Magpadayon Ka ha Gugma han Dios!
Magpadayon Ka ha Gugma han Dios!
“Mga hinigugma, . . . magpadayon kamo ha gugma han Dios, . . . ha kinabuhi nga waray kataposan.”—JUDAS 20, 21.
1, 2. Paonan-o ka magpapabilin ha gugma han Dios?
HINIGUGMA gud ni Jehova an katawohan salit iya iginhatag an iya bugtong nga Anak basi nga an natoo ha iya magkaada kinabuhi nga waray kataposan. (Juan 3:16) Urusahon gud an pakaeksperyensya han sugad nga gugma! Kon usa ka nga surugoon ni Jehova, sigurado nga karuyag mo makaeksperyensya hito nga gugma ha waray kataposan.
2 Iginsumat han disipulo nga hi Judas kon paonan-o ka magpapabilin ha gugma han Dios. “Ginpatindog niyo an iyo kalugaringon ha iyo baraan gud nga pagtoo, nga nag-aampo ha espiritu santo,” nagsurat hi Judas, “magpadayon kamo ha gugma han Dios, nga maghulat kamo ha kalooy han aton Ginoo Jesu-Kristo, ha kinabuhi nga waray kataposan.” (Judas 20, 21) An pag-aram ha Pulong han Dios ngan pagsangyaw han maopay nga sumat nabulig ha imo nga magin marig-on ha “baraan gud nga pagtoo”—an Kristiano nga mga katutdoan. Basi magpabilin ha gugma han Dios, kinahanglan mag-ampo ka pinaagi han baraan nga espiritu, o han impluwensya hito. Basi balosan hin kinabuhi nga waray kataposan, kinahanglan tumoo ka ha halad lukat ni Jesu-Kristo.—1 Juan 4:10.
3. Kay ano nga an iba diri na mga Saksi ni Jehova?
3 An iba nga may pagtoo hadto waray magpabilin ha gugma han Dios. Tungod kay ginpili nira nga magpadayon ha makasasala nga pagkinabuhi, diri na hira mga Saksi ni Jehova. Paonan-o mo malilikyan an sugad nga eksperyensya? An pagpamalandong ha masunod nga mga punto mahimo makabulig ha imo nga makalikay ha sala ngan magpadayon ha gugma han Dios.
Ipakita an Imo Gugma ha Dios
4. Mationan-o kaimportante an pagsugot ha Dios?
4 Ipakita an imo gugma ha Dios pinaagi han pagsugot ha iya. (Mateo 22:37) “Amo ini an gugma ha Dios,” nagsurat hi apostol Juan, “nga pagtumanon ta an iya mga sugo; ngan an iya mga sugo diri magbug-at.” (1 Juan 5:3) An batasan na nga pagsugot ha Dios makakaparig-on ha imo nga maatohan an pagsulay ngan makakapalipay ha imo. An salmista nagsiring: “Mahimayaon [“malipayon,” NW] an tawo nga diri naglalakat han sagdon han mga magdaraot, . . . kondi ha balaud ni Jehova aada an iya kalipay.”—Salmo 1:1, 2.
5. An gugma kan Jehova magpapagios ha imo nga buhaton an ano?
5 An imo gugma kan Jehova magpapagios ha imo nga likyan an seryoso nga pakasala nga magpapasipara ha iya ngaran. “Ayaw ako hatagi han kakablasan o han bahandi,” nag-ampo hi Agur. “Pakaona ako han karaunon nga kinahanglanon nakon; kay bangin ako mabusog, ngan maglirong ha imo, ngan sumiring: Hin-o hi Jehova? O bangin ako makablas, ngan mangawat, ngan gumamit ha mapinasipad-on han ngaran han akon Dios.” (Proberbios 30:1, 8, 9) Magin determinado nga diri ‘gamiton ha mapasipad-on an ngaran han Dios’ pinaagi han pagpakaraot ha iya. Lugod, pangalimbasog pirme nga buhaton an matadong nga maghihimaya ha iya.—Salmo 86:12.
6. Ano an mahimo mahitabo kon tinuyo nga nagbubuhat ka hin sala?
6 Regular nga mag-ampo ha imo mahigugmaon nga langitnon nga Amay para han bulig nga maatohan an pagsulay ha pagbuhat hin sala. (Mateo 6:13; Roma 12:12) Padayon nga sunda an sagdon han Dios basi an imo mga pag-ampo diri maulang. (1 Pedro 3:7) Kon tinuyo nga magbubuhat ka hin sala, peligroso an magigin mga resulta hito, kay simboliko nga gin-uulang ni Jehova an pagdaop ha iya han mga rebelyoso sugad hin madakmol nga dampog nga nakakaulang han ira mga pag-ampo basi diri makaabot ha iya. (Mga Pagtangis 3:42-44) Salit ipakita an mapainubsanon nga disposisyon, ngan pag-ampo nga diri ka unta makabuhat hin bisan ano nga makakaulang ha imo pagdaop ha Dios ha pag-ampo.—2 Korinto 13:7.
Ipakita an Gugma ha Anak han Dios
7, 8. Paonan-o an pagsunod ha sagdon ni Jesus makakabulig ha usa nga isalikway an makasasala nga buhat?
7 Ipakita an gugma kan Jesu-Kristo pinaagi han pagsugot ha iya mga sugo, kay mabulig ini ha imo nga isalikway an makasasala nga buhat. “Kon iyo tipigan an akon mga sugo,” nagsiring hi Jesus, “kamo mabibilin han akon paghigugma; sugad gud han akon pagtipig han mga sugo han akon Amay, ngan ako napabilin ha iya [gugma].” (Juan 15:10) Paonan-o an pag-aplikar han mga pulong ni Jesus nabulig ha imo nga magpabilin ha gugma han Dios?
8 An pagsunod ha mga pulong ni Jesus makakabulig ha imo nga matipigan an mga prinsipyo ha moral. An Balaud han Dios ha Israel nagsiring: “Diri ka makighilawas ha diri mo asawa.” (Eksodo 20:14) Kondi iginpahayag ni Jesus an usa nga prinsipyo ha luyo hito nga sugo ha pagsiring: “An ngatanan nga nasiplat ha babaye ha pagkaipa ha iya makakapanlibog na ha iya dida ha iya kasingkasing.” (Mateo 5:27, 28) Hi apostol Pedro nagsiring nga an iba ha siyahan-siglo nga kongregasyon may-ada “mga mata nga mga puno ha panlibog” ngan “naglulumay ha mga kalag nga diri magrig-on.” (2 Pedro 2:14) Kondi, diri pariho ha ira, makakalikay ka han seksuwal nga mga sala kon nahigugma ngan nasugot ka ha Dios ngan kan Kristo ngan determinado ha pagtipig han imo relasyon ha ira.
Tuguti an Espiritu ni Jehova nga Maggiya ha Imo
9. May kalabotan han baraan nga espiritu, ano an mahimo mahitabo kon an usa nagpapadayon ha pagbuhat hin sala?
9 Pag-ampo para ha baraan nga espiritu han Dios, ngan tuguti ito nga maggiya ha imo. (Lukas 11:13; Galasia 5:19-25) Kon magpapadayon ka ha pagbuhat hin sala, bangin kuhaon han Dios ha imo an iya espiritu. Katapos makasala hi David may kalabotan kan Batseba, nanginyupo hiya ha Dios: “Ayaw gud ako isalikway ha imo atubangan; ngan ayaw pagkuhaa ha akon an imo baraan nga espiritu.” (Salmo 51:11) Tungod ha pagin diri-mabinasulon nga makasasala, nawara ni Hadi Saul an espiritu han Dios. Hi Saul nakasala tungod ha paghalad hin halad nga sinunog ngan tungod kay waray niya bungkaga hin bug-os an panon han kakarnerohan, an kabakahan, ngan an hadi han mga Amalekanhon. Katapos hito, ginkuha ni Jehova an iya baraan nga espiritu kan Saul.—1 Samuel 13:1-14, 15:1-35; 16:14-23.
10. Kay ano nga sadang isalikway mo an paghunahuna ha pagbuhat hin sala?
10 Isalikway an paghunahuna ha pagbuhat hin sala. “Kon magpakasala kita hin tinuyo katapos ta makakarawat han kinaadman ha kamatuoran,” nagsurat hi apostol Pablo, “waray na nabilin nga halad tungod ha mga sala.” (Hebreo 10:26-31) Peligroso gud kon tinuyo nga magbubuhat ka hin sala!
Ipakita an Totoo nga Gugma ha Iba
11, 12. Ha ano nga mga paagi an gugma ngan pagtahod magpupugong ha usa ha pagbuhat hin sayop may kalabotan ha sekso?
11 An gugma ha mga igkasi-tawo magpupugong ha imo ha pagbuhat hin sayop may kalabotan ha sekso. (Mateo 22:39) An sugad nga gugma magpapagios ha imo nga bantayan an imo kasingkasing basi diri ito mag-aghat ha imo nga kuhaon an gugma han padis han iba. An pagbuhat hito mahimo magresulta ha sala nga pag-adulteryo. (Proberbios 4:23; Jeremias 4:14; 17:9, 10) Magin pariho ha matadong nga hi Job, nga waray magtugot han iya kalugaringon nga maghatag hin atensyon ha bisan hin-o nga babaye nga diri niya asawa.—Job 31:1.
12 An pagtahod ha pagkasagrado han pag-asawa makakabulig ha imo nga malikyan an seryoso nga sala. Katuyoan han Dios nga an dungganon nga pag-asawa ngan seksuwal nga relasyon sadang magin paagi han pagpadamu han kinabuhi. (Genesis 1:26-28) Hinumdumi nga an katuyoan han seksuwal nga mga organo amo an pagpadamu han kinabuhi, nga sagrado. An mga makihihilawason ngan mga adulteroso nagtatalapas ha Dios, diri nagpapasidungog ha seksuwal nga buhat, waray pagtahod ha pagkasagrado han pag-asawa, ngan nakakasala ha ira kalugaringon nga lawas. (1 Korinto 6:18) Kondi an gugma ha Dios ngan ha igkasi-tawo nga may diosnon nga pagkamasinugtanon magpupugong ha usa ka tawo ha paggawi nga mahimo magresulta hin pagpaiwasa ha iya tikang ha Kristiano nga kongregasyon.
13. Ha ano nga paagi an imoral nga tawo ‘nagkakarag han manggad’?
13 Kinahanglan pugngan naton an makasasala nga mga panhunahuna basi diri kita makapasubo ha aton mga hinigugma. “Hiya nga nakikig-upod-upod ha mga bigaon nagkakarag han iya manggad,” siring han Proberbios 29:3. An diri-mabinasulon nga adulteroso nagdadaot han iya relasyon ha Dios ngan ha bugkos han pamilya. An iya asawa may hinungdan ha pagdiborsyo ha iya. (Mateo 19:9) Bana man o asawa an nagbuhat hin sala, an pagbulag han mag-asawa mahimo magresulta hin daku nga kasakit ha inosente nga padis, ha mga anak, ngan ha iba. Diri ka ba nauyon nga an pakahibaro han kadaot nga resulta han imoral nga paggawi sadang magpagios ha aton nga atohan an pagsulay ha pagbuhat hito?
14. Ano nga leksyon may kalabotan han sayop nga buhat an mahibabaroan ha Proberbios 6:30-35?
14 An kamatuoran nga waray gud maipapasangil ha pag-adulteryo sadang magpagios ha aton nga likyan inin hakugnon hinduro nga buhat. Ipinapakita han Proberbios 6:30-35 nga bisan kon an mga tawo magpakita hin simpatiya ha kawatan nga nangangawat tungod kay gutom hiya, nangangalas hira ha adulteroso tungod kay may-ada hiya maraot nga motibo. Hiya ‘naggugunaw han iya kalag [o, kinabuhi].’ Ha Mosaiko nga Balaud, papatayon hiya. (Lebitiko 20:10) An usa nga nag-aadulteryo nakakahimo hin kasakit ha iba basi la matagbaw an iya maraot nga hingyap, ngan an diri-mabinasulon nga adulteroso diri nagpapabilin ha gugma han Dios kondi ginpapaiwas ha limpyo nga Kristiano nga kongregasyon.
Tipigi an Limpyo nga Konsensya
15. Ano an kahimtang han konsensya nga minarkahan “sugad ha binaga nga puthaw”?
15 Basi magpabilin ha gugma han Dios, diri naton tutugotan an aton konsensya nga magin diri-naabat hin sala. Matin-aw, kinahanglan diri naton karawaton an mga suruklan ha moral han kalibotan, ngan kinahanglan mag-ikmat kita ha mga butang sugad han pagpili hin mga kaupod, barasahon, ngan kaliawan. Hi Pablo nagpahamangno: “Ha urhi nga panahon an iba magkakahulog tikang ha pagtoo, manmamati ha mga maglimbong nga mga espiritu, ngan ha mga pagturon-an han mga yawa. Pinaagi ha kasalingkapaw han mga tawo nga nagyayakan hin mga buwa, mag-ulat ha ira mga kalugaringon nga konsensya sugad ha binaga nga puthaw.” (1 Timoteo 4:1, 2) An konsensya nga minarkahan “sugad ha binaga nga puthaw” pariho han unod nga kubalon ngan waray na pag-abat. An sugad nga konsensya diri na magpapahamangno ha aton nga magpahirayo ha mga apostata ngan ha mga sitwasyon nga mahimo magpahirayo ha aton ha pagtoo.
16. Kay ano nga importante hinduro an pagkaada hin limpyo nga konsensya?
16 An aton kaluwasan nadepende ha aton pagkaada hin limpyo nga konsensya. (1 Pedro 3:21) Pinaagi han aton pagtoo ha iginbubo nga dugo ni Jesus, an aton konsensya nalimpyohan na han patay nga mga buhat, basi ‘makag-alagad kita ha buhi nga Dios.’ (Hebreo 9:13, 14) Kon tinuyo nga magbubuhat kita hin sala, an aton konsensya magigin mahugaw ngan diri na kita magigin limpyo nga katawohan nga kwalipikado ha pag-alagad ha Dios. (Tito 1:15) Kondi pinaagi han bulig ni Jehova, mahimo kita magkaada hin limpyo nga konsensya.
Iba nga mga Paagi ha Paglikay ha Sayop nga Paggawi
17. Ano an kapulsanan han ‘hingpit nga pagsunod kan Jehova’?
17 ‘Hingpit nga sunda hi Jehova,’ sugad han ginbuhat ni Kaleb ha kadaan nga Israel. (Deuteronomio 1:34-36) Buhata an ginkikinahanglan han Dios ha imo, ngan ayaw gud paghunahuna ha pakiangbit ha “lamesa han mga yawa.” (1 Korinto 10:21) Isalikway an apostasya. Mapasalamaton nga kumaon han espirituwal nga pagkaon dida la ha lamesa ni Jehova, ngan diri ka malilimbongan han palso nga mga magturutdo o magraot nga espiritu. (Efeso 6:12; Judas 3, 4) Isentro an atensyon ha espirituwal nga mga butang, sugad han pag-aram ha Biblia, pagtambong ha mga katirok, ngan ministeryo ha kanataran. Sigurado nga magmamalipayon ka kon hingpit nga susundon mo hin bug-os hi Jehova ngan magkaada damu nga pagbubuhaton ha buruhaton han Ginoo.—1 Korinto 15:58.
18. Paonan-o an kahadlok kan Jehova makakaapekto ha imo paggawi?
18 Magin determinado ha ‘pag-alagad ha Dios nga may pagtahod ngan kahadlok.’ (Hebreo 12:28) An matinalahuron nga kahadlok kan Jehova magpapagios ha imo nga isalikway an bisan ano nga maraot nga buhat. Mabulig ito ha imo nga gumawi uyon ha sagdon ni Pedro ha mga igkasi-dinihogan: “Kon magtawag kamo ha iya nga Amay, nga amo an waray pinalabi nga tawo ngan naghuhukom sugad han buhat han tagsa-tagsa nga tawo, gamita niyo an iyo pagkahumarapit nga may kahadlok.”—1 Pedro 1:17.
19. Kay ano nga sadang iaplikar mo pirme an imo hinbabaroan tikang ha Pulong han Dios?
19 Iaplikar pirme an imo hinbabaroan tikang ha Pulong han Dios. Mabulig ini ha imo nga malikyan an seryoso nga sala tungod kay pamamatud-an mo nga kaupod ka “hadton mga tawo nga pinaagi han paggamit, an ira mga balatian nagkababatid na ha pagkilala han maopay ngan han maraot.” (Hebreo 5:14) Imbes han pagin waray-pagtagad ha pagyakan ngan paggawi, magin maikmat basi maglakat ka sugad nga maaramon, nga ‘ginpapahimulosan an oras’ hinin magraot nga mga adlaw. Padayon nga “hibaroan niyo kon ano an kaburut-on han Ginoo,” ngan padayon nga buhata ito.—Efeso 5:15-17; 2 Pedro 3:17.
20. Kay ano nga kinahanglan likyan naton an kaipa?
20 Likayi gud an kaipa—an hakugnon nga kaipa ha mga gintatag-iya han iba. An usa han Napulo nga Sugo nasiring: “Diri ka maipa han balay han imo igkasi-tawo, diri ka maipa han asawa han imo igkasi-tawo, bisan han iya surugoon nga lalaki, bisan han iya surugoon nga babaye, bisan han iya baka, bisan han iya asno, bisan hin ano nga butang nga iya han imo igkasi-tawo.” (Eksodo 20:17) Ini nga balaud nagpanalipod han balay, asawa, mga surugoon, mga hayop, ngan iba pa nga butang han usa ka tawo. Kondi an pinakaimportante amo an ginsiring ni Jesus nga an kaipa amo an nakakahugaw ha tawo.—Markos 7:20-23.
21, 22. Ano nga nagpupugong nga mga paagi an mahimo buhaton han usa nga Kristiano basi malikyan an pakasala?
21 Pag-ikmat nga an kaipa diri maggiya ha imo ha pakasala. An disipulo nga hi Jakobo nagsurat: “An tagsa-tagsa ginsulay, kon ginsisimang ngan gin-uulohan han iya kalugaringon nga kaipa. Niyan an kairiphon, han human na mag-anak, nabunga hin sala: ngan an sala, kon tigurang na, nag-aanak ha kamatayon.” (Jakobo 1:14, 15) Pananglitan, kon an usa ka tawo may-ada problema hadto ha pag-ininom, mahimo hiya magdesisyon nga diri magkaada mga irinmon nga de-alkohol ha iya balay. Basi makalikay ha pagsulay nga nagdadabi ha usa nga membro han diri-kasekso, bangin kinahanglan bag-ohon han usa nga Kristiano an iya lugar dida ha iya gintatrabahoan o magbag-o han iya trabaho.—Proberbios 6:23-28.
22 Ayaw buhata bisan an siyahan nga pitad ha pakasala. An pagpikat ngan paghunahuna hin imoral nga mga butang mahimo magresulta hin pornikasyon ngan pag-adulteryo. An gudti nga mga pagbuwa mahimo makaaghat ha usa nga magbuwa hin seryoso ngan bangin magresulta ha makasasala nga batasan nga pagbinuwa. An pangawat hin gutiay mahimo makadaot ha konsensya han usa tubtob nga magtikang na hiya pangawat hin mas dagku. Bisan an gutiay nga pagkonsinter ha apostata nga panhunahuna mahimo magresulta ha usa nga magin apostata gud.—Proberbios 11:9; Pahayag 21:8.
Ano Man Kon Ikaw Nakasala?
23, 24. Ano nga pagliaw an aada ha 2 Kronikas 6:29, 30 ngan Proberbios 28:13?
23 An ngatanan nga tawo diri-hingpit. (Eklesiastes 7:20) Kondi kon nakasala ka hin seryoso, maliliaw ka han pag-ampo ni Hadi Salomon han iginpahinungod an templo ni Jehova. Hi Salomon nag-ampo ha Dios: “Bisan ano nga pag-ampo ngan pakimalooy an paghimoon han bisan hin-o nga tawo, o han bug-os nga imo katawohan nga Israel, nga makilala an tagsa ka tawo han ira kalugaringon nga sirot ngan han ira kalugaringon nga kabidoan, ngan duphon an iya mga kamot tipakanhi hini nga balay: Dida hito pamatian mo tikang ha langit an lugar nga imo puroy-anan, ngan pasayloa, ngan hatagi an tagsa ka tawo sumala han ngatanan niya nga dalan, kanay kasingkasing imo hinbabaroan (kay ikaw, bisan ikaw la, maaram han mga kasingkasing han mga anak han mga tawo).”—2 Kronikas 6:29, 30.
24 Oo, an Dios maaram han kasingkasing ngan mapinasayloon. An Proberbios 28:13 nasiring: “Hiya nga nagtatabon han iya mga pagtalapas diri mauswag; kondi bisan hin-o nga magsumat ngan bumaya hini makakakuha hin kalooy.” Pinaagi han mabinasulon nga pagsumat ngan pagbaya ha sala, posible nga makarawat han tawo an kalooy han Dios. Kondi, kon aada ka ha maluya nga kahimtang ha espirituwal, ano pa an makakabulig ha imo basi magpabilin ha gugma han Dios?
Paonan-o Mo Babatunon?
• Paonan-o kita makakagpadayon ha gugma han Dios?
• Paonan-o an gugma ha Dios ngan kan Kristo nabulig ha aton nga isalikway an makasasala nga buhat?
• Kay ano nga an totoo nga gugma ha iba nagpupugong ha aton ha pagbuhat hin sayop nga paggawi may kalabotan ha sekso?
• Ano an pipira nga paagi basi malikyan an sayop nga paggawi?
[Mga Pakiana]
[Retrato ha pahina 21]
Ipinapakita ni Judas ha aton kon paonan-o kita magpapadayon ha gugma han Dios
[Retrato ha pahina 23]
An pagbulag han mag-asawa mahimo magresulta hin daku nga kasakit ha inosente nga padis ngan ha mga anak
[Retrato ha pahina 24]
Pariho kan Kaleb, determinado ka ba ha ‘hingpit nga pagsunod kan Jehova’?
[Retrato ha pahina 25]
Mag-ampo pirme para han bulig basi maatohan an pagsulay