Maaramon nga Sagdon Mahitungod ha Pagin Solo Ngan Pag-asawa
Maaramon nga Sagdon Mahitungod ha Pagin Solo Ngan Pag-asawa
“Ini iginsisiring ko . . . tungod ha maopay, ngan nga mag-alagad kamo ha Ginoo ha waray kalingawan.”—1 KOR. 7:35.
1, 2. Kay ano nga sadang naton usisahon an sagdon han Biblia mahitungod ha pagin solo ngan pag-asawa?
AN KALIPAY, kapakyasan, ngan kabaraka kasagaran na nga inaabat naton ha aton pakig-upod ha diri kapariho an sekso. Tungod kay naieksperyensyahan naton ini nga mga emosyon, kinahanglan mangaro kita hin giya ha Dios. May iba pa nga hinungdan nga sadang kita magpagiya ha iya. Pananglitan, an usa nga Kristiano nga malipayon ha pagin solo bangin umabat nga an iya mga kapamilya o kasangkayan nag-iinaghat ha iya nga mag-asawa. May iba liwat nga bangin karuyag mag-asawa kondi waray pa makaagi hin angayan nga maarasawa. An iba nagkikinahanglan hin giya kon paonan-o mangangandam ha mga responsabilidad han pagin bana o asawa. Ngan an solo ngan inasaw-an nga mga Kristiano pariho nakakaeksperyensya hin mga pagsulay nga magbuhat hin imoralidad.
2 Ini nga mga kahimtang nakakaapekto diri la han aton kalipay kondi labi na han aton relasyon kan Jehova nga Dios. Ha kapitulo 7 han siyahan nga surat ni Pablo ha mga taga-Korinto, naghatag hiya hin sagdon mahitungod han pagin solo ngan pag-asawa. Karuyag niya aghaton an iya magbarasa nga buhaton an ‘maopay ngan mag-alagad ha Ginoo ha waray kalingawan,’ o kaulangan. (1 Kor. 7:35) Samtang imo ginpapamalandong an iya sagdon mahitungod hinin importante nga mga butang, usisaha an imo kahimtang—solo ka man o inasaw-an—basi bug-os nga makag-alagad kan Jehova.
Seryoso Ngan Personal nga Desisyon
3, 4. (a) Ano an mahimo mahitabo kon an kasangkayan o kapamilya nag-iinaghat ha usa nga mag-asawa? (b) Paonan-o an sagdon ni Pablo makakabulig ha aton nga magkaada timbang nga panhunahuna ha pag-asawa?
3 Pariho ha mga Judio ha siyahan nga siglo, damu yana an natoo nga importante gud an pag-asawa. Kon an usa nga olitawo o daraga nagkakaedad na ngan diri pa nag-aasawa, bangin mabaraka an iya kasangkayan ngan mga paryente ngan maaghat nga sagdonan hiya. Ha iristorya, bangin magsuhestyon hira ha iya nga maniguro pamiling hin maarasawa. Bangin magsiring hira kon hin-o an naangay ha iya. Bangin planuhon pa ngani nira nga magkita an duha nga pariho solo. An pagbuhat hito usahay nagriresulta hin kaalohi, kadaot han pagkamagsangkay, ngan kasubo.
4 Hi Pablo waray magsiring ha iba nga kinahanglan hira mag-asawa o magpabilin nga solo. (1 Kor. 7:7) Kontento hiya nga mag-alagad kan Jehova nga waray asawa, kondi ginrespeto niya an katungod han iba nga mag-asawa. An mga Kristiano yana may katungod liwat ha pagdesisyon kon mag-aasawa hira o diri. Diri an iba an magbubuot kon ano an sadang nira magin desisyon.
Magin Malampuson ha Pagin Solo
5, 6. Kay ano nga gindasig ni Pablo an mga Kristiano nga magpabilin nga solo?
5 Ha surat ni Pablo ha mga taga-Korinto, makatirigamnan an iya positibo nga panhunahuna ha pagin solo. (Basaha an 1 Korinto 7:8.) Bisan kon hi Pablo waray asawa, waray niya hunahunaa nga mas maopay hiya kay ha mga inasaw-an, sugad han ginbubuhat han solo nga mga klero han Kakristianohan. Lugod, iya ginpabug-atan an usa nga bentaha nga napapahimulsan han damu nga solo nga Kristiano. Ano ito?
6 An solo nga Kristiano kasagaran na nga puydi kumarawat hin toka ha pag-alagad kan Jehova nga bangin diri mahihimo han inasaw-an. Hi Pablo gintagan hin espesyal nga pribilehiyo nga magin “apostol ha mga Hentil.” (Roma 11:13) Basaha an Buhat kapitulo 13 tubtob 20, ngan handurawa an iya pagbiyahe upod an iya mga igkasi-misyonero basi magsangyaw ha iba-iba nga lugar ngan mag-establisar hin bag-o nga mga kongregasyon. Nag-antos hiya hin magkuri nga kahimtang nga diri maieksperyensyahan han damu ha aton yana. (2 Kor. 11:23-27, 32, 33) Bisan pa hito, malipayon hiya tungod kay damu an iya nabuligan nga magin disipulo. (1 Tes. 1:2-7, 9; 2:19) Mahihimo ba niya ito ngatanan kon may asawa hiya o may pamilya? Bangin diri.
7. Pag-unabi hin ehemplo han kabugtoan nga ginsalingabot an ira pagin solo para dugangan an ira mahihimo ha pagsangyaw.
7 Ginsasalingabot han damu nga solo nga Kristiano an ira kahimtang basi dugangan an ira mahihimo ha pagsangyaw. Hira Sara ngan Limbania nga solo nga mga payunir ha Bolivia, binalhin ha usa nga baryo nga damu na ka tuig nga waray masangyawi. Nagin problema ba nira an kawaray koryente didto? Hira nagsiring: “Waray radyo o TV, salit waray nakakaulang ha mga tawo ha pagbasa, an ira paborito nga hilangkagan.” Iginpakita ha ira han iba nga taga-baryo an mga publikasyon han mga Saksi ni Jehova nga ira la gihapon ginbabasa kondi maiha na nga diri gin-iimprinta. Tungod kay haros kada balay may interesado, maiha antes nira natapos an teritoryo. Usa nga edaran na nga babaye an nagsiring ha ira: “Hirani na gud ada an kataposan kay nakaabot na ha amon an mga Saksi ni Jehova.” Waray pag-iha, an iba nga taga-baryo natambong na ha mga katirok.
8, 9. (a) Kay ano nga nagsiring hi Pablo nga maopay an pag-alagad ha Dios nga solo? (b) Ano an mga bentaha han pagin solo nga Kristiano?
8 Syempre, an pagsangyaw han inasaw-an nga mga Kristiano ha magkuri nga teritoryo nagkakaada liwat mag-opay nga resulta. Kondi an iba nga toka nga puydi ha solo nga mga payunir bangin makuri ha mga inasaw-an o may mga anak. Han nagsurat hi Pablo ha mga kongregasyon, maaram hiya nga damu pa an sadang himoon ha pagsangyaw han maopay nga sumat. Karuyag niya nga magmalipayon an ngatanan pariho ha iya. Tungod hito nagsiring hiya nga maopay an pag-alagad kan Jehova nga solo.
9 Usa nga solo nga payunir nga babaye ha Estados Unidos an nagsurat: “An iba naghuhunahuna nga an mga solo diri magigin malipayon. Pero naobserbaran ko nga an tinuod nga kalipay nadepende ha aton pakigsangkay kan Jehova. Bisan kon sakripisyo an pagin solo, makalilipay ito nga regalo kon gagamiton ha maopay nga paagi.” May kalabotan ha pagin malipayon, hiya nagsiring: “An pagin solo usa nga higayon basi magin malipayon, diri kay ulang. Maaram ako nga hinigugma ni Jehova an ngatanan, solo man o inasaw-an.” Yana, malipayon nga nag-aalagad hiya ha usa nga nasud nga daku an panginahanglan hin magwarali. Kon waray ka asawa, puydi mo ba dugangan an imo mahihimo ha pagtutdo ha iba han kamatuoran? Kon bubuhaton mo ito, an pagin solo magigin birilhon nga regalo ni Jehova ha imo.
Mga Solo nga Karuyag Mag-asawa
10, 11. Paonan-o ginbubuligan ni Jehova an mga naruruyag pag-asawa kondi waray pa makaagi hin angayan nga padis?
10 Katapos hin pipira ka panahon ha pagin solo, damu nga magtinumanon nga Saksi ni Jehova an nagdidesisyon nga mamiling hin maarasawa. Tungod kay maaram hira nga nagkikinahanglan hira hin giya, nangangaro hira hin bulig kan Jehova ha pamiling hin angayan nga padis. An Biblia nasiring: “Kon inaabat han bisan hin-o nga birhen nga diri hiya makakapugong han iya seksuwal nga mga hingyap, kon lahos na hiya ha pagkabatan-on, ini an angay mahitabo: buhaton niya an iya karuyag; diri hiya nakakasala. Pabay-i nga mag-asawa hira.”—1 Kor. 7:36, NW.
11 Kon karuyag mo makaasawa hin bugto nga bug-os-kasingkasing nga nag-aalagad kan Jehova, padayon ito nga ig-ampo ha Iya. (Fil. 4:6, 7) Bisan kon ano kaiha an imo paghulat, ayaw kawad-i hin paglaom. Maaram hi Jehova han imo ginkikinahanglan, ngan kon sumarig ka ha iya, bubuligan ka niya nga mailob an imo kahimtang.—Heb. 13:6.
12. Kon may nangangasawa ha imo, ano an sadang mo pamurubuuton hin maopay antes magdesisyon?
12 An usa nga solo nga Kristiano nga naruruyag pag-asawa bangin karuyag pangasaw-on hin bugto nga maluya an espirituwalidad o hin tagagawas pa ngani. Kon mahitabo ito ha imo, hinumdumi nga an kasubo nga resulta han sayop nga pagpili hin maarasawa mas duro pa ha kasubo nga gin-aabat han waray asawa. Ngan kon may asawa ka na, anoman an mahitabo, diri ka puydi bumulag ha imo asawa samtang buhi pa kamo. (1 Kor. 7:27) Ayaw pag-asawa tungod la kay naghuhunahuna ka nga ito na la an imo higayon nga makaasawa. Bangin pagbasolan mo ito ha urhi.—Basaha an 1 Korinto 7:39.
Pag-andam ha Pagin Inasaw-an
13-15. Ano an posible magin hinungdan han mga problema nga sadang pag-istoryahan han mag-uyab antes magpakasal?
13 Bisan kon hi Pablo nagsiring nga maopay an pag-alagad kan Jehova nga solo, waray niya minosa an mga nagdesisyon nga mag-asawa. Lugod, an iya sagdon nabulig ha mga inasaw-an nga masabtan kon ano an malalaoman katapos han kasal ngan kon paonan-o magigin marig-on an ira pag-asawa.
14 Bangin kinahanglan bag-uhon han iba nga mag-uyab an ira ginlalaoman ha pag-asawa. Samtang mag-uyab pa la, bangin hunahunaon nira nga waray kapariho an ira gugma ngan sigurado nga magigin malipayon gud an ira pag-asawa. Nagpapakasal hira nga sugad hito an panhunahuna ngan natoo nga waray gud makakadaot han ira kalipay sugad nga mag-asawa. Diri reyalistiko an sugad nga panhunahuna. Oo, makalilipay an romantiko nga bahin han pag-asawa. Kondi diri ito igo ha pagsulbad han mga problema ngan kakurian nga naieksperyensyahan han mag-asawa.—Basaha an 1 Korinto 7:28. *
15 Katapos han kasal, damu nga mag-asawa an nahipapausa o nasusubo pa ngani kon diri hira nagkakauyon ha importante nga mga butang. Bangin diri pariho an ira panhunahuna ha paggasto hin kwarta, pagpahalibway, kon diin maukoy, ngan kon ano kaagsob hira mabisita ha ira pamilya. Ngan an kada tagsa may diri maopay nga kinaiya nga nakakapaaringit ha usa. Samtang mag-uyab pa la, bangin hunahunaon nga diri kinahanglan pag-istoryahan inin importante nga mga butang, pero puydi ito magin hinungdan han mga problema kon mag-asawa na. Salit mas maopay nga pag-istoryahan ito antes magpakasal.
16. Kay ano nga an mag-asawa sadang magkauyon kon paonan-o susulbaron an ira mga problema?
16 Basi magin malampuson ngan malipayon, kinahanglan magkauyon an mag-asawa ha pagtuman han ira mga responsabilidad. Kinahanglan magkauyon hira kon paonan-o didisiplinahon an ira mga anak ngan kon paonan-o mamangnoan an ira lagas nga mga kag-anak. An mga problema ha pamilya diri sadang magin hinungdan han tensyon butnga han mag-asawa. Pinaagi ha pag-aplikar han sagdon ha Biblia, masusulbad nira an damu nga problema, maiilob an diri nasusulbad, ngan magpapabilin hira nga malipayon sugad nga mag-asawa.—1 Kor. 7:10, 11.
17. Kay ano nga an inasaw-an “maminangnoon ha mga butang ha kalibotan”?
17 Gin-unabi ni Pablo an usa pa nga kahimtang han mga inasaw-an ha 1 Korinto 7:32-34. (Basaha.) Hira “maminangnoon ha mga butang ha kalibotan,” sugad han pagkaon, bado, balay, ngan iba pa nga nangunguna nga panginahanglan. Kay ano? Han waray pa asawa, an usa nga bugto nga lalaki bangin nakapokus gud ha ministeryo. Kondi sugad nga bana, kinahanglan ibanan niya an panahon ngan kusog nga iya ginagamit para hito basi mangnoan an iya asawa. Sugad liwat hito an ginbubuhat han iya asawa. Nasasabtan ni Jehova ito nga panginahanglan. Maaram hiya nga basi magmalampuson an pag-asawa, agsob nga kinahanglan ibanan han mag-asawa an panahon ngan kusog nga ira gin-gamit hadto ha pag-alagad ha iya han solo pa hira.
18. Ano nga mga pagbag-o an bangin kinahanglan buhaton han mag-asawa may kalabotan ha panahon nga ira igin-gagahin ha pagpahalibway?
18 Kondi diri la ito an kinahanglan nira buhaton. Kon kinahanglan nira ibanan an panahon ngan kusog nga ira ginagamit ha pag-alagad ha Dios basi mangnoan an usa kag usa, diri ba ito liwat an sadang nira buhaton ha panahon ngan kusog nga ira gin-gamit ha pagpahalibway han solo pa hira? Ano an aabaton han asawa kon daku la gihapon nga panahon an igin-gagahin han iya bana ha mga isport upod han iya kasangkayan? Ano an aabaton han bana kon daku la gihapon nga panahon an igin-gagahin han iya asawa ha mga hilangkagan upod han iya kasangkayan? An tagsa ha ira bangin umabat nga nag-uusahan, diri hinigugma, ngan masurub-on. Malilikyan ini kon bubuhaton han mag-asawa an ngatanan nga ira mahihimo ha pagparig-on han ira relasyon sugad nga mag-asawa.—Efe. 5:31.
Karuyag ni Jehova nga Magin Limpyo Kita ha Moral
19, 20. (a) Kay ano nga an pag-asawa diri awtomatiko nga nagpapanalipod ha usa tikang ha imoralidad? (b) Ano an peligro kon an mag-asawa diri nagkakaupod hin maiha nga panahon?
19 An mga magsiringba ni Jehova determinado nga magpabilin nga limpyo ha moral. Basi malikyan an problema may kalabotan hini, an iba nagdidesisyon nga mag-asawa. Kondi an pag-asawa diri awtomatiko nga nagpapanalipod ha usa tikang ha seksuwal nga imoralidad. Ha panahon han Biblia, an mga syudad may higtaas ngan magrig-on nga pader. Pero mapapanalipdan la an usa kon diri hiya magawas ha pader. Kon gumawas hiya, puydi hiya tikasan o patayon pa ngani han mga tulisan ngan kriminal. Ha pariho nga paagi, mapapanalipdan la an mag-asawa tikang ha imoralidad kon susundon nira an mga balaud ngan limitasyon nga iginhatag ni Jehova para ha mag-asawa.
20 Iginsaysay ni Pablo ito nga mga limitasyon ha 1 Korinto 7:2-5. May kalabotan ha seksuwal nga relasyon, an asawa la an may katungod ha iya bana, ngan sugad man an bana ha iya asawa. An kada tagsa ginlalaoman nga maghatag han “angay” ha iya padis, karuyag sidngon, an seksuwal nga relasyon nga katungod han usa nga inasaw-an. Kondi may mga mag-asawa nga diri nagkakaupod hin maiha nga panahon—magbulag nga nagbabakasyon o hirayo ha usa kag usa tungod han trabaho, salit diri nira naihahatag an “angay” ha usa kag usa. Hunahunaa an makasurubo nga resulta kon an usa magpasulay kan Satanas ngan mag-adulteryo tungod han “diri pagpugong ha kairibgon han lawas.” Bibendisyonan ni Jehova an mga ulo han pamilya nga nagtatagana han panginahanglan han ira pamilya nga diri iginsasakripisyo an ira pag-asawa.—Sal. 37:25.
Mga Kapulsanan han Pagsunod ha Sagdon han Biblia
21. (a) Kay ano nga makuri an paghimo hin mga desisyon may kalabotan ha pagin solo ngan pag-asawa? (b) Kay ano nga mapulsanon an sagdon ha 1 Korinto kapitulo 7?
21 Makuri hinduro an paghimo hin mga desisyon may kalabotan ha pagin solo ngan pag-asawa. Magpabilin ka man nga solo o mag-asawa, magkakaada gihapon mga problema tungod kay an ngatanan diri hingpit. Ngan bisan an mga gin-uuyonan ngan ginbibendisyonan ni Jehova diri makakalikay ha kasub-anan, solo man hira o inasaw-an. Pero kon imo iaaplikar an maaramon nga sagdon ha 1 Korinto kapitulo 7, malilikyan mo an damu han mga problema nga aton ginhisgotan. Ha paniplatan ni Jehova ‘maopay an imo hihimoon,’ solo ka man o inasaw-an. (Basaha an 1 Korinto 7:37, 38.) * An pagkaada han pag-uyon han Dios amo an gimaopayi nga tumong nga imo makakab-ot. Kon uuyonan ka niya, padayon ka nga mag-uuswag ngadto ha kinabuhi ha iya bag-o nga kalibotan. Didto, mawawara na an mga problema nga naieksperyensyahan yana butnga han kalalakin-an ngan kababayin-an.
[Mga footnote]
^ par. 21 Ha New World Translation, ini an mababasa ha 1 Korinto 7:37, 38: “Kon determinado an bisan hin-o ngan diri nanginginahanglan nga mag-asawa, ngan kon kontrolado niya an iya kalugaringon ngan marig-on gud ha iya desisyon nga diri mag-asawa, maopay an iya ginhihimo. Sugad man, maopay an nag-aasawa, pero mas maopay an diri nag-aasawa.”
Mababaton Mo Ba?
• Kay ano nga diri husto nga pag-inaghaton nga mag-asawa an usa nga solo?
• Paonan-o mo magagamit ha gimaopayi nga paagi an imo panahon sugad nga solo nga Kristiano?
• Paonan-o an mag-uyab makakapangandam para ha mga problema ha pag-asawa?
• Kay ano nga an pag-asawa diri awtomatiko nga nagpapanalipod ha usa tikang ha imoralidad?
[Mga Pakiana]
[Mga Retrato ha pahina 14]
Malipayon an solo nga mga Kristiano nga ginagamit an ira panahon ha pagpauswag han ira ministeryo
[Retrato ha pahina 16]
Ano nga mga pagbag-o an bangin kinahanglan himoon han iba katapos han kasal?
