Ano an “Kataposan nga mga Adlaw”?

NAHUHUNAHUNA mo ba kon ano an malalaoman mo ngan han imo mga hinigugma ha tidaraon? Gintatagad gud han damu nga tawo an report han media basi hibaroan kon paonan-o an mga panhitabo ha kalibotan mahimo makaapekto han ira kinabuhi. Kondi, an pagtagad ha giniyahan nga Pulong han Dios naghahatag ha aton hin totoo nga hilarom nga pagsabot. Tungod ito kay ha maiha na nga naglabay, an Biblia nagtagna diri la han presente nga kahimtang kondi pati liwat han mahitatabo ha unhan.

Pananglitan, han nakanhi hi Jesu-Kristo ha tuna, pirme hiya nag-iinistorya mahitungod han Ginhadian han Dios. (Lukas 4:43) Makatadunganon la nga an mga tawo nga nakabati ha iya naruyag mahibaro kon san-o maabot iton urusahon nga Ginhadian. Ha pagkamatuod, tulo ka adlaw antes hi Jesus diri-makatadunganon nga ginpatay, ginpakianhan hiya han iya mga disipulo: “Ano an tigaman han imo pagkanhi [ha pagmando han Ginhadian], ngan ha kataposan han kalibotan?” (Mateo 24:3) Ginsumatan hira ni Jesus nga hi Jehova nga Dios la an maaram han eksakto nga panahon kon san-o bug-os nga kukontrolon han Ginhadian an tuna. (Mateo 24:36; Markos 13:32) Kondi, hi Jesus ngan an iba nagtagna gud hin partikular nga mga panhitabo ha tuna nga magigin ebidensya nga hi Kristo nagmamando na ha gahum han Ginhadian.

Antes naton usisahon an nakikita nga ebidensya nga nagkikinabuhi na kita ha “kataposan nga mga adlaw” han presente nga sistema han mga butang, tagdon naton hin madaliay an usa nga importante nga panhitabo ha langit. (2 Timoteo 3:1) Hi Jesu-Kristo nagin Hadi ha langit han tuig 1914. a (Daniel 7:13, 14) Waray pag-iha katapos karawaton an gahum han Ginhadian, ginios hi Jesus. An Biblia nasiring: “Nag-araway ha langit: hi Miguel ngan an iya mga anghel nakikipag-away kontra han dragon; ngan an dragon ngan an iya mga anghel nakikipag-away.” (Pahayag 12:7) “Hi Miguel nga punoan han mga anghel” amo hi Jesu-Kristo ha iya katungdanan ha langit. b (Judas 9; 1 Tesalonika 4:16) An dragon amo hi Satanas nga Yawa. Hito nga away, ano an nahitabo kan Satanas ngan ha iya mga sumurunod nga magraot hinduro nga anghel, nga tinatawag nga mga demonyo? Napirde hira hito nga girra ngan “ginlabog,” o ginpaiwas ha langit, nganhi ha tuna. (Pahayag 12:9) Tungod hini nagrarayhak an “mga langit, ngan [adton] nag-uukoy dida,” nga amo an magtinumanon nga espiritu nga mga anak han Dios. Kondi, an mga tawo diri nakakaeksperyensya hin sugad nga pagrayhak. “Kairo han tuna,” nagtagna an Biblia, “kay an Yawa linusad ha iyo, nga may daku nga kasina, kay hinbaroan niya nga halipot na la nga oras iton iya pag-ukoy.”—Pahayag 12:12.

Hi Satanas nasisina hinduro, ngan tungod hito, iya ginpapahinabo an duro nga kagol-anan—pag-antos ngan kasakit—ha mga nag-uukoy ha tuna. Kondi, ito nga kagol-anan diri mag-iiha, ‘halipot la nga oras.’ Ini nga peryodo gintatawag han Biblia nga an “kataposan nga mga adlaw.” Malilipay kita nga ha diri na maiha an impluwensya han Yawa ha tuna wawad-on na gud. Kondi ano an ebidensya nga nagkikinabuhi na kita ha kataposan nga mga adlaw?

[Mga footnote]

 [Ginkuhaan han mga Retrato ha pahina 2]

KOBRE: Atubangan: © Chris Stowers/Panos Pictures; luyo: FAROOQ NAEEM/AFP/Getty Images