Nagbubunga an Maopay nga Panggawi

HA USA nga gutiay nga isla nga hirani ha baybayon han sur nga bahin han Japan, an usa nga iroy ngan an iya tulo nga kabataan pa nga mga anak nagtikang ha pag-aram han Biblia ha mga Saksi ni Jehova. Han hibaroan ini han mga tawo dida hito nga nabubulag ngan konserbatibo hinduro nga lugar, diri na nira hiya gin-aasi ha kada panahon nga ira iginkakatapo hiya. “An mas nakapasubo ha akon kay han ira diri pangasi amo an ira diri pakisangkay ha akon bana ngan ha akon mga anak,” siring niya. Bisan pa hito, iya ginsidngan an iya mga anak: “Kinahanglan padayon nga asihon naton an aton mga igkasi-tawo para kan Jehova.”—Mateo 5:47, 48.

Ha balay, iya gintutdoan an iya mga anak nga magin matinalahuron bisan pa han diri maopay nga pagtagad han mga tawo. Ha kada nira pagkadto ha mga hot spring ha ira lugar, ginbabansay han kabataan an ira iyayakan samtang aada pa hira ha awto. Ha kada pagsulod han kabataan ha pasilidad, hira malipayon nga nasiring, “Konnichiwa!—“Maopay nga adlaw!” Mapailubon nga padayon nga gin-aasi han pamilya an ngatanan nga ira iginkakatapo, bisan kon matugnaw la gihapon an pagtagad han mga tawo ha ira. Ha gihapon, naobserbahan han mga tawo an maopay nga pamatasan han kabataan.

Ha urhi, usa-usa nga nagtikang bumaton an mga tawo hin “Konnichiwa.” Ha kataposan han duha ka tuig, nabaton na an haros ngatanan nga mga tawo ha bungto han gin-aasi hira han pamilya. Nagtikang na liwat hira mangasi ha usa kag usa ngan nagin mas makisangkayon. An bise mayor naruyag nga pasidunggan an kabataan tungod han ira bahin hini nga pagbag-o. Kondi ginpasarig hiya han iroy han kabataan nga ginbubuhat la nira an angay buhaton han mga Kristiano. Ha urhi, ha usa nga kompetisyon ha pakigpulong nga gindumara para ha bug-os nga isla, iginsumat han usa han mga anak nga lalaki kon paonan-o ginbansay han iya nanay an pamilya nga matinalahuron nga mangasi ha iba anoman an ira reaksyon. An iya pahayag nakadaog han siyahan nga premyo ngan naipublikar ha peryodiko han bungto. Yana, malipayon hinduro an pamilya nga an pagsunod ha Kristiano nga mga prinsipyo nagresulta hin sugad maopay nga mga bunga. Mas masayon an pakig-istorya mahitungod han maopay nga sumat ha iba kon makisangkayon an mga tawo.