

Waray mahadlok hi Kain nga makakabulos pa an iya patay na nga bugto