Pagsabot ha Biblia—Usa nga Kalipay nga Abrido ha Imo

AN Biblia nagsusulod hin presyoso nga mga kamatuoran tikang ha Dios. Nagsusumat ito ha aton mahitungod han katuyoan han kinabuhi, han hinungdan han pag-antos han tawo, ngan han tidaraon han katawohan. Nagtututdo ito ha aton kon paonan-o makakabiling hin kalipayan, kon paonan-o magkakaada hin kasangkayan, ngan kon paonan-o malalamposan an mga problema. Labaw pa hito, nahibabaro kita mahitungod ha aton Maglalarang ngan langitnon nga Amay, hi Jehova. An sugad nga kahibaro naghahatag ha aton hin kalipay ngan hin kahulogan ha aton mga kinabuhi.

Ha Biblia, an pagkuha hin kahibaro mahitungod ha Dios iginpapariho ha pagkaon. Hi Jesus nagsiring: “Diri la an tinapay an nakakabuhi han tawo, kondi an ngatanan nga pulong, nga nagowa ha baba han Dios.” (Mateo 4:4; Hebreo 5:12-14) Sugad la nga an pagkaon hin masustansya nga pagkaon kada adlaw ginkikinahanglan basi padayon kita nga mabuhi, ha pariho nga paagi an regular nga pagbasa han Pulong han Dios ginkikinahanglan basi magpahimulos kita han saad han Dios nga kinabuhi nga waray kataposan.

Nalilipay kita ha pagkaon tungod kay ito an pagkadisenyo ha aton ni Jehova ngan tungod kay gintatagbaw hito an usa nga importante nga panginahanglan. Kondi, may-ada kita usa pa nga importante nga panginahanglan nga kinahanglan matagbaw kon karuyag naton magin malipayon. Hi Jesus nagsiring: “Malipayon adton mahunahunaon han ira espirituwal nga panginahanglan.” (Mateo 5:3, NW) Posible an kalipay tungod kay ito nga panginahanglan mahimo matagbaw pinaagi ha pagsabot ha Pulong han Dios.

Totoo, nakukurian an iba ha pagsabot han Biblia. Pananglitan, bangin magkinahanglan ka hin bulig ha mga teksto nga naghihisgot hin diri-pamilyar nga mga kustomre o nagamit hin simboliko nga mga pulong. May-ada liwat mga tagna nga iginsurat ha simboliko nga mga pulong nga mahimo  hisabtan la pinaagi ha pag-usisa ha iba nga teksto ha Biblia nga naghihisgot han pariho nga topiko. (Daniel 7:1-7; Pahayag 13:1, 2) Bisan pa hito, mahimo mo gud hisabtan an Biblia. Paonan-o ka makakasiguro hito?

Usa nga Kalipay nga Abrido ha Ngatanan

An Biblia amo an Pulong han Dios. Dida hito iginpapahayag han Dios an iya kaburut-on ha aton. Magtatagana ba an Dios hin libro nga diri mahisasabtan o masasantop la han mga tawo nga hitaas an edukasyon? Diri, diri ito bubuhaton ni Jehova. Hi Kristo Jesus nagsiring: “Hain ha iyo nga amay, nga kon an iya anak nangangaro hin tinapay, iya ba tatagan hiya hin bato? O kon isda, tatagan ba hiya han halas liwan han isda? O, kon mangaro hiya hin bonay, tatagan ba hiya hin urang-urang? Busa, kon kamo nga mga magraot, mahibabaro kamo paghatag hin mag-opay nga mga hatag ha iyo mga kabataan labi pa gud an iyo Amay nga langitnon, nga mahatag han espiritu santo ha mga nangangaro ha iya?” (Lukas 11:11-13) Salit, makakasiguro ka nga mahimo mo masabtan an Biblia ngan kon sinsero ka nga maghangyo ha Dios, magtatagana hiya ha imo han bulig nga kinahanglan mo basi hisabtan an iya Pulong. Aw, bisan an kabataan mahimo makasabot han basihan nga mga katutdoan han Biblia!—2 Timoteo 3:15.

Bisan kon ginkikinahanglan an pangalimbasog basi hisabtan an Biblia, an pagbuhat hito mahimo magkaada gamhanan ngan makapadasig nga epekto ha aton. Katapos banhawon hi Jesus, nagpakita hiya ha duha han iya mga disipulo ngan nakiistorya ha ira mahitungod han mga tagna han Biblia. An asoy ni Lukas nasiring: “Tumikang kan Moises, ngan ha ngatanan nga mga manaragna, iginsaysay niya ha ira an ngatanan nga mga bagay ha Santos nga Surat ha nahitutungod ha iya ngahaw.” Ano an resulta? Hito nga gab-i, samtang ginpapamalandong han mga disipulo an ira hinbaroan, hira nagsiring ha kada tagsa: “Waray ba magpaso an aton mga kasingkasing ha aton, han nagyiyinakan hiya ha aton ha dalan, ngan han pagbuklari niya ha aton ha Santos nga Surat?” (Lukas 24:13-32) An pagsabot ha Pulong han Dios naghatag ha ira hin kalipay tungod kay nagparig-on ito han ira pagtoo ha mga saad han Dios ngan naghatag ha ira hin positibo nga panlantaw ha tidaraon.

Imbes han pagin mabug-at, an pagsabot ha Pulong han Dios makapainteres ngan mapulsanon, makalilipay pariho ha pagkaon hin marasa ngan masustansya nga pagkaon. Ano an kinahanglan mo buhaton basi magkaada han sugad nga pagsabot? Ipapakita han sunod nga artikulo kon paonan-o ka makakabiling hin kalipay ha ‘kahibaro han Dios.’—Proberbios 2:1-5.

[Retrato ha pahina 4]

Pariho ha mahigugmaon nga amay, hi Jehova naghahatag hin baraan nga espiritu basi buligan kita nga hisabtan an Biblia