1. Ano an makalilipay nga mga eksperyensya han damu nga batan-on nga Kristiano?

NAGKIKINABUHI kita ha importante hinduro nga mga panahon. Sugad han waray pa mahitabo ha naglabay, minilyon nga tikang ha ngatanan nga nasud an nadangop ha tinuod nga pagsingba. (Pah. 7:9, 10) Damu nga batan-on an nagkakaada hin makalilipay nga mga eksperyensya samtang ginbubuligan nira an iba nga mahibaro han nagluluwas-hin-kinabuhi nga mga kamatuoran ha Biblia. (Pah. 22:17) An pipira nga batan-on nagdudumara hin mga pag-aram ha Biblia, ginbubuligan an mga tawo nga magkaada hin mas maopay nga kinabuhi. An iba madasigon nga nagsasangyaw han maopay nga sumat ha mga teritoryo nga iba an yinaknan. (Sal. 110:3; Isa. 52:7) Ano an sadang mo buhaton basi makigbahin ka hinin makalilipay nga buruhaton han katawohan ni Jehova?

2. Paonan-o iginpapakita han ehemplo ni Timoteo nga andam hi Jehova humatag hin mga responsabilidad ha mga batan-on? (Kitaa an retrato hini nga pahina.)

² Sugad nga batan-on, mahimo ka maghimo hin mga desisyon yana nga bangin ha urhi makabulig basi magkaada ka hin dugang nga mga oportunidad ha pag-alagad ha Dios. Pananglitan, hi Timoteo nga taga-Listra naghimo hin maaramon nga mga desisyon, salit han mga 20 anyos hiya, nagin kwalipikado na hiya sugad nga misyonero. (Buh. 16:1-3) Posible nga pipira pa la ka bulan katapos mapiritan pagbaya hi apostol Pablo ha bag-o pa la nga naiestablisar nga kongregasyon ha Tesalonika tungod han madarahog nga pagkontra, ginsugo niya hi Timoteo nga bumalik ha Tesalonika basi parig-unon an mga kabugtoan didto. (Buh. 17: 5-15; 1 Tes. 3:1, 2, 6) Hunahunaa la an kalipay nga inabat ni Timoteo han nakarawat niya ito nga toka!

3. Ano an pinakaimportante nga desisyon nga imo mahihimo, ngan san-o mo ito hihimoon?

³ Yana na an panahon ha paghimo hin importante nga mga desisyon, samtang batan-on ka pa. Kondi may usa nga desisyon nga pinakaimportante—an imo pag-alagad kan Jehova. San-o an pinakamaopay nga panahon ha paghimo hito? Hi Jehova nagsiring: “Hinumdumi . . . an imo Magburuhat ha mga adlaw han imo pagkabatan-on.” (Ekles. 12:1) An paagi la basi ‘hinumdoman’ hi Jehova amo an pag-alagad ha iya ha bug-os mo nga kasingkasing. (Deut. 10:12) Ito an pinakaimportante nga desisyon nga imo mahihimo. Daku an magigin epekto hito ha imo kabubuwason.—Sal. 71:5.

4. Ano pa nga importante nga mga desisyon an makakaapekto ha imo pag-alagad ha Dios?

⁴ Syempre, labot pa han imo desisyon ha pag-alagad kan Jehova, may mga desisyon ka pa nga makakaapekto ha imo kabubuwason. Pananglitan, kinahanglan mo magdesisyon kon mag-aasawa ka ba, kon hin-o an imo karuyag mapangasawa, ngan kon ano an imo magigin trabaho. Importante ini nga mga desisyon, pero maaramon nga magdesisyon ka anay kon mag-aalagad ka kan Jehova ha bug-os mo nga kasingkasing. (Deut. 30:19, 20) Kay ano? Tungod kay ini nga mga desisyon konektado ha usa kag usa. An imo desisyon mahitungod ha pag-asawa ngan ha trabaho makakaapekto ha imo pag-alagad ha Dios. (Itanding an Lucas 14:16-20.) Ha pariho nga paagi an imo hingyap nga mag-alagad ha Dios makakaapekto liwat ha imo desisyon mahitungod ha pag-asawa ngan ha trabaho. Salit pagdesisyon anay kon ano an magigin pinakaimportante ha imo kinabuhi.—Fil. 1:10.

5, 6. Iilustar kon paonan-o an paghimo hin husto nga mga desisyon mahimo magresulta hin dugang nga oportunidad ha pag-alagad kan Jehova. (Kitaa an artikulo nga “An Akon Desisyon han Bata Pa Ako” hini nga gowa.)

⁵ Kon nagdesisyon ka na nga mag-alagad ha Dios, pamalandonga kon ano an karuyag niya nga buhaton mo, katapos, pagdesisyon kon paonan-o mo gagamiton an imo kinabuhi ha pag-alagad ha iya. Usa nga brother nga taga-Japan an nagsurat: “Han 14 anyos ako, nakapartner ko pagsangyaw an usa nga tigurang. Iya naobserbaran nga diri ako nag-i-enjoy ha ministeryo. May pagkabuotan nga ginsidngan niya ako: ‘Yuichiro, uli anay. Lingkod ngan pamalandonga hin maopay an mga ginbuhat ni Jehova para ha imo.’ Ginhimo ko an iya ginsiring. Ha pagkamatuod, ginhinunahuna ko ito ngan igin-inampo ha sulod hin pipira ka adlaw. Hinay-hinay nga nagbag-o an akon disposisyon. Waray pag-iha, inabat ko an kalipay ha pag-alagad kan Jehova. Nag-enjoy ako pagbasa han mga eksperyensya han mga misyonero, ngan nagtikang ako maghunahuna kon paonan-o ko pa mapapauswag an akon pag-alagad ha Dios.

⁶ “Naghimo ako hin mga desisyon nga ha urhi makakabulig ha akon basi makag-alagad kan Jehova ha iba nga nasud,” siring ni Yuichiro. “Pananglitan, nag-aram ako hin English. Han nakatapos ako, nag-part-time ako pagtutdo hin English basi makagpayunir. Han 20 anyos ako, nag-aram ako hin Mongolian ngan nagkaada higayon nga bumisita ha usa nga grupo hin magwarali nga nagyayakan hito nga yinaknan. Paglabay hin duha ka tuig, han 2007, kumadto ako ha Mongolia. Han nagsangyaw ako upod han pipira nga payunir ngan nakita ko nga damu nga tawo an namimiling han kamatuoran, naruyag ako nga bumalhin didto ngan buligan hira. Binalik ako ha Japan basi planuhon an akon bubuhaton. Tikang pa han Abril 2008, payunir na ako ha Mongolia. Diri masayon an kinabuhi dinhi. Kondi an mga tawo makinarawaton han maopay nga sumat, ngan nabuligan ko hira nga magin duok kan Jehova. Masisiring ko gud nga ginpili ko an gimaopayi nga paagi han pagkinabuhi.”

7. Ano nga mga desisyon an sadang mo himoon, ngan ano an imo mahibabaroan tikang kan Moises?

⁷ Kinahanglan ikaw an magdesisyon kon paonan-o mo gagamiton an imo kinabuhi ha pag-alagad kan Jehova. (Jos. 24:15) Diri ka namon pagbubut-an kon mag-aasawa ka, kon hin-o an imo mapapangasawa, o kon ano an imo magigin trabaho. Pipilion mo ba an trabaho nga diri nagkikinahanglan hin daku nga panahon ha pagbansay?  An pipira ha iyo nga mga batan-on nag-uukoy ha pobre nga mga baryo; an iba ha riko nga mga syudad. Ha bug-os nga kalibotan, magkaiba-iba gud an iyo mga personalidad, abilidad, eksperyensya, karuyag, ngan pagtoo. Bangin an kaibahan han kahimtang han iyo pagkinabuhi pariho han kaibahan han pagkinabuhi han batan-on nga hi Moises ngan han batan-on nga mga Hebreohanon ha kadaan nga Ehipto. Sugad nga apo han hadi, riko hi Moises, pero mga uripon an iba nga batan-on nga mga Hebreohanon. (Eks. 1:13, 14; Buh. 7:21, 22) Pariho ha iyo, nagkinabuhi hira ha importante hinduro nga mga panahon. (Eks. 19: 4-6) An tagsa kinahanglan magdesisyon kon ano an sadang niya himoon ha iya kinabuhi. Hi Moises naghimo hin husto nga desisyon nga buhaton an kaburut-on ni Jehova.—Basaha an Hebreo 11:24-27.

8. Ano an mabulig ha imo basi makahimo hin maaramon nga mga desisyon?

⁸ Hi Jehova nabulig ha imo basi makahimo ka hin maaramon nga mga desisyon durante ha imo pagkabatan-on. Naghahatag hiya hin sagdon pinaagi han mga prinsipyo ha Biblia nga imo magagamit anoman an imo kahimtang. (Sal. 32:8) Dugang pa, an imo Kristiano nga mga kag-anak ngan an mga tigurang ha kongregasyon makakabulig kon paonan-o mo iaaplikar ini nga mga prinsipyo. (Prob. 1:8, 9) Aton hisgotan an tulo nga prinsipyo ha Biblia nga mabulig ha imo ha paghimo hin maaramon nga mga desisyon nga magkakaada hin maopay nga epekto ha imo kabubuwason.

9. (a) Paonan-o kita ginpapasidunggan ni Jehova pinaagi ha paghatag ha aton hin kagawasan ha pagpili? (b) An ‘pag-una ha pagpamiling han Ginhadian’ naghahatag ha aton hin ano nga higayon?

⁹ Unaha an pagpamiling han Ginhadian ngan han iya katadongan. (Basaha an Mateo 6:19-21, 24-26, 31-34.) Ginpapasidunggan kita ni Jehova pinaagi ha paghatag ha aton hin kagawasan ha pagpili. Waray hiya magsiring nga kinahanglan mo gamiton ha pagsangyaw an ngatanan nga panahon han imo pagkabatan-on. Kondi gintagan kita ni Jesus hin prinsipyo nga makakabulig basi unahon an pagpamiling han Ginhadian. An imo pag-aplikar hito maghahatag ha imo hin higayon nga ipakita an imo gugma ha Dios ngan ha imo mga amyaw ngan an imo pagpasalamat ha paglaom nga kinabuhi nga waray kataposan. Samtang ginhuhunahuna mo an mahitungod han pag-asawa ngan pagtrabaho, tagda kon an imo ba mga desisyon maghahatag ha imo hin kabaraka ha materyal nga mga panginahanglan o magpapakita han imo kadasig para ha Ginhadian han Dios ngan han iya katadongan.

10. Kay ano nga malipayon hi Jesus, ngan ano nga mga desisyon an makakapalipay ha imo?

¹⁰ Pagin malipayon ha pag-alagad ha iba. (Basaha an Buhat 20:20, 21, 24, 35.) Mahigugmaon nga igintutdo ha aton ni Jesus inin importante nga prinsipyo. Malipayon gud hiya tungod kay ginbuhat niya an kaburut-on han iya Amay imbes nga an iya kaburut-on. Nalipay gud hiya pagkita ha mapainubsanon nga mga tawo nga nakarawat han maopay nga sumat. (Luc.10:21; Juan 4:34) Bangin naeksperyensyahan mo na liwat an kalipay tungod ha pagbulig ha iba. Kon imo ipapahiuyon an imo mga desisyon ha mga prinsipyo nga igintutdo ni Jesus, sigurado nga malilipay ka ngan mapapalipay mo liwat hi Jehova.—Prob. 27:11.

11. Kay ano nga nawara an kalipay ni Baruk, ngan ano an sagdon ha iya ni Jehova?

¹¹ An aton gidadakui nga kalipay nagtitikang ha pag-alagad kan Jehova. (Prob. 16:20) Baga hin nahingalimtan ito han sekretaryo ni Jeremias nga hi Baruk. May takna ha iya kinabuhi nga nawara an iya kalipay ha pag-alagad kan Jehova. Ginsidngan hiya ni Jehova: “Nangingita ka ba han dagku nga mga butang para ha imo ngahaw? Ayaw pangita ha ira: Kay, kitaa, akon pagdadad-on an karaotan ngada ha ngatanan nga unod . . . kondi an imo kinabuhi akon ihahatag ha imo sugad nga dinakpan ha ngatanan nga lugar ngain ka kakadto.” (Jer. 45:3, 5) Ha imo hunahuna, ano an makakapalipay kan Baruk? An pagpamiling ba han dagku nga mga butang o an pakatalwas ha kabungkagan han Jerusalem sugad nga matinumanon nga surugoon han Dios?—San. 1:12.

12. Ano nga desisyon an nakaghatag kan Ramiro hin kalipay?

¹² An usa nga brother nga nagin malipayon  tungod ha pag-alagad ha iba amo hi Ramiro. Hiya nagsiring: “Nagdaku ako ha pobre nga pamilya nga naukoy ha usa nga baryo ha Andes Mountains. Salit han gintanyagan ako ni Kuya nga papaeskwelahon niya ako ha unibersidad, daku gud ito nga oportunidad. Kondi bag-o pa la ako nga nabawtismohan sugad nga usa han mga Saksi ni Jehova, ngan nakakarawat ako hin iba nga tanyag—gin-aghat ako hin usa nga payunir nga magboluntaryo upod niya ha usa nga gutiay nga bungto. Kumadto ako, nag-aram ako pangarot, ngan nag-abri hin barber shop basi masuportahan an akon kalugaringon. Han nagtanyag kami ha pagtutdo ha mga tawo mahitungod ha Biblia, damu an kinarawat hito. Ha urhi, nakig-upod ako ha usa nga bag-o la nga naestablisar nga kongregasyon nga nagyayakan hin nitibo nga yinaknan. Napulo na ka tuig nga nag-aalagad ako sugad nga bug-os panahon nga ministro. Waray trabaho nga maghahatag ha akon han sugad nga kalipay kay han pagbulig ha mga tawo nga mag-aram ha Biblia ha ira kalugaringon nga yinaknan.”

13. Kay ano nga maopay nga mag-alagad kan Jehova hin bug-os kasingkasing samtang batan-on pa?

¹³ Pahimulusi an pag-alagad kan Jehova samtang batan-on ka pa. (Basaha an Eklesiastes 12:1.) Ayaw hunahunaa nga kinahanglan mo anay magkaada hin maopay nga trabaho antes ka mag-alagad kan Jehova. Samtang batan-on ka pa, ini an pinakamaopay nga panahon ha pag-alagad kan Jehova ha bug-os nga kasingkasing. Damu nga batan-on an gutiay pa la an responsabilidad ha pamilya, mahimsog, ngan makusog pa ha pagbuhat han magkuri nga mga toka. Samtang batan-on ka pa, ano an imo karuyag buhaton para kan Jehova? Bangin tumong mo nga magpayunir, ngan karuyag mo mag-alagad ha teritoryo nga iba an yinaknan. O bangin may dugang ka pa nga mahihimo ha pag-alagad ha iyo kongregasyon. Anoman an imo tumong, kinahanglan maaram ka kon paonan-o susuportahan an imo adlaw-adlaw nga panginahanglan. Ano nga trabaho an imo pipilion, ngan mationan-o kadaku nga panahon an magagamit ha pagbansay para hito?

14. Kay ano nga kinahanglan magin mabinantayon ka kon namimiling hin trabaho?

¹⁴ An tulo nga prinsipyo ha Biblia nga aton ginhisgotan mabulig ha imo ha pagdesisyon kon ano nga trabaho an imo pipilion. An imo mga magturutdo o an mga ahensya ha gobyerno posible nga maaram kon ano nga mga trabaho an puydi maaplayan ha iyo lugar o ha lugar diin karuyag mo mag-alagad. Makakabulig an mga impormasyon tikang ha ira, kondi kinahanglan ka magin mabinantayon. An mga tawo nga diri nahigugma kan Jehova bangin mangalimbasog nga impluwensyahan ka nga higugmaon an kalibotan. (1 Juan 2:15-17) Kon tatagdon mo an mga tanyag han kalibotan, bangin masayon ka malimbongan han imo kasingkasing.—Basaha an Proberbios 14:15; Jer. 17:9.

15, 16. Hin-o an makakaghatag ha imo hin maaramon nga sagdon mahitungod ha trabaho?

¹⁵ Kon mahibaroan mo na kon ano nga mga trabaho an puydi mo maaplayan, kinahanglan mo hin maaramon nga sagdon. (Prob. 1:5) Hin-o an makakabulig ha imo basi makapili hin trabaho nga uyon ha mga prinsipyo ha Biblia? Pamati ha mga tawo nga nahigugma kan Jehova, nahigugma ha imo, ngan nakilala ha imo ngan maaram gud han imo mga kahimtang. Bubuligan ka nira nga tangkod nga usisahon an imo kapasidad ngan mga motibo. Bangin an ira igsisiring makabulig nga hunahunaon mo utro an imo mga tumong. Kon an imo mga kag-anak nahigugma kan Jehova, makakabulig gud hira ha imo. An mga tigurang ha kongregasyon makakahatag liwat ha imo hin maaramon nga sagdon. Dugang pa, pakianhi an mga payunir ngan an nagbibiyahe nga mga paramangno kon kay ano nga nagdesisyon hira nga mag-alagad hin bug-os-panahon. Paonan-o hira nakagpayunir, ngan paonan-o nira ginsuportahan an ira kalugaringon? Ano nga mga bendisyon an ira nakarawat?—Prob. 15:22.

¹⁶ Adton nakilala gud ha imo makakaghatag ha imo hin maaramon nga sagdon. Pananglitan, bangin karuyag mo umundang pag-eskwela ha hayskul ngan magpayunir tungod la kay nakukurian ka ha mga buruhaton ha eskwelahan. An usa nga nahigugma ha imo bangin mahibaro han imo motibo ngan buligan ka nga masabtan nga an pagpadayon ha pag-eskwela mabulig ha imo nga magin mapailubon, usa nga importante nga kalidad kon karuyag mo mag-alagad kan Jehova hin bug-os.—Sal. 141:5; Prob. 6:6-10.

17. Ano nga mga desisyon an sadang naton likyan?

¹⁷ An tagsa nga nag-aalagad kan Jehova makakaeksperyensya hin mga kahimtang nga mahimo magpaluya han iya pagtoo ngan magpahirayo ha iya tikang kan Jehova. (1 Cor. 15:33; Col. 2:8) Kondi may pipira nga klase hin trabaho nga bangin mas mameligro an imo espirituwalidad. Bangin naobserbaran mo nga nawara an pagtoo han pipira katapos pilion an usa nga klase hin trabaho. (1 Tim. 1:19) Maaramon ka gud kon lilikyan mo an paghimo hin desisyon nga makakadaot han imo relasyon ha Dios.—Prob. 22:3.

18, 19. Kon an usa waray pa hingyap nga pauswagon an iya pag-alagad kan Jehova, ano an sadang niya buhaton?

¹⁸ Kon may-ada ka sinsero nga hingyap nga mag-alagad kan Jehova, pahimulsi an mga oportunidad nga iginhahatag niya ha imo samtang batan-on ka pa. Paghimo hin mga desisyon nga mabulig ha imo nga magin malipayon ha pag-alagad kan Jehova durante hinin importante gud nga mga panahon.—Sal. 148:12, 13.

¹⁹ Ha luyo nga bahin, ano an sadang mo buhaton kon waray ka pa hingyap nga pauswagon an imo pag-alagad kan Jehova? Ayaw undang ha pagpangalimbasog nga parig-unon an imo pagtoo. Katapos isaysay ni Pablo an iya pangalimbasog nga magkinabuhi ha paagi nga inuuyonan han Dios, hiya nagsiring: “Kon diri sugad hini an iyo panhunahuna ha anoman nga paagi, ipapahayag ha iyo han Dios an husto nga disposisyon. Pero anoman nga pag-uswag an aton nahimo, padayon kita nga maglakat hin husto ha amo gihapon nga paagi.” (Fil. 3:15, 16) Hinumdumi nga hinigugma ka ni Jehova. An iya sagdon amo an pinakamaopay. Mabulig hiya ha imo nga makahimo ka hin maaramon nga mga desisyon durante han imo pagkabatan-on.