“An Akon Tambulig Natikang kan Jehova”

An Pagsakripisyo-ha-Kalugaringon Nagdadara hin Bendisyon ni Jehova

USA nga lalaki an nagbibisikleta ha kasulod-suloran nga bahin han kagurangan han Cameroon. Ha sulod hin mga oras, nagbibisikleta hiya ha baha nga kakalsadahan ngan naagi ha kalapokan, gin-aatubang an peligro basi parig-unon an iba. Basi makagtutdo ha nabubulag nga grupo, duha nga bugto nga lalaki ha Zimbabwe an nagbabaktas hin kinse kilometro ha binabaha nga mga salog, gintutukdo an ira mga bado ngan mga sapatos basi diri ito maghulos. Ha iba nga dapit, usa nga babaye an nabuhát ha alas-kwatro ha kaagahon basi bisitahon ngan dumarahan hin pag-aram an usa nga nars nga mahimo la maggahin hin usa ka oras ha temprano ha aga.

Ano an ginkakaparihoan hinin tulo nga ehemplo? Hira ngatanan bug-os-panahon nga mga ministro han mga Saksi ni Jehova nga nakikigbahin ha buruhaton han pagtutdo han kamatuoran ha Biblia. Upod ha ira an mga regular ngan espesyal payunir, mga misyonero, nagbibiyahe nga mga paramangno, ngan yinukot nga mga boluntaryo ha Bethel ha bug-os nga kalibotan. Ngan an pagsakripisyo ha kalugaringon amo an kalidad nga nagpapakilala ha ira. a

Husto nga Motibo

Gintutuman han mga Saksi ni Jehova an sagdon ni apostol Pablo kan Timoteo: “Talinguhaon mo gud an pagpakita ha Dios, basi nga pagproybahan ka niya, sugad hin magburuhat nga diri makakaawod han iya buhat, nga nagamit hin maopay han pulong nga kamatuoran.” (2 Timoteo 2:15) Kondi ano an nag-aaghat ha ginatos ka yukot nga mga Saksi nga mag-alagad sugad nga bug-os-panahon nga mga ministro?

Kon ginpapakianhan an bug-os-panahon nga mga ministro kon kay ano nga nangangalimbasog gud hira ha pag-alagad kan Jehova, an ira baton nag-uupod han gugma ha Dios ngan ha mga igkasi-tawo. (Mateo 22:37-39) Husto gud ini, tungod kay kon diri gugma an motibo, kawang la anoman kadaku an ira pangalimbasog.—1 Korinto 13:1-3.

Nagsasakripisyo-ha-Kalugaringon nga Pag-alagad

Kinarawat han ngatanan nga dedikado nga mga Kristiano an panawagan ni Jesus: “Kon may tawo nga buot magsunod ha akon, maglirong ha iya la ngahaw, ngan pas-anon an iya krus, ngan sumunod ha akon.” (Mateo 16:24) An paglirong han aton kalugaringon nangangahulogan hin kinaburut-on nga pagpasakop ha pagin tinatag-iya ngan giniyahan ni Jehova nga Dios ngan ni Jesu-Kristo. Para ha damu, nagtutugway ini ha pag-alagad nga may pagsakripisyo-ha-kalugaringon ha bug-os-panahon nga ministeryo.

Damu nga mga Saksi an naghihimo hin dagku nga mga pangalimbasog ha pagpahaluag han ira pag-alagad kan Jehova. Tagda an 56-anyos nga hi Júlia, usa nga regular payunir ha São Paulo, Brazil. “Usa nga Intsik nga bugto nga lalaki an tumawag ha akon ha telepono ha pagpakiana kon karuyag ko mag-aram hin Inintsik,” nahinumdom hiya. “Tungod han akon edad, waray na ako maghunahuna hin pag-aram pa hin bag-o nga yinaknan. Kondi paglabay hin pipira ka adlaw, ginkarawat ko an ayat. Yana, nakakahimo na ako hin mga presentasyon ha Kasuratan ha Inintsik nga yinaknan.”

An sanga nga opisina han mga Saksi ni Jehova ha Peru nagreport: “Hinin bag-o pa la nga mga  tuig, ginatos nga regular payunir an binalhin ngadto ha waray itoka nga mga teritoryo, nga ipinapakita an maisugon ngan nagsasakripisyo-ha-kalugaringon nga disposisyon. Nabalhin hira ha hirayo nga mga bungto diin waray moderno nga mga garamiton ngan limitado an mga oportunidad ha pagtrabaho. Ini nga kabugtoan andam nga buhaton an bisan ano nga ginkikinahanglan basi makapabilin ha ira mga toka. Kondi, labaw nga importante, an ira buruhaton ha ministeryo nagdadara hin maopay nga mga resulta ha damu nga lugar. Nagreport an nagbibiyahe nga mga paramangno nga naorganisa an bag-o nga mga grupo pinaagi han bulig hinin nagsasakripisyo-ha-kalugaringon nga mga regular payunir.”

Iginbutang ha peligro han iba nga mga Kristiano an ira kinabuhi basi makabulig ha mga igkasi-tumuroo. (Roma 16:3, 4) Usa nga paramangno han sirkito ha usa nga lugar ha Aprika nga nadaot hin girra an nagreport: “Antes kami umabot ha kataposan nga barikada ha butnga han mga teritoryo nga okupado han mga rebelde ngan hadton kontrolado han gobyerno, ginpalibotan kami nga mag-asawa hin upat nga kumander han rebelde nga militar ngan han ira mga gwardya, nga nagpakiana kon hin-o kami. Samtang gin-uusisa an amon mga I.D., nasantop nira nga tikang kami ha lugar nga kontrolado han gobyerno, salit ginpangulba hira. Gin-akusahan ako ha pagin espiya. Salit, nagdesisyon hira nga ihulog ako ha usa nga buho. Iginsaysay ko ha ira kon hin-o kami, ngan ha urhi ira kami ginpalakat.” Nagpasalamat gud an mga kongregasyon nga naglampos inin nagsasakripisyo-ha-kalugaringon nga mag-asawa ha pagbisita ha ira!

Bisan pa han mga kakurian nga ira naieksperyensyahan, an sugad nga bug-os-panahon nga mga ministro nagtitikadamu ha bug-os nga kalibotan. (Isaias 6:8) Ginpapabilhan hinin maduruto nga mga magburuhat an ira pribilehiyo han pag-alagad kan Jehova. Minilyon nga iba pa an nagdadayaw yana kan Jehova nga may-ada pariho nga nagsasakripisyo-ha-kalugaringon nga disposisyon. Sugad nga balos, hura nga ginbibendisyonan niya hira. (Proberbios 10:22) Tungod kay an sugad nga maduruto nga mga magburuhat nasarig han padayon nga bendisyon ngan suporta, ira iginpapakita an disposisyon han salmista nga nagkanta: “An akon tambulig natikang kan Jehova.”—Salmo 121:2.

[Footnote]

[Blurb ha pahina 9]

“An imo katawohan kinaburut-on nga maghahatag han ira kalugaringon ha adlaw han imo pwersa militar.”—SALMO 110:3, NW

[Kahon ha pahina 8]

GINPAPABILHAN NI JEHOVA AN IYA DEBOTADO NGA MGA SURUGOON

“Magrig-on kamo, nga diri sadang mabantad, nga magpadayon kamo gihapon ha buruhaton han Ginoo, kay hinbaroan niyo nga an iyo kabudlay tungod ha Ginoo diri waray kapulsanan.”—1 Korinto 15:58.

“An Dios diri nga diri matadong, nga hikalimtan niya an iyo buhat ngan an iyo gugma nga iyo iginpakita tungod ha iya ngaran.”—Hebreo 6:10.