1, 2. Ano an iginsugo ni Jehova kan Moises, ngan ano an Iya iginpasarig kan Moises?

ANO an imo aabaton kon kinahanglan mo umatubang ha usa nga pinakagamhanan nga magmarando ha tuna ngan makiistorya para ha katawohan ni Jehova? Posible nga umabat ka hin kabaraka, pagin diri-takos, ngan kahadlok pa ngani. Paonan-o ka mangangandam ha imo isisiring? Ano an mahimo mo buhaton basi makagyakan ka hin may awtoridad sugad nga representante han makagarahum-ha-ngatanan nga Dios?

² Ito an sitwasyon ni Moises. Ginsugo ni Jehova hi Moises, ‘an labi nga maaghop ha ngatanan nga tawo ha bawbaw han tuna,’ nga kumadto kan Paraon basi talwason an katawohan han Dios tikang ha pagtalumpigos ngan pagkauripon ha Ehipto. (Num. 12:3) Sugad han ginpapamatud-an han mga panhitabo, hi Paraon bastos ngan hambog nga tawo. (Eks. 5:1, 2) Kondi, karuyag ni Jehova nga sidngon ni Moises hi Paraon nga pagawson tikang ha pagkauripon an minilyon nga Israelita! Masasabtan naton kon kay ano nga nagpakiana hi Moises kan Jehova: “Hin-o ako nga makadto kan Paraon, ngan magdadara han mga anak ni Israel tikang ha Ehipto?” Sigurado nga inabat ni Moises nga waray hiya kapas ngan diri niya ito mahihimo. Kondi ginpasarig hiya han Dios nga diri hiya mag-uusahan. “Ha pagkamatuod ako maupod ha imo,” siring ni Jehova.—Eks. 3:9-12.

3, 4. (a) Kay ano nga nabaraka hi Moises? (b) Ha ano nga kahimtang bangin maeksperyensyahan mo an inabat ni Moises?

 ³ Kay ano nga nabaraka hi Moises? Tungod kay bangin diri karawaton o pamatian ni Paraon an usa nga representante ni Jehova nga Dios. Nabaraka liwat hiya nga bangin diri tumoo an mga Israelita nga ginpili hiya ni Jehova basi pangunahan hira ha paggawas ha Ehipto. Salit hi Moises nagsiring kan Jehova: ‘Kon pananglitan diri hira tumuod ha akon panginyupo? Bangin sumiring la hira, “Waray magpakita ha imo an Ginoo.”’—Eks. 3:15-18; 4:1, Baraan nga Biblia.

⁴ May mahibabaroan kita nga importante nga leksyon ha baton ni Jehova kan Moises ngan ha sunod nga mga nahitabo. Tinuod, bangin diri mo man kinahanglan umatubang ha usa nga hitaas nga opisyal ha gobyerno. Kondi, usahay nakukurian ka ba pagsumat mahitungod ha Dios ngan han iya Ginhadian bisan ha ordinaryo nga mga tawo nga nakakaistorya mo kada adlaw? Kon oo, may mahibabaroan ka tikang ha eksperyensya ni Moises.

5. Ano an ginhimo ni Jehova ha tungkod nga nakada ha kamot ni Moises, ngan paonan-o ito nakabulig ha iya nga magkaada hin kompyansa? (Kitaa an retrato ha tinikangan hini nga artikulo.)

⁵ Han iginsumat ni Moises kan Jehova nga nababaraka hiya nga bangin diri tumoo ha iya an mga tawo, igin-andam hiya han Dios basi maglampos ha iya toka. An asoy ha Eksodo mababasa: ‘Hi Jehova siniring kan Moises: Ano ito nga aada ha imo kamot? Ngan hiya siniring: Usa nga tungkod. Ngan [hi Jehova] siniring: Ipilak ito ngada ha tuna. Ngan iya ito ipinilak ngada ha tuna, ngan nahimo nga halas; ngan hi Moises pinalagiw tikang ha atubangan hito. Ngan siniring hi Jehova kan Moises: Unata an imo kamot ngan kapti ito ha ikog, ngan iya inunat an iya kamot, ngan kinaptan ito, ngan nahimo nga tungkod dida han iya kamot; basi hira tumoo nga hi Jehova pinakita ha imo.’ (Eks. 4:2-5) Pinaagi han gahum han Dios, an tungkod nga nakada ha kamot ni Moises nagin usa nga halas! Ito nga milagro magpapamatuod nga hi Moises representante han Dios ngan gintagan hiya han Dios hin awtoridad. Hi Jehova nagsiring ha iya: “Imo bibitbiton ini nga tungkod, nga pinaagi hini magbubuhat ikaw han mga tigaman.” (Eks. 4:17) Tungod kay may-ada na hiya hito nga pamatuod, may kompyansa na hiya ha pagrepresentar ha tinuod nga Dios ha atubangan han mga Israelita ngan ni Paraon.—Eks. 4:29-31; 7:8-13.

6. (a) Kon nagsasangyaw kita, andam kita nga gamiton an ano, ngan kay ano? (b) Isaysay kon paonan-o “an pulong han Dios buhi ngan gamhanan.”

⁶ Kon iginsusumat naton ha iba an mensahe han Dios, bangin may magpakiana ha aton: “Ano ito nga aada ha imo kamot?” Ha damu nga higayon, an Biblia aada ha aton kamot ngan andam kita paggamit hito. Bisan kon ginhuhunahuna han iba nga an Biblia usa nga ordinaryo la nga libro, ginagamit ni Jehova iton iya giniyahan nga Pulong ha pakigkomunikar ha aton. (2 Ped. 1:21) Mababasa dida hito an mga saad han Dios mahitungod han mga mahitatabo ilarom ha pagmando han iya Ginhadian. Salit hi apostol Pablo nakagsurat: “An pulong han Dios buhi ngan gamhanan.” (Basaha an Hebreo 4:12.) Paonan-o? Hi Jehova padayon nga nagbubuhat basi matuman an ngatanan niya nga saad ngan bug-os gud ito nga matutuman. (Isa. 46:10; 55:11) Kon masantop han usa nga tawo ini nga kamatuoran mahitungod han Pulong ni Jehova, an iya mababasa dida hito magkakaada hin daku nga epekto ha iya kinabuhi.

7. Paonan-o naton ‘maitututdo ngan maisasaysay an pulong han kamatuoran ha husto nga paagi’?

⁷ Oo, iginhatag ni Jehova ha aton an iya buhi nga sinurat nga Pulong nga mabulig ha aton basi mapamatud-an naton nga an aton mensahe masasarigan ngan tikang ito ha iya. Diri urusahon nga katapos magsurat ni Pablo ha mga Hebreohanon, gin-aghat niya an iya ginbabansay nga hi Timoteo nga ‘buhaton an bug-os nga mahihimo nga maitutdo ngan maisaysay an pulong han kamatuoran ha husto nga paagi.’ (2 Tim. 2:15) Paonan-o  naton maiaaplikar an sagdon ni Pablo? Pinaagi ha pagbasa hin angayan nga mga teksto basi mabantad an kasingkasing han aton mamarati. An mga tract nga iginrelis han 2013 gindisenyo basi buligan kita nga mabuhat ito.

8. Ano an ginsiring han usa nga paramangno han pag-alagad mahitungod han mga tract?

⁸ Papriho an pormat han ngatanan nga bag-o nga tract. Salit kon mahibaro kita paggamit han usa hito, mahibabaro na kita paggamit hito ngatanan. Masayon la ba ito gamiton? Usa nga paramangno han pag-alagad ha Hawaii, U.S.A., an nagsurat: “Diri namon ginlalaoman nga sugad kaepektibo inin bag-o nga mga tract ha pagsangyaw ha balay-balay ngan ha pagsangyaw ha publiko.” Naobserbaran niya nga mas madagmit bumaton an mga tawo tungod han paagi han pagkasurat hito, ngan kasagaran nga nagriresulta hin maopay nga pag-istorya. Nahunahuna niya nga tungod ito han pakiana ngan han mapipilian nga mga baton nga aada ha siyahan nga pahina hito nga mga tract. An tagbalay diri nag-aalang nga bangin sayop an iya baton.

9, 10. (a) Paonan-o an mga tract nag-aaghat ha aton nga gamiton an Biblia? (b) Ano nga mga tract an nagamit mo na hin epektibo, ngan kay ano?

⁹ An tagsa nga tract nag-aaghat ha aton nga magbasa hin angayan nga teksto. Pananglitan, kitaa an tract nga Matatapos Pa ba an Pag-antos? Bumaton man an tagbalay hin “oo,” “diri,” o “bangin,” abrihi la an tract ngan siring, “Ini an ginsisiring han Biblia.” Katapos, basaha an Pahayag 21:3, 4.

¹⁰ Sugad liwat hito an bubuhaton kon ginagamit an tract nga Ano an Imo Panhunahuna ha Biblia? Anoman an pilion nga baton han tagbalay, abrihi la an tract ngan siring, “An Biblia nasiring nga an ‘ngatanan nga Kasuratan giniyahan han Dios.’” Mahimo ka magdugang, “Ha pagkamatuod, may sumpay pa ini nga teksto.” Abrihi an imo Biblia, ngan basaha an 2 Timoteo 3:16, 17.

11, 12. (a) Paonan-o mo magagamit an mga tract basi magin mas makalilipay an imo ministeryo? (b) Paonan-o mabulig ha imo an mga tract ha pagpangandam ha imo pagbalik-bisita?

¹¹ An kadamu han mahimo mo basahon ngan hisgotan ha tract nadepende ha reaksyon han tagbalay. Anoman an iya magin reaksyon, malilipay ka kay labot la nga nakahatag ka hin tract, nabasa mo pa ha iya an Pulong han Dios—bisan kon usa la o duha nga bersikulo an imo nabasa ha imo siyahan nga pagbisita. Ha urhi, mahimo ka bumalik ngan ipadayon an paghisgot.

¹² Ha luyo han tagsa nga tract ilarom han sub-ulohan nga “Alayon Hunahunaa Ini,” may  pakiana ngan mga teksto nga mahimo hisgotan ha pagbalik-bisita. Ha tract nga Ano Daw La an Mahitatabo ha Tidaraon? ini an pakiana para ha pagbalik-bisita, “Ano an bubuhaton han Dios basi magin maopay an kahimtang han kalibotan?” Gin-unabi an Mateo 6:9, 10 ngan Daniel 2:44. Ha tract nga Mabubuhi Gud ba Utro an mga Patay? ini an pakiana, “Kay ano nga nalalagas kita ngan namamatay?” Gin-unabi an Genesis 3:17-19 ngan Roma 5:12.

13. Isaysay kon paonan-o magagamit an mga tract ha pagtikang hin mga pag-aram ha Biblia.

¹³ Gamita an mga tract basi makagtikang hin mga pag-aram ha Biblia. Kon ig-scan han usa an QR Code * ha luyo han tract, gigiyahan hiya ngadto ha usa nga impormasyon ha aton Web site nga mahimo mag-aghat ha iya nga mag-aram ha Biblia. Igin-aaghat liwat hini nga mga tract nga basahon an usa nga leksyon han brosyur nga Maopay nga Sumat Tikang ha Dios! Pananglitan, an tract nga Hin-o Gud ba an Nagkukontrol han Kalibotan? naggigiya ngadto ha leksyon 5 hito nga brosyur. An tract naman nga Ano an Sekreto ha Malipayon nga Pamilya? naggigiya ngadto ha leksyon 9. Kon gagamiton mo an mga tract uyon ha katuyoan hito, masusunod mo an maopay nga pamaagi ha paggamit han Biblia ha siyahan nga pagbisita ngan ha mga pagbalik-bisita. Mahimo ito magresulta ha pakagtikang hin mas damu nga pag-aram. Ano pa an mahimo mo buhaton basi epektibo nga magamit an Pulong han Dios ha imo ministeryo?

14, 15. Paonan-o mo masusubad an disposisyon ni Pablo ha ministeryo?

¹⁴ Ha pagministeryo ni Pablo, andam hiya magpahiuyon ha “damu gud nga tawo tubtob nga mahihimo.” (Basaha an 1 Corinto 9:19-23.) Tigamni nga karuyag ni Pablo ‘makabig an mga Judio, makabig an mga sakop han balaud, makabig an mga waray balaud, makabig an mga maluya.’ Oo, karuyag niya sangyawan an “ngatanan nga klase hin tawo, basi matalwas [niya] an iba ha anoman nga paagi kon posible.” (Buh. 20:21) Paonan-o naton masusubad an disposisyon ni Pablo samtang nangangandam kita ha pagsangyaw han kamatuoran ha “ngatanan nga klase hin tawo” ha aton teritoryo?—1 Tim. 2:3, 4.

¹⁵ Kada bulan, may iginsusuhestyon nga mga presentasyon ha Aton Ministeryo ha Ginhadian. Sarihi ito. Kondi kon may iba nga mga topiko nga ginhuhunahuna han mga tawo ha iyo teritoryo, paghimo hin makapainteres nga mga presentasyon nga angayan para hito. Hunahunaa an kahimtang ha iyo lugar, an mga tawo nga naukoy dida, ngan an kasagaran nga ira ginkakabarak-an. Katapos, pagpili hin teksto nga makakabulig ha ira. Ini an ginsiring han usa nga paramangno han sirkito mahitungod ha kon paonan-o nira ginagamit nga mag-asawa an Biblia ha ira pagministeryo: “Kadam-an han tagbalay natugot nga magbasa kami hin usa nga teksto kon madaliay la kami ngan direkta ha punto. Katapos namon maghatag hin katalahoran samtang ginkakaptan an amon abrido nga Biblia, ginbabasa namon an teksto.” Tagda an pipira nga topiko, pakiana, ngan teksto nga napamatud-an na nga epektibo ngan puydi mo sarihan ha iyo teritoryo.

16. Isaysay kon paonan-o mahimo gamiton an Isaias 14:7 ha ministeryo.

¹⁶ Kon naukoy ka ha usa nga masamok nga lugar, mahimo ka magpakiana ha tagbalay: “Posible ba nga ini an magin laray-ulohan han balita: ‘An bug-os nga kalibutan may-ada na pagpahuway ngan kalinaw, ngan magkakanta nga malipayon an ngatanan’? Ito an ginsisiring han Biblia ha Isaias 14:7. (Maopay nga Sumat) Ha pagkamatuod, mababasa ha Biblia an damu nga saad han Dios mahitungod han mamurayawon nga panahon nga mahitatabo ha tidaraon.” Katapos, ipabasa ha iya an usa hini nga mga saad dida ha Biblia.

17. Paonan-o mo gagamiton an Mateo 5:3 ha pakiistorya?

¹⁷ Damu ba nga lalaki ha iyo lugar an nakukurian ha panginabuhi? Kon oo, mahimo mo tikangan  an pakiistorya pinaagi ha pagpakiana: “Pira an kinahanglan magin kità han usa nga lalaki basi magin malipayon an iya pamilya?” Katapos bumaton han tagbalay, mahimo ka sumiring: “Damu nga lalaki an may kità nga mas daku pa hito, pero diri pa gihapon kontento an ira pamilya. Kon sugad, ano gud ba an ginkikinahanglan?” Katapos, basaha an Mateo 5:3 ngan pagtanyag hin pag-aram ha Biblia.

18. Basi maliaw an iba, paonan-o mo gagamiton an Jeremias 29:11?

¹⁸ Nag-aantos ba an mga tawo ha iyo lugar tungod han naglabay pa la nga trahedya? Mahimo mo tikangan an pakiistorya pinaagi ha pagsiring: “Bumisita ako ha imo basi maghatag hin nakakaliaw nga mensahe. (Basaha an Jeremias 29:11.) Nakita mo ba an duha nga butang nga karuyag han Dios nga mapahimulsan naton? ‘Kamurayawan’ ngan ‘paglaom.’ Diri ba makalilipay an paghibaro nga karuyag han Dios nga magkaada kita maopay nga kinabuhi? Kondi paonan-o ito mahitatabo?” Katapos hisguti ha iya an angayan nga leksyon ha Maopay nga Sumat nga brosyur.

19. Isaysay kon paonan-o gagamiton an Pahayag 14:6, 7 ha pakiistorya ha relihiyoso nga mga tawo.

¹⁹ Damu ba an relihiyoso ha iyo lugar? Kon oo, mahimo mo tikangan an pakiistorya pinaagi ha pagsiring: “Kon may anghel nga makiistorya ha imo, mamamati ka ba ha iya? (Basaha an Pahayag 14:6, 7.) Tungod kay an anghel nagsiring nga ‘kahadluki an Dios,’ diri ba importante nga hibaroan kon hin-o nga Dios an iya gin-uunabi? An anghel nagsiring nga hiya ‘an Dios nga naghimo han langit ngan han tuna.’ Hin-o daw la hiya?” Katapos basaha an Salmo 124:8, nga nasiring: ‘An aton tambulig aada ha ngaran ni Jehova, nga naghimo han langit ngan han tuna.’ Katapos sidnga hiya nga karuyag mo isaysay ha iya an dugang pa mahitungod kan Jehova nga Dios.

20. (a) Paonan-o mo gagamiton an Proberbios 30:4 ha pagtutdo ha usa mahitungod han ngaran han Dios? (b) Ano nga teksto an nagamit mo na hin epektibo?

²⁰ Mahimo mo tikangan an pakiistorya ha usa nga batan-on pinaagi ha pagsiring: “Karuyag ko basahon ha imo an usa nga teksto nga may importante gud nga pakiana. (Basaha an Proberbios 30:4.) Waray tawo nga makakahimo hini nga mga butang, salit sigurado nga nagtutudlok ito ha aton Maglalarang. * Paonan-o naton hibabaroan an iya ngaran? Nalilipay ako nga ipabasa ito ha imo ha Biblia.”

21, 22. (a) Paonan-o an angayan nga teksto mahimo makagbag-o han kinabuhi han usa nga tawo? (b) Samtang gintutuman mo an imo ministeryo, determinado ka nga buhaton an ano?

²¹ Diri ka maaram kon ano an magigin reaksyon han mga tawo ha angayan nga teksto nga imo ginbasa. Pananglitan, duha nga Saksi ha Australia an bumisita ha usa nga batan-on nga babaye. Usa ha ira an nagpakiana ha iya: “Maaram ka ba han ngaran han Dios?” ngan katapos ginbasa an Salmo 83:18. “Diri ako makatoo!” siring han babaye. “Pagbaya nira, nagbiyahe ako hin 35 ka milya (56 km) ngadto ha usa nga tindahan hin mga libro basi kitaon an iba nga hubad han Biblia ngan bilngon ha diksyonaryo ito nga ngaran. Tungod kay nakombinse ako nga Jehova an ngaran han Dios, naghunahuna ako kon ano pa an diri ko hinbabaroan.” Waray pag-iha katapos hito, hiya ngan an iya magigin bana nag-aram ha Biblia, ngan ha urhi nabawtismohan hira.

²² An Pulong han Dios may gahum ha pagbag-o han kinabuhi han mga tawo. Kon an usa nagbabasa han Biblia, napaparig-on an iya pagtoo ha mga saad ni Jehova. (Basaha an 1 Tesalonica 2:13.) An mensahe han Biblia mas gamhanan kay ha bisan ano nga mahimo naton isiring basi maabot an kasingkasing han aton kaistorya. Salit ha tagsa nga higayon kon posible, sadang naton gamiton an Pulong han Dios tungod kay buhi ito!