Paglikay ha Palso nga Pagsingba!
Paglikay ha Palso nga Pagsingba!
“Gumowa ngan bumulag kamo tikang ha ira, siring han Ginoo [nga Jehova], ngan diri kamo dumuot hin mahugaw nga bagay.”—2 KORINTO 6:17.
1. Ano an kinahanglan gud hibaroan han sinsero nga mga tawo?
DAMU nga sinsero nga mga tawo an diri maaram han kamatuoran mahitungod ha Dios ngan han tidaraon han katawohan. Tungod kay waray hira makabiling han ginkikinahanglan gud nira, nagugupong gud hira ngan waray kasigurohan. Minilyon an nauuripon ha mga patootoo, mga rituwal, ngan mga selebrasyon nga nakakapasina ha aton Maglalarang. Bangin may-ada ka mga amyaw ngan mga paryente nga natoo ha naglalaga nga impyerno, ha trinidad, ha pagkadiri-mamaratyon han kalag, o ha iba pa nga palso nga katutdoan.
2. Ano an ginbubuhat han mga lider han relihiyon, ngan ano an resulta?
2 Ano an hinungdan hinin kalyap nga kaignorante mahitungod ha Dios? Kabaliktaran ha ginlalaoman, an relihiyon mismo—labi na an mga organisasyon ngan mga lider han relihiyon nga nagtututdo han mga ideya nga nakontra ha mga panhunahuna han Dios. (Markos 7:7, 8) Sugad nga resulta, damu nga mga tawo an nalilimbongan ha pagtoo nga ira ginsisingba an matuod nga Dios, samtang an totoo, nakakapasina hira ha iya. An palso nga relihiyon an direkta nga hinungdan hinin makasurubo nga kahimtang.
3. Hin-o an nangunguna nga promotor han palso nga pagsingba, ngan paonan-o hiya iginhuhulagway ha Biblia?
3 May-ada diri-nakikita nga persona nga nasuporta ha palso nga relihiyon. Ha pag-unabi ha iya, hi apostol Pablo nagsiring: “An mga hunahuna hini nga diri-magtinoohon ginbuta han dios hini nga kalibotan, basi nga diri hira sidlakan han kalamrag han maopay nga sumat han himaya ni Kristo, nga amo an dagway han Dios.” (2 Korinto 4:4) An “dios hini nga kalibotan” amo hi Satanas nga Yawa. Hiya an nangunguna nga promotor han palso nga pagsingba. “Hi Satanas nagpapakaaroanghel han kahayag,” nagsurat hi Pablo. “Busa diri ito daku nga bagay kon an iya mga ministro magpakamuroministro han katadongan.” (2 Korinto 11:14, 15) Ginpapahinabo ni Satanas nga magin maopay pagkit-on an maraot nga mga butang ngan iya ginlilimbongan an mga tawo nga tumoo ha mga buwa.
4. Ano an ginsiring han Balaud han Dios ha kadaan nga Israel mahitungod han buwaon nga mga propeta?
4 Salit matin-aw kon kay ano nga ginkukondenar gud ha Biblia an palso nga relihiyon! Pananglitan, an Mosaiko nga Balaud espisipiko nga nagpahamangno ha pinili nga katawohan han Dios kontra han buwaon nga mga propeta. Bisan hin-o nga nasuporta ha palso nga mga katutdoan ngan ha pagsingba ha palso nga mga dios kinahanglan ‘patayon kay hiya nagyakan ha pagsuki kan Jehova.’ An mga Israelita ginsugo nga ‘kuhaon an maraot tikang ha butnga nira.’ (Deuteronomio 13:1-5) Oo, gintatagad ni Jehova an palso nga relihiyon sugad nga maraot.—Esekiel 13:3.
5. Ano nga mga pahamangno an sadang sundon naton yana?
5 Ipinakita ni Jesu-Kristo ngan han iya mga apostol an duro nga pagkontra ni Jehova ha palso nga relihiyon. Hi Jesus nagpahamangno ha iya mga disipulo: “Magtagam kamo ha mga manaragna nga buwaon, nga maabot ha iyo, nga nagpapanapton sugad hin karnero; kondi ha sulod nira amo an magpintas nga mga lobo.” (Mateo 7:15; Markos 13:22, 23) Hi Pablo nagsurat nga ‘an kasina han Dios iginpahayag tikang ha langit kontra ha ngatanan nga pagkadiri-matinahuron ha Dios ngan pagkadiri-matadong han mga tawo nga nagpupugong han kamatuoran.’ (Roma 1:18) Importante gud nga sundon han totoo nga mga Kristiano ini nga mga pahamangno ngan maglikay ha bisan hin-o nga nagpupugong han kamatuoran han Pulong han Dios o nagpapasarang hin palso nga mga katutdoan!—1 Juan 4:1.
Gawas Kamo ha ‘Babilonya nga Daku’
6. Paonan-o iginlaladawan ha Biblia an ‘Babilonya nga Daku’?
6 Hunahunaa kon paonan-o iginhuhulagway han libro han Biblia nga Pahayag an palso nga relihiyon. Iginlaladawan ito sugad nga nahubog nga puta nga may impluwensya ha damu nga mga ginhadian ngan ha katawohan hito. Inin simboliko nga babaye nakighilawas ha damu nga kahadian ngan nahubog ha dugo han totoo nga mga magsiringba han Dios. (Pahayag 17:1, 2, 6, 18) May-ada hiya ngaran nga iginsurat ha iya agtang nga naangay ha iya malaw-ay hinduro ngan mangil-ad nga paggawi. An ngaran amo an ‘Babilonya nga Daku, an iroy han mga puta ngan mga durumtanan ha tuna.’—Pahayag 17:5.
7, 8. Paonan-o an palso nga relihiyon nagin puta, ngan ano an mga resulta?
7 An Kasuratanhon nga paghulagway han Babilonya nga Daku naangay ha ngatanan nga palso nga relihiyon han kalibotan. Bisan kon an yinukot nga mga relihiyon diri pormal nga nagkakaurosa sugad nga usa nga organisasyon ha kalibotan, magkaupod hira ha katuyoan ngan mga buhat. Sugad han iginladawan han imoral nga babaye ha Pahayag, an palso nga relihiyon may-ada daku nga impluwensya ha mga gobyerno. Pariho han babaye nga diri-matinumanon ha iya mga saad ha pag-asawa, an palso nga relihiyon nagin puta pinaagi han pakig-alyansa ha damu nga politikal nga mga gobyerno. ‘Mga manlilibog, waray ba niyo hibaroi nga an pakigsangkay ha kalibotan amo an pakig-away ha Dios?’ nagsurat an disipulo nga hi Jakobo. “Busa, bisan hin-o an makigsangkay ha kalibotan naghihimo ha iya ngahaw nga kaaway kontra han Dios.”—Jakobo 4:4.
8 Ini nga pagtampo han palso nga relihiyon ngan han mga gobyerno nagriresulta hin duro nga pag-antos han mga tawo. An Aprikano nga political analyst nga hi Dr. Xolela Mangcu nakaobserba nga “an kasaysayan han kalibotan puno hin mga ehemplo han durungan nga pamatay hin damu nga mga tawo tungod han pagtampo han relihiyon ngan politika.” Usa nga pahayagan an bag-o la nga nagsiring: “An pinakamadugo ngan pinakapeligroso nga mga araway yana . . . relihiyon an hinungdan.” Minilyon nga mga tawo an ginpatay ha mga araway nga suportado han relihiyon. Ginpipersigir ngan ginpapatay pa ngani han Babilonya nga Daku an totoo nga mga surugoon han Dios, nahuhubog han ira dugo, siring pa.—Pahayag 18:24.
9. Paonan-o iginpapahayag ha libro nga Pahayag an kangalas ni Jehova ha palso nga pagsingba?
9 Matin-aw nga nasasabtan tikang ha nahitatabo ha Babilonya nga Daku nga hi Jehova nangangalas ha palso nga pagsingba. An Pahayag 17:16 nasiring: “An napulo nga mga sungay nga imo hinkit-an, ngan an mananap, ini hira magdudumot han puta, ngan paglalaglagon ngan paghuhuboan hiya nira, ngan pangangaunon nira an iya unod, ngan pagsusunugon gud hiya ha kalayo.” Siyahan, an daku nga mananap maatake ha iya tubtob nga hiya mamatay ngan kakaunon an iya mga unod. Katapos, anoman an mahisalin ha iya, bug-os nga susunugon. Ha sugad man nga paagi, diri na mag-iiha an mga gobyerno ha kalibotan maatake kontra ha palso nga relihiyon. Pagigiuson hira han Dios nga buhaton ito. (Pahayag 17:17) An Babilonya nga Daku, an imperyo han palso nga relihiyon ha kalibotan, sigurado nga mabubungkag. “Diri na gud [hiya] hiaagian.”—Pahayag 18:21.
10. Ano an sadang magin disposisyon naton may kalabotan ha palso nga relihiyon?
10 Ano an sadang magin disposisyon han totoo nga mga magsiringba may kalabotan ha Babilonya nga Daku? Matin-aw hinduro nga an Biblia nagsusugo: ‘Gawas kamo ngadi, mga tawo ko, tikang ha iya, basi diri kamo makaangbit ha iya mga sala, ngan basi diri kamo makakarawat han iya mga peste.’ (Pahayag 18:4) Adton naruruyag maluwas kinahanglan gumawas ha palso nga relihiyon antes magin urhi na hinduro. Han hi Jesu-Kristo nakanhi ha tuna, nagtagna hiya nga ha kataposan nga mga adlaw, damu an mag-aangkon la nga nasugot ha iya. (Mateo 24:3-5) Ha sugad nga mga tawo, hiya nagsiring: ‘Ako diri gud nakilala ha iyo; iwas kamo ha akon, mga magburuhat han karat-an.’ (Mateo 7:23) An nahitrono na yana nga Hadi, hi Jesu-Kristo, nagsalikway han palso nga relihiyon.
Paglikay ha Palso nga Pagsingba—Paonan-o?
11. Ano an sadang buhaton naton basi malikyan an palso nga pagsingba?
11 An totoo nga mga Kristiano naglilikay ha palso nga pagsingba ngan nagsasalikway han palso nga mga katutdoan han relihiyon. Nangangahulogan ini nga diri kita namamati o nagkikita han mga programa ha radyo ngan telebisyon mahitungod han palso nga relihiyon ngan diri liwat naton binabasa an mga barasahon ha relihiyon nga nagtututdo hin mga buwa mahitungod ha Dios ngan han iya Pulong. (Salmo 119:37) Maaramon liwat nga linilikyan naton an pakigbahin ha sosyal nga mga katirok ngan mga buruhaton ha pagpahalibway nga ginhikay han anoman nga organisasyon han palso nga relihiyon. Dugang pa, diri kita nasuporta ha palso nga pagsingba ha anoman nga paagi. (1 Korinto 10:21) An paglikay ha sugad nga mga butang nagpapanalipod ha aton nga diri madara han usa ngadto ha “kauripon tungod han iya pilosopiya ngan paglimbong nga waray pulos, sugad ha mga surumatanon han mga tawo, sugad ha binata nga pagturon-an han kalibotan, ngan diri sugad kan Kristo.”—Kolosas 2:8.
12. Paonan-o tatapuson han usa nga tawo an iya pagin membro ha mga organisasyon han palso nga relihiyon?
12 Kumusta man kon an usa ka tawo nga naruruyag magin usa han mga Saksi ni Jehova rehistrado nga membro han palso nga relihiyon? Kasagaran, an usa nga surat nga nagpapahibaro han pagbaya magigin ebidensya nga an tawo diri na naruruyag nga tagdon sugad nga membro han palso nga relihiyon. Importante gud nga magin determinado an tawo nga maglikay hin bug-os ha kahugawi han bisan ano nga klase han palso nga pagsingba. An mga buhat han usa nga naruruyag magin Saksi sadang magpahibaro hin matin-aw ha relihiyoso nga organisasyon ngan ha publiko nga gintatapos na niya an iya pagin membro hito nga relihiyon.
13. Ano nga sagdon an iginhahatag han Biblia may kalabotan han panginahanglan nga maglikay ha palso nga pagsingba?
13 “Diri kamo magpas-an han yugo upod han mga diri-magtinoohon,” nagsurat hi apostol Pablo. “Kay oonan-on ba an pagkatampo han katadongan ngan han diri-katadongan? O oonan-on ba an pagkaangbit han kalamrag ngan han kangitngit? Ngan oonan-on ba an pagkaangay nira Kristo ngan hi Belial? O oonan-on ba an pagkaangbit han matinoohon ngan han diri-matinoohon? Ngan oonan-on ba an pagkaangay han templo han Dios ngan han mga diosdios? . . . Busa gumowa ngan bumulag kamo tikang ha ira, siring han Ginoo [nga Jehova], ngan diri kamo dumuot hin mahugaw nga bagay.” (2 Korinto 6:14-17) Ginsusunod naton ini nga mga pulong pinaagi han paglikay ha palso nga pagsingba. An sagdon ba ni Pablo nagsasagda nga likyan liwat naton an palso nga mga magsiringba?
Padayon nga “Manggawi Kamo ha Kaaram”
14. Kinahanglan ba nga likyan naton an anoman nga pakig-upod ha mga nakikigbahin ha palso nga pagsingba? Isaysay.
14 Diri na gud ba makikigkita o makikiistorya an totoo nga mga magsiringba ha mga tawo nga nakikigbahin ha palso nga pagsingba? Sadang ba naton likyan an anoman nga pakig-upod ha mga tawo nga diri naton igkasi-tumuroo? An baton, diri. An ikaduha han gidadakui nga mga sugo nasiring: “Higugmaon mo an imo igkasi-tawo sugad ha imo ngahaw.” (Mateo 22:39) Sigurado nga ipinapakita naton an aton gugma ha aton mga igkasi-tawo kon iginpapaangbit naton ha ira an maopay nga sumat han Ginhadian. Naipapakita liwat an aton gugma ha ira kon binubuligan naton hira ha pag-aram ha Biblia ngan iginsusumat ha ira nga kinahanglan likyan an palso nga pagsingba.
15. Ano an kahulogan han pagin ‘diri bahin han kalibotan’?
15 Bisan kon iginsasangyaw naton an maopay nga sumat ha aton mga igkasi-tawo, sugad nga mga sumurunod ni Jesus kita ‘diri bahin han kalibotan.’ (Juan 15:19, NW) An pulong dinhi nga “kalibotan” nagtutudlok ha mga tawo nga bulag ha Dios. (Efeso 4:17-19; 1 Juan 5:19) Bulag kita ha kalibotan ha paagi nga linilikyan naton an mga disposisyon, pagyakan, ngan paggawi nga nakakapasina kan Jehova. (1 Juan 2:15-17) Dugang pa, uyon ha prinsipyo nga “an magraot nga mga kaupod nakakadunot ha mga mag-opay nga batasan,” linilikyan naton an pakigsangkay ha mga tawo nga diri nagkikinabuhi uyon ha Kristiano nga mga prinsipyo. (1 Korinto 15:33) An pagin diri bahin han kalibotan amo an pagpabilin nga ‘waray buring han kalibotan.’ (Jakobo 1:27) Salit, an pagin bulag ha kalibotan diri nangangahulogan nga diri na gud kita makikigkita o makikiistorya ha iba nga mga tawo.—Juan 17:15, 16; 1 Korinto 5:9, 10.
16, 17. Mationan-o sadang tratuhon han mga Kristiano adton diri maaram ha kamatuoran han Biblia?
16 Salit, paonan-o naton tatagdon adton diri maaram han mga kamatuoran ha Biblia? Ha kongregasyon ha Kolosas, hi Pablo nagsurat: “Manggawi kamo ha kaaram ha mga aadto ha gawas, nga pagpahimulosan niyo an panahon. An iyo pulong kinahanglan nga may-ada grasya, nga ginparasa hin asin, basi nga iyo hibaroan an pagbaton ha usa kag usa.” (Kolosas 4:5, 6) Hi apostol Pedro nagsurat: “Pagbaraanon niyo ha iyo mga kasingkasing hi Kristo nga Ginoo; ngan mag-andam kamo gihapon ha pagbaton, nga may kaaghop ngan pagtahod, ha ngatanan nga mga tawo nga mapakiana ha iyo, kon ano an katungdanan [pangatadongan] han pagtoo nga aada ha iyo.” (1 Pedro 3:15) Ginsagdonan ni Pablo an mga Kristiano nga ‘diri magyakan hin maraot kontra ha bisan hin-o, nga diri makimasamok, magtalunoy, nagpapakita hin bug-os nga kaaghop ha ngatanan nga mga tawo.’—Tito 3:2.
17 Sugad nga mga Saksi ni Jehova, linilikyan naton nga magin maraugdaog o arogante ha iba. Diri gud kita nagamit hin nakakainsulto nga mga pulong ha paghulagway ha mga tawo han iba nga mga relihiyon. Lugod, mataktika kita, bisan kon an tagbalay, amyaw, o katrabaho diri-buotan o nakakasakit magyakan.—Kolosas 4:6; 2 Timoteo 2:24.
Tipigi an ‘Surubdan han Putli nga mga Pulong’
18. Ano nga maraot nga kahimtang ha espirituwal an naieksperyensyahan hadton nabalik ha palso nga pagsingba?
18 Katapos hibaroan an mga kamatuoran han Biblia, peligroso gud kon an usa bumalik ha palso nga pagsingba! Iginsasaysay han Biblia an nakakadaot nga mga resulta han pagbuhat hito han nagsiring ito: “Kon katapos na nira makapalagiw ha mga maghugaw nga bagay han kalibotan pinaagi han pagkilala han Ginoo ngan Manluluwas, nga hi Jesu-Kristo, mamungot [mahidabi] na liwat hira ngan nadaog, an ira urhi nga kamutangan malabi pa hin kamaraot kay han siyahan. . . . Ini nahinabo ha ira sumala ha matuod nga higaday: An ayam binalik ngahaw ngadto ha iya iginsuka, ngan an anay nga naghugas ha paglab-og ha lagay.”—2 Pedro 2:20-22.
19. Kay ano nga importante nga magpabilin kita nga alerto ha bisan ano nga mahimo makadaot han aton espirituwalidad?
19 Kinahanglan magpabilin kita nga alerto ha bisan ano nga makakadaot han aton espirituwalidad. May-ada gud mga peligro! Hi apostol Pablo nagpahamangno: “An espiritu nasiring gud ha dayag, nga ha urhi nga panahon an iba magkakahulog tikang ha pagtoo, manmamati ha mga maglimbong nga mga espiritu, ngan ha mga pagturon-an han yawa.” (1 Timoteo 4:1) Nagkikinabuhi kita ha “urhi nga panahon.” Adton diri naglilikay ha palso nga pagsingba mahimo ‘ig-anod-anod ngan igpalid han tagsa nga hangin han pagturon-an, pinaagi han mga panlimbong han mga tawo, ha katusohan tikang ha mga buwa han kasaypanan.’—Efeso 4:13, 14.
20. Paonan-o naton mapapanalipdan an aton kalugaringon kontra han nakakadaot nga impluwensya han palso nga relihiyon?
20 Paonan-o naton mapapanalipdan an aton kalugaringon kontra han nakakadaot nga impluwensya han palso nga relihiyon? Hunahunaa an ngatanan nga igintatagana ni Jehova. May-ada kita han Pulong han Dios, an Biblia. (2 Timoteo 3:16, 17) Hi Jehova nagtatagana liwat hin abunda nga espirituwal nga pagkaon pinaagi han “matinumanon ngan maaramon nga uripon.” (Mateo 24:45, NW) Samtang nag-uuswag kita ha kamatuoran, diri ba sadang patuboon naton an pagkaruyag ha ‘mabaskog nga kakaunon nga kanan katigurangan,’ ngan an hingyap ha pagkatirok diin hibabaroan naton an espirituwal nga mga kamatuoran? (Hebreo 5:13, 14; Salmo 26:8) Magin determinado kita nga salingabuton hin bug-os an mga tagana ni Jehova basi kita makagpadayon ha ‘pagsubad ha surubdan han putli nga mga pulong’ nga aton hinbabatian. (2 Timoteo 1:13) Hito nga paagi malilikyan naton an palso nga pagsingba.
Ano an Imo Hinbaroan?
• Ano an ‘Babilonya nga Daku’?
• Ano an kinahanglan buhaton naton basi malikyan an palso nga relihiyon?
• Ano nga mga peligro ha aton espirituwalidad an sadang likyan naton?
[Mga Pakiana]
[Retrato ha pahina 28]
Maaram ka ba kon kay ano nga an ‘Babilonya nga Daku’ iginlaladawan sugad nga imoral nga babaye?
[Retrato ha pahina 29]
An ‘Babilonya nga Daku’ sigurado nga mabubungkag
[Retrato ha pahina 31]
Ipinapakita naton an ‘kaaghop ngan pagtahod’ ha mga diri igkasi-tumuroo naton