Mabubungkag ba an Aton Tuna?

NAGPAKIANA ka na ba, ‘Ano an mahitatabo ha aton tuna ha tidaraon?’ Tungod han nakikita han mga tawo nga nahitatabo ha maopay hinduro nga planeta, damu an natoo nga an tuna bangin mabungkag.

Oo, gindadaot yana an tuna pinaagi ha pag-abuso han birilhon nga mga bahandi hito, sugad han tubig, kagurangan, ngan atmospera. Labot pa hito, nagpapahamangno an pipira nga syentista nga an tuna ngan an ngatanan nga kinabuhi dida hito, bangin madaot han mga butang sugad han meteorite, nabuto nga bitoon, o han kaubos han hydrogen han adlaw.

Natoo an mga syentista nga an tuna hinay-hinay—bangin paglabay hin binilyon nga katuigan—nga diri na makakasustini han kinabuhi han tawo. Iginhuhulagway ini han Encyclopædia Britannica sugad nga “an diri na mapupugngan nga kabungkagan.”

Makalilipay nga ginpapasarig kita han Biblia nga diri tutugotan ni Jehova nga Dios nga mabungkag ngan diri na maukyan an tuna. Sugad nga Maglalarang, waray tubtoban an iya ‘daku nga gahum,’ salit mamimintinar niya an uniberso ha kadayonan. (Isaias 40:26) Tungod hito, makakasarig ka hini: “Nagbubutang [an Dios] han mga karig-onan han tuna, basi nga ito diri na makiwa ha waray kataposan.” “Pagdayawa hiya niyo, adlaw ngan bulan. Dayawa hiya niyo, kamo ngatanan nga mga bitoon nga magsanag. . . . Kay hiya nagsugo, ngan hira nagkahihimo. Iya liwat hira gintindog ha kagihaponan.”—Salmo 104:5; 148:3-6.

An Katuyoan han Dios ha Tuna

Diri gud katuyoan han Dios nga abusuhon ngan hugawan an tuna sugad han nahitatabo yana. Lugod, ginlarang niya an siyahan nga lalaki ngan babaye, hira Adan ngan Eva, ngan iginbutang hira ha maopay hinduro nga hardin. Syempre, an ira inuukyan nga Paraiso diri magpapabilin nga maopay kon diri kultibaron. Tungod hito, gintokahan hira han Dios nga “paghawanan ngan pagbantayan” ito. (Genesis. 2:8, 9, 15) Makalilipay ngan makapatagbaw gud nga buruhaton an igintoka han Dios ha ira!

 Kondi, labaw pa ha pagkultibar hiton orihinal nga hardin an katuyoan han Dios ha tuna. Karuyag niya nga an bug-os nga tuna magin paraiso. Tungod hito, ginsugo niya hira Adan ngan Eva: “Magmabungahon kamo ngan magdamu ngan pun-on niyo an tuna, ngan pagtag-iyaha niyo ito: ngan paghadian niyo an kaisdaan han dagat, ngan an katamsihan ha mga langit, ngan an ngatanan nga mga mananap nga nabantad ha bawbaw han tuna.”—Genesis 1:28.

Makasurubo, ito nga katuyoan han Dios ginkontra han mapahitas-on nga anghel nga ginkilala sugad nga hi Satanas. Nag-ungara hiya nga singbahon nira Adan ngan Eva. Pinaagi ha paggamit hin halas sugad nga iya paragyakan, iya nasulay hira nga magrebelde ha pagmando han Dios. (Genesis 3:1-6; Pahayag 12:9) Sigurado nga nasakitan gud an aton Maglalarang tungod han ira kahakog ngan kawaray apresasyon! Bisan pa han ira pagrebelde, waray nabag-o an katuyoan han Dios ha tuna. Hiya nagsiring: “An akon pulong nga magawas ha akon baba diri . . . mabalik ha akon nga kawang, kondi magtutuman hadton akon karuyag, ngan ini mauswag dida ha bagay ngain ko ini igpapadara.”—Isaias 55:11.

May-ada mapulsanon nga hinungdan nga gintutugotan ni Jehova nga magpadayon an pagrebelde ni Satanas tubtob yana. Durante hini nga panahon, nasarihan na han katawohan an magkalain-lain nga pagmando, ngan napamatud-an han mga resulta nga an pagin bulag ha Dios, sugad han igin-aaghat ni Satanas, bug-os gud nga kapakyasan. a—Jeremias 10:23.

Bisan pa han maraot nga resulta han pagrebelde ni Satanas, ginbendisyonan ni Jehova an pipira nga magtadong nga katawohan durante han naglabay nga mga milenyo. Iya liwat gintipigan ha Biblia an rekord han mga resulta han pagsugot ngan pagtalapas ha Iya. Dugang pa, nagbuhat Hiya hin urusahon nga mga butang para ha aton tidaraon nga kapulsanan. Mahigugmaon nga igintagana Niya ha katawohan an Manluluwas pinaagi ha pagsugoa han Iya hinigugma nga Anak, hi Jesu-Kristo, ha pagtutdo ha aton han gimaopayi nga paagi ha pagkinabuhi. Dugang pa, iginhatag ni Jesus an iya kinabuhi para ha aton. (Juan 3:16) Tungod kay diri hiya takos mamatay, ginamit han Dios an iya kamatayon sugad nga legal nga paagi ha paglukat han nawara nira Adan ngan Eva, an paglaom han kinabuhi nga waray kataposan ha paraiso nga tuna. b Tungod hito, gin-establisar ni Jehova nga Dios an gobyerno ha langit basi mandoan an ngatanan nga katawohan, ngan Iya ginpili an Iya Anak, an binanhaw nga hi Jesu-Kristo, nga magin Hadi hito nga Ginhadian. Sisiguruhon hinin urusahon nga kahikayan nga matutuman an katuyoan han Dios ha tuna.—Mateo 6:9, 10.

Salit, makakasarig ka gud hinin makalilipay hinduro nga saad nga iginrekord ha Biblia: “Paglalaglagon an mga magburuhat hin maraot; kondi an mga nahulat kan Jehova, makakapanunod hira han tuna. An mga magtadong makakapanunod han tuna, ngan maukoy hira dida hin waray kataposan.” “Kitaa, an payag han Dios aada ha mga tawo, ngan mag-uukoy hiya upod nira, ngan hira magigin iya katawohan, ngan an Dios ha iya ngahaw maupod man ha ira, ngan magigin ira Dios: Ngan pagpapahiron niya an ngatanan nga luha tikang ha ira mga mata; ngan mawawaray na kamatayon; ngan mawawaray na an kabidoan, bisan pagtangis, bisan kasakit pa gud: kay an siyahan nga mga bagay nag-agi na. Ngan an nalingkod ha lingkuranan nga hadianon siniring: Kitaa, akon ginhimo an ngatanan nga mga butang nga bag-o.”—Salmo 37:9, 29; Pahayag 21:3-5.

Diri Nagkakasumpaki an Biblia

Kondi, an pipira bangin magpakiana, ‘Paonan-o naton maipapahiuyon an ginkotar na nga mga teksto ha Biblia ha iba nga bersikulo nga baga hin naghihisgot mahitungod han tiarabot nga kabungkagan han tuna?’ Aton paghisgotan an pipira hini. Kon uusisahon naton ito, hibabaroan naton nga diri nagkakasumpaki an Biblia.

 Maiha na antes mahibaroan han mga syentista an “diri na mapupugngan nga kabungkagan” han ngatanan nga butang, usa nga salmista an nagsurat: “Imo [karuyag sidngon, an Dios] gintukod an tuna; ngan an mga langit amo an buhat han imo mga kamot. Magkakawawara hira, kondi hi ikaw magpapadayon; oo, hira ngatanan magkakadadaan sugad hin panapton; sugad hin kurigmos, imo hira pagliliwanan, ngan magkaliliwat hira: kondi ikaw amo la gihapon, ngan an imo mga tuig waray kataposan.”—Salmo 102:25-27.

Han isurat han salmista ini, diri hiya nariwa ha waray tubtoban nga katuyoan han Dios ha tuna. Lugod, iginpapakita niya an kaibahan han waray tubtoban nga pag-eksister han Dios ha pagin nabubungkag han ngatanan nga Iya ginlarang. Kon waray han nagpapadayon nga gahum han Dios ha pagpahiuli, an uniberso—upod na an sistema solar diin kita nakadepende para ha karig-on, lamrag ngan enerhiya—magigin diri organisado gud ngan ha kataposan mabubungkag. Salit, kon pababay-an ito, an aton tuna ‘madadaan’ o mabubungkag ha kadayonan.

May-ada iba nga teksto ha Kasuratan nga baga hin nasumpaki liwat ha katuyoan han Dios ha tuna. Pananglitan, gin-uunabi han Biblia an langit ngan tuna nga ‘lumalabay.’ (Pahayag 21:1) Kondi, sigurado nga diri gud ito nakontra ha saad ni Jesus: “Bulahan an mga maaghop, kay hira makakapanunod han tuna.” (Mateo 5:5) Salit, ano an iginpapasabot han Biblia han magsiring ito nga an langit ngan tuna ‘lumalabay’?

Agsob nga ginagamit han Biblia an pulong nga “tuna” ha simboliko nga paagi, ngan nangangahulogan ito hin sosiedad han katawohan. Pananglitan, tagda ini: “An bug-os nga tuna may uusa la nga yinaknan ngan uusa la an pinulongan.” (Genesis. 11:1) Matin-aw nga an “tuna” nga gin-unabi dinhi nagtutudlok ha mga tawo nga nag-uukoy ha tuna. Usa pa nga teksto amo an Salmo 96:1 nga sumala ha hubad han Maopay nga Sumat, nasiring: “Kanta ha GINOO, an bug-os nga tuna.” Klaro nga ipinapakita hini ngan han iba nga teksto nga an pulong nga “tuna” simboliko nga ginagamit para ha mga tawo.—Salmo 96:13.

Usahay iginpapariho han Biblia an mga magmarando ha tuna ha kalangitan o ha mga linarang dida hito. Pananglitan, an matinalumpiguson nga mga magmarando han Babilonya iginhulagway nga pariho hin bitoon tungod kay ira iginpahitaas an ira kalugaringon ha mga nakapalibot ha ira. (Isaias 14:12-14) Sugad han igintagna, an simboliko nga “mga langit” o nagmamando nga grupo han Babilonya, ngan an “tuna,” an mga nasuporta hito, nabungkag han 539 A.K.P. (Isaias 51:6) Tungod hito, nakahigayon an mabinasulon nga mga Judio nga bumalik ha Jerusalem, diin an “bag-o nga mga langit,” usa nga bag-o nga gobyerno, nagmando ha “bag-o nga tuna,” an matadong nga sosiedad han katawohan.—Isaias 65:17.

An ginsiring han Biblia nga pagin ‘lumalabay’ han langit ngan tuna matin-aw nga nagtutudlok ha kataposan han maraot nga gobyerno ha tuna yana ngan ha diri-diosnon nga mga parasuporta hito. (2 Pedro 3:7) Tungod hito magigin posible para ha bag-o nga gobyerno han Dios ha langit nga bendisyonan an matadong nga bag-o nga sosiedad han katawohan, tungod kay “sumala ha [kanan Dios] saad, naghuhulat kita hin mga bag-o nga langit ngan bag-o nga tuna, diin mag-uukoy an katadongan.”—2 Pedro 3:13.

Salit, makakasarig ka ha saad han Dios nga an aton inuukyan nga tuna magpapabilin ha kadayonan. Dugang pa, an Biblia nagsusumat kon ano an imo sadang buhaton basi maeksperyensyahan inin makalilipay nga panahon diin an tuna paghihimoon nga bug-os-globo nga paraiso. Hi Jesus nagsiring: “Ini amo an kinabuhi nga waray kataposan, nga hira kumilala ha imo, nga amo la an matuod nga Dios, ngan hi Jesu-Kristo nga imo ginpakanhi.” (Juan 17:3) Kay ano nga diri himoon nga tumong nga usisahon an igintututdo han Biblia mahitungod han tidaraon han tuna ngan han katawohan? Malilipay an mga Saksi ni Jehova ha iyo lugar ha pagbulig ha imo.

[Mga footnote]

[Blurb ha pahina 12]

Nagsasaad an Biblia nga an aton inuukyan nga tuna magpapabilin ha kadayonan

[Ginkuhaan han mga Retrato ha pahina 10]

Globo: NASA/The Visible Earth (http://visibleearth.nasa.gov/); oso: © Bryan and Cherry Alexander Photography