1, 2. Ano an inaabat han mga surugoon han Dios may kalabotan hini nga sistema, ngan ha ano nga paagi masisiring nga may urukyan hira?

 NAABAT ka ba nga talwas ngan komportable hini nga kalibotan? Kon diri, diri la ikaw an naabat hito! Tikang pa hadto, an ngatanan nga tinuod nga nahigugma kan Jehova naabat nga sugad hira hin mga estranghero, o dumuruong, hini nga sistema. Pananglitan, samtang nagbuburobalhin hin lugar ha Kanaan, an magtinumanon nga magsiringba han Dios “nagsumat nga mga dumuruong ngan mga lumalabay hira ha tuna.”—Heb. 11:13.

² Ha pariho nga paagi, an dinihogan nga mga sumurunod ni Kristo, nga an “pagkatuminungnong aadto ha langit,” naabat nga sugad hira hin “mga lumalabay ngan dumuruong” hini nga sistema. (Fil. 3:20; 1 Ped. 2:11) An ‘iba nga mga karnero’ ni Kristo ‘diri [liwat] kanan kalibotan sugad nga hi Jesus diri man kanan kalibotan.’ (Juan 10:16; 17:16) Bisan pa hito, diri karuyag sidngon nga an katawohan han Dios waray “urukyan.” An tinuod, protektado kita ha pinakatalwas ngan pinakamahigugmaon nga urukyan nga aton mahuhunahuna, nga nakikita pinaagi han mga mata han pagtoo. Hi Moises nagsurat: “Ginoo, hi ikaw an amon urukyanan, ha ngatanan nga mga katulinan.” (Sal. 90:1) Paonan-o hi Jehova nagin ‘urukyan’ para ha iya maunungon nga mga surugoon ha kadaan nga panahon? Paonan-o hiya usa nga ‘urukyan’ han iya katawohan yana? Ngan paonan-o hiya magigin an amo la nga talwas nga urukyan ha tidaraon?

3. Ha ano igintanding hi Jehova ha Salmo 90:1, ngan kay ano?

³ Ha Biblia, hi Jehova usahay  igintatanding ha mga butang nga aton nakikita basi mas masabtan naton an iya personalidad. Pananglitan, ha Salmo 90:1 igintanding hi Jehova ha usa nga ‘urukyan,’ o balay. Kon ginhuhunahuna naton an usa nga balay, nahuhunahuna naton an usa nga lugar diin may gugma, kamurayawan, ngan proteksyon. Kay ano nga hi Jehova igintanding ha usa nga balay? An Biblia nasiring nga hi Jehova gugma. (1 Juan 4:8) Dios liwat hiya han kamurayawan, nga ‘nagpapapuyo hin marig-on’ han mga maunungon ha iya. (Sal. 4:8) Pananglitan, tagda an iya pagtratar ha matinumanon nga mga patriarka nga hira Abraham, Isaak, ngan Jakob.

4, 5. Paonan-o hi Jehova nagin ‘urukyan’ para kan Abraham?

⁴ Mahuhunahuna naton an inabat ni Abraham, nga hito nga panahon gintawag nga Abram, han ginsidngan hiya ni Jehova: “Gawas ha imo tuna, ngan ha imo mga kaurupdan, . . . ngan mapakadto ha tuna nga akon ha imo ipakikita.” Kon inabat hi Abraham hin kabaraka, sigurado nga nawara ito ha sunod nga ginsiring ni Jehova: “Hihimoon ko ikaw nga daku nga nasud, ngan bibendisyonan ko ikaw ngan pagpapadakuon ko an imo ngaran . . . Ngan akon pagbibendisyonan adton magbibendisyon ha imo, ngan adton magtatampalas ha imo, akon pagdadauton.”—Gen. 12:1-3.

⁵ Pinaagi hito nga mga pulong, nagsaad hi Jehova nga magigin talwas hiya nga urukyan para kan Abraham ngan ha iya katulinan. (Gen. 26:1-6) Gintuman ni Jehova an iya saad. Pananglitan, iya ginpugngan an Paraon han Ehipto ngan hi Hadi Abimelek han Gerar ha pagpatay kan Abraham ngan pagkuha han iya asawa nga hi Sara. Ginpanalipdan liwat ni Jehova hira Isaak ngan Rebeka ha pariho nga paagi. (Gen. 12:14-20; 20:1-14; 26:6-11) Ini an aton mababasa: “Waray [hi Jehova] tugot nga bisan hin-o magpakasayop ha ira; oo, tungod ha ira ginbadlong niya an mga hadi, nga nasiring: Ayaw pagkamkama an akon mga hinirogan, ngan ayaw pagbuhati hin maraot an akon mga manaragna.”—Sal. 105:14, 15.

6. Ano an ginsiring ni Isaak nga buhaton ni Jakob, ngan ano an bangin inabat ni Jakob?

⁶ Upod hito nga mga manaragna an apo ni Abraham nga hi Jakob. Han inabot an panahon nga mamimiling na hi Jakob hin maarasawa, ginsidngan hiya han iya tatay nga hi Isaak: “Diri ka mag-arog hin asawa ha mga anak nga babaye ha Kanaan. Buhat, pakadto ha Padan-aram, ha balay ni Betuel nga amay han imo iroy; ngan kumuha ka hin asawa didto ha mga anak nga babaye ni Laban nga bugto han imo iroy.” (Gen. 28:1, 2) Sinugot dayon hi Jakob kan Isaak. Binaya hiya ha iya pamilya ha Kanaan ngan nagbiyahe hin ginatos ka kilometro tipakadto ha Haran, posible nga nag-uusahan. (Gen. 28:10) Bangin naghunahuna hiya: ‘Ano ako kaiha didto? Kakarawaton ba ako han akon batâ ngan tatagan hin asawa nga may kahadlok ha Dios?’ Kon hi Jakob may sugad hito nga mga kabaraka, sigurado nga nawara ito pag-abot niya ha Luz, mga 100 ka kilometro tikang ha Beer-seba. Ano an nahitabo ha Luz?

7. Pinaagi hin inop, paonan-o ginpasarig han Dios hi Jakob?

 ⁷ Ha Luz, hi Jehova nagpakita kan Jakob ha inop ngan nagsiring: “Kitaa, ako upod ha imo, ngan magtitipig ha imo bisan diin ikaw pakadto, ngan magdadara ha imo liwat nganhi hini nga tuna; kay diri ko ikaw babayaan, tubtob han akon katuman han iginyakan ko ha imo.” (Gen. 28:15) Sigurado nga nagpasarig ngan nagliaw gud kan Jakob iton mahigugmaon nga mga pulong! Nahuhunahuna mo ba hiya nga malaksi nga nagbabaktas katapos hito, kay karuyag gud niya makita kon paonan-o tutumanon han Dios an Iya saad? Kon binaya ka ha iyo lugar, bangin basi mag-alagad ha iba nga nasud, posible nga nasasabtan mo an inabat ni Jakob. Kondi sigurado nga napamatud-an mo nga hi Jehova nagmamangno ha imo.

8, 9. Ha ano nga mga paagi hi Jehova nagin ‘urukyan’ para kan Jakob, ngan ano nga leksyon an aton hibabaroan hini?

⁸ Pag-abot ni Jakob ha Haran, mahigugmaon nga gin-abiabi hiya han iya batâ nga hi Laban ngan ha urhi iginhatag ha iya hira Lea ngan Rakel sugad nga mga asawa. Kondi paglabay han panahon hi Laban nagin diri makatadunganon kan Jakob ngan napulo ka beses nga ginbag-o an suhol ha iya! (Gen. 31:41, 42) Pero gin-ilob ni Jakob ito nga kawaray hustisya kay nasarig hiya nga padayon nga mamangnoan hiya ni Jehova—ngan ginbuhat gud ito ni Jehova! Ha pagkamatuod, ha panahon nga ginsidngan han Dios hi Jakob nga bumalik ha Kanaan, may-ada na hiya “daku nga mga panon, ngan mga surugoon nga kababayin-an, ngan mga surugoon nga kalalakin-an, ngan mga kamelyo ngan mga asno.” (Gen. 30:43) Mapasalamaton gud hi Jakob ngan nag-ampo: “Ako diri takos han gigugutiayi han ngatanan nga mga kalooy, ngan han ngatanan nga kamatuoran nga imo iginpahayag ha imo surugoon; kay tinabok ako ha Jordan dara an akon tungkod; ngan yana nagin duha ako ka pundok.”—Gen. 32:10.

⁹ Oo, tinuod gud an ginsiring ni Moises ha iya pag-ampo: “Ginoo, hi ikaw an amon urukyanan, ha ngatanan nga mga katulinan”! (Sal. 90:1) Hi Jehova waray magbag-o. Hiya nahigugma, nagpapanalipod, ngan nagmamangno pa gihapon ha iya maunungon nga mga surugoon. (Jak. 1:17) Aton hisgotan kon paonan-o.

10. Kay ano nga makakasiguro kita nga hi Jehova padayon nga nagigin talwas nga urukyan para ha iya mga surugoon?

¹⁰ Hunahunaa ini: Nagtitestigo ka ha korte kontra ha usa nga organisasyon hin mga kriminal ha bug-os nga kalibotan. An lider hito baltok hinduro, gamhanan, ngan waray kalooy nga buwaon ngan parapamatay. Ano an imo aabaton paggawas mo ha korte ha kataposan hito nga adlaw? Maabat ka ba nga talwas? Diri gud! Ha pagkamatuod, may maopay ka nga hinungdan nga maghangyo hin proteksyon. Igin-iilustrar hini nga kahimtang an sitwasyon han mga surugoon ni Jehova nga maisugon nga nagtitestigo para kan Jehova ngan waray kahadlok nga iginbubuhayhag an iya numero uno ngan mapintas gud nga kaaway, hi Satanas! (Basaha an Pahayag 12:17.) Kondi napahilom ba ni Satanas an katawohan han Dios? Waray! Ha pagkamatuod, padayon nga nagsasangyaw kita ha mas damu nga tawo ha bug-os nga kalibotan. Usa la an hinungdan nga nagin posible ini: Hi Jehova amo pa gihapon an aton arayopan, usa nga ‘urukyan’ para ha aton, labi na hinin kataposan nga mga adlaw. (Basaha an Isaias 54:14, 17.) Kondi hi Jehova diri magigin talwas nga urukyan para ha aton kon magpapasulay kita kan Satanas nga gumawas ha aton urukyan.

11. Ano nga leksyon an aton hibabaroan tikang ha mga patriarka?

¹¹ May kalabotan hini, mahibabaro liwat kita hin leksyon ha mga patriarka. Bisan kon inukoy hira ha Kanaan, nagpabilin hira nga bulag ha mga umurukoy hito nga lugar ngan nangalas ha maraot ngan imoral nga binuhatan hito nga mga tawo. (Gen. 27:46) Mga kalalakin-an hira nga may prinsipyo ngan diri nadepende ha hilaba nga listahan han puydi ngan diri puydi buhaton sugad nga giya. Igo na ha ira an ira hinbaroan mahitungod kan Jehova ngan han iya personalidad. Tungod kay  hiya an ira urukyan, ginbuhat nira an ngatanan nga ira mahihimo basi diri magin bahin han kalibotan. Maopay gud hira nga susbaranan ha aton! Nangangalimbasog ka ba nga subaron an magtinumanon nga patriarka ha imo pagpili hin kasangkayan ngan kaliawan? Makasurubo nga an iba ha Kristiano nga kongregasyon nagpapakita nga ha pipira nga paagi komportable hira ha kalibotan ni Satanas. Kon naabat ka hito hin bisan gutiay la, ig-ampo ito. Hinumdumi, hi Satanas an tag-iya hini nga kalibotan. Iginpapakita hito an iya kawaray gugma ngan pagin makikalugaringon.—2 Kor. 4:4; Efe. 2:1, 2.

12. (a) Paonan-o hi Jehova nagtatagana para ha iya mga surugoon? (b) Ano an imo inaabat mahitungod hini nga mga tagana?

¹² Basi maatohan an mga limbong ni Satanas, kinahanglan pahimulsan naton an ngatanan nga espirituwal nga tagana ni Jehova para ha iya mga surugoon nga ginhihimo hiya nga ira urukyan. Upod hini nga mga tagana an Kristiano nga mga katirok, pagsingba han pamilya, ngan an regalo nga kalalakin-an—an mga paramangno nga ginpili han Dios basi magliaw ngan bumulig ha aton samtang nangangalimbasog kita nga mailob an mga problema. (Efe. 4:8-12) Hi Brother George Gangas, nga damu ka tuig nga membro han Nagmamando nga Lawas, nagsurat: “Kon kaupod ko [an katawohan han Dios] naabat ako nga talwas ngan komportable sugad la kon kaupod ko an akon pamilya, ha espirituwal nga paraiso.” Ito ba liwat an imo inaabat?

13. Ano nga importante nga leksyon an aton hibabaroan ha Hebreo 11:13?

¹³ Usa pa nga kalidad han mga patriarka nga sadang naton subaron amo an ira pagin andam nga magin iba ha mga tawo nga nakapalibot ha ira. Sugad han ginsiring ha  parapo 1, hira “nagsumat nga mga dumuruong ngan mga lumalabay hira ha tuna.” (Heb. 11:13) Determinado ka ba nga magin iba ha mga tawo ha kalibotan? Oo, diri pirme masayon an pagbuhat hito. Kondi ha bulig han Dios ngan han kabugtoan, mahimo ka maglampos. Hinumdumi, diri ka nag-uusahan. An ngatanan nga karuyag mag-alagad kan Jehova nakikig-away kan Satanas ngan hini nga kalibotan! (Efe. 6:12) Kondi mahimo kita magdaog kon sumarig kita kan Jehova ngan himoon hiya nga aton talwas nga urukyan.

14. Ano nga “bungto” an ginhulat han mga surugoon ni Jehova?

¹⁴ Importante liwat ini: Subara hi Abraham pinaagi han pagpokus pirme ha premyo. (2 Kor. 4:18) Hi apostol Pablo nagsurat nga hi Abraham ‘naghihinulat han bungto nga may patukoranan, nga an magturukod ngan magburuhat amo an Dios.’ (Heb. 11:10) Ito nga “bungto” amo an Mesianiko nga Ginhadian. Syempre, kinahanglan hulaton ni Abraham ito nga “bungto.” Ha usa nga paagi,  diri na kita naghuhulat hito. Nagmamando na ito yana ha langit. Labot pa, nagtitikadamu an ebidensya nga hirani na ito magmando ha bug-os nga tuna. Tinuod ba ha imo ito nga Ginhadian? Nakakaimpluwensya ba ito ha imo panlantaw ha kinabuhi, ha imo panhunahuna hini nga kalibotan, ngan ha imo mga prayoridad?—Basaha an 2 Pedro 3:11, 12.

15. Ano an mahitatabo ha mga nasarig hini nga kalibotan?

¹⁵ Samtang nagtitikahirani an kataposan han kalibotan ni Satanas, an “mga kasakitan” hito magtitikaduro. (Mat. 24:7, 8) Sigurado nga magigin mas maraot pa gud an kahimtang ha daku nga kagol-anan. Mabubungkag an mga imprastraktura, ngan an mga tawo mahahadlok hinduro. (Hab. 3:16, 17) An Biblia nasiring nga tungod kay waray na hira makakadtoan, maayop hira ha “mga lungib ngan ha dagku nga bato ha kabukiran.” (Pah. 6:15-17) Kondi bisan an literal nga lungib o an sugad-bukid nga mga organisasyon ha politika ngan komersyo diri makakapanalipod ha ira.

16. Ano an sadang naton magin pagtagad ha Kristiano nga kongregasyon, ngan kay ano?

¹⁶ Kondi an katawohan ni Jehova padayon nga magigin talwas ha ira ‘urukyan,’ hi Jehova nga Dios. Pariho kan propeta Habakuk, hira “magmamalipay dida kan Jehova.” Hira “magmamahimongayaon dida han Dios han [ira] kaluwasan.” (Hab. 3:18) Ha ano nga mga paagi hi Jehova magigin ‘urukyan’ durante hiton makuri nga panahon? Kinahanglan hulaton naton ito basi aton makita. Kondi makakasiguro kita hini: Pariho han mga Israelita ha panahon han pagbaya nira ha Ehipto, an daku nga panon magpapabilin nga organisado ngan alerto gud ha mga instruksyon han Dios. (Pah. 7:9; basaha an Eksodo 13:18.) Ito nga mga instruksyon ihahatag ha teokratiko nga paagi, posible nga pinaagi han kongregasyon. Ha pagkamatuod, an yinukot nga kongregasyon ha bug-os nga kalibotan bangin amo an gin-uunabi nga nagpapanalipod nga “mga sulod” nga kwarto nga igintagna ha Isaias 26:20. (Basaha.) Ginpapabilhan mo ba an mga katirok han kongregasyon? Ginsusunod mo ba dayon an instruksyon nga iginhahatag ni Jehova pinaagi han kongregasyon?—Heb. 13:17.

17. Ha ano nga paagi hi Jehova ‘urukyan’ bisan han iya maunungon nga mga surugoon nga namatay na?

¹⁷ Bisan adton bangin mamatay nga matinumanon antes an daku nga kagol-anan magpapabilin nga talwas kan Jehova, an ira ‘urukyan.’ Ha ano nga paagi? Maiha na katapos mamatay an magtinumanon nga patriarka, hi Jehova nagsiring kan Moises: “Ako amo an Dios . . . ni Abraham, an Dios ni Isaak, ngan an Dios ni Jakob.” (Eks. 3:6) Katapos ni Jesus igkotar ito nga mga pulong, hiya nagsiring: “Hiya diri Dios han mga minatay, kondi han mga buhi. Kay an ngatanan nabubuhi ha iya.” (Luk. 20:38) Oo, para kan Jehova, sugad hin buhi la gihapon an iya maunungon nga mga surugoon nga namatay nga matinumanon; sigurado nga babanhawon hira.—Ekles. 7:1.

18. Ha bag-o nga kalibotan, ha ano nga paagi hi Jehova magigin ‘urukyan’ para ha iya katawohan ha espesyal nga paagi?

¹⁸ Ha bag-o nga kalibotan nga hirani na umabot, hi Jehova magigin ‘urukyan’ para ha iya katawohan ha usa pa nga paagi. An Pahayag 21:3 nasiring: “Kitaa, an payag han Dios aada ha mga tawo, ngan mag-uukoy hiya upod nira.” Ha siyahan, hi Jehova maukoy upod han iya mga sakop dinhi ha tuna pinaagi kan Kristo Jesus sugad nga iya representante. Ha kataposan han usa ka yukot ka tuig, itutubyan ni Jesus an Ginhadian ha iya Amay, kay bug-os na niya nga natuman an katuyoan han Dios para ha tuna. (1 Kor. 15:28) Katapos hito, hi Jehova na an direkta nga magmamando ha hingpit nga katawohan. Makalilipay gud nga tidaraon an aton ginpapamulat! Samtang waray pa ito, mangalimbasog kita nga subaron an magtinumanon nga surugoon ni Jehova ha kadaan nga panahon pinaagi ha paghimo kan Jehova nga aton ‘urukyan.’