1. Kay ano nga nagsiring hi apostol Pablo nga ‘an Kristo amo an kapahayagan han gahum han Dios’?

IGINPAKITA ni Jehova an Iya gahum pinaagi kan Jesus ha urusahon nga mga paagi. Han nakanhi hi Jesus ha tuna, naghimo hiya hin mga milagro. Mababasa naton an pipira hito ha upat nga Ebanghelyo, ngan magpaparig-on ito han aton pagtoo. (Mat. 9:35; Luc. 9:11) Oo, nakita kan Jesus an gahum han Dios. Salit angayan la an ginsiring ni apostol Pablo: ‘An Kristo amo an kapahayagan han gahum han Dios.’ (1 Cor. 1:24) Pero ano an kapulsanan ha aton han mga milagro ni Jesus?

2. Ano an aton mahibabaroan ha mga milagro ni Jesus?

² Hi apostol Pedro nagsiring nga hi Jesus naghimo hin mga milagro, o “urusahon nga mga butang.” (Buh. 2:22) An urusahon nga mga ginbuhat ni Jesus dinhi ha tuna nagtututdo ha aton kon ano an iya bubuhaton durante han iya Usa ka Yukot ka Tuig nga Pagmando. Hito nga panahon, maghihimo hiya hin mas dagku nga milagro para  ha kapulsanan han ngatanan nga tawo ha tuna. An mga milagro ni Jesus nabulig liwat nga magkaada kita hilarom nga kahibaro mahitungod han iya personalidad ngan han personalidad han iya Amay. Paghisgotan naton an pipira han mga milagro ni Jesus ngan kon ano an kapulsanan hito ha aton—yana ngan ha tidaraon.

3. (a) Kay ano nga ginhimo ni Jesus an iya siyahan nga milagro? (b) Ha Cana, paonan-o iginpakita ni Jesus an iya pagin mahinatagon?

³ Ha usa nga kasal ha Cana ha Galilea, ginhimo ni Jesus an iya siyahan nga milagro. Posible nga damu an bisita nga inabot kay ha ginlalaoman. Pero anoman an kahimtang, nagkulang an bino. Usa han mga bisita hi Maria, nga nanay ni Jesus. Ha sulod hin damu ka tuig, posible gud nga ginpamalandong niya an ngatanan nga tagna mahitungod han iya anak, ngan maaram hiya nga tatawagon hi Jesus nga “Anak han Gihitaasi.” (Luc. 1:30-32; 2:52) Natoo ba hiya nga may-ada gahum hi Jesus? Hito nga higayon usa nga butang an sigurado, pinaid hiya ngan hi Jesus ha bag-o nga kinasal ngan karuyag nira buligan hira basi diri maalohan. Maaram hi Jesus nga obligasyon an pagin maabiabihon. Salit milagroso nga ginhimo niya nga “maopay nga bino” an 100 ka galon (380 L) nga tubig. (Basaha an Juan 2:3, 6-11.) Obligado ba hi Jesus nga buhaton ini nga milagro? Diri. Ginbuhat niya ito tungod kay napaid hiya ha mga tawo ngan ginsusubad niya an iya mahinatagon nga Amay ha langit.

4, 5. (a) Ano an igintututdo ha aton han siyahan nga milagro ni Jesus? (b) Ano an igintututdo ha aton han milagro ha Cana mahitungod ha tidaraon?

⁴ Hi Jesus milagroso nga nagtagana hin damu nga maopay nga bino nga igo para ha daku nga grupo. Ano an igintututdo ha aton hini nga milagro? Igintututdo hini nga hi Jehova ngan hi Jesus diri halot; lugod, mahinatagon gud hira. Nagpapasarig ini ha aton nga importante ha ira an pagbati han mga tawo. Iginpapakita liwat hini nga gagamiton ni Jehova an iya gahum basi magtagana hin hura nga pagkaon ha bag-o nga kalibotan para ha “ngatanan nga mga katawohan” ha tuna.—Basaha an Isaias 25:6.

⁵ Hunahunaa la! Diri na mag-iiha, ihahatag ni Jehova an aton gud mga ginkikinahanglan, sugad han masustansya nga pagkaon ngan komportable nga urukyan. Hinaot magin malipayon gud kita ha pagpamulat han mag-opay nga butang nga hura nga itatagana ha aton ni Jehova ha Paraiso nga tuna.

6. Para kan kanay gin-gamit ni Jesus an iya gahum, ngan paonan-o naton hiya masusubad?

⁶ Makapainteres nga han ginsulay han Yawa hi Jesus nga himoon nga tinapay an bato, waray gamita ni Jesus an iya gahum basi tagbawon an iya personal nga karuyag. (Mat. 4:2-4) Pero, gin-gamit niya an iya gahum basi buligan an iba ngan tagbawon an ira panginahanglan. Paonan-o naton masusubad an pagin diri makikalugaringon ni Jesus? Gin-aghat niya an mga surugoon han Dios nga ‘batasanon an paghatag.’ (Luc. 6:38) Mahimo ba naton ito ipakita pinaagi ha pag-imbitar ha iba ha aton balay para hin pangaon ngan espirituwal nga pagparig-onay? Mahimo  ba kita maggahin hin panahon katapos han katirok basi buligan an usa nga nanginginahanglan, sugad han pagpamati ha bugto nga nagrirehers han iya bahin? Ano an puydi naton himoon para hadton nanginginahanglan hin bulig ha ministeryo? Ginsusubad naton an pagin mahinatagon ni Jesus kon nangangalimbasog kita pagbulig ha iba tubtob nga mahihimo naton.

7. Ano nga kahimtang an magpapadayon samtang naeksister inin maraot nga sistema?

⁷ Hadto pa man, komon na an kapobrehan. Ginsidngan ni Jehova an mga Israelita nga “diri mawawarayan an tuna han mga kablas.” (Deut. 15:11) Paglabay hin mga siglo, hi Jesus nagsiring: “An mga pobre pirme niyo kaupod.” (Mat. 26:11) Iginpapasabot ba ni Jesus nga diri mawawarayan hin mga pobre ha tuna? Diri. Iginpapasabot niya nga samtang naeksister inin maraot nga sistema padayon nga magkakaada hin mga pobre. Salit makalilipay gud hibaroan nga an mga milagro ni Jesus nagpapakita nga magkakaada mas maopay nga kahimtang ilarom han pagmando han Ginhadian, diin an ngatanan magkakaada na hura nga pagkaon ngan matatagbaw hira!

8, 9. (a) Kay ano nga nagpakaon hi Jesus hin yinukot nga mga tawo? (b) Ano an imo inaabat may kalabotan hini nga milagro?

⁸ An salmista nagsiring mahitungod kan Jehova: “Imo binubuklad an imo kamot, ngan ginbubusog an tinguha han tagsa nga buhi.” (Sal. 145:16) Han nakanhi hi Jesus ha tuna, ginsubad gud niya an iya Amay, ngan agsob niya itagana an panginahanglan han iba. Waray niya ito buhata basi la ipakita nga gamhanan hiya. Lugod, ginbuhat niya ito tungod kay hinigugma niya an mga tawo. Hisgotan naton an Mateo 14:14-21. (Basaha.) Damu nga tawo an nagbaktas ha pagsinunod kan Jesus tikang ha mga syudad. (Mat. 14:13) Han tikagab-i na, an mga disipulo nabaraka kay an mga tawo magluya na ngan gutom. Salit ginsidngan nira hi Jesus nga palakton an mga tawo basi pumalit hin ira pagkaon. Ano an ginbuhat ni Jesus?

⁹ Pinaagi hin lima nga tinapay ngan duha nga isda, ginpakaon ni Jesus an mga 5,000 nga kalalakin-an, pati na an kababayin-an ngan kabataan! Diri ba kita nalilipay nga gin-gamit ni Jesus an iya gahum basi mahigugmaon nga itagana an panginahanglan han mga pamilya, pati na han gudtiay nga kabataan? Posible liwat nga damu gud an pagkaon nga igintagana ni Jesus tungod kay an mga tawo ‘nangaon ngan nabusog.’ Naghatag ito ha ira hin kusog para han ira hirayo nga biyahe tipauli. (Luc. 9:10-17) Ngan 12 nga basket an napuno han mga nahisalin!

10. Ha tidaraon, ano an mahitatabo ha kapobrehan?

¹⁰ Tungod han hakog ngan korap nga mga lider, ginatos ka milyon nga tawo an pobre. Bisan an pipira naton nga kabugtoan waray igo nga pagkaon. Kondi diri mag-iiha, an masinugtanon nga katawohan magkikinabuhi ha kalibotan nga waray na korapsyon o kapobrehan. Kon may-ada ka gahum, diri mo ba ihahatag an panginahanglan han katawohan? Hi Jehova, an Dios nga Makagarahum-ha-ngatanan, may-ada gud gahum ngan hingyap ha pagbuhat hito. Nagsaad hiya nga hirani na niya wad-on an kapobrehan!—Basaha an Salmo 72:16.

11. Kay ano nga kombinsido ka nga gagamiton han Kristo an iya gahum ha bug-os nga tuna, ngan ano an karuyag mo buhaton?

¹¹ Han nakanhi hi Jesus ha tuna, naghimo hiya hin mga milagro ha pipira la nga lugar ngan ha sulod la hin tulo ngan tunga ka tuig. (Mat. 15:24) Pero sugad nga ginhimaya nga Hadi, bubuligan niya an ngatanan nga tawo ha bug-os nga tuna durante han iya Usa ka Yukot ka Tuig nga Pagmando. (Sal. 72:8) An iya mga milagro nagpapasarig ha aton nga karuyag niya gamiton an iya gahum para ha aton kaopayan. Diri kita makakahimo hin mga milagro, pero magagamit  naton an aton panahon ngan kusog ha pagsumat ha iba mahitungod han makalilipay nga tidaraon nga iginsasaad han Biblia. Sugad nga mga Saksi ni Jehova nga may-ada hinin presyoso nga kahibaro mahitungod han tidaraon, diri ba responsabilidad naton an pagsumat hito ha iba? (Roma 1:14, 15) Hinaot an pagpamalandong ha mga pagbubuhaton han Kristo magpagios ha aton ha pagbuhat hito.—Sal. 45:1; 49:3.

12. Kay ano nga makakasiguro kita nga nasasabtan gud ni Jesus an ekolohiya han tuna?

¹² Han ginlarang han Dios an tuna ngan an ngatanan nga butang dida hito, hi Jesus nakada ‘ha iya hirani sugad hin labaw nga magburuhat.’ (Prob. 8:22, 30, 31; Col. 1:15-17) Salit, nasasabtan gud ni Jesus an ekolohiya han tuna. Maaram hiya kon paonan-o gagamiton ngan kukontrolon an ngatanan nga elemento hito.

13, 14. Paghatag hin ehemplo kon paonan-o mahimo kontrolon ni Jesus an mga pwersa han palibot.

¹³ Han nakanhi hi Jesus ha tuna, iginpakita niya nga hiya ‘an kapahayagan han gahum han Dios’ pinaagi ha pagkontrol han mga pwersa han palibot. Pananglitan, hunahunaa kon paonan-o ginkontrol ni Jesus an makusog nga subasko nga nagin hinungdan nga nameligro an iya mga disipulo. (Basaha an Marcos 4:37-39.) Usa nga eskolar ha Biblia an nagsiring: “An Griego nga pulong [para ha subasko nga gin-gamit ha Marcos 4:37] naghuhulagway hin makusog nga bagyo. Diri ito nagtutudlok ha usa la nga makusog gud nga huyop han hangin . . . kondi ha usa nga bagyo nga may maitom nga mga dampog, makusog gud nga mga huyop han hangin, bunok hin uran, ngan naguguba an ngatanan nga agian hito.”

¹⁴ Handurawa an sitwasyon: An mga balud napusak ha baluto salit nasulod an tubig dida hito. Bisan pa han makusog nga aringasa han bagyo ngan duro nga kakiwa han baluto, maopay la gihap an katurog ni Jesus tungod kay kapoy hiya hinduro. Pero an mga disipulo nahadlok, salit ginpukaw nira hiya ngan nagsiring: “Magkakamatay na kami!” (Mat. 8:25) Hi Jesus binuhat ngan ginsidngan an hangin ngan an dagat: “Husto na! Maglinaw ka!” (Mar. 4:39) Inundang an makusog nga bagyo ngan “nagkalma gud” an hangin ngan an dagat. Urusahon gud ito nga pagpakita han gahum ni Jesus ha pagkontrol han mga pwersa han palibot!

15. Paonan-o iginpakita han Dios nga Makagarahum-ha-ngatanan nga may kapas hiya ha pagkontrol han mga pwersa han palibot?

¹⁵ Tikang mismo kan Jehova an gahum ni Jesus, salit makakasiguro kita nga makukontrol gud han Dios nga Makagarahum-ha-ngatanan an mga pwersa han palibot. Tagda an pipira nga ehemplo. Antes han Baha, hi Jehova nagsiring: “Kay pito pa ka adlaw, ngan bubuhatan ko nga umuran ha bawbaw han tuna kap-atan ka adlaw ngan kap-atan ka gab-i.” (Gen. 7:4) Sugad man, ha Eksodo 14:21, aton mababasa: “Kan Jehova ginpabalik an dagat pinaagi hin makusog nga hangin tikang ha sinirangan.” Mababasa liwat naton ha Jonas 1:4: “Nagpadara hi Jehova hin daku nga hangin ngada ha dagat, ngan may-ada daku nga bagyo dida ha dagat, ha pagkaagi nga an sakayan hirani na mabungkag.” Makaparig-on gud hibaroan nga may gahum hi Jehova ha pagkontrol han mga elemento. Oo, may maopay gud nga tidaraon an aton planeta nga Tuna.

16. Kay ano nga nakakaliaw an paghibaro nga an aton Maglalarang ngan an iya suhag nga Anak may gahum ha pagkontrol han mga pwersa han palibot?

¹⁶ Nakakaliaw gud an pagpamalandong han urusahon nga gahum han aton Maglalarang ngan han iya “labaw nga magburuhat.” Durante han Usa ka Yukot ka Tuig nga Pagmando han Kristo, an ngatanan nga tawo magkakaada na seguridad. Hito nga panahon, diri na kita mahahadlok  nga madaot tungod han mga kalamidad sugad han bagyo, tsunami, pagbuto hin bulkan, o linog. Makalilipay gud an paghunahuna han panahon nga waray na mamamatay o madadaot tungod han mga kalamidad, kay “an tolda han Dios aada ha katawohan”! (Pah. 21:3, 4) Makakasarig kita nga tatagan ni Jehova hi Jesus hin gahum ha pagkontrol han mga pwersa han palibot durante han iya Usa ka Yukot ka Tuig nga Pagmando.

17. Paonan-o naton masusubad hi Jehova ngan hi Jesus?

¹⁷ Syempre, diri pariho kan Jehova ngan kan Jesus, diri naton mapupugngan an mga kalamidad, pero may mahihimo kita. Mahimo naton iaplikar an Proberbios 3:27. (Basaha.) Kon nag-aantos an aton kabugtoan, mahimo naton hira liawon ngan buligan ha pisikal, emosyonal, ngan espirituwal. (Prob. 17:17) Pananglitan, mahimo naton hira buligan katapos hin kalamidad. Usa nga balo nga nagub-an hin balay katapos hin bagyo, an nagsiring: “Mapasalamaton gud ako nga bahin ako han organisasyon ni Jehova, diri la tungod han materyal nga bulig kondi pati liwat han espirituwal nga bulig.” Usa liwat nga solo nga bugto an nawad-an hin paglaom han nakita niya nga naguba an iya balay tungod hin bagyo. Katapos hiya buligan han kabugtoan, hiya nagsiring: “Diri ko bug-os nga maisaysay an akon inaabat . . . Salamat, Jehova!” Mapasalamaton kita nga bahin kita han pagminagburugto nga nagtatagad gud ha mga panginahanglan han usa kag usa. Ngan labi kita nga mapasalamaton tungod kay hi Jehova ngan hi Jesu-Kristo nagtatagad gud ha aton.

18. Ano an nakakapainteres ha imo may kalabotan han motibo ni Jesus ha paghimo hin mga milagro?

¹⁸ Durante han ministeryo ni Jesus, ginpamatud-an niya nga hiya ‘an kapahayagan han gahum han Dios.’ Pero ano an iya motibo? Waray gud niya gamita an iya gahum para magpabilib o para ha iya kalugaringon nga kapulsanan. Lugod, gin-gamit niya ito basi ipakita an iya gugma ha mga tawo. Hihisgotan naton ito ha sunod nga artikulo.