Mga Pakiana Tikang ha mga Magbarasa

Igindidiri ni Jehova an idolatriya, kondi kay ano nga waray niya siruti hi Aaron han naghimo hin bulawan nga baka?

Han naghimo hi Aaron hin bulawan nga baka, sugad han nakarekord ha Eksodo kapitulo 32, iya gintalapas an balaud han Dios may kalabotan ha idolatriya. (Eks. 20:3-5) Sugad nga resulta, “hi Jehova nasina hinduro kan Aaron ha paggunaw ha iya: ngan nag-ampo liwat [hi Moises] tungod kan Aaron hadto ngahaw nga panahon.” (Deut. 9:19, 20) Nagkaada ba “daku nga gahum” an panginyupo han matadong nga hi Moises para kan Aaron? (Jak. 5:16, Maopay nga Sumat) Oo. Tungod hito ngan han diri maminos hin duha pa nga hinungdan, baga hin ginbaton ni Jehova an pag-ampo ni Moises ngan waray siruti hi Aaron.

Posible nga an usa nga hinungdan amo an rekord han pagkamatinumanon ni Aaron. Han ginsugo hi Moises nga umatubang kan Paraon ngan manguna ha mga Israelita paggawas ha Ehipto, gintokahan ni Jehova hi Aaron nga updan hi Moises ngan magyakan sugad nga iya representante. (Eks. 4:10-16) Hira nga duha sinugot nga umatubang ha hadi han Ehipto hin damu ka beses ngan nag-antos han kasina ni Paraon tungod han katig-a han iya kasingkasing. Salit samtang nakadto ha Ehipto, hi Aaron matinumanon ngan marig-on ha iya pag-alagad kan Jehova.—Eks. 4:21.

Tagda liwat kon ano an nakaaghat kan Aaron nga maghimo hin bulawan nga baka. Kwarenta ka adlaw nga nakadto hi Moises ha Bukid Sinai. “Ha pakakita han katawohan nga hi Moises naiha hin paglusad tikang ha bukid,” ginkombinse nira hi Aaron nga maghimo hin dios-dios para ha ira. Sinugot hiya ngan naghimo hin bulawan nga baka. (Eks. 32:1-6) Kondi katapos hito, nakita ha iya mga buhat nga diri gud hiya nauyon hito nga idolatriya. Baga hin napiritan la hiya. Pananglitan, han ha urhi ginpapili ni Moises an katawohan kon diin hira madapig may kalabotan hito nga isyu, an ngatanan nga anak ni Lebi—upod na hi Aaron—marig-on nga dinapig kan Jehova. Tulo ka yukot nga Israelita nga nanguna ha pagsingba ha dios-dios an ginpamatay.—Eks. 32:25-29.

Katapos hito hi Moises nagsiring ha katawohan: “Kamo nakasala hin daku nga sala.” (Eks. 32:30) Salit diri la hi Aaron an salaan. Hiya ngan an katawohan nagpahimulos ha daku nga kalooy ni Jehova.

Katapos hito nga panhitabo, hi Jehova nagsugo nga pilion hi Aaron nga magin hitaas nga saserdote. An Dios nagsugo kan Moises: “Isul-ot mo ha kan Aaron an baraan nga mga panapton; ngan dihogan mo hiya, ngan pagbaraana hiya, nga basi hiya mag-alagad ha akon ha pagkasaserdote.” (Eks. 40:12, 13) Matin-aw nga ginpasaylo ni Jehova an kaluyahan ni Aaron, tungod kay ha pagkamatuod, hi Aaron maunungon nga nasuporta ha tinuod nga pagsingba ngan diri idolatroso nga rebelde.