Han Disyembre 2009, tungod han usa nga desisyon nga ginsuportahan han Korte Suprema han Russia, ginpaundang an relihiyoso nga organisasyon han mga Saksi ni Jehova ha Taganrog, Russia. Iginpasara an ira Kingdom Hall, ngan igindeklara nga peligroso ha publiko an 34 han aton mga publikasyon. Ini nga panhitabo iginbutang ha opisyal nga Web site han mga Saksi ni Jehova lakip an mga retrato han mga Saksi nga naapektohan hito nga desisyon, upod an kabataan.

Paglabay hin pipira ka bulan, an Administrative Center han mga Saksi ni Jehova ha Russia nakakarawat hin kahon ngan hin surat tikang ha usa nga Saksi nga pamilya ha Queensland, Australia, nga nakabasa han report mahitungod han desisyon han Korte. An surat nasiring: “Hinigugma nga Kabugtoan, An amon mga anak nga hira Cody ngan Larissa nabantad gud han pagtoo ngan mga pagsari nga naeksperyensyahan han kabugtoan ha Russia. Naghimo hira hin mga kard ngan surat, ngan ginbutang namon ito ha usa nga gutiay nga kahon nga may mga regalo nga karuyag namon ipadara ha kabataan ha Taganrog, basi hibaroan nira nga ha hirayo hinduro nga lugar, may kabataan nga matinumanon liwat nga nag-aalagad kan Jehova ngan naghuhunahuna ha ira. Ginpapaabot nira ha ira ngatanan an ira hangkop ngan gugma.”

Han nakarawat han kabataan ha Taganrog ini nga mga regalo, naghimo hira hin mga surat nga may mga drowing ha pagpasalamat ha pamilya ha Australia. Usa nga bugto nga nag-aalagad ha sanga nga opisina ha Russia an nabantad hini nga pagdasig “tikang ha baba han mga kabataan” salit nagsurat hiya kanda Cody ngan Larissa: “Sigurado nga maaram kamo nga nasusubo gud an kabataan ngan mga adulto kon ginsisirotan hira ha usa nga butang nga waray nira buhata. Waray ginbuhat nga sayop an aton kabugtoan ha Taganrog, kondi iginpasara an ira Kingdom Hall. Nakapasubo gud ini ha ira. Madadasig hira ha paghibaro nga may naghuhunahuna ha ira ha luyo nga bahin han kalibotan. Salamat han iyo gugma ngan pagkamahinatagon!”—Sal. 8:2.

Bahin gud kita han bug-os-kalibotan nga pagminagburugto, ngan an aton gugma ha usa kag usa nabulig ha aton ngatanan nga mailob an mga pagsari ngan kakurian. Samtang gindidebatehan ha mga korte kon nag-aaghat ba hin kapungot an mga publikasyon han mga Saksi ni Jehova, iginpapakita han aton kabataan an ira pagtagad ha kaopayan han kada tagsa, nga diri nagpapaapekto ha pagkaiba-iba han nasyonalidad ngan kultura ngan iginpapakita nga tinuod an ginsiring ni Jesus: “Tungod hini an ngatanan makilala, nga kamo akon mga tinon-an, kon kamo maghigugmaanay an usa kag usa.”—Juan 13:35.