Totoo ba an Yawa?

ANO an imo opinyon mahitungod han Yawa? Ginhuhunahuna mo ba hiya sugad nga totoo nga persona nga nagsusulay ha mga tawo nga magbuhat hin maraot, o nagrirepresentar la hiya han prinsipyo han duro nga karaotan? An Yawa ba usa nga angay kahadlokan, o sadang la hiya tagdon sugad nga patootoo nga ideya o usa nga susmatanon? An termino ba nga “yawa” nagtutudlok ha usa nga makabungkag nga pwersa ha uniberso nga waray espisipiko nga pangirilal-an? Posible ba nga an termino usa la nga simbolo ha paghulagway han karaotan nga aada ha mga tawo, sugad han gintotoohan han damu nga moderno nga mga teologo?

Diri urusahon nga magkalainlain an mga opinyon han katawohan ha pakiana kon hin-o an Yawa. Handurawa kon mationan-o kakuri mahibaroan an totoo nga pangirilal-an han usa nga eksperto ha pagtago han iya pangirilal-an! Labaw pa gud nga makuri kon determinado hiya nga tagoon kon hin-o gud hiya. Ginhuhulagway han Biblia nga sugad hito an personalidad han Yawa. Ha pagtawag ha iya nga Satanas, ito nasiring: “Hi Satanas nagpapakaaroanghel han kahayag.” (2 Korinto 11:14) Bisan kon maraot hinduro an Yawa, nagpapakunokuno hiya ha pagin maopay basi limbongan an iba. Ngan kon mapatoo niya an mga tawo nga diri hiya naeksister, mas matutuman an iya katuyoan.

Kon sugad, hin-o gud an Yawa? Kakan-o ngan paonan-o hiya nagtikang umeksister? Paonan-o niya iniimpluwensyahan an mga tawo yana? May-ada ba kita mahihimo basi atohan ito nga impluwensya? An Biblia nagsusulod han husto nga kasaysayan han Yawa tikang ha iya gud tinikangan ngan naghahatag hin totoo nga mga baton ngada hini nga mga pakiana.

[Retrato ha pahina 3]

Makuri gud makilal-an an usa nga determinado nga tagoon kon hin-o gud hiya!