Liawa an Ngatanan nga Masurub-on
Liawa an Ngatanan nga Masurub-on
“Hi Jehova nagdihog ha akon . . . ha paglipay hadton ngatanan nga masurub-on.”—ISA. 61:1, 2.
1. Ano an ginbuhat ni Jesus para ha mga masurub-on, ngan kay ano?
HI Jesu-Kristo nagsiring: “An akon pagkaon amo an pagbuhat han kaburut-on han nagsugo ha akon ngan paghuman han iya buruhaton.” (Juan 4:34) Ha pagbuhat ni Jesus han toka ha iya han Dios, iya iginpakita an mag-opay hinduro nga kalidad han iya Amay. Usa hito amo an daku nga gugma ni Jehova ha mga tawo. (1 Juan 4:7-10) Gin-unabi ni apostol Pablo an usa nga kapahayagan hito nga gugma han ginhulagway niya hi Jehova sugad nga “Dios han ngatanan nga paglipay.” (2 Kor. 1:3) Iginpakita ni Jesus an sugad hito nga gugma han iya ginbuhat an igintagna ni Isaias. (Basaha an Isaias 61:1, 2.) Ha sinagoga ha Nasaret, ginbasa ni Jesus ito nga tagna ngan gin-aplikar ito ha iya kalugaringon. (Luk. 4:16-21) Ha iya bug-os nga ministeryo, an mga masurub-on iya ginliaw, gindasig, ngan ginbuligan nga magkaada murayaw nga hunahuna.
2, 3. Kay ano nga an mga sumurunod ni Kristo kinahanglan magsubad ha iya ha pagliaw ha iba?
2 An ngatanan nga sumurunod ni Jesus kinahanglan magsubad ha iya pinaagi ha pagliaw ha mga masurub-on. (1 Kor. 11:1) Hi Pablo nagsiring: “Pagdinasigay ngan pagbinuligay kamo.” (1 Tes. 5:11, Maopay nga Sumat) Kinahanglan gud naton liawon an iba, tungod kay nagkikinabuhi kita ha “magpakalilisang nga mga panahon.” (2 Tim. 3:1) An mag-opay nga tawo ha bug-os nga kalibotan nagkikinabuhi upod hadton nagyayakan ngan nagbubuhat hin mga butang nga nagigin hinungdan han pag-antos, kasakit, ngan kasubo.
3 Sugad han igintagna ha Biblia, hinin kataposan nga mga adlaw hini nga maraot nga sistema, damu an ‘mahigugmaon ha ira kalugaringon, mahigugmaon ha salapi, hambog, palabilabihon, maglibakon, maglaris ha mga ginikanan, diri magbaluson, diri baraan, waray gugma nga kinaiya, diri sadang malukmay, maglibakon, diri mag-ilubon, magpintas, waray gugma ha kaopayan, maglingo, batinguran, pagdadayaw, mahigugmaon ha kalipayan labi kay ha paghigugma ha Dios.’ Ini nga mga batasan nagtitikaduro na gud yana, kay ‘an magraot ngan maglimbong nga tawo nagigin labi pa gud nga maraot.’—2 Tim. 3:2-4, 13.
4. Ano an kahimtang han kalibotan ha aton panahon?
4 Diri kita sadang mahipausa hini, kay iginpapatin-aw han Pulong han Dios nga “an bug-os nga kalibotan kanan kayawan-on.” (1 Juan 5:19) “An bug-os nga kalibotan” nag-uupod han politikal, relihiyoso, ngan komersyal nga mga bahin hini nga kalibotan, pati na an mga paagi nga ginagamit ni Satanas ha pagpasarang han iya mga propaganda. Angayan gud la nga hi Satanas nga Yawa gintatawag nga “prinsipe han kalibotan” ngan “dios hini nga kalibotan.” (Juan 14:30; 2 Kor. 4:4) An kahimtang ha bug-os nga kalibotan padayon nga nagtitikaraot tungod kay nasisina hinduro yana hi Satanas kay maaram hiya nga halipot na la an nabibilin nga panahon antes hiya bungkagon ni Jehova. (Pah. 12:12) Nakakaliaw gud hibaroan nga hirani na bungkagon han Dios hi Satanas ngan an iya maraot nga sistema, ngan masusulbad na an isyu nga iginbangon ni Satanas may kalabotan ha pagkasoberano ni Jehova!—Gen., kap. 3; Job, kap. 2.
An Maopay nga Sumat Iginsasangyaw ha Bug-os nga Kalibotan
5. Paonan-o an tagna mahitungod han pagsangyaw nga buruhaton natutuman hinin kataposan nga mga adlaw?
5 Hinin makuri nga panahon ha kasaysayan han tawo, natutuman ini nga tagna ni Jesus: “Ini nga Maopay nga Sumat han ginhadian igwawali ha bug-os nga kalibotan ha pagpamatuod ha ngatanan nga mga nasud; ngan niyan an kataposan maabot.” (Mat. 24:14) Inin bug-os-kalibotan nga pagsangyaw han maopay nga sumat mahitungod han Ginhadian han Dios nag-uuswag gud. Yana, sobra 7,500,000 nga Saksi ni Jehova ha sobra 107,000 nga kongregasyon ha bug-os nga tuna an nagsasangyaw mahitungod han Ginhadian han Dios, nga amo liwat an iginsangyaw ngan igintutdo ni Jesus. (Mat. 4:17) Tungod han aton pagsangyaw, damu nga masurub-on an aton naliliaw. Ha naglabay pa la nga duha ka tuig, 570,601 an nabawtismohan sugad nga mga Saksi ni Jehova!
6. Ano an imo masisiring ha pag-uswag han aton pagsangyaw?
6 Masasabtan gud naton an kahaluag hini nga pagsangyaw kon aton huhunahunaon nga an mga Saksi ni Jehova yana naghuhubad ngan nananaltag hin mga literatura mahitungod ha Biblia ha sobra 500 nga yinaknan. Yana pa gud la ini nahitabo ha bug-os nga kasaysayan han tawo! An pag-eksister, buruhaton, ngan pag-uswag han tunan-on nga bahin han organisasyon ni Jehova urusahon gud. Kon waray han giya ngan bulig han baraan nga espiritu han Dios, imposible ini mahitabo dinhi hini nga kalibotan nga kontrolado ni Satanas. Tungod kay an maopay nga sumat iginsasangyaw ha bug-os nga kalibotan, diri la an katawohan ni Jehova an naliliaw han Kasuratan kondi pati na an masurub-on nga mga tawo nga nakarawat han mensahe han Ginhadian.
Pagliaw ha mga Igkasi-Magsiringba
7. (a) Kay ano nga diri kita makakalaom nga wawad-on ni Jehova an ngatanan nga hinungdan han kasubo yana? (b) Kay ano nga makakasiring kita nga puydi naton mailob an pagtimaraot ngan kakurian?
7 Hini nga kalibotan nga puno hin karaotan ngan pag-antos, sigurado nga maatubang kita hin mga kahimtang nga makakapasubo ha aton. Diri kita makakalaom nga wawad-on han Dios an ngatanan nga hinungdan han kasubo o pag-antos antes niya bungkagon ini nga sistema. Yana, samtang naieksperyensyahan naton an igintagna nga pagtimaraot, nasasarihan an aton pagkamaunungon kan Jehova ngan pagsuporta ha iya pagkasoberano. (2 Tim. 3:12) Kondi pinaagi han bulig ngan pagliaw han aton langitnon nga Amay, mahimo kita magin pariho han dinihogan nga mga Kristiano ha kadaan nga Tesalonika, nga nag-antos hin mga pagtimaraot ngan kakurian nga may pagpailob ngan pagtoo.—Basaha an 2 Tesalonika 1:3-5.
8. Paonan-o iginpapakita han Biblia nga ginliliaw ni Jehova an iya mga surugoon?
8 Igintatagana gud ni Jehova ha iya mga surugoon an pagliaw nga ira ginkikinahanglan. Pananglitan, han hi propeta Elias karuyag patayon han maraot nga hi Rayna Jesebel, nahadlok hiya ngan pinalagiw, ngan nagsiring pa ngani nga karuyag na niya mamatay. Kondi imbes nga sawayon hiya, ginliaw hiya ni Jehova ngan gintagan hin kaisog basi maipadayon an iya buruhaton sugad nga propeta. (1 Hadi 19:1-21) Usa pa nga ehemplo nga ginliliaw ni Jehova an iya katawohan amo an naeksperyensyahan han Kristiano nga kongregasyon ha siyahan nga siglo. Pananglitan, aton mababasa an mahitungod han panahon nga an mga kongregasyon “namurayaw ha bug-os nga Judea, ngan Galilea, ngan Samaria, ngan ginparig-on.” Dugang pa, ‘ha paggawi tungod ha kahadlok ha Ginoo ngan ha kalipay ha espiritu, nagdamu hira.’ (Buh. 9:31) Mapasalamaton gud kita nga kita liwat ginliliaw han baraan nga espiritu!
9. Kay ano nga nakakaliaw ha aton an paghibaro mahitungod kan Jesus?
9 Sugad nga mga Kristiano, nakakaliaw ha aton an paghibaro mahitungod kan Jesu-Kristo ngan pagsubad ha iya. Hi Jesus nagsiring: “Kadi ngatanan kamo ha akon, nga nagbubuhat ngan binubug-atan, ngan akon kamo tatagan hin pagpahuway. Pas-ana niyo an akon yugo, ngan magtoon kamo ha akon, kay ako maaghop ngan mapainubsanon ha kasingkasing, ngan kamo makakaagi hin pagpahuway ha iyo mga kalag. Kay an akon yugo masayon, ngan an akon pinas-an magaan.” (Mat. 11:28-30) An paghibaro mahitungod han mahigugmaon nga pagtratar ni Jesus ha mga tawo ngan pagsubad ha iya daku na nga bulig basi gumaan an aton pag-abat.
10, 11. Ha kongregasyon, hin-o an puydi makaliaw ha aton?
10 Mahimo liwat kita maliaw han aton mga igkasi-Kristiano. Pananglitan, tagda kon paonan-o ginbubuligan han mga tigurang an kabugtoan nga nagluluya an pagtoo. An disipulo nga hi Jakobo nagsurat: “Masakit ba [ha espirituwal] an iba ha iyo? Tawagon niya an mga ansiano han singbahan, ngan mag-ampo hira tungod ha iya.” Ano an resulta hito? “An pag-ampo han pagtoo makakaluwas ha masakit, ngan an Ginoo magbabanhaw ha iya; ngan kon makasala hiya, pagpapasayloon hiya.” (Jak. 5:14, 15) An iba ha kongregasyon makakabulig liwat ha pagliaw ha aton.
11 Kasagaran na nga masayon para ha mga babaye nga ig-istorya an ira mga problema ha ira igkasi-babaye. An mas edaran ngan mas eksperyensyado nga kabugtoan nga kababayin-an makakahatag hin mag-opay nga sagdon ha batan-on nga kabugtoan nga kababayin-an. Inin edaran ngan hamtong nga kabugtoan bangin nakaeksperyensya na hin pariho nga mga kahimtang. Daku an maibubulig han ira pagpamati ngan pagpakita hin pagpaid. (Basaha an Tito 2:3-5.) Syempre, an mga tigurang ngan an iba pa mahimo ‘makaparig-on ha nanluluya’ nga kabugtoan, ngan sadang nira buhaton ito. (1 Tes. 5:14, 15) Ngan maopay gud hinumdoman nga an Dios “naglilipay ha aton ha ngatanan nga aton mga kagol-anan, basi nga sadang man kita makapaglipay ha ngatanan nga aada ha bisan ano nga kagol-anan.”—2 Kor. 1:4.
12. Kay ano nga importante nga tumambong kita ha mga katirok?
12 Usa nga importante gud nga paagi basi maliaw amo an pagtambong ha mga katirok, diin gindadasig kita han mga paghisgot ha Biblia. Mababasa naton nga hira Judas ngan Silas ‘nagyakan hin maiha ha kabugtoan, ngan nakapakusog ngan nakapadasig ini ha ira.’ (Buh. 15:32, Maopay nga Sumat) Antes ngan katapos han aton mga katirok, makapadasig an iristorya han mga membro han kongregasyon. Salit bisan kon nag-aantos kita tungod hin problema, diri kita sadang magpahirayo ha kabugtoan, kay diri ito makakabulig ha aton. (Prob. 18:1) Lugod, maopay nga sundon naton an giniyahan nga sagdon ni apostol Pablo: “Magpinalandonganay an usa kag usa ha aton ha pag-aghat ha gugma ngan ha mga mag-opay nga buhat; diri ta bayaan an aton pagturotarampo, sugad han batasan han iba, kondi maglinaygayay kita labi na gud, nga iyo gintatan-aw nga an adlaw nagtitikahirani na.”—Heb. 10:24, 25.
Ginliliaw Kita han Pulong han Dios
13, 14. Isaysay kon paonan-o an Kasuratan makakaliaw ha aton.
13 Bawtismado man kita nga mga Kristiano o nag-aaram pa la mahitungod ha Dios ngan ha iya mga katuyoan, maliliaw gud kita han Pulong han Dios. Hi Pablo nagsurat: “An ngatanan nga mga butang nga nahisurat na nga daan ginsurat ha pagtutdo ha aton, basi tungod ha pag-ilob ngan ha paglipay han mga Maopay nga Surat may maada ta paglaom.” (Roma 15:4) An Biblia makakaliaw ngan makakabulig ha aton nga “mahingpit, ngan maandam tungod ha ngatanan nga maopay nga buhat.” (2 Tim. 3:16, 17) An paghibaro han kamatuoran mahitungod han mga katuyoan han Dios ngan pagkaada tinuod nga paglaom ha tidaraon sigurado nga makakaliaw gud ha aton. Salit pag-adman naton hin maopay an Biblia ngan an basado ha Biblia nga mga publikasyon nga makakaliaw ngan makakabulig ha aton ha damu nga paagi.
14 Hi Jesus nagpakita hin maopay nga susbaranan pinaagi ha paggamit han Kasuratan ha pagtutdo ngan pagliaw ha iba. Pananglitan, katapos niya mabanhaw, nagpakita hiya ha duha han iya mga disipulo ngan ‘ginbuklaran hira han Santos nga Surat.’ Sigurado nga nakaliaw gud ito ha ira. (Luk. 24:32) Ha pagsubad han maopay hinduro nga susbaranan ni Jesus, hi apostol Pablo nangatadongan gamit an Kasuratan. Ha Berea, an mga namati ha iya “nagkarawat han pulong hin bug-os nga kaabtik, ngan ha adlaw-adlaw ira gin-usisa an Santos nga Surat.” (Buh. 17:2, 10, 11) Angayan gud nga basahon naton an Biblia kada adlaw ngan magpahimulos han bulig hito ngan han Kristiano nga mga publikasyon nga gindisenyo ha pagliaw ngan paghatag ha aton hin paglaom hinin masamok nga panahon!
Dugang Pa nga mga Paagi ha Pagliaw ha Iba
15, 16. Ano an pipira nga puydi naton buhaton ha pagbulig ngan pagliaw ha aton kabugtoan?
15 Damu an paagi nga mabubuligan ngan maliliaw naton an aton mga igkasi-Kristiano. Pananglitan, puydi naton buligan an mga lagas o may sakit nga kabugtoan ha ira pamalit. Mahimo naton buligan an iba ha mga buruhaton ha ira balay basi ipakita an personal nga interes ha ira. (Fil. 2:4) Puydi naton kumendasyonan an kabugtoan ha ira mag-opay nga kalidad sugad han gugma, kaisog, ngan pagtoo.
16 Basi liawon an mga lagas, mahimo naton hira bisitahon ngan pamatian hin maopay an ira mga eksperyensya ngan an mga bendisyon nga ira nakarawat ha pag-alagad kan Jehova. Bangin hira pa ngani an makadasig ngan makaliaw ha aton! Puydi naton basahon an Biblia o an aton mga publikasyon upod han kabugtoan nga aton ginbibisita. Bangin puydi naton pag-adman upod ha ira an artikulo ha Barantayan o an pag-aadman ha Pag-aram ha Biblia han Kongregasyon nga nakaeskedyol para hito nga semana. Mahimo naton hira updan ha pagkita hin DVD nga iginpublikar han aton organisasyon. Ngan puydi liwat kita magbasa o mag-istorya hin makapadasig nga mga eksperyensya tikang ha aton mga publikasyon.
17, 18. Sugad nga maunungon nga mga surugoon ni Jehova, kay ano nga makakasiguro kita nga bubuligan ngan liliawon kita niya?
17 Kon maaram kita nga an usa nga bugto nagkikinahanglan hin pagliaw, puydi naton hiya ig-ampo. (Roma 15:30; Kol. 4:12) Kon may mga problema kita ngan nangangalimbasog liwat nga liawon an iba, mahimo naton ipakita an pagtoo nga pariho han iginpakita han salmista nga nagkanta: “Ibutang an imo dinara ha bawbaw ni Jehova, ngan ikaw iya kabubuligan; diri gud hiya makakailob nga pagkikiwahon an matadong.” (Sal. 55:22) Oo, hi Jehova pirme magliliaw ngan mabulig ha aton. Diri gud niya papabay-an an iya maunungon nga mga surugoon.
18 An Dios nagsiring ha iya mga magsiringba ha naglabay: “Ako, bisan ako, amo hiya nga naglilipay ha iyo.” (Isa. 51:12) Bubuhaton liwat ito ni Jehova para ha aton ngan bibendisyonan an aton pangalimbasog nga liawon an mga masurub-on. Ha langit man o ha tuna an aton paglaom, an tagsa ha aton maliliaw han ginsiring ni Pablo ha iya igkasi-dinihogan nga mga Kristiano: “An . . . aton Ginoo Jesu-Kristo, ngan an Dios nga aton Amay, nga naghigugma ha aton ngan naghatag ha aton hin waray kataposan nga paglipay ngan maopay nga paglaom pinaagi han grasya, maglipay ha iyo mga kasingkasing ngan magparig-on hadto ha ngatanan nga maopay nga buhat ngan pulong.”—2 Tes. 2:16, 17.
Nahihinumdoman Mo Ba?
• Ano kahaluag an aton pagsangyaw?
• Ano an pipira nga puydi naton buhaton ha pagliaw ha iba?
• Paonan-o iginpapakita han Biblia nga ginliliaw ni Jehova an iya katawohan?
[Mga Pakiana]
[Retrato ha pahina 28]
Ginliliaw mo ba an mga masurub-on?
[Retrato ha pahina 30]
Batan-on man o lagas, mahimo naton dasigon an iba
