Karuyag Mo ba Magkaada hin Totoo nga mga Sangkay?

KADAM-AN nga mga tawo an naruruyag magkaada hin totoo nga mga sangkay. Nagigin mas makalilipay an imo kinabuhi kon naisusumat mo an imo mga eksperyensya ha duok nga mga sangkay. Kondi paonan-o mo hiaagian an totoo nga pakigsangkay? Hirani 2,000 ka tuig na an naglabay, ipinakita ni Jesus nga an pinakaimportante ha kalamposan han ngatanan nga relasyon han tawo amo an diri-hakugnon nga gugma. Hiya nagtutdo: “Sugad han iyo karuyag nga buhaton ha iyo han mga tawo, buhata man ha ira an sugad.” (Lukas 6:31) Inin pagsaysay nga agsob tawagon nga Bulawanon nga Surundon, nagpapakita nga kinahanglan magin diri-hakugnon ka ngan mahinatagon nga tawo basi magkaada ka hin mga sangkay. Matin-aw, basi magkaada hin usa nga sangkay, kinahanglan magin usa ka nga sangkay. Paonan-o?

An duok, mahigugmaon nga pakigsangkay diri mapapatubo dayon. Sadang hunahunaon nga an mga sangkay labaw pa kay ha mga kakilala la. Hira an mga indibiduwal nga imo hinigugma. An pagpatubo ngan pagtipig hin duok nga pakigsangkay kinahanglan pangalimbasogan. Kasagaran, an pakigsangkay nagkikinahanglan nga unahon mo an mga panginahanglan han imo sangkay kay ha imo kalugaringon nga kaopayan. An magsarangkay diri la nalilipay kon malipayon hira kondi nasusubo liwat kon an makuri nga kahimtang nahitatabo ha usa ha ira.

Ipinapakita mo an totoo nga pakigsangkay labi na pinaagi han paghatag hin emosyonal ngan praktikal nga suporta ha usa ka tawo nga nanginginahanglan. An Proberbios 17:17 nasiring: ‘An totoo nga sangkay nahigugma ha ngatanan nga panahon, ngan usa nga bugto nga natawo para ha kakurian.’ Ha pagkamatuod, an bugkos han pagkasarangkay mahimo magin mas marig-on pa ngani kay ha relasyon han mga kapamilya. An Proberbios 18:24 (NW) nasiring: “May-ada mga magkaurupod nga nagpapakaraot ha usa kag usa, kondi may-ada sangkay nga mas duok pa kay ha usa nga bugto.” Karuyag mo ba mahibaro hin dugang pa kon paonan-o mapapatubo an sugad nga totoo nga pagkasarangkay? Karuyag mo ba magin kaupod han usa nga grupo han mga tawo nga kilala tungod han ira paghigugmaay ha usa kag usa? (Juan 13:35) Kon amo, malilipay an mga Saksi ni Jehova ha iyo komunidad ha pagpakita ha imo kon paonan-o hiaagian an totoo nga mga sangkay.