‘An Gugma han Ngatanan ha Iyo Nagtitikauswag’

NAGKAADA hin pipira nga natural nga mga kalamidad ha Japan han 2004. Nag-uupod ini hin mga bagyo, mga baha, ngan mga linog. Nakadaot ito hinduro ha pagkinabuhi han damu nga mga tawo, upod na an mga Saksi ni Jehova. (Eklesiastes 9:11) Kondi, ini nga mga kakurian, naghatag hin mga higayon ha mga Saksi nga ipakita an ira minagburugto nga gugma ha usa kag usa.—1 Pedro 1:22.

Pananglitan, tungod han duro nga pag-inuran han Hulyo, naglapwas an usa nga salog ha sentro han Japan. An pagbaha nakadaot hin sobra 20 nga kabalayan han mga Saksi ni Jehova. Ha usa nga Kingdom Hall, an tubig humitaas hin haros usa ka metro tikang ha salóg. Binulig dayon an mga Saksi tikang ha hirani nga mga kongregasyon. Ginatos nga mga boluntaryo an naglimpyo ha mga balay nga puno hin lapok. An Kingdom Hall bug-os nga nalimpyohan ngan naayad ha sulod hin duha la ka semana.

Han Oktubre 23, an linog nga may kakusgon nga 6.8 ha Richter’s scale nakadaot hito mismo nga lugar. Mga 40 nga kinabuhi an nawara, ngan sobra 100,000 ka tawo an kinahanglan ibalhin tikang ha ira mga balay. Nawara an suplay han tubig, gas, ngan koryente. Bisan kon an sentro han linog 50 kilometro la an kahirayo, waray maguba an gin-ayad pa la nga Kingdom Hall. Nagin temporaryo dayon ito nga sentro han pagbulig. Ginpanginano dayon han Kristiano nga mga paramangno an kahimtang han ira mga igkasi-tumuroo ngan nalipay nga waray bisan usa nga naul-ulan o namatay. Aga-aga pa kinabuwasan, unom nga Saksi nga kalalakin-an nga nabiktima han pagbaha han Hulyo an madasigon nga nagboluntaryo ha pagdul-ong hin pagkaon ngan tubig ha apektado nga lugar. Pipira ka oras katapos han linog, may-ada na inabot nga bulig.

“Gintatagad hadton mga nabiktima han baha nga an pagbulig para hadton apektado han linog usa ka higayon ha pagpahayag han ira apresasyon ha mga bulig nga ira mismo nakarawat,” siring han usa nga paramangno. “Mauyatom nga nagtrabaho hira tikang ha temprano han aga tubtob ha katutnga han gab-i. Ngan nakikita gud ha ira mga nawong an kalipay!”

Diri nadadaot han mga baha o mga linog an bugkos han gugma nga naghihiusa han Kristiano nga pagminagburugto han mga Saksi ni Jehova. Ha kabaliktaran, kon naabot an sugad nga mga kalamidad, naieksperyensyahan han mga Kristiano an ginsiring ni apostol Pablo ha mga igkasi-tumuroo ha Tesalonika: “An gugma han kada tagsa ngan han ngatanan ha iyo nagtitikauswag para ha usa kag usa.”—2 Tesalonika 1:3, NW.