An mga Anghel—“Mga Espiritu nga Ginsugo ha Pag-alagad”

“Diri ba hira ngatanan mga ministro nga espiritu, nga ginsugo ha pagbuhat hin pag-alagad tungod hadton manununod han kaluwasan?”—HEB. 1:14.

1. Ano nga pagliaw an aton mababasa ha Mateo 18:10 ngan Hebreo 1:14?

 GINPAHAMANGNOAN ni Jesu-Kristo an bisan hin-o nga mahimo makapakdol ha iya mga sumurunod: “Magmatngon kamo, nga diri kamo magtamay ha usa hini nga mga gudtiay; kay ako nasiring ha iyo, nga ha langit an ira mga anghel nakakakita gihapon han bayhon han akon Amay nga aadto ha langit.” (Mat. 18:10) Mahitungod ha magtinumanon nga anghel, hi apostol Pablo nagsurat: “Diri ba hira ngatanan mga ministro nga espiritu, nga ginsugo ha pagbuhat hin pag-alagad tungod hadton manununod han kaluwasan?” (Heb. 1:14) Nakakaliaw ito nga pasarig nga ginsusugo han Dios an mga anghel ha pagbulig ha mga tawo. Ano an iginsusumat ha aton han Biblia mahitungod han mga anghel? Paonan-o hira nabulig ha aton? Ano an aton hibabaroan ha ira susbaranan?

2, 3. Ano an mga responsabilidad han mga anghel ha langit?

² Minilyon an matinumanon nga anghel ha langit. Hira ngatanan “gamhanan ha kusog, mga nagtutuman han iya mga pulong.” (Sal. 103:20; basaha an Pahayag 5:11.) Inin espiritu nga mga anak han Dios may-ada iba-iba nga personalidad, mga kalidad nga pariho ha Dios, ngan kagawasan ha pagbuot. Maopay gud an pagkaorganisa ha ira ngan may-ada hira importante nga katungdanan ha kahikayan han Dios; an arkanghel amo hi Miguel (an ngaran ni Jesus ha langit). (Dan. 10:13; Jud. 9) Inin “siyahan nga natawo han ngatanan nga mga binuhat” amo “an Pulong,” o Tagapagyakan han Dios ngan pinaagi ha iya ginlarang ni Jehova an iba pa nga butang.—Kol. 1:15-17; Juan 1:1-3.

³ Sunod han arkanghel amo an mga serapin, nga nagpapahayag han pagkabaraan ni Jehova ngan nabulig ha iya katawohan nga magpabilin nga limpyo ha espirituwal. May-ada liwat mga kerubin, nga nasuporta han pagkasoberano ni Jehova. (Gen. 3:24; Isa. 6:1-3, 6, 7) An iba pa nga anghel o mensahero may-ada magkalain-lain nga toka ha pagtuman han kaburut-on han Dios.—Heb. 12:22, 23.

4. Ano an inabat han mga anghel han ginpahamutang an tuna, ngan ano unta an nahitabo kon husto nga gin-gamit an kagawasan ha pagbuot?

⁴ An ngatanan nga anghel nalipay han  ‘iginpahamutang an patukoranan han tuna’ ngan malipayon nga nagbuhat han ira toka samtang ginhihimo an matahom nga tuna nga urukyan han tawo. (Job 38:4, 7) Ginlarang ni Jehova an tawo nga “ubos la hin gutiay kay ha mga anghel” kondi ha Iya dagway, salit naipapakita han tawo an mag-opay nga kalidad han Maglalarang. (Heb. 2:7; Gen. 1:26) Kon husto nga gin-gamit nira Adan ngan Eva an ira kagawasan ha pagbuot, hira ngan an ira katulinan padayon unta nga maukoy ha paraiso sugad nga bahin han bug-os uniberso nga pamilya han intelihente nga mga linarang ni Jehova.

5, 6. Ano nga pagrebelde an nahitabo ha langit, ngan ano an ginbuhat han Dios?

⁵ Sigurado nga diri-makatoo an magtinumanon nga anghel han nagtikang an pagrebelde ha langitnon nga pamilya han Dios. Usa ha ira an nagin diskontento ha pagdayaw kan Jehova, lugod naghingyap nga singbahon hiya. Salit hiya mismo an naghimo han iya kalugaringon nga magin Satanas (nangangahulogan nga “Parakontra”) pinaagi ha pag-ayat han katungod ni Jehova ha pagmando ngan ha pangalimbasog nga magin soberano liwat hiya. Ha siyahan nga nakarekord nga pagbuwa, tuso nga gin-aghat niya hira Adan ngan Eva nga magrebelde liwat ha ira mahigugmaon nga Maglalarang.—Gen. 3:4, 5; Juan 8:44.

⁶ Ginhukman dayon ni Jehova hi Satanas pinaagi ha pagpahayag han siyahan nga tagna ha Biblia: “Igbubutang ko in away ha butnga nimo ngan han babaye, ngan ha butnga han imo katulinan ngan han iya katulinan: ngan ini magtutultog han imo ulo, ngan hi ikaw magtutultog han iya tikod.” (Gen. 3:15) Magpapadayon an away ni Satanas ngan han simboliko nga “babaye” han Dios. Oo, gintatagad ni Jehova an langitnon nga organisasyon han magtinumanon nga anghel sugad hin hinigugma nga asawa nga kahiusa niya sugad nga Bana. Ini nga tagna nagin basihan han sigurado nga paglaom, bisan kon an mga detalye hini nagpabilin nga sagrado nga “tinago” nga hinay-hinay nga igpapahayag. Katuyoan han Dios nga may usa tikang ha iya langitnon nga organisasyon nga magbubungkag han ngatanan nga rebelde ngan pinaagi ha iya pagtitirukon “an mga bagay nga aadto ha langit ngan hahani ha tuna.”—Efe. 1:8-10.

7. Ano an ginbuhat han iba nga anghel ha panahon ni Noe, ngan tungod hito, ano an nahitabo ha ira?

⁷ Ha panahon ni Noe, damu nga anghel an binaya ha ira husto nga ‘urukyan’ ngan nagpakatawo basi ipadayon dinhi ha tuna an ira pagpatagbaw ha kalugaringon. (Jud. 6; Gen. 6:1-4) Ginlabog hira ni Jehova ngadto ha duro nga kasisidman, ngan inupod hira kan Satanas ha pagin ‘maraot nga espirituhanon nga kasundalohan’ ngan magbangis nga kaaway han mga surugoon han Dios.—Efe. 6:11-13; 2 Ped. 2:4.

Paonan-o Nabulig ha Aton an mga Anghel?

8, 9. Paonan-o ginpagios ni Jehova an mga anghel ha pagbulig ha mga tawo?

⁸ Hira Abraham, Jakob, Moises, Josue, Isaias, Daniel, Jesus, Pedro, Juan, ngan Pablo kaupod hadton ginbuligan han mga anghel. An magtadong nga anghel nagpadapat han mga paghukom han Dios ngan nagpahayag hin mga tagna ngan sugo, upod na an Mosaiko nga Balaud. (2 Hadi 19:35; Dan. 10:5, 11, 14; Buh. 7:53; Pah. 1:1) Tungod kay may-ada na kita yana han bug-os nga Biblia, mahimo nga diri na kinahanglan magpahayag an mga anghel han mensahe han Dios. (2 Tim. 3:16, 17) Kondi, bisan kon diri naton hira nakikita, okupado gud hira ha pagtuman han kaburut-on han Dios ngan pagbulig ha iya mga surugoon.

⁹ An Biblia nagpapasarig ha aton: ‘An anghel ni Jehova nakapalibot ha nagkakahadlok ha iya, ngan iya ginbabawi hira.’ (Sal. 34:7; 91:11) Tungod kay ginruruhaduhaan ni Satanas an aton pagkamaunungon kan Jehova, gintutugotan Niya hi Satanas nga himoon an ngatanan nga klase hin pagsari ha aton. (Luk. 21:16-19) Kondi, maaram an Dios kon maiha na kita nga nagpapailob ngan igo na ito nga pamatuod nga magpapabilin kita nga maunungon ha iya. (Basaha an 1 Korinto 10:13.) Pirme alerto an mga anghel ha paggios uyon ha kaburut-on han Dios. Ira gintalwas hira Sadrak, Mesak, Abednego, Daniel, ngan Pedro kondi waray nira pugngi an mga parakontra ha pagpatay kan Esteban ngan Jakobo. (Dan. 3:17, 18, 28; 6:22; Buh. 7:59, 60; 12:1-3, 7, 11) Iba-iba an kahimtang ngan pagsari. Ha mga kampo nga prisohan han Nazi, ginpatay liwat an iba  han aton kabugtoan, kondi gintalwas ni Jehova an kadam-an ha ira.

10. Dugang pa ha bulig han mga anghel, ano nga bulig an aton makakarawat?

¹⁰ An Kasuratan waray magtutdo nga an tagsa nga tawo may-ada anghel nga magbarantay. May pagsarig nga nag-aampo kita nga “kon mangaro kita hin bisan ano nga bagay sumala ha . . . kaburut-on [han Dios], mamamati hiya ha aton.” (1 Juan 5:14) Oo, mahimo magsugo hi Jehova hin anghel ha pagbulig ha aton, kondi mabubuligan kita niya ha magkalain-lain nga paagi. Bangin pagiuson niya an igkasi-Kristiano ha pagbulig ngan pagliaw. Mahimo hiya maghatag ha aton hin kinaadman ngan karig-on basi mailob an gin-aantos naton nga “tunok ha unod” nga baga hin gin-aatake kita hin “surugoon ni Satanas.”—2 Kor. 12:7-10; 1 Tes. 5:14.

Subara hi Jesus

11. Paonan-o binuligan han mga anghel hi Jesus, ngan ano an iya napamatud-an ha pagpabilin nga matinumanon ha Dios?

¹¹ Hunahunaa kon paonan-o ginsugo ni Jehova an mga anghel may kalabotan kan Jesus. Iginpahibaro nira an iya katawo ngan pagkabanhaw ngan ginbuligan hiya han nakanhi pa ha tuna. Mahimo unta nira pugngan an pag-aresto ngan mabangis nga pagpatay ha iya. Kondi, ginsugo lugod an usa nga anghel ha pagparig-on ha iya. (Mat. 28:5, 6; Luk. 2:8-11; 22:43) Uyon ha katuyoan ni Jehova, hi Jesus namatay sugad nga halad ngan nagpamatuod nga an hingpit nga tawo makakagpabilin nga maunungon ha Dios bisan pa han duro nga pagsari. Salit, ginbanhaw hiya ni Jehova, gintagan hin diri-mamaratyon nga kinabuhi ha langit ngan han “ngatanan nga kagamhanan,” ngan iginpasakop ha iya an mga anghel. (Mat. 28:18; Buh. 2:32; 1 Ped. 3:22) Hito nga paagi, napamatud-an nga hi Jesus an nangunguna nga bahin han “katulinan” o binhi han simboliko nga “babaye” han Dios.—Gen. 3:15; Gal. 3:16.

12. Ha ano nga paagi masusubad naton an pagin timbang ni Jesus?

¹² Maaram hi Jesus nga sayop kon sarihan niya hi Jehova pinaagi ha paglaom nga luluwason hiya han mga anghel kon pasagdan niya nga mameligro an iya kinabuhi. (Basaha an Mateo 4:5-7.) Salit subaron naton hi Jesus pinaagi ha pagtipig hin “maopay nga panhunahuna,” nga ginlilikyan an mga peligro, kondi marig-on nga gin-aatubang an paglutos.—Tito 2:12, NW.

Kon Ano an Aton Hibabaroan ha Magtinumanon nga Anghel

13. Ano an aton hibabaroan ha susbaranan han magtadong nga anghel nga gin-unabi ha 2 Pedro 2:9-11?

¹³ Ha pagsaway hadton ‘nagpapasipara’ ha dinihogan nga mga surugoon ni Jehova, iginpatin-aw ni apostol Pedro an susbaranan han magtadong nga anghel. Bisan kon gamhanan hira, mapainubsanon nga naglikay hira ha paghukom ngan pag-akusar tungod ha pagtahod kan Jehova. (Basaha an 2 Pedro 2:9-11.) Diri liwat kita maghukom, tahuron naton an gintaporan ha pagpanguna ha kongregasyon, ngan isarig an ngatanan kan Jehova, an Supremo nga Hukom.—Roma 12:18, 19; Heb. 13:17.

14. Ano an aton hibabaroan ha pagin mapainubsanon han mga anghel?

¹⁴ An mga anghel ni Jehova maopay nga susbaranan han pagin mapainubsanon. Waray isumat  han iba nga anghel an ira ngaran ha mga tawo. (Gen. 32:29; Huk. 13:17, 18) Bisan kon minilyon an anghel ha langit, hira Miguel ngan Gabriel la an gin-unabi ha Biblia. Posible nga basi diri naton hira hatagan hin sobra nga pagpasidungog. (Luk. 1:26; Pah. 12:7) Han hi apostol Juan hinapa ha pagsingba ha atubangan han anghel, ginsaway hiya: “Ayaw pagbuhat hito: igkasi-uripon mo ako ngan ha imo mga kabugtoan.” (Pah. 22:8, 9) An aton pagsingba ngan pag-ampo kinahanglan nga ngadto la ha Dios.—Basaha an Mateo 4:8-10.

15. Ha ano nga paagi susbaranan an mga anghel ha pagin mapailubon?

¹⁵ Susbaranan liwat an mga anghel ha pagin mapailubon. Bisan kon interesado gud hira nga hibaroan an sagrado nga mga tinago han Dios, diri hira maaram hito ngatanan. “Hini nga mga butang an mga anghel nagtitinguha ha pag-usisa,” siring han Biblia. (1 Ped. 1:12) Salit, ano an ira ginbubuhat? Mapailubon nga naghuhulat hira ha itinanda nga panahon han Dios ha ‘pagpakilala’ o pagpahibaro han iya “magkadirodilain nga mga kinaadman” pinaagi ha kongregasyon.—Efe. 3:10, 11.

16. Paonan-o nakakaapekto ha mga anghel an aton paggawi?

¹⁶ An ginpapasakitan nga mga Kristiano ‘taran-awon han mga anghel.’ (1 Kor. 4:9) Nalilipay gud hira kon matinumanon kita ngan kon nagbabasol an makasasala. (Luk. 15:10) Nakikita nira an diosnon nga paggawi han Kristiano nga kababayin-an. Sumala ha Biblia, “kinahanglan nga an babaye may tigaman ha kagamhanan ha iya ulo, tungod ha mga anghel.” (1 Kor. 11:3, 10) Oo, nalilipay an mga anghel kon ginsusunod han Kristiano nga kababayin-an ngan han iba pa nga surugoon han Dios an teokratiko nga kahikayan ngan pagkaulo. Maopay gud nga pahinumdom ha mga anghel an ira pagkamasinugtanon.

Aktibo nga Nabulig an mga Anghel ha Pagsangyaw

17, 18. Kay ano makakasiring kita nga nabulig an mga anghel ha aton pagsangyaw?

¹⁷ May-ada bahin an mga anghel ha pipira nga makatirigamnan nga panhitabo ha “adlaw han Ginoo.” Kaupod hito an kaestablisar han Ginhadian han 1914 ngan an paglabog kan Satanas ngan han iya mga demonyo tikang ha langit han mapirde hira ni ‘Miguel ngan han iya mga anghel.’ (Pah. 1:10; 11:15; 12:5-9) Nakita ni apostol Juan an “anghel nga naglulupadlupad ha ginkakatungaan han langit, nga may-ada waray kataposan nga maopay nga sumat nga igwawali ngadto  hadton mga nag-uukoy ha tuna.” An anghel nagpahayag: “Kahadluki niyo an Dios, ngan tagi hiya niyo hin himaya; kay an oras han iya paghukom iini na: ngan pagsingbaha niyo adton naghimo han langit ngan han tuna, ngan dagat ngan mga burabod han mga tubig.” (Pah. 14:6, 7) Kon sugad, makakasarig an mga surugoon ni Jehova han bulig han mga anghel samtang nagsasangyaw hira han maopay nga sumat mahitungod han naestablisar nga Ginhadian bisan pa han mabangis nga pagkontra han Yawa.—Pah. 12:13, 17.

¹⁸ Yana, diri nakikiistorya ha aton an mga anghel basi giyahan kita ngadto ha mga tangkod-an-kasingkasing sugad han pakiistorya han anghel kan Felipe ngan paggiya ha iya ngadto ha Etiopiahanon nga yunuko. (Buh. 8:26-29) Kondi, damu nga eksperyensya yana an nagpapamatuod nga bisan kon diri naton hira nakikita, ginbubuligan kita nira ha pagsangyaw ngan ginigiyahan ngadto ha “mga tinunguran han kinabuhi nga waray kataposan.” a (Buh. 13:48) Importante gud nga regular nga magsangyaw kita basi matuman naton an aton bahin ha pagbiling hadton karuyag ‘magsingba ha Amay ha espiritu ngan kamatuoran’!—Juan 4:23, 24.

19, 20. Ano an bahin han mga anghel ha mga hitabo nga nagtitigaman han ‘ikatarapos’ hini nga sistema?

¹⁹ Mahitungod ha aton panahon, hi Jesus nagsiring nga ‘ha ikatarapos’ hini nga sistema, “paglalainon [han mga anghel] an mga magraot tikang ha mga magtadong.” (Mat. 13:37-43, 49) Nabulig hira ha ultimo nga pagtirok ngan pagselyo ha mga dinihogan. (Basaha an Mateo 24:31; Pah. 7:1-3) Dugang pa, kaupod ni Jesus an mga anghel ha ‘paglain han karnero tikang ha mga kanding.’—Mat. 25:31-33, 46.

²⁰ ‘Ha pagpahayag han Ginoo nga hi Jesus tikang ha langit upod han iya gamhanan nga mga anghel,’ bubungkagon an ngatanan nga ‘waray kumilala ha Dios ngan waray magtuman han maopay nga sumat han aton Ginoo nga hi Jesus.’ (2 Tes. 1:6-10) Han nakita ni Juan ha bisyon an pariho hito nga hitabo, iginhulagway niya hi Jesus ngan an langitnon nga kasundalohan sugad nga nasakay ha magbusag nga kabayo ngadto ha matadong nga pakiggirra.—Pah. 19:11-14.

21. Mahitungod kan Satanas ngan ha iya mga demonyo, ano an bubuhaton ha ira han anghel nga “may-ada han yawi han atabay nga waray sag-od, ngan hin daku nga talikara dida ha iya kamot”?

²¹ Hinkit-an liwat ni Juan “an usa nga anghel nga nalusad tikang ha langit, nga may-ada han yawi han atabay nga waray sag-od, ngan hin daku nga talikara dida ha iya kamot.” Hiya amo gud an arkanghel nga hi Miguel, nga maggagapos han Yawa ngan maglalabog ha iya—ngan han iya mga demonyo—ngadto ha atabay nga waray sag-od. Bubuhian hira hin madaliay ha kataposan han Milenyo nga Pagmando ni Kristo para ha ultimo nga pagsari ha hingpit nga katawohan. Katapos hito, pupoohon hi Satanas ngan an ngatanan nga rebelde. (Pah. 20:1-3, 7-10; 1 Juan 3:8) Salit, mawawara na an ngatanan nga pagrebelde ha Dios.

22. Ano an toka han mga anghel ha tidaraon, ngan ano an sadang naton abaton mahitungod hito?

²² Hirani na gud an kaluwasan tikang ha maraot nga sistema ni Satanas. Magkakaada importante nga toka an mga anghel hinin makatirigamnan nga panhitabo nga magbibindikar han pagkasoberano ni Jehova ngan magbubuhat hira tubtob ha bug-os nga katumanan han iya katuyoan para ha tuna ngan katawohan. Tinuod gud nga an magtadong nga anghel ‘mga espiritu nga ginsugo ha pag-alagad tungod hadton manununod han kaluwasan.’ Salit, angay gud naton pasalamatan hi Jehova nga Dios tungod han iya pagsugo ha mga anghel basi buligan kita nga buhaton an iya kaburut-on ngan magkaada kinabuhi nga waray kataposan.

[Footnote]

Ano an Imo Baton?

• Paonan-o gin-organisa an mga anghel ha langit?

• Ano an ginbuhat han iba nga anghel ha panahon ni Noe?

• Paonan-o ginpapagios han Dios an mga anghel ha pagbulig ha aton?

• Ano an toka han magtadong nga anghel ha aton panahon?

[Mga Pakiana]

[Retrato ha pahina 21]

Nalilipay an mga anghel ha pagtuman han kaburut-on han Dios

[Retrato ha pahina 23]

Pirme alerto an mga anghel ha paggios uyon ha kaburut-on han Dios, pariho han ira ginbuhat kan Daniel

[Mga Retrato ha pahina 24]

Magmaisugon, kay nabulig an mga anghel ha aton pagsangyaw!

[Ginkuhaan han Retrato ha pahina 24]

Globe: NASA photo