Kamatayon—Makaharadlok nga Reyalidad!

“TIKANG ha takna han katawo, aada pirme an posibilidad nga mamatay an usa,” nagsurat an historyador nga taga-Britanya nga hi Arnold Toynbee. Hiya nagdugang: “Ngan usa nga kamatuoran nga an tagsa nga tawo mamamatay ha kaurhian.” Nasusubo gud kita kon namamatay an usa nga hinigugma nga membro han pamilya o usa ka duok nga sangkay!

An kamatayon usa nga makaharadlok nga reyalidad ha katawohan ha sulod hin mga milenyo na. Naabat kita hin bug-os nga kawaray nahihimo kon namamatayan kita hin aton hinigugma. Waray eksempsyon hini nga kasub-anan. Waray usa nga nakakalikay hito. “An kasub-anan nakakahimo ha aton ngatanan nga magin sugad hin kabataan na liwat—anoman an aton naeskwelahan, kita ngatanan waray mga baton. An mga pinakamaaramon waray hinbabaroan.” Ito an mensahe han usa nga parasurat han ika-19 ka siglo. Kita nagigin pariho ha gudtiay nga kabataan—waray-nahihimo, diri nakakagbag-o han kahimtang. An karikohan o gahum diri makakapabalik han nawara. An mga maaramon ngan intelektuwal waray mga baton. An mga magkusog nagtatangis, sugad man an mga magluya.

Hi Hadi David han kadaan nga Israel nakaeksperyensya hinin duro nga kasub-anan han an iya anak nga hi Absalon namatay. Han hibatian an mahitungod han iya kamatay, nagtangis an hadi ngan nagsiring: “O anak ko nga Absalon, anak ko, anak ko nga Absalon! Namatay pa unta ako para ha imo, O Absalon, anak ko, anak ko!” (2 Samuel 18:33) An usa nga bantogan nga hadi nga nakapirde hin gamhanan nga mga kaaway waray nahimo kondi maghingyap nga ginpatay na la unta hiya han ‘kataposan nga kaaway, an kamatayon,’ imbes an iya anak.—1 Korinto 15:26.

May-ada ba solusyon ha kamatayon? Kon may-ada, ano an paglaom han mga patay? Makikita pa ba naton an aton mga hinigugma? An masunod nga artikulo magtatagana hin Kasuratanhon nga mga baton hini nga mga pakiana.